Category: არქივი

ტელეწამყვან ნანუკა ჟორჟოლიანის შვილი, მარიამ გეგუჩაძე სამოქალაქო აქტივისტია, რომელიც სხვადასხვა პოლიტიკურ და საზოგადოებრივ მოვლენებში აქტიურად არის ჩართული.

მარიამი აქციის ერთ-ერთი ორგანიზატორიც არის, მის გუშინდელ გამოსვლას, სადაც გახარიას გადადგომისკენ მოუწოდებს, საზოგადოებაში დადებითი გამოხმაურება მოჰყვა, თუმცა სოციალურ ქსელში იყო ნეგატიური კომენტარებიც. ამასთან დაკავშირებით პოპულარული ტელეწამყვანი საკუთარ შვილს ამხნევებს და მის აქტიურობას დადებითად აფასებს.

“ამ ნიუსის ქვევით ბევრი ნეგატივია. ზოგი ბოტია, ზოგი ქოცი და ყველა დაიკიდე. შენი გზა გაქვს და ამ გზაზე ყველა მაყეფარს თუ ქვის სროლა დაუწყე, მიზნამდე ან ვერ მიხვალ, ან დაგაგვიანდება.

Go,მარიამ Go. ბოლომდე შენს გვერდით ვარ და ძალიან ამაყი ვარ რომ მშვიდ ცხოვრებას, ეს გზა არჩიე. ეს სწორი გზაა და არსად გადაუხვიო”-წერს ნანუკა ჟორჟოლიანი.

პოლიტიკური გაერთიანება „ქართული ოცნება “ განცხადებას ავრცელებს.

„პირველ რიგში, გვსურს მადლობა გადავუხადოთ ჩვენს ყველა მხარდამჭერს და გულშემატკივარს, თითოეულ მოქალაქეს, რომელიც ხედავს და რეალურად აფასებს შექმნილ მდგომარეობას, სახელმწიფო ინსტიტუტებზე მიტანილი შეტევების რეალურ მიზნებს.

განვითარებული მოვლენების ფონზე, საზოგადოებაში ხშირად ისმის კონტრაქციის ორგანიზების მოწოდებები.

ხაზგასმით ვაცხადებთ, საქართველოში დაცულია შეკრებისა და გამოხატვის თავისუფლება. ჩვენ პატივს ვცემთ თითოეული ჩვენი მოქალაქის პოზიციას და მშვიდობიანი პროტესტის უფლებას. „ქართული ოცნების“ ხელისუფლების პირობებში ჩვენი მოქალაქეების ეს უფლება იყო, არის და იქნება დაცული.

ჩვენი ხელისუფლების პირობებში, ასევე განუხრელად არის და იქნება დაცული ქვეყნის კონსტიტუცია და სახელმწიფო ინსტიტუტები ყოველგვარი აგრესიისა და ძალადობისგან.

სახელმწიფო იცავს როგორც მოქალაქეებს, მათი გამოხატვის თავისუფლებას, ასევე კონსტიტუციას და საზოგადოებრივ მართლწესრიგს.

არსებულ ვითარებაში, მიზანშეწონილად მიგვაჩნია ვთხოვოთ ჩვენს მოქალაქეებს, რომლებიც განიცდიან და ემოციურად რეაგირებენ უკანასკნელ დღეებში შექმნილ სურათზე, თავი შეიკავონ ყოველგვარი კონტრაქციისგან და იმგვარი ქმედებებისგან, რომელმაც შესაძლოა დამატებითი დაძაბულობა შემოიტანოს და საფუძველი შეუქმნას დესტრუქციულ ძალებს პროვოკაციებისა და დაძაბულობის ინსპირაციისთვის“, – ნათქვამია „ქართული ოცნების“ განცხადებაში.

საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში, ზურაბ აბაშიძე აცხადებს, რომ რუსი დეპუტატის, სერგეი გავრილოვისთვის 20 ივნისს ბოდიში მას არ მოუხდია.

“მე იგი ვნახე აეროპორტში, როდესაც თვითმფრინავი მიფრინავდა, იმ პერიოდში იქ ვიყავი ახლო-მახლო. მივედი მასთან, ვნახე, როგორ მიმდინარეობდა მათი გამგზავრება და ძალიან მოკლე საუბარი მქონდა. სულ რამდენიმე ფრაზა იყო გავრილოვთან. ბოდიშები არ მოგვიხდია. მივედი, ვნახე, როგორ მიმდინარეობდა მათი გამგზავრება. შემიძლია ეს დაგიდასტუროთ. დეგელაცია მიემგზავრებოდა. მას აცილებდნენ შვეიცარიის საელჩოს წარმომადგენლები და რამდენიმე წუთის შემდეგ ის თვითმფრინავი გაემგზავრა“, – განაცხადა აბაშიძემ.

შეგახსენებთ, რომ სერგეი გავრილოვმა 20 ივნისს საქართველოს ნაჩქარევად  დატოვების შემდეგ განაცხადა, რომ მართლმადიდებლური საპარლამენტთაშორისო ასამბლეის ჩაშლის გამო  მას მოსკოვში გამგზავრების წინ  რამდენიმე ქართველმა პოლიტიკოსმა ბოდიში მოუხადა. მან ამ დეპუტატების ვინაობა არ დაასახელა.

მე დარწმუნებული ვარ ჩემი გადაწყვეტილების სისწორეში – განაცხადა  საპარლამენტო უმრავლესობის დეპუტატმა, განათლების კომიტეტის თავმჯდომარემ მარიