newsreport.ge

Category: არქივი

  • “2012 წლის არჩევნებში რუსეთი აქტიურად ერეოდა”-მიხეილ სააკაშვილი

    “2012 წელს საქართველოში არჩევნები ჩატარდა, სადაც რუსეთი აქტიურად ერეოდა” – ამის შესახებ განცხადება, საქართველოს მესამე პრეზიდენტმა მიხეილ სააკაშვილმა fox news-თან ეთერში განაცხადა.

    მიხეილ სააკაშვილმა ინტერვიუში, 2012 წლის საპარლამენტო არჩევნებში რუსული ფულის გავლენაზე ისაუბრა. მან ყურადღება აშშ-ს ყოფილი სახელმწიფო მდივნის, ჰილარი კლინტონის ელექტრონულ მიმოწერაზე გაამახვილა, რომელიც ცოტა ხნის წინ გასაჯაროვდა.

    მისი თქმით, კლინტონის გარემოცვის ელექტრონული მიმოწერიდან ირკვევა, რომ პირები, რომლებიც ბიძინა ივანიშვილისგან ფულს იღებდნენ, აძლევდნენ რეკომენდაციებს სახელმწიფო მდივანს და მის გარემოცვას პოლიტიკურ საკითხებში.

    “2012 წელს საქართველოში არჩევნები ჩატარდა, სადაც რუსეთი აქტიურად ერეოდა. პრორუსი ოლიგარქი, გაზპრომის აქციათა უდიდესი მეწილე, ბატონი ივანიშვილი ატარებდა კამპანიას ჩემს წინააღმდეგ. ამ დროს სახელმწიფო მდივნის ჰილარი კლინტონის გარემოცვასთან კონტაქტი ჰქონდა 3 პიროვნებას. ეს ადამიანები იღებდნენ რუსულ ფულს ივანიშვილისგან და შემდეგ როგორც უკვე ცნობილია, მეილკების საქმიდან, აძლევდნენ რეკომენდაციას სახელმწიფო მდივანს თუ რა ეთქვა პრესკონფერენციაზე როდესაც ის სტუმრობდა ამერიკის მოკავშირე ქვეყანას, ეკონტაქტებოდნენ მის გარემოცვას შეხვედრების დაგეგმვის მიზნით. ეს ადამიანები ეუბნებოდნენ ჰილარი კლინტონის ადმინისტრაციას, რომ თუ სააკაშვილის პარტია მოიგებდა, ეს გაართულებდა ამერიკის ურთიერთობებს მოსკოვთან. მათი ნაწილი ღიად მუშაობდა რუსულ ფულზე, რუსეთის მონაწილეობით და აკეთებდა ამას არაოფიციალური არხებით, რაც კანონით აკრძალულია. ჩვენ მაშინ ხმამაღლა ვაცხადებდით, რომ რუსეთი ერეოდა ჩვენს არჩევნებში, ახორციელებდა დეზინფორმაციის კამპანიებს, პროვოკაციებს, სამხედრო ზეწოლას. ვითხოვდით გადაერჩინათ ჩვენი დემოკრატია. იგივე პირებმა, რომლებმაც ასეთი ხმაური ატეხეს დონალდ ტრამპის არ არსებულ შეთქმულებაზე, მაშინ თვალი დახუჭეს რუსეთის მასშტაბურ ჩარევაზე ჩვენს არჩევნებში“ – განაცხადა მიხეილ სააკაშვილმა.

  • სმიტების მკვლელობის საქმეზე საბოლოო განაჩენს მოსამართლე 27 მარტს გამოიტანს

    სმიტების ოჯახის სამი წევრის მკვლელობასა და ლორა სმიტის გაუპატიურებაში მსჯავრდებულ მალხაზ კობაურის საქმეზე სასჯელის დანიშვნის სხდომა 27 მარტს გაიმართება.
    ხადას ხეობაში სმიტების ოჯახის სამი წევრის მკვლელობასა და ლორა სმიტის გაუპატიურებაში მსჯავრდებულ მალხაზ კობაურის საქმეზე სასჯელის დანიშვნის სხდომა 27 მარტს, გორის რაიონულ სასამართლოში გაიმართება. სხდომა 12:00 საათზეა დანიშნული.
    როგორც ცნობილი გახდა, ბრალდების მხარე კობაურისთვის უვადო თავისუფლების აღკვეთას მოითხოვს.
    შეგახსენებთ, რომ ხადას ხეობაში სმიტების ოჯახის სამი წევრის მკვლელობაში ბრალდებულ მალხაზ კობაურს ნაფიცმა მსაჯულებმა გამამტყუნებელი ვერდიქტი გამოუტანეს. კობაური ნაფიცმა მსაჯულებმა წარდგენილ ყველა ბრალში ერთხმად დამნაშავედ სცნეს, მათ შორის, ლორა სმიტის გაუპატიურებაშიც. მსაჯულები სათათბირო ოთახში 4 საათი მსჯელობდნენ.

