მეტროში ისევ შეფერხებაა. რამდენიმე წუთის წინ მეტროსადგურ ღრმაღელეში ორივე მიმართულებით მოძრავი მატარებლები მგზავრებისგან დაცალეს.
ხალხი ბაქანზე გამოიყვანეს და უთხრეს, რომ შემდეგ მატარებელს დალოდებოდნენ. თვითმხილველების ინფორმაციით, მანამდე რამდენიმე წუთის განმავლობაში მოძრაობა შეჩერებული იყო.
ჯერჯერობით დაზუსტებით არ არის ცნობილი, ხარვეზი კონკრეტული შემადგენლობის ტექნიკური გაუმართაობას უკავშირდება თუ ტექნიკური შეფერხება მეტროპოლიტენის სავალ ნაწილზე მოხდა.
„დღეს ორიანი დაგიწერეთ, არ ხართ კარგად მომზადებული”, – ასე უპასუხა კახა კალაძემ ჟურნალისტს, რომელმაც მსახიობ ლევან ჯიბღაშვილის დაკავებასთან დაკავშირებით თბილისის მერს შეკითხვა დაუსვა.
გუშინ გავრცელდა ინფორმაცია, რომ მსახიობი ლევან ჯიბღაშვილი დაკავებისას კახა კალაძის სახელს ახსენებდა. ჟურნალისტის შეკითხვაც სწორედ ამ ფაქტს შეეხებოდა.
ლევან ჯიბღაშვილის საქმეზე გამოძიება სისხლის სამართლის კოდექსის 260-ე მუხლის პირველი ნაწილით მიმდინარეობს, რაც ნარკოტიკული საშუალების შეძენა-შენახვას ითვალისწინებს და ისჯება თავისუფლების აღკვეთით ვადით, 6 წლამდე.
ჟურნალისტ ზაზა სვანაძე ორთვიანი წინასწარი პატიმრობა შეეფარდა.
სვანაძეს მუქარის განხორციელებაში ნავთობისა და გაზის კორპორაციის საზოგადოებასთან ურთიერთობის ხელმძღვანელი ნინო ჯღარკავა ადანაშაულებს.
ჯღარკავას თქმით, ზაზა სვანაძე მის შვილს სოციალური ქსელის მეშვეობით სიცოცხლის მოსპობით ემუქრებოდა. გარდა ამისა სვანაძეს პროკურატურა ერთ-ერთი ჟურნალისტის შეურაცხყოფას და მუქარასაც ედავება.
სვანაძის ადვოკატი თბილისის საქალაქო სასამართლოს გადაწყვეტილების გასაჩივრებას აპირებს.
„სასამართლომ ასე, აბსოლუტურად ულოგიკოდ მიიღო ძალიან ცუდი გადაწყვეტილება. კონტექსტიდან ამოგლეჯილი წინადადებიდან, რომელიც დაწერა ზაზა სვანაძემ „ფეისბუქ პოსტზე“, ამასთან დაკავშირებით მას ახლა 2 თვიანი წინასწარი პატიმრობა შეეფარდა. ეს არის სრული მარაზმი,“-აცხადებს სვანაძის ადვოკატი ალექსანდრე კობაიძე.
საქმის პროკურორის განცხადებით, სასამართლომ მუქარის საფრთხე რეალურად მიიჩნია და აღნიშნული გადაწყვეტილება მიიღო.
“ყველა ის ადამიანი, ვინც ეწინააღმდეგება ქვეყნის ენერგოდამოუკიდებლობას, ენერგეტიკულ განვითარებას, ქვეყნის მტერია.”-ეს განცხადება თბილისის მერმა, კახა კალაძემ ჟურნალისტებთან გააკეთა.
კალაძის თქმით, ჰესების აშენება პირდაპირ არის დაკავშირებული ქვეყნის განვითარებასთან.
“კამპანია, რომელიც ჰესების მშენებლობის წინააღმდეგ არის მიმართული, ჩემთვის კატეგორიულად მიუღებელია. ჩვენ თუ გვინდა ქვეყანა განვითარდეს, წინ წავიდეს, მაქსიმალურად რაციონალურად უნდა იქნას ათვისებული წყლის რესურსი და შესაძლებლობები, რომელიც ქვეყანას გააჩნია. 5 წლის განმავლობაში ვიყავი ენერგეტიკის მინისტრი და ამდენი პროექტი – ჰიდროელექრტოსადგური, ქარის ელექტროსადგური, თბოელექტროსადგური, ქვესადგურების პროექტი, რომლებიც ევროპული სტანდარტებით გავაკეთეთ, არასდროს საქართველოში არ გაკეთებულა. გული მწყდება, რომ დღეს ამ მიმართულებით პროექტების განხორციელება არის შეფერხებული. ჩვენი ქვეყანა განვითარებადია, ყოველწლიურად ვითარდება, ეკონომიკური ზრდა გვაქვს და შესაბამისად, ელექტროენერგიაზე მოთხოვნაც მეტი იქნება. რატომ უნდა ვიყოთ დამოკიდებული სხვადასხვა ქვეყნებზე ელექტროენერგიის შემოტანით, რატომ უნდა გავიდეს თანხები სხვა ქვეყნებში? ისევ ჩვენს ეკონომიკაში ჩაიდოს და მოხმარდეს ეს თანხები. ყველა ის ადამიანი, ვინც ეწინააღმდეგება ქვეყნის ენერგოდამოუკიდებლობას, ენერგეტიკულ განვითარებას, მარტივად რომ ვთქვა, ქვეყნის მტერია”,- განაცხადა კალაძემ.
