Category: მსოფლიო

გამოცემა Reuters-ი იუწება, რომ რუსეთის პრეზიდენტმა ვლადიმერ პუტინმა, შეერთებული შტატების პრეზიდენტს, ჯო ბაიდენს ქვეყნის დამოუკიდებლობის დღე არ მიულოცა. როგორც კრემლის პრესსპიკერი დიმიტრი პესკოვი აცხადებს, მიმდინარე წელი მოსკოვისთვის შეერთებული შტატების “არამეგობრული” პოლიტიკის კულმინაცია იყო.

• “ეს წელი იყო შეერთებული შტატების არამეგობრული პოლიტიკის კულმინაციაა, ამიტომ ნაკლებად სავარაუდოა, რომ ასეთი გზავნილი შესაბამისი იყოს “, – თქვა პესკოვმა 

4 ივლისს შეერთებული შტატები აღნიშნავს მთავარ ეროვნულ დღესასწაულს – დამოუკიდებლობის დღეს, რომელიც ემთხვევა 1776 წელს დიდი ბრიტანეთისგან დამოუკიდებლობის დეკლარაციის მიღებას.

თუ პუტინი არ გაჩერდება უკრაინაში, რევანშისტული თავდასხმებისთვის ახალ სამიზნეებს იპოვის – ამის შესახებ დიდი ბრიტანეთის პრემიერ-მინისტრმა ბორის ჯონსონმა მადრიდში ნატო-ს სამიტზე განაცხადა.

შვეიცარიაში “უკრაინის აღდგენის კონფერენციაზე” გამოსვლისას ფინანსური დახმარების აუცილებლობაზე საუბრისას, უკრაინის პრემიერმინისტრის, დენის შმიგალის განცხადებით, ქვეყნის აღდგენის გეგმა დაახლოებით 750 მილიარდი დოლარი დაჯდება. მან ასევე დასძინა, რომ რუსეთის გაყინული აქტივები, სხვადასხვა შეფასებით, 300-დან 500 მილიარდ დოლარამდე მერყეობს და  დაფინანსების მთავარი წყარო, ის რუსული აქტივები უნდა იყოს, რომელიც რუსებს ჩამოერთვათ.

“ვინ უნდა გადაიხადოს აღდგენის გეგმა, რომელიც უკვე 750 მილიარდ დოლარად არის შეფასებული? მიგვაჩნია, რომ აღდგენის მთავარი წყარო რუსეთისა და რუსი ოლიგარქების ჩამორთმეული აქტივები უნდა იყოს. რუსეთის ხელისუფლებამ ეს სისხლიანი ომი გააჩაღა. მათ გამოიწვიეს ეს მასიური ნგრევა და მათ პასუხი უნდა აგონ მასზე.

1200-ზე მეტი საგანმანათლებლო დაწესებულება, 200-ზე მეტი საავადმყოფო, ათასობით კილომეტრიანი გაზსადენი, წყლისა და ელექტროენერგიის ქსელი, გზები და რკინიგზა განადგურდა ან დაზიანდა”. – თქვა შმიგალმა.

უკრაინის შეიარაღებული ძალების გენერალური შტაბი აცხადებს, რომ ლისიჩანსკზე კონტროლი დაკარგეს. უკრაინელი სამხედროები აცხადებენ, რომ რუსული ძალები ლუჰანსკის ოლქის შემდეგ დონეცკის რეგიონზე თავდასხმისთვის ემზადებიან.

“ლისიჩანსკისთვის მძიმე ბრძოლების შემდეგ, უკრაინის თავდაცვის ძალები იძულებული გახდნენ თავიანთი პოზიციები და ხაზები დაეტოვებინათ,” – თქვა უკრაინის შეიარაღებული ძალების გენერალურმა შტაბმა.

უკრაინული არმია ხერსონზე კონტრშეტევისთვის ემზადება, რაც გზას ხსნის ყირიმისკენ. ამის შესახებ The Economist წერს.