  • Apple-მა საკრედიტო ბარათი და ტელეპლატფორმა ცნობილ ვარსკვლავებთან ერთად დააანონსა

    Apple-მა მისი ახალი ტვ სტრიმინგის პლატფორმა – Apple Tv+ კალიფორნიაში გამართულ ღონისძიებაზე წარმოადგინა.
    ჯენიფერ ენისტონი, სტივენ სპილბერგი და ოფრა უინფრი მათ შორის იყვნენ, ვინც Apple–ს შტაბბინაში სცენაზე გამოვიდნენ, რათა ტექნიკური გიგანტის შეკვეთით შექმნილ სატელევიზიო პროექტებში საკუთარი მონაწილეობა ეჩვენებინათ. პლატფორმა მაყურებელს უკვე არსებული – მაგალითად Hulu–ს და HBO-ს სერვისების შოუებსაც შესთავაზებს.
    Apple–მა საკრედიტო ბარათის, სათამაშო პორტალის და გაუმჯობესებული ნიუს აპლიკაციის გამოშვებაც დააანონსა. ღონისძიების დასაწყისშივე კომპანიის აღმასრულებელმა დირექტორმა, ტიმ კუკმა ცხადად განმარტა, რომ საქმე ეხება ახალ სერვისებს და არა ახალ მოწყობილობებს. ეს 42 წლის კომპანიისთვის პრაქტიკულად მიმართულების შეცვლას ნიშნავს.

    Apple TV

    არსებობდა ბევრი ვარაუდი და მოლოდინი Apple–ს ინტერნეტ ტვ სტრიმინგის ბაზარზე შესვლის შესახებ, რომელზეც ჯერჯერობით ამაზონი და ნეტფლიქსი დომინირებენ.

    The Apple TV+ –ის აპლიკაცია, რომელიც სტივენ სპილბერგმა წარმოადგინა შემოდგომაზე ჩაეშვება. სპილბერგმა განაცხადა,რომ თვითონ შექმნის მასალას ახალი პლატფორმისთვის.

    სცენაზე გამოსულ ვარსკვლავებს შორის იყვნენ რიზ უიზერსპუნი, სტივ კარელი, ჯეისონ მომოა, ალფრედ ვუდარდი, კომიკოსი კუმაილ ნანჯიანი.

    პირველად ისტორიაში აპლიკაცია კონკურენტი ფირმების მოწყობილობებზეც იქნება ხელმისაწვდომი, მათ შორის Samsung, LG, Sony და Vizio–ს სმარტ ტელევიზორებზე, ასევე , Amazon Firestick და Roku–ზე.
    სააბონენტო გადასახადის შესახებ ჯერ არაფერი თქმულა. ჯერჯერობით ერთი რამ ცხადია – ნეტფლიქსი ამ პროექტში არ მონაწილეობს და Apple-ს პაკეტის ნაწილი არ იქნება.
    “Apple-ს ტესტი ასეთი იქნება: შეძლებს თუ არა ახალი კონტენტი ისინი კონკურენტებისგან მკაფიოდ განასხვავოს და შეძლებენ თუ არა ისინი მომხმარებელს ახალი, განსაკუთრებული კონტენტი მიაწოდონ, რომელიც შეძლებს აუდიტორიამდე ისევე ეფექტურად მიაღწიოს, როგორც მაგალითად ნეტფლიქსის პროდუქტები – განაცხადა იორკის უნივერსიტეტის ექსპერტმა კინოსა და წარმოების სფეროში ედ ბრამანმა.

