Category: არქივი

ლგბტ აქტივისტებმა დინამო არენაზე ლგბტ სიმბოლიკის შეტანის ხელშეშლისთვის ადამიანის უფლებთა ევროპულ სასამართლოს მიმართეს. ამის შესახებ განცხადებას ორგანიზაცია “თანასწორობის მოძრაობა” ავრცელებს.

საქმე  2018 წლის 9 სექტემბერს თბილისში დინამო სტადიონზე გამართულ საფეხბურთო მატჩს ეხება, სადაც ლგბტ აქტივისტები სპეციალურად გურამ კაშიასთვის მადლიერების გამოსახატად ლგბტ სიმბოლიკით მივიდნენ, შსს-ს თანამშრომლებმა გულშემატკივრებს მატჩზე არ შეატანინეს დროშები და პოსტერები, რომლებზეც ლგბტ სიმბოლიკა  იყო გამოსახული. ეს შეზღუდვა სამინისტრომ დაასაბუთა სტადიონზე მყოფი ადამიანების უსაფრთხოების უზრუნველყოფის, სიცოცხლისა და ჯანმრთელობის დაცვის მიზნებით და დაეყრდნო პოლიციის შესახებ საქართველოს კანონს, რომელიც პოლიციას აძლევს უფლებას დროებით შეუზღუდოს ადამიანს გადაადგილების თავისუფლება და ასევე დროებით ჩამოართვას რომელიმე ნივთის ფლობის უფლება, თუ ეს ნივთი წარმოადგენს მისი ან სხვა ადამიანის სიცოცხლისთვის საფრთხეს.

სარჩელი ევროსასამართლოში 2019 წლის 9 მარტს გაიგზავნა. საქმეს “თანასწორობის მოძრაობა” აწარმოებს. 9 ლგბტ აქტივისტს, ვინც სასამართლოს მიმართა, მიაჩნია, რომ პოლიციის თანამშრომლებმა გადააცილეს საკუთარ უფლებამოსილებას, რადგან დროშები და პოსტერები, თავისთავად, ვერ იქნებოდა გამოყენებული სხვა ადამიანების სიცოცხლისა და ჯანმრთელობის დაზიანების იარაღად.

იმ შემთხვევაში, თუ ჰომოფობიურად განწყობილი ადამიანების მხრიდან ადგილი ექნებოდა კანონსაწინააღმდეგო ქმედებებს, პოლიციას ზომები უნდა მიეღო ამ ქმედებების აღსაკვეთად.

პოლიცია წინასწარ გაფრთხილებული იყო, რაზეც მეტყველებს ის, რომ მე-9 სექტორში, სადაც გურამ კაშიას გულშემატკივრებიც იყვნენ კონცენტრირებული, საკმაოდ დიდი ოდენობით პოლიცია იყო მობილიზებული.

მომჩივანი მხარე   ხელისუფლებას ადამიანის უფლებათა და ძირითად თავისუფლებათა ევროპული კონვენციის მე-11 და მე-11 მუხლთან მიმართებით მე-14 მუხლის დარღვევას ედავება .

მე-11 მუხლით გარანტირებულია გამოხატვის თავისუფლება, ხოლო მე-14 მუხლით დისკრიმინაციისგან თავისუფლება.

მომჩივნებს აზრით, სახელმწიფომ უსაფუძვლოდ შეზღუდა ისინი და სექსუალური ორიენტაციისა და გენდერული იდენტობის ნიშნით, ანუ დისკრიმინაციულად.

ადგილობრივ დონეზე პროკურატურამ უარი თქვა, შსს-ს თანამშრომლების მიმართ გამოძიების დაწყებაზე, რადგან ვერ დაინახა დანაშაულის, ანუ სამსახურეობრივი უფლებამოსილების გადამეტების ნიშნები. შსს-ს გენერალურმა ინსპექციამაც ვერ დაინახა პოლიციელების ქმედებებში დისციპლინური გადაცდომები და განმარტა, რომ ისინი მოქმედებდნენ შსს-ს მაღალჩინოსნის ბრძანების და კანონის საფუძველზე.