რუსებმა ხერსონის აღება ომის პირველივე დღეებში შეძლეს. ოკუპანტებისთვის ქალაქი მთელი რეგიონის მნიშვნელოვანი ნაწილია. იქ მდებარეობს დამბა, რომელიც ყირიმის ნახევარკუნძულს წყლით ამარაგებს, ასევე იქ არის თავმოყრილი სხვადასხვა სოფლის მეურნეობის კულტურები – საზამთრო, პომიდორი, მზესუმზირა და სოიო.

გამოცემა წერს, რომ უკრაინულ არმიას ხერსონთან ტაქტიკური წარმატებები აქვს. მასთან საუბარში სამხედრო დაზვერვის ოფიცერი აცხადებს, რომ რუსეთის ფედერაციის მოწინავე ნაწილები უკრაინელი სნაიპერების ხელმისაწვდომობის ზონაში არიან. ეს კი ხერსონის შემოგარენიდან დაახლოებით ერთი კილომეტრია.

“შემდგომი ორი კვირა კიდევ უფრო საინტერესო იქნება“–ამბობს მებრძოლი.

ამასთან, აღინიშნება, რომ რაც არ უნდა ხდებოდეს ხერსონის რაიონში, ეს ჯერ კიდევ არ გავს სრულფასოვან კონტრშეტევას. ჯარისკაცები საბრძოლო მასალების და ძალების უკმარისობაზე საურობენ. უკრაინის არმიას ჯერ არ მიუღწევია სამი ერთთან უპირატესობითვის, რაც წარმატებული კონტრშეტევისთვის აუცილებელია.

ამასთან, რუსეთის არმიამ აქ გამაგრებული მიწისქვეშა გზების ქსელი შექმნა. როგორც უკრაინის “ტერაბარონის“ მებრძოლი ამბობს, როცა ისინი რუსების განდევნას ცდილობენ, პოზიციებზე ათის ნაცვლად ასი ჯარისკაცი მოდის. ერთ სოფელს შეიძლება ჰაერსაწინააღმდეგო თავდაცვის 4 დანაყოფი იცავდეს. გარდა ამისა, ადგილობრივებს საკუთარი სახლები არ დაუტოვებიათ, რაც ასევე ართულებს უკრაინული ჯარის მუშაობას.

როგორც ყოფილი ჩინოვნიკი ამბობს, რომელმაც ხერსონი მას შემდეგ დატოვა, რაც ოკუპანტებმა კოლაბორაციონისტული ორგანოს მეთაურობა შესთავაზეს, რუსეთი ცდილობდა ადგილობრივი მოსახლეობა გადაებირებინა, თუმცა სიტუაცია სწრაფად შეიცვლება, თუ რუსების ხერსონიდან გაყრა დაიწყება.

“რუსები ძალიან გაბოროტებულები იქნებიან და არავის დაინდობენ, თუმცა პარტიზანული წინააღმდეგობაც ასეთივე სასტიკი იქნება. ადგილობრივები რუსებს უბრალოდ ნაწილებად დაგლეჯენ“–თვლის ყოფილი ჩინოვნიკი, რომლის ვინაობა არ სახელდება.

ფინეთის  სამხრეთ კარელიის პროვინციის ქალაქ ლაპეენრანტის მერი, კიმო იარვა გამოდის წინადადებით ჩრდილო ატლანტიკური ალიანსის ბაზა რუსეთის საზღვართან ახლოს, აერეოპორტის ტერიტორიაზე აშენდეს. ამის შესახებ ადგილობრივი მედია წერს და აზუსტებს, რომ იდეა მას შემდეგ გაჩნდა, რაც ქვეყნის ნატოში გაწევრიანების პროცესი დაჩქარდა. ამ ინიციატივის მეორე მიზეზი სწორედ აგრესორი ქვეყნის საზღვართან ამ ტერიტორიის სიახლოვეა. აეროპორტი ლენინგრადის ოლქიდან 20 კილომეტით არის დაშორებული.