    Apple Card–ის საკრედიტო ბარათი აშშ–ში ამ ზაფხულს გამოჩნდება. იქნება ბარათის ორი ვერსია – როგორც iPhone–ში, ასევე ბარათის ფიზიკური ვერსია, რომელიც ყოველი შენაძენისას მყიდველს ქეშბექით წაახალისებს. Apple Pay–ს ვიცე პრეზიდენტის, ჯენიფერ ბეილის თქმით, საკრედიტო ბარათებს არ დაერიცხება წლიური საკომისიო, არც საკომისიო საერთაშორისო გადახდებისთვის. მომხმარებელს არ დაეკისრება ჯარიმები გადახდის დაგვიანებისთვის. ბარათი Goldman Sachs–ის და MasterCard–ის დახმარებით შეიქმნა.

    რაც შეეხება კომპანიის მიერ წარმოდგენილ ახალი ამბების აპლიკაციას – Apple News+, მის პაკეტში შევა 300–ზე მეტი დასახელების ჟურნალი, მათ შორის Marie Claire, Vogue, New Yorker, Esquire, National Geographic და Rolling Stone.პლატფორმის ნაწილი გახდებიან ლოს ანჟელეს თაიმსი და ვოლ სთრით ჯორნალიც.
    ახალი ამბების აპლიკაციის ფასი თვეში 9.99 დოლარი იქნება და პირველ ეტაპზე აშშ–სა და კანადაში იქნება ხელმისაწვდომი. წლის ბოლოსთვის ევროპაშიც გავრცელდება. ტვ პლატფორმისგან განსხვავებით ახალი ამბების პლატფორმა მხოლოდ ეფლის მოწყობილობებზე იქნება ხელმისაწვდომი.
    რაც შეეხება თამაშების პლატფორმას – Apple Arcade მომხმარებელს 100–ზე მეტ ექსკლუზიურ თამაშს შესთავაზებს, რომელთა თამაში ინტერნეტის გარეშეც იქნება შესაძლებელი. შემოდგომაზე თამაშების პლატფორმა 150 ქვეყანაში იქნება ხელმისაწვდომი. თუმცა მისი ფასები ჯერჯერობით არ სახელდება.

    ეფლის აგრესიული შესვლა ერთდროულად რამდენიმე ბაზარზე მისი მაშტაბებიდან გამომდინარე იმას ნიშნავს, რომ ის შესვლისთანავე მსხვილი მოთამაშე გახდება. ექსპერტები ამბობენ, რომ საკრედიტო ბარათის დაანონსება აჩვენებს, რამდენად სერიოზულია ეფლის განზრახვა მომხმარებლისთვის ცხოვრების მთავარი მეგზური გახდეს.
    როგორც სცენაზე გამოსვლისას ოფრა უინფრიმ განაცხადა, “მათ ხომ უკვე მილიარდობით ადამიანის ჯიბეში შეაღწიეს.“

  • მთაწმინდის არჩევნების წინ გირჩი “მასობრივ გადასახლებას“ აცხადებს

    2019 წლის 19 მაისისთვის დანიშნულ მთაწმინდის მაჟორიტარულ არჩევნებში გირჩის წევრი, ჰერმან საბო მონაწილეობს. პარტიამ გადაწყვიტა მისთვის ხმების მობილიზაცია მათი მხარდამჭერების მთაწმინდის შესაბამის ოლქში დარეგისტრირების საშუალებით მოახდინონ. კამპანია სახელწოდებით “გირჩების გადასახლება“ ფეისბუქში უკვე დაიწყო. გირჩი სპეციალური ფორმის შევსებას სთავაზობს მათ, ვისაც უნდა მათი კანდიდატისთვის ხმის მისაცემად მთაწმინდაზე გადაეწეროს ან მათ, ვინც მთაწმინდაზე ცხოვრობს და აქვს სურვილი გირჩის მხარდამჭერები საკუთარ საცხოვრებელში დაარეგისტრიროს.

    “ გვაქვს შანსი, რომ ჩვენი კანდიდატი, ჰერმან საბო პარლამენტში მოხვდეს.

    #გირჩისხმაპარლამენტში
    ამ პროცესისთვის ხელის შესაწყობად კანონმდებლობაში არსებულ ყველა ხვრელს გამოვიყენებთ და ერთერთი ასეთია – გირჩის მხარდამჭერების მთაწმინდელ ამომრჩევლად გარდაქმნა.