“სანამ პოროშენკო პრეზიდენტია, მე სასაზღვრო სამსახურისგან სხვა პასუხს არც ველოდი. არაუშავს, კიდევ ცოტასაც მოვითმენ ამდენთვიანი ლოდინის შემდეგ,”-განაცხადა სააკაშვილმა.
სააკაშვილმა უკრაინაში დაბრუნება რამდენიმე თვის წინ დააანონსა. მისი დაბრუნება ვლადიმერ ზელენსკის გამარჯვებას უკავშირდება.
სააკაშვილმა უკრაინის უსაფრთხოებისა და სასაზღვრო სამსახურს განცხადებით მიმართა და მოუწოდა, გაეუქმებინათ აკრძალვა, რომლის მიხედვითაც მას უკრაინაში შესვლის უფლება არ აქვს.
უკრაინის სასაზღვრო სამსახურმა სააკაშვილს ოფიციალური განცხადებით უპასუხა და ქვეყანაში მის შეშვებაზე უარი თქვა:
“აღნიშნულმა პირმა 2017 წლის სექტემბერში უკანონოდ გადმოკვეთა საზღვარი პოლონეთიდან უკრაინაში, რაც ადგილობრივი და სააპელაციო სასამართლოების გადაწყვეტილებით დასტურდება,”- ნათქვამია განცხადებაში.
სამდღიანი უკანონო პატიმრობის შემდეგ გორის მუნიციპალიტეტის სოფელ მეჯვრისხევიდან ოკუპანტების მიერ გატაცებული მწყემსი გაათავისუფლეს.
45 წლის გოჩა ფიდიური ე.წ. საზღვრის უკანონოდ გადაკვეთაში ადანაშაულებდნენ.
ცხინვალიდან გათავისუფლების შემდეგ ფიდიური პოლიციის სამხარეო სამმართველოში გამოკითხვაზე გადაიყვანეს.
„ევროპული საქართველო“ გიორგი გახარიას წინადადებას ეხმაურება და მინისტრს ყავაზე ეპატიჟება. ელენე ხოშტარიას თქმით, ის მზადაა, გახარიას ყავა თავად მოუდუღოს, თუ მინისტრი შეკითხვებს უპასუხებს.
„დღეს შინაგან საქმეთა მინისტრთან არის ძალიან სერიოზული კითხვები და მას მოუწევს, ძალიან სერიოზული პასუხების გაცემა. თუ მას აშინებს კომიტეტის კედლები, თუ მას აშინებს კომიტეტსა და პარლამენტში მოსვლა, მინდა შევთავაზო, ჩემი ხელით მოვუდუღებ ყავას, მობრძანდეს და გასცეს ყველა ამ კითხვას პასუხი. გიორგი გახარიამ ნებისმიერი ადგილი და დრო დაასახელოს, ერთადერთი ჩემი პირობაა , ჩემი ხელით მოდუღებული ყავა უნდა დალიოს და კითხვებს გასცეს პასუხი,’ – განაცხადა ელენე ხოშტარიამ.
გახარიამ ევროპულ საქართველოს გუშინ მიმართა.
“თუ “ევროპული საქართველოს” რომელიმე ლიდერს სურს დამატებით კიდევ ჩემი ნახვა, შეუძლიათ დამპატიჟონ ყავაზე და მივალ, დაველაპარაკები. ”-განაცხადა გიორგი გახარიამ.
შინაგან საქმეთა მინისტრი პარლამენტში 3 მაისს არის დაბარებული. “მინისტრის საათის” ფორმატში გახარია დეპუტატების შეკითხვებს უპასუხებს.
ბუნებრივი აირის გაჟონვის კიდევ ერთი შემთხვევა თბილისში, გლდანში ერთ-ერთ ბინაში გაზის ონკანი ღია დარჩათ.
ერთ-ერთი საცხოვრებელი კორპუსის მცხოვრებლებმა დღეს დილით სადარბაზოში გაზის სუნი იგრძნეს და “ყაზტრანსგაზს” მიმართეს.
“ყაზტრანსგაზის” წარმომადგენლები ადგილზე მალევე მივიდნენ და მოსახლეობის ევაკუაცია მოახდინეს.
მაცხოვრებლების განცხადებით, ერთ-ერთ ბინაში მამაკაცს გაზის ონკანი ღია დარჩა, რამაც ბუნებრივი აირის დაგროვება გამოიწვია.