ქალაქში ხაზს უსვამენ, რომ ფინეთის თავდაცვის ძალებთან ბაზის აქ აშენების შესაძლებლობა ჯერ არ განუხილავთ. ამავე დროს, იმედი აქვთ, რომ ლაპეენრანტის ტერიტორიაზე ნატოს კონტიგენტის განლაგება სამხრეთ კარელიაში ინვესტიციებს მიიზიდავს. მერის თქმით, ფინეთის ნატოში გაწევრიანების დაჩქარებამ მთელ პროვიპნციას იმედი გაუჩინა

“ეს უსაფრთხოების განცდას აჩენს და შეიძლება ამ რეგიონში ინვესტიციები მოიზიდოს“– ამბობს ის.

იარვა აღნიშნავს, რომ აეროპორტი ხელმისაწვდომია ბაზის შესაქმნელად, თუმცა მერი არ არის მზად ისაუბროს სახმელეთო ძალების სკოლის და ქვეყნის თავდაცვის ძალების აქ განლაგების თემაზე, რადგან ამბობს, რომ “სპეციალისტი არ არის.“

შეგახსენებთ, რომ ფინეთი და შვედეთი ოფიციალურად მიიწვიეს ნატოში გასაწევრიანებლად. ორი ქვეყანა ალიანსის წევრი ოფიციალურად მას შემდეგ გახდება, რაც მათ შეერთებას ოფიციალურად დაუჭერს მხარს 30 წევრი ქვეყანა. ორმა ქვეყანამ ნატოში გაწევრიანება რუსეთის უკრაინაში შეჭრის შემდეგ გადაწყვიტა.

3 ივლისს ბელორუსი დამოუკიდებლობის დღეს აღნიშნავს. საზეიმო ღონისძიებების ფარგლებში „დიდების ბორცვის„ კომპლექსთან სიტყვით გამოსვლისას ბელორუსის პრეზიდენტმა განაცხადა, რომ არ დაუშვებს “რუსეთისთვის ზურგში დარტყმას“.

ლუკაშენკომ თქვა, რომ ბელორუსს და რუსეთს ფაქტიურად საერთო არმია ყავთ.

“დღეს გვადანაშაულებენ იმაში, რომ ერთადერთი ქვეყანა ვართ მსოფლიოში, რომელიც რუსეთს უჭერს მხარს ნაციზმთან ბრძოლაში. მეორე მხარეს თითქმის 50 ქვეყანაა. ჩვენ მხარი დავუჭირეთ და ისე დავუჭერთ მხარს რუსეთს – ეს მოძმე სახელმწფიოა. და დღეს სიმართლე მოძმე რუსეთის მხარეს არის“–თქვა ლუკაშენკომ გამოსვლისას.

ბელორუსის პრეზიდენტი თვლის, რომ ბელორუსებისთვის ტრაგედიაა “ორი მოძმე ხალხის – რუსების და ბელორუსების შეტაკება“. სიტყვით გამოსვლისას ლუკაშენკომ აღნიშნა, რომ უკრაინაში ახლა დასავლეთის ქვეყნები ომობენ და ბელორუსი რუსეთს კვლავ დაუჭერს მხარს.

“ჩვენ უმჭიდროვესი კავშირი გვაქვს რუსეთთან. უკვე დიდი ხანია შექმნილი გვაქვს შეიარაღებული ძალების ერთიანი დაჯგუფება, ფაქტიურად საერთო არმია. ჩვენი მონაწილეობა სპეცოპერაციაში ჩემს მიერ დიდი ხანია გადაწყვეტილია. ამ ოპერაციის დაწყების პირველივე დღეს.“–თქვა ლუკაშენკომ.