    ამისთვის ვეძებთ ორი კატეგორიის ადამიანებს:

    1. მთაწმინდელ გირჩელებს, რომლებსაც მთაწმინდაზე საკუთრებაში აქვთ სახლი და მზად არიან, მათთან მასიურად ჩაეწერონ სხვა გირჩელები (გადაწერისთვის საჭიროა მხოლოდ მფლობელის ხელმოწერა, იუსტიციის სახლში მისვლის გარეშე)
    2. გირჩელებს მთელი საქართველოს მასშტაბით, რომლებიც მზად არიან მთაწმინდაზე გადმოეწერონ, ამისთვის საჭიროა განცხადება, რომელსაც ჩვენ ოფისში შევსებულს დაგახვედრებთ, პირადად მიიტანოთ იუსტიციის სახლში.

    შეავსეთ ეს ფორმა და დაგიკავშირდებით, დაგაორგანიზებთ :))

    ორივე კატეგორიის ხალხს მინიმუმ ერთხელ მოუწევს მოსვლა გირჩის ოფისში, თბილისში, ბესიკის 4-ში.

    პროცედურა სრულიად უფასოა.“ წერია გირჩის ფეისბუქ გვერდზე. 

    იქვე პარტია ხშირად დასმულ შეკითხვებს და მათზე პასუხებს აქვეყნებს:

    კითხვა:
    თუ რეგიონში ვარ, შევძლებ გადმოწერას?
    პასუხი:
    მთაწმინდაზე გადმოწერა შეუძლია ყველას. თუმცა პრობლემა ისაა, რომ ამას დისტანციურად ვერ იზამთ. გადაწერის შევსებული განაცხადი პირადად უნდა ჩააბაროთ თბილისში, საჯარო რეესტრში. ამიტომ ერთხელ მაინც მოგიწევთ თბილისში ჩამოსვლა.

    კ.: არჩევნების მერე რა ხდება?
    პ.:პირველი კატეგორიის ხალხისთვის – ერთხელ მიდიხართ საჯარო რეესტრში და თქვენთან ჩაწერილ ყველა დროებით მთაწმინდელს ერთი განცხადებით ამოწერენ, ერთ დღეში.
    მეორე კატეგორიის ხალხისთვის – სადაც იყავით ჩაწერილი, მიდიხართ იქაურ იუსტიციის სახლში და ისევ თქვენს სახლში გადაეწერებით (ამ სახლის მფლობელის თანხმობით).

    კ.:ჩემს სახლში თუ ჩავწერე ბევრი ხალხი, შეიძლება თუ არა ამან რამით დამაზიანოს?
    პ.:არანაირად. შენთან შეიძლება ჩაწერილი იყოს ათასობით ადამიანი და ეს არაფერს ცვლის შენთვის. არც რაიმე კანონს არღვევ და არც რაიმე უფლება აქვთ ამ ჩაწერილ ხალხს შენს საკუთრებაზე. მხოლოდ წყლისა და დასუფთავების გაზრდილი გადასახადი მოგივა 2 თვის განმავლობაში, რომლის დაფარვაშიც დაგეხმარებით. 

    დეტალური ინსტრუქტაჟის გარდა გირჩი ელექტრონულ ფორმასაც აქვეყნებს, რომლის შევსება “გირჩების გადასახლებაში“ მონაწილეობის მსურველებს შეუძლიათ. 

  • დეკანოზი მამალაძე ციხის საკვების მიღებაზე უარს აცხადებს

    დეკანოზი გიორგი მამალაძე  პენიტენციური დაწესებულების საკვების მიღებაზე უარს ამბობს, რადგან მას სამარხვო საკვებით ვერ უზრუნველყოფენ. ამის გამო, მსჯავრდებული დეკანოზი იძულებულია თავად იყიდოს საკვები. ინფორმაციას მისი ადვოკატი ავრცელებს, რომელიც დღეს სასჯელაღსრულების დაწესებულებაში დეკანოზთან იმყოფებოდა.