მომჩივნებმა საჩივრით პროკურატურის, გენინსპექციის, შსს-ს მინისტრის და შსს-ს ადამიანის უფლებათა დაცვის დეპარტამენტის გარდა, მიმართეს საქართველოს სახალხო დამცველსაც, თუმცა უშედეგოდ.

მატჩი, რომელიც საქართველოსა და ლატვიის ნაკრებებს შორის გაიმართა, შედგა მას შემდეგ რაც გურამ კაშიას უეფამ “თანასწორობის ჯილდო” გადასცა. ჯილდოს გადაცემამდე ერთი წლით ადრე, გურამ კაშია ჩაერთო ჰოლანდიის ერედივიზიონის კამპანიაში, რომელიც მიმართული იყო ჰომოფობიის წინააღმდეგ. კამპანიაში ჩართვის ნიშნად, კაშიამ ლგბტ სამკლაური გაიკეთა, რასაც საქართველოში ჰომოფობიურად განწყობილი ადამიანების პროტესტის მოჰყვა. ამ პროტესტის საპირწონედ კი ლგბტ და სამოქალაქო აქტივისტები გურამ კაშიას მხარდასაჭერად და მადლობის ნიშნად მივიდნენ დინამო არენაზე.

ბაღდათის მუნიციპალიტეტში, კურორტ საირმეში უბედური შემთხვევა მოხდა. 32 წლის ქალი სასტუმროს შენობის მესამე სართულის ფანჯრიდან გადმოვარდა და ადგილზევე გარდაიცვალა.

გარდაცვლილი ქალი ამ სასტუმროში მუშაობდა. მომხდარის მიზეზები უცნობია.

შინაგან საქმეთა სამინისტროს ინფორმაციით, გამოძიება 115-ე მუხლით მიმდინარეობს, რაც თვითმკვლელობამდე მიყვანას გულისხმობს.

სპეციალური პენიტენციური სამსახური  ვანო მერაბიშვილთან დაკავშირებით განცხადებას ავრცელებს.

როგორც განცხადებიდან ირკვევა  მერაბიშვილის პირობით ვადამდე გათავისუფლების თაობაზე, აღმოსავლეთ საქართველოს პირველმა ადგილობრივმა საბჭომ მიმდინარე წლის 24 იანვარს იმსჯელა და გათავისუფლების მოთხოვნა არ დააკმაყოფილა. განცხადებაში აღნიშნულია,რომ  მსგავსი მოთხოვნები არ დაკმაყოფილდა 2017 და 2018 წლებშიც.

“ამჯერადაც, ადგილობრივი საბჭოს მიერ პირობით ვადამდე გათავისუფლების შესახებ საკითხის განხილვისას განსაკუთრებით უარყოფითი გავლენა იქონია, სხვებს შორის, ჩადენილი დანაშაულების სიმძიმემ და დანაშაულების ხასიათმა, ასევე იმან, თუ რა გარემოებებში იქნა სხვადასხვა დანაშაული ჩადენილი. 2019 წლის 24 იანვრის აღმოსავლეთ საქართველოს პირველი ადგილობრივი საბჭოს გადაწყვეტილება მსჯავრდებულმა გაასაჩივრა თბილისის საქალაქო სასამართლოში.

2019 წლის 25 თებერვლის თბილისის საქალაქო სასამართლოს გადაწყვეტილებით ნაწილობრივ დაკმაყოფილდა მსჯავრდებულის და მისი ინტერესების დამცველი ადვოკატების საჩივარი და, გათავისუფლების მიზანშეწონილობის საკითხის გადაუწყვეტლად, საქმე თავიდან განსახილველად დაუბრუნდა იმავე ადგილობრივ საბჭოს, რომელსაც დაევალა საქმისათვის არსებითი მნიშვნელობის მქონე გამოკვლევისა და შეფასების შემდეგ, კანონით დადგენილ ვადაში, ახალი ინდივიდუალური ადმინისტრაციულ-სამართლებრივი აქტის გამოცემა. სპეციალურმა პენიტენციურმა სამსახურმა თბილისის საქალაქო სასამართლოდან მიმდინარე წლის 5 მარტს მიიღო ზემოხსენებული გადაწყვეტილება, რომელიც ჯერ არ იყო კანონიერ ძალაში შესული.

