გადაუღებელმა წვიმამ თელავის, ლაგოდეხისა და ახმეტის შემდეგ ყვარელიც დააზიანა. ამჟამად ადიდებულია მდინარე დურუჯი, მონგრეულია დამცავი ჯებირები, დატბორილია ადგილობრივების კუთვნილი სახნავ-სათესები და ვენახები. ადიდებული მდინარე კალაპოტიდან გადმოვიდა და სოფლებთან ახლოს მიედინება. გადაუღებელი წვიმის გამო, სალიკვიდაციო სამუშაოები ვერ ხერხდება.
“შესაბამისი ტექნიკის მდინარეში შეყვანა მხოლოდ წყლის დონის დაწევის შემდეგ იქნება შესაძლებელი,” – განაცხადა ყვარლის მუნიციპალიტეტის მერმა, როსტომ სესიაშვილმა.
კასპში, ოკუპირებული ტერიტორიის პერიმეტრზე მდებარე სოფელ ყარაფილასთან, რუსმა მესაზღვრეებმა სოფელ ქვემოჭალის მცხოვრები ორი მამაკაცი გაიტაცეს.
როგორც კასპის მუნიციპალიტეტის მერი სტეფანე მესროფაშვილი აცხადებს, ორი მამაკაცი დიმიტრი ისერგიშვილი და ვასილ პატარკაციშვილი, სატაცურის საკრეფად წავიდნენ, ამ დროს გამოჩნდნენ შეიარღებული ფორმიანი მესაზღვრეები და ორივე მათგანი დააკავეს.
ისერგიშვილი 50 წლამდე ასაკისაა, პატარკაციშვილი კი – 35 წლის. სახელმწიფო უსაფრთხოების სამსახური აცხადებს,რომ დაკავებულებს ე.წ. საზღვრის უკანონო კვეთა ედებათ ბრალად.ადგილობრივების ინფორმაციით, დაკავებულები ოკუპირებული ცხინვალის მილიციის განყოფილებაში გადაიყვანეს.
უკრაინის არჩეული პრეზიდენტი ქვეყნის მოქმედ ლიდერს ხელისუფლების გადაცემის პროცესის გაჭიანურებაში ადანაშაულებს. ამის შესახებ ზელენსკიმ მორიგ ვიდეომიმართვაში ისაუბრა. მან უმაღლეს რადას მოუწოდა, ინაუგურაციის თარიღად 19 მაისი დაამტკიცოს.პეტრო პოროშენკო ზელენსკიმ ეგვიპტეში მყოფ ტურისტს შეადარა, რომელსაც გამგზავრების წინ ჩემოდანში სასტუმროს ნივთებს ალაგებს.
ზელენსკის ბრალდებას პოროშენკოს ადმინისტრაციაში უპასუხეს. მათი თქმით, უკრაინა სასტუმროს ნომერი არაა და ხელისუფლების გადაბარება საკმაოდ რთული და საპასუხისმგებლო პროცესია.
თელავის მუნიციპალიტეტის სოფელ აკურაში სტალინის ბიუსტი აიღეს. მუნიციპალიტეტის რეაგირება მასალის გაშუქებას მოჰყვა. როგორც თელავის მერი, შოთა ნარეკლიშვილი აცხადებს, ბიუსტი სწორედ მისი დავალებით აიღეს და მას აღარ დადგამენ.
ბიუსტი სოფელ აკურის ცენტრალურ პარკში, მეორე მსოფლიო ომში დაღუპულთა მემორიალის გვერდით, 9 მაისთან დაკავშირებული ღონისძიების დროს ადგილობრივების ერთმა ჯგუფმა დადგა.
შინაგან საქმეთა მინისტრმა 19 მაისის შუალედური და რიგგარეშე არჩევნების თავისუფალ, დემოკრატიულ და უსაფრთხო გარემოში ჩატარების უზრუნველსაყოფად სპეციალური ბრძანება გამოსცა.
ბრძანების თანახმად, ტერიტორიულ ერთეულებში მოქმედი შესაბამისი სტრუქტურული დანაყოფები, წინასაარჩევნო კამპანიის მიმდინარეობისას და უშუალოდ არჩევნების დღეს, თავიანთ სამოქმედო არეალში, სამართალდარღვევათა პრევენციას და მათზე დროულ რეაგირებას უზრუნველყოფენ.
გარდა ამისა, ბრძანება ყველა პოლიციელს სამსახურებრივი მოვალეობის შესრულებისას პოლიტიკური ნეიტრალიტეტის პრინციპის მკაცრად დაცვას ავალდებულებს.
კიდევ ერთი ღონისძიება, რომელიც შინაგან საქმეთ სამინისტრომ არჩევნების მშვიდ გარემოში ჩატარების უზრუნველსაყოფად უკვე გაატარა, ეს არის მემორანდუმის გაფორმება ცენტრალურ საარჩევნო კომისიასთან.