    დავით ჯანდიერის ინფორმაციით, მსჯავრდებული სასულიერო პირის მონახულებას უახლოეს პერიოდში აპირებენ სახალხო დამცველის წარმომადგენლებიც. „დღეს მან უარი განაცხადა პენიტენციური დაწესებულების მიერ მიწოდებული საკვების მიღებაზე და ამის მიზეზი არის ის უყურადღებობა, რომელსაც ის განიცდის. რამდენიმე დღის წინ, მას ჰქონდა ჯანმრთელობასთან დაკავშირებული სხვა პრობლემებიც, თუმცა სათანადო  ყურადღება არ იქნა მის მიმართ აღმოჩენილი,“ – განაცხადა ადვოკატმა.

    განცხადება გააკეთა დეკანოზ გიორგი მამალაძის ძმამაც. ოჯახი დეკანოზის სამოქალაქო კლინიკაში გადაყვანას ითხოვს. „თავდაპირველად, პირობა მოგვცეს, რომ გადაიყვანდნენ მე-18 დაწესებულებაში და მიეცემოდა მას სათანადო მკურნალობა მისი ჯანმრთელობიდან გამომდინარე. მაგრამ სამწუხაროდ, დღეს ვხედავთ, რომ ელემენტარული ყურადღებაც არ ექცევა. ამასთან დაკავშირებით, სახალხო დამცველმაც დადო დასკვნა და იმედია, ჩვენ ამას ვითხოვთ, რომ გაითვალისწინებენ და მოხდება ჩემი ძმის გადაყვანა შესაბამის დაწესებულებაში, სადაც ელემენტარულად, უკვე მის სიცოცხლეს საფრთხე არ შეექმნება,“ – განაცხადა თორნიკე მამალაძემ.

  • საქართველოს მოქალაქის მკვლელობისთვის რუსეთის მოქალაქეს შვედეთის სასამართლომ 16 წელი მიუსაჯა

    შვედური მედიის ინფორმაციით 49 წლის რუს მამაკაცს სასამართლომ 16 წლიანი პატიმრობა მიუსაჯა საქართველოს მოქალაქის მკვლელობისთვის .
    ხაპარანდის რაიონულმა სასამართლომ ორშაბათს ანდრეი მანკო დამნაშავედ ცნო 39 წლის ქართველის მკვლელობაში, რომელთან ერთად შვედეთის ჩრდილოეთით მდებარე ქალაქ კალიქსში, თავშესაფარში ერთ ოთახში ცხოვრობდა. გარდა ამისა სასამართლომ დაადგინა რომ სასჯელის მოხდის შემდეგ მისი დეპორტაცია უნდა მოხდეს. მკვლელობა მიგრანტთა თავშესაფარში მოხდა. მკვლელობის შემდეგ მკვლელმა მოკლულის სხეული დაანაწევრა და მდინარეში გადააგდო.
    სასამართლოს განცხადებით ეჭვგარეშეა, რომ მანკომ მოკლა ადამიანი,სხეული ოთახშივე დაჭრა, შემდეგ კი მდინარეში გადააგდო.
    პოლიციამ გამოძიება მას შემდეგ დაიწყო, რაც გასული წლის 24 ოქტომბერს ძაღლმა მდინარე კალიქსში შემთხვევით იპოვნა გარდაცვლილის ხელი, ფეხი და თავი. მისი ტორსი კი ქალაქის ნარჩენების უტილიზაციის ცენტრში იპოვნეს. მისი გენიტალიები ჯერ არ უპოვნიათ, თუმცა ჯერ არ არის დამტკიცებული, რომ ის სხეულიდან განზრახ იყო მოკვეთილი.
    მანკო, რომელიც შვედეთში რუსეთიდან ჩავიდა და იქ თავშესაფარს ითხოვდა, 24 ოქტომბრის შემდეგ რამდენიმე დღეში დააკავეს. მან აღიარა, რომ ოთახის მეზობელი მოკლა, თუმცა ამტკიცებდა, რომ ეს არა მკვლელობა, არამედ თავდაცვა იყო, რადგან 39 წლის მამაკაცი მას დანით ხელში თავს დაესხა.
    ადგილობრივი მედიის ცნობით სასამართლოს მსვლელობისას გაირკვა, რომ მანკო მოკლულს პირველად სტოკჰოლმში შეხვდა. ქართველი შვედეთში შესაბამისი ნებართვის გარეშე იმყოფებოდა. მალკომ ის კალიქსში დაპატიჟა და რამდენიმე დღის მანძილზე მის ოთახში დარჩენა შესთავაზა.