აღმოსავლეთ საქართველოს ადგილობრივმა საბჭომ 2019 წლის 20 მარტს მიმართა თბილისის საქალაქო სასამართლოს ადმინისტრაციულ საქმეთა კოლეგიას კანონიერ ძალაში შესული გადაწყვეტილების მოთხოვნით. დღეის მდგომარეობით, კანონიერ ძალაში შესული გადაწყვეტილება საბჭოს არ მიუღია. კანონიერ ძალაში შესული სასამართლო გადაწყვეტილების შესაბამისად, პირობით ვადამდე გათავისუფლების საკითხი თავიდან განსახილველად გადაეცემა ადგილობრივ საბჭოს, რომელიც საქმეს განიხილავს კანონით დადგენილ ვადებში და წესით”, – ნათქვამია განცხადებაში.

შეგახსენებთ,რომ  მერაბიშვილის ადვოკატმა გიორგი ჩივიაშვილმა დღეს გაავრცელა ინფორმაცია, რომლის მიხედვით, სასამართლომ ე.წ. უდოს კომისიას დაავალა, ვანო მერაბიშვილის საკითხზე ხელახლა იმსჯელოს.

ნატო-ს გენერალურმა მდივანმა იენს სტოლტენბერგმა საქართველოში ოფიციალური ვიზიტი დაასრულა. დელეგაცია საქართველოს საგარეო საქმეთა მინისტრმა დავით ზალკალიანმა გააცილა.

ნატო-ს გენერალურმა მდივანმა ვიზიტის ფარგლებში შეხვედრები გამართა საქართველოს პრემიერ-მინისტრ მამუკა ბახტაძესთან, პრეზიდენტ სალომე ზურაბიშვილთან, პარლამენტის თავმჯდომარე ირაკლი კობახიძესთან და პარლამენტის წევრებთან.

სტოლტენბერგი  ასევე  ნატო-ს წვრთნებისა და შეფასების ერთობლივ ცენტრს ეწვია და  ნატო-საქართველოს სწავლებას დაესწრო.

სტოლტენბერგის  საქართველოს გუშინ 24 მარტს ოფიციალური ვიზიტის ფარგლებში ესტუმრა.

„ქართული ოცნების“ მიერ შუალედური არჩევნებისთვის მერობის და მთაწმინდის მაჟორიტარი დეპუტატობის კანდიდატების დასახელებას ოპოზიციაში ეხმაურებიან. ოპოზიციის შეფასებით, „ქართულ ოცნების” ნებისმიერი კანდიდატი მარცხისთვისაა განწირული.

„ნებისმიერი კონკრეტული სახელის და გვარის უკან დგას რეალობა, რომელიც შექმნა „ქართულმა ოცნებამ“, გაუარესებული, გართულებული ცხოვრება და გაჭირვებაში მყოფი ადამიანები. ამიტომ, დარწმუნებული ვარ, რომ რა სახელი და გვარიც არ უნდა არჩიოს „ქართულმა ოცნებამ“ საკუთარ კანდიდატებად, დარწმუნებული ვარ ოპოზიციური კანდიდატების წარმატებაში, იმიტომ, რომ საზოგადოებას სჭირდება ცვლილებები, სჭირდება უკეთესობა და ცვლილებების და უკეთესობის ერთადერთი გზა არის დღევანდელი ხელისუფლების მშვიდობიანი გზით დამარცხება და ჩამოშორება, რომელი სახელი და გვარიც არ უნდა წარმოადგენდეს ამ ხელისუფლებას კონკრეტულ არჩევნებზე,“ – განცხადა “ევროპული საქართველოს” ლიდერმა დავით ბაქრაძემ.

განსაკუთრებული გამოხმაურება მოჰყვა ქართული ოცნების მაჟორიტარობის კანდიდატად ლადო კახიძის დასახელებას, მას უარყოფითად აფასებენ, როგორც “ევროპულ საქართველოში”, ასევე ლეიბორისტულ პარტიაში.