დოკუმენტს ხელი საქართველოს შინაგან საქმეთა მინისტრმა – გიორგი გახარიამ და ცენტრალური საარჩევნო კომისიის თავმჯდომარემ – თამარ ჟვანიამ მოაწერეს.
მემორანდუმით განისაზღვრა საარჩევნო პერიოდში მხარეთა შორის თანამშრომლობისათვის დამატებითი ფორმები და შესაბამისი სამართლებრივი ჩარჩო.
დოკუმენტი ასევე ითვალისწინებს არჩევნების დღეს ხმის მიცემის პროცესის მშვიდ და თავისუფალ გარემოში ჩატარების უზრუნველსაყოფად მხარეთა თანამშრომლობას, ერთობლივი ღონისძიებებისა და სამუშაო შეხვედრების ორგანიზებას.
ქართველი ისტორიკოსი და ხელნაწერთა ეროვნული ცენტრის დირექტორი ბუბა კუდავა საკუთარ ფეისბუქ გვერდზე წერს, რომ ტაო-კლარჯეთში, X საუკუნის ცნობილი ქართული ტაძრის დოლიყანის კარიბჭეში საპირფარეშო შენდება.
ბუბა კუდავა წერს:”საგანგაშო, ყოვლად დაუჯერებელი და ყოვლად გაუგებარი სიახლე ტაო-კლარჯეთიდან!X საუკუნის ცნობილი ქართული ტაძრის – დოლისყანის კარიბჭეში ტუალეტი შენდება!
ფოტოები ეს წუთია გამომიგზავნეს. კარიბჭეში უკვე ამოთხრილია ორმოები, რომლებიც რკინის ცხაურითაა გადახურული. ჩალაგებულია მილები, ტაძარში შეტანილია შესაბამისი მასალა და დღე-დღეზე ალბათ ბეტონსაც დაასხამენ.
აქაური ისტორიული ძეგლების დაზიანებების (უყურადღებობით გამოწვეული თუ განზრახ ჩადენილი) უამრავი ფაქტია ცნობილი, მაგრამ იმედის მომცემი იყო ტენდენცია, რომ ბოლო ათწლეულებში მსგავსი ფაქტები ძალზე შემცირდა.
ის, რაც ახლა დოლისყანაში ხდება, სრულიად დაუჯერებელია!
21-ე საუკუნეა, 2019 წელია და ტაო-კლარჯეთის ძეგლების დიდი ისტორიული და კულტურული მნიშვნელობა უკვე კარგა ხანია კარგად ესმით ჩვენს თურქ კოლეგებსა და ჩვენი მეზობელი ქვეყნის შესაბამის უწყებებს.
იმედი მაქვს, სასწრაფოდ შეწყდება სამუშაოები.
P. S.
საქმის კურსშია საქართველოს საელჩო თურქეთში. ვესაუბრე ელჩს – ბ-ნ გია ჯანჯღავას. უკვე შეუდგა ინფორმაციის გადამოწმებას. დარწმუნებული ვარ, ცდას არ დააკლებს საკითხის მოგვარებას.” {{PHOTOGALLERY}}
საქართველოში შემოწმებული ყოველი მეორე კლინიკა დარღვევებით მუშაობს. სწორედ ასეთი პირობებია ინფექციური დაავადებების C ჰეპატიტის, შიდსისა და ტუბერკულოზის გავრცელების მთავარი წყარო.
სახელმწიფო აუდიტის სამსახურმა მოამზადა დასკვნა საქართველოში ინფექციების კონტროლის შესახებ. აუდიტი კლინიკების კონტროლის გამკაცრების და ინფექციების კონტროლის ერთიანი სტრატეგიის შექმნის აუცილებლობას საკანონმდებლო დონეზე ითხოვს.
სტაციონარებში ხშირია საშარდე გზების ინფექციებისა და პნევმონიების გადატანაც. დარღვევების აღმოჩენისას კლინიკა გაფრთხილებას იღებს, გამოუსწორებლობის შემთხვევაში კი საქმეში მარეგულირებელი ერთვება. ამ მოდელს “მხარდამჭერი შემოწმება” ჰქვია, რასაც ჯანდაცვის უწყებაში კლინიკების წახალისებით ხსნიან.
აუდიტის რეკომენდაციები უკვე გადაეგზავნა ჯანდაცვის სამინისტროს, თუმცა ჯერ კიდევ 2016 წელს ინფექციების კონტროლის ერთიანი სტრატეგიის შექმნის რეკომენდაცია საქართველომ მსოფლიო ჯანდაცვის ორგანიზაციიდან უკვე მიიღო.
ჯანდაცვის სამინიტროში ამბობენ, რომ სტრატეგიაზე უკვე მუშაობენ, რომელიც ქვეყანაში 2020 წლიდან ამოქმედდება.