    ანდრეი მანკო

    სასამართლოში მკვლელი ამტკიცებდა, რომ რამდენჯერმე დაუკავშირდა პოლიციას, რათა შეეტყობინებინა, რომ მის ოთახში ადამიანი იმყოფებოდა, რომელსაც შვედეთში ცხოვრების კანონიერი უფლება არ ქონდა. სასამართლომ დაადგინა, რომ მანკოს მართლაც ეშინოდა მისი მსხვერპლის, რასაც მოწმეთა ჩვენებებიც ადასტურებს, თუმცა ამავე დროს დაადგინა, რომ მოვლენების მისეული ვერსია არც გარდაცვლილისთვის მიყენებულ ტრავმებს და არც მკვლელობის ადგილზე ჩატარებული სამედიცინო ექსპერტიზის შედეგებს არ შეესაბამებოდა.


    ოთახი, სადაც მკვლელობა მოხდა.

    სასამართლოს გადაწყვეტილებით ამ ადამიანის მტკიცებები, რომ მას თავს დაესხნენ არ შეიძლება იყოს სიმართლე. მან მინიმუმ ორჯერ ჩაარტყა თვაში გარდაცვლილს განზრახ და კარგად იცოდა, რომ ამ დარტყმებს ფატალური შედეგი მოჰყვებოდა – განმარტა სასამართლოს თავმჯდომარემ, აგნეტა კარლსონმა თავის გადაწყვეტილებაში.
    შვედეთში საქართველოს მოქალაქის მკვლელობის შესახებ ინფორმაცია გასული წლის ნოემბერში როგორც შვედურ, ისე ქართულ მედიაში გამოჩნდა. მაშინ მოკლულის ვინაობა არ დასახელებულა. ქართველი სამართალდამცავები აცხადებდნენ, რომ გამოძიებაში ჩაერთნენ. მოკლულის ვინაობა დღემდე უცნობი რჩება. მის სახელს და გვარს არც შვედური მედია ასახელებს.

  • სმიტების ოჯახის მკვლელობაში ბრალდებული ნაფიცმა მსაჯულებმა დამნაშავედ ცნეს

    გამამტყუნებელი ვერდიქტი ხადას ხეობაში სმიტების ოჯახის სამი წევრის მკვლელობაში ბრალდებულ მალხაზ კობაურს-ნაფიცმა მსაჯულებმა საქმეზე 4-საათიანი მსჯელობა ასეთი შედეგით  დაასრულეს. კობაური ნაფიცმა მსაჯულებმა წარდგენილ ყველა ბრალში ერთხმად დამნაშავედ სცნეს.

    მალხაზ კობაურს ბრალი სისხლის სამართლის კოდექსის 109-ე მუხლის პირველი ნაწილის „გ“, მე-2 ნაწილის „ბ“, მე-3 ნაწილის „ა“ და „ბ“ ქვეპუნქტებით და 137-ე მუხლის პირველი ნაწილით ჰქონდა წარდგენილი, რაც განზრახ მკვლელობას სხვა დანაშაულის გაადვილებისა და დაფარვის მიზნით, სამი პირის განსაკუთრებული სისასტიკით მკვლელობას, წინასწარი შეცნობით არასრულწლოვნის მიმართ მკვლელობასა და გაუპატიურებას გულისხმობს.

    აღნიშნული დანაშაული 16-დან 20-წლამდე, ან უვადო პატიმრობას ითვალისწინებს.

  • “მკვდარი უფრო კარგ ფორმაში ვიქნები ვიდრე შენ“–სააკაშვილი გიგი უგულავას პასუხობს

    მიხეილ სააკაშვილი ფეისბუქ გვერდზე გიგი უგულავას მიერ გადაცემა “კვირის აქცენტებში “ გაკეთებულ განცხადებებს პასუხობს.