ევროპული საქართველოს ლიდერმა გიგი უგულავამ ლადო კახაძის კანდიდატურა,როგორც “მკვდარზე ვენოკი” შეაფასა და მისი წარუმატებელი პოლიტიკური საქმიანობა გაიხსენა.

„ორსულად რომ მყავდეს მეუღლე და ექოსკოპისტი მჭირდებოდეს, ლადო კახაძესთან, ალბათ, მივიყვანდი. დიდი სუფრა რომ იყოს და თამადა გვჭირდებოდეს, ამასაც შეიძლება დავთანხმებოდი. როდესაც ვსაუბრობთ პარლამენტზე, ლადო კახაძის დაყენება არის მთაწმინდელების, მთელი საზოგადოების შეურაცხყოფა და დაცინვა. „ქართული ოცნებისგან“ ეს ჩვეულებრივია იმიტომ, რომ ისინი საერთოდ ვერ ხვდებიან რა კატასტროფის წინაშე არიან, ლადო კახაძის არჩევანი სწორედ ამის მანიშნებელია. როდესაც პარტიას აკლია კვალიფიციური იურისტები, ეკონომისტები, როცა მმართველი პარტიის და შესაბამისად, მთავრობის მთავარი პრობლემა კვალიფიკაციის ნაკლებობა და უნიათობაა, ლადო კახაძე ნამდვილად მკვდარზე „ვენოკია“ „ქართული ოცნებისთვის“. მე მას პერსონალურ შეურაცხყოფას არ ვაყენებ, მაგრამ როგორც პოლიტიკოსმა ლადო კახაძემ რით დაგვამახსოვრა თავი? 90-იანების ბოლოში ის იყო „ლეიბორისტი“, შემდეგ გადმოხტა „მოქალაქეთა კავშირისკენ“ და გახდა საკრებულოს თავმჯდომარე, შემდეგ იყო დიდი პაუზა, 2016 წელს ბურჭულაძის პარტიიდან იყრიდა კენჭს და მიიღო 2%“ – განაცხადა უგულავამ.

„ ლადო კახაძე არის მდარე პოლიტიკოსი. „ქართული ოცნების“ მხრიდან იმის გამო, რომ იმ პარტიაში იყო კახაძე, რომელსაც გამყიდველებს ეძახდა, ეს მორალური კომპრომისია და სამწუხაროა, რომ ასეთ მორალურ კომპრომისს სთავაზობს საზოგადოებას „ქართული ოცნება“,- განაცხადა უგულავამ.

შალვა ნათელაშვილმა კახიძის პოლიტიკური წარსული გაიხსენა და მოღალატეობრივად შეაფასა.
„98 წელს ეს ბატონი მოიყვანეს ჩვენთან, როგორც წარჩინებული გინეკოლოგი, ექიმი, ქალბატონების იმედი და მეც აღფრთოვანებულმა იმით, რომ გამოადგებოდა დედაქალაქს, მედიცინას, საზოგადოებას, ჩავწერე სიაში და დავნიშნე, პირდაპირი გაგებით, თბილისის საკრებულოს თავმჯდომარედ, საიდანაც რამდენიმე თვეში ტყაპანი მოადინა შევარდნაძის ბანაკში და უღალატა პარტიას, უღალატა იმ ხალხს, ვინც ის აირჩია დედაქალაქის დეპუტატად და საკრებულოს თავმჯდომარედ. ივანიშვილს ალბათ, მოღალატე „ლეიბორისტების“ გარდა აღარავინ აღარ დარჩა, ყველა გამოექცა და კიდევ გამოექცევა და ღმერთმა მშვიდობაში მოახმაროს ისინი,“ – განაცხადა შალვა ნათელაშვილმა.

„ქართულმა ოცნებამ“ მთაწმინდის შუალედურ არჩევნებში მაჟორიტარ კანდიდატად ექიმი ლადო კახაძე წარადგინა.