მისი განცხადებით, ბელორუსმა უკვე დაიკავა თავდაცვის პოზიცია, რათა არ დაუშვას “ნატოს ჯარების მხრიდან რუსებისთვის ზურგში დარტყმა“.

“ჩვენ გავამაგრეთ ბრესტის ციხე–სიმაგრე სამხრეთ საზღვართან. ნატოს ბლოკმა მიიღო გადაწყვეტილება აღმოსავლეთ ევროპაში შეიარაღებული ძალები 10–ჯერ გაზარდოს. რა საჭიროა ამის გაკეთება მშვიდობიან დროს? იმისათვის, რომ იომო. და ჩვენ ყველაფერს გავაკეთებთ იმისთვის, რომ გავძლოთ და გავიმარჯვოთ.“– თქვა ლუკაშენკომ.

წუხელ რუსების მიერ ოკუპირებულ მელიტოპოლში  ადგილობრივი აეროპორტის ტერიტორია დაიბომბა, სადაც რუსი სამხედროების ბაზა იყო განთავსებული. სოციალურ ქსელებში არაერთი ფოტო და ვიდეო ვრცელდება.  კვამლის უზარმაზარი სვეტები არა მხოლოდ მელიტოპოლიდან, არამედ მეზობელი სოფლებიდანაც ჩანდა. აფეთქებების ხმა დიდხანს ისმოდა.

ადგილობრივი მოსახლეობის ინფორმაციით, აფეთქებებმა ოკუპანტებში პანიკა გამოიწვია და ისინი ქუჩებში აქტიურად გადაადგილდებოდნენ. პანიკა იყო მოსახლეობაშიც, რადგან ქალაქის ოკუპაციის შემდეგ რუსებმა აქ ყველა თავშესაფარი გააუქმეს და დაბომბვისას ადამიანებს თავის შეფარება აღარსად შეუძლიათ.

ოკუპირებული მელიტოპოლის მერმა, ივან ფიოდოროვმა განაცხადა, რომ წუხელ უკრაინულმა ძალებმა 30–ზე მეტი შეტევა განახორციელეს და მწყობრიდან გამოიყვანეს ქალაქში განლაგებული ერთ–ერთი რუსული სამხედრო ბაზა. გარდა ამისა, მისი თქმით წინააღმდეგობის ძალებმა რელსებიდან გადაიყვანეს რუსული ჯავშანმატარებელი, რომელიც საბრძოლო მასალებით იყო დატვირთული.

“ახლა ოკუპანტები ცდილობენ პროვოკაცია მოაწყონ და ამტკიცებენ, თითქოს დაიბომბა მშვიდობიანი რაიონები, დაზარალდა მშვიდობიანი მოსახლეობა, დაინგრა საქალაქო ინფრასტრუქტურა. ეს ტყუილია! უკრაინის შეიარაღებული ძალები ყველაფერს აკეთებენ, რომ მელიტოპოლში მშვიდობიანი ცხოვრება და უკრაინული სახელმწიფოებრიობა დაბრუნდეს“–თქვა ივანოვმა.

დღეს დილით აფეთქებების ხმა ისმოდა რუსეთში, ბელგოროდის ოლქში, რომელიც უკრაინის საზღვრის სიახლოვეს მდებარეობს. ამუშავდა ჰაერსაწინააღმდეგო თავდაცვის სისტემა. გუბერნატორ ვიაჩესლავ გლადკოვის ინფორმაციით დაიღუპა 3 ადამიანი, ოთხი დაშავდა.

ბელგოროდის გუბერნატორი არ აზუსტებს, რა მოხდა რეალურად, თუმცა წერს, რომ დაინგრა 11 მრავალბინიანი სახლი და 30–ზე მეტი კერძო სახლი, 5 კერძო სახლი მთლიანად დანგრეულია.

ჯერჯერობით უცნობია რა მოხდა რეალურად. მედია და სოციალური ქსელების მომხმარებლები საუბრობენ “მაღალი ხმაურების  სერიაზე“ .