    “გუშინ გიგი უგულავა გვარამიასთან სულ იმეორებდა “არაა სააკაშვილი ფორმაშიო”..რა თქმა უნდა,მუდმივად საჭიროა საკუთარ თავზე მუშაობა,და ძვირფასო გიგი,გისურვებ კიდევ 100 წლის სიცოცხლეს ამასთანავე მეც არ ვაპირებ ჯერ სიკვდილს,მაგრამ დაიმახსოვრე,მკვდარი უფრო კარგ ფორმაში ვიქნები,ვიდრე შენ და შენი ზოგიერთი კოლეგა შემდეგი 100 წლის მანძილზე

    “ათას ცოცხალსა ბევრჯერა,
    ასჯერ სჯობს ერთი მკვდარია” – წერს სააკაშვილი

    “მე მხოლოდ გამიხარდება, თუ კარგ ფორმაში იქნები და მკვდართან შეჯიბრი არ მომიწევს. საუკეთესო სურვილებით“,- ასე პასუხობს „ევროპული საქართველოს“ ერთ-ერთი ლიდერი, გიგი უგულავა მიხეილ სააკაშვილს ფეისბუქსტატუსს.

  • ოპოზიციამ საარჩევნო სისტემის შესაცვლელად თელავში ხელმოწერების შეგროვება დაიწყო

    პროპორციულ საარჩევნო სისტემაზე გადასვლის მოთხოვნით, გაერთიანებულმა ოპოზიციამ, რომელშიც 24 პოლიტიკური პარტიაა გაერთიანებული, თელავში ხელმოწერების შეგროვება დაიწყო.
    ოპოზიციის წარმომადგენლებმა შეხვედრა არასამთავრობო ორგანიზაციების წარმომადგენლებთან, აქტიურ მოქალაქეებთან და პარტიის მხარდამჭერებთან გამართეს.
    „ნაციონალური მოძრაობის“ თავმჯდომარე აცხადებს, რომ აუცილებელია მომდევნო საპარლამენტო არჩევნები პროპორციული საარჩევნო სისტემით ჩატარდეს.
    გრიგოლ ვაშაძის თქმით, პარტიები გაერთიანდენენ საერთო იდეით, რათა საარჩევნო სისტემა რაც შეიძლება უფრო დემოკრატიული გახდეს.
    “რესპუბლიკური პარტიის” ერთ-ერთი ლიდერის დავით ბერძენიშვილის თქმით, პროპორციული საარჩევნო სისტემა როგორც ოპოზიციისთვის ასევე მმართველი პარტიისთვის მნიშვნელოვანია, რადგან ის ხელს უწყობს ქვეყნის წინსვლას და კოალიციური მმართველობის ჩამოყალიბებას.

  • “თუ არ გინდათ ორბანი, უყურეთ ივანიშვილს”-სააკაშვილი ეკა კვესიტაძეს მიმართავს

    საქართველოს მე-3 პრეზიდენტი მიხეილ სააკაშვილი სოციალურ ქსელში ეკა კვესიტაძეს მიმართავს და ჟურნალისტის მიერ გამოთქმულ კრიტიკას ეხმაურება, რომელმაც გუშინ საკუთარ გადაცემაში განაცხადა, რომ საქართველოში არ სურს ორბანი(იგულისხმება უნგრეთის პრემიერ მინისტრი).

    “ეკა კვესიტაძის გასაგონად,რომელიც არსებული ივანიშვილის ფონზე აცხადებს,რომ თურმე ,არ სურს ორბანი საქართველოში და რაღაცნაირად ჩემზე მიანიშნებს-ვიქტორ ორბანი ჩემი მეგობარია,ჩვენ ბევრ რამეში განვსხვავდებით,მაგრამ ორბანის დროს უნგრეთის ეკონომიკა გადაიქცა ევროპის ერთ-ერთ ყველაზე სწრაფად მზარდ ეკონომიკად,რაც კეთილად აისახება თითოეული უნგრელის კეთილდღეობაზე.

    ბუდაპეშტში და სხვა ქალაქებში განხორციელდა ისტორიული ცენტრის აღდგენის სამუშაოები და დაიწყო მშენებლობის ბუმი,უფრო მეტი უნგრელი ბრუნდება,ვიდრე ტოვებს თავის ქვეყანას…ხო და,თუ არ გინდათ ორბანი,უყურეთ ივანიშვილს,ოღონდ სახლში წაიყვანეთ და ისე,საქართველოს კიდევ მიეცით განვითარების შესაძლებლობა!

    ორბანით და სხვა მაგალითებით დაშინება ემსახურება მხოლოდ არსებული ჭაობის შენარჩუნებას და სწორედ ესაა ივანიშვილის თამაში და ყველას ვთხოვ,ნუ შეყვებით მას ამ თამაშში..”