სახელისუფლებო პარტიამ დღესვე რეგიონებში დანიშნულ შუალედურ არჩევნებზე მერობის კანდიდატები დაასახელა.

კანდიდატები იქნებიან: ზუგდიდში – გიორგი შენგელია, მარნეულში – ზაურ დარგალი, ზესტაფონში – გიორგი გოგლიჩიძე, ჭიათურაში – გივი მოდებაძე, ხულოში – ვახტანგ ბერიძე.

ცენტრალური საარჩევნო კომისიის გადაწყვეტილებით, შუალედური არჩევნები 2019 წლის 19 მაისს ჩატარდება.

მერაბიშვილის ადვოკატი გიორგი ჩივიაშვილი ვადაზე ადრე გათავისუფლების კომისიას მიმართავს, დაუყოვნებლივ იმსჯელოს ვანო მერაბიშვილის პატიმრობიდან გათავისუფლების თაობაზე.

ჩივიაშვილის განცხადებით, ვადაზე ადრე გათავისუფლების კომისიამ მერაბიშვილის გათავისუფლების საკითხზე იმსჯელა და დაადგინა, რომ მერაბიშვილი კვლავ პატიმრობაში უნდა დარჩეს. ადვოკატის ინფორმაციით, სასამართლომ  კომისიის ადმინისტრაციული აქტი გააუქმა და მიუთითა, რომ არგუმენტები, რომელითაც მერაბიშვილი კვლავ პატიმრობაში რჩება, უსაფუძვლოა.

სასამართლოს ეს გადაწყვეტილება ადვოკატმა დღეს ჟურნალისტებსაც გააცნო.

„სასამართლომ მიუთითა, რომ ის საფუძვლები, რომელიც მოყვანილი ჰქონდა ვადაზე ადრე გათავისუფლების კომისიას, არის უსაფუძვლო. ასევე, მიუთითა მათ, რომ ახლიდან იმსჯელონ და სხვა გადაწყვეტილება გამოიტანონ. ეს გადაწყვეტილება უკვე კანონიერ ძალაშია შესული, იუსტიციის სამინისტროს ის არ გაუსაჩივრებია სააპელაციო სასამართლოში. შესაბამისად, ვადაზე ადრე გათავისუფლების კომისია ახლა, ვალდებულია, რომ იმსჯელოს კანონით დადგენილ ვადებში. როგორც წესი, ეს ვადები არის თვის 25 რიცხვიდან, შემდგომი თვის 5 რიცხვამდე და მოახდინოს ახალი სამართლებრივი აქტის გამოცემა. იმის გათვალისწინებით, რომ ვადაზე ადრე გათავისუფლების კომისიას, (რაც ჩვენ გვქონდა გასაჩივრებული თავის სამართლებრივ აქტში ჩაწერილი საფუძვლები სასამართლოს მიერ უსაფუძვლოდ იქნა მიჩნეული), რჩება ერთადერთი გამოსავალი, რომ მათ დაუყოვნებლივ იმსჯელონ და გაათვისუფლონ ვანო მერაბიშვილი პატიმრობიდან”, განაცხადა ჩივიაშვილმა.

ინტერნეტით გამოწერილი ნივთის განბაჟება, თუ მისი ღირებულება  500 ლარს არ აღემატება, შესაძლოა აღარ მოგიწიოთ. დღეს მოქმედი კანონის თანახმად, თუ გამოწერილი საქონლის ღირებულება 300 ლარს აღემატება, ის განბაჟებას ექვემდებარება.
„ევროპული საქართველოს“ ინიციატივას საფოსტო გზავნილებზე განბაჟების არსებული ლიმიტის 300-დან 500 ლარამდე გაზრდის შესახებ, დარგობრივმა კომიტეტმა მხარი დაუჭირა.

პარტიაში აცხადებენ, რომ თავის დროზე ზღვარი 200 დოლარამდე ღირებულების პროდუქციის შემოტანაზე დაწესდა, დღეს კი 200 დოლარის ექვივალენტი უკვე 500 ლარს აჭარბებს.
ოპოზიციური პარტიის ინიციატივას მხარი დაუჭირეს საპარლამენტო უმრავლესობის წევრებმაც.

ზღვარის გაზრდას არ იზიარებენ მთავრობაში. აღმასრულებელ ხელისუფლებაში ფიქრობენ, რომ ზღვარი არ უნდა გაიზარდოს, რადგან რთულია იმის ადმინისტრირება, ხდება თუ არა ნივთის გამოწერა პირადი მიზნებისთვის.

„ევროპული საქართველოს“ წევრები ინიციატივას ლარის კურსის გაუფასურებით ხსნიან და აცხადებენ, რომ მეორე მოსმენაზე დეპუტატებს მინიმალური მარჟის 700 ლარამდე გაზრდას შესთავაზებენ.

თბილისში კიდევ 16 „ჭკვიანი“ ვიდეოკამერა დამონტაჟდა, რომელიც სექციებს შორის ავტომობილის სიჩქარეს აკონტროლებს-ამის შესახებ ინფორმაციას საქართველოს შინაგან საქმეთა სამინისტრო ავრცელებს.

შინაგან საქმეთა სამინისტრო, საგზაო მოძრაობის უსაფრთხოების დაცვის მიზნით, კვლავ განაგრძობს სიჩქარის მზომი „ჭკვიანი“ კამერების მონტაჟს. 2018 წლის დასაწყისში, ქვეყნის მასშტაბით, მხოლოდ 170 ვიდეოკამერა ფუნქციონირებდა.

ამ დროისთვის, მთელი საქართველოს მასშტაბით მოქმედებს 2204 ვიდეოკამერა, მათ შორის 829 ნომრის ამომცნობი, 1375 კი ზოგადი ხედვის კამერა. საშუალო სიჩქარის კონტროლის სექციებით გადაფარულია საავტომობილო გზების 432 კილომეტრი.
თბილისში სიჩქარის კონტროლის სექციები განთავსებულია შემდეგ ადგილებზე:

1. მარშალ გელოვანის მოედნიდან მდინარე მტკვრის მარჯვენა სანაპირომდე, გიორგი სააკაძის 1-ელ შესახვევამდე (ნებადართული სიჩქარე 70 კმ/სთ).
2. ნ. ბარათაშვილის სანაპიროსა და სამტრედიის ქუჩის კვეთიდან ნ. ბარათაშვილის სანაპიროსა და ხოშარაულის ქუჩის კვეთამდე (ნებადართული სიჩქარე 70 კმ/სთ).
3. ნ. ბარათაშვილის სანაპიროსა და ხოშარაულის ქუჩის კვეთიდან ნ. ბარათაშვილის სანაპიროსა და სამტრედიის ქუჩის კვეთამდე (ნებადართული სიჩქარე 70 კმ/სთ).
4. ნ. ბარათაშვილის სანაპიროსა და ხოშარაულის ქუჩის კვეთიდან ნ. ბარათაშვილის სანაპიროსა და ცაბაძის ქუჩის კვეთამდე (ნებადართული სიჩქარე 70 კმ/სთ).
5. ნ. ბარათაშვილის სანაპიროსა და ცაბაძის ქუჩის კვეთიდან ნ. ბარათაშვილის სანაპიროსა და ხოშარაულის ქუჩის კვეთამდე (ნებადართული სიჩქარე 70 კმ/სთ).
6. მოსკოვის გამზირისა და ჯავახეთის ქუჩის კვეთიდან მოსკოვის გამზირისა და ქინძმარაულის მე-2 შესახვევის კვეთამდე (ნებადართული სიჩქარე 40 კმ/სთ).
7. მოსკოვის გამზირის N25-დან მოსკოვის გამზირისა და ქინძმარაულის მე-2 შესახვევის კვეთამდე (ნებადართული სიჩქარე 40 კმ/სთ).
8. მოსკოვის გამზირისა და ქინძმარაულის მე-2 შესახვევიდან მოსკოვის გამზირისა და ჯავახეთის ქუჩის კვეთამდე (ნებადართული სიჩქარე 40 კმ/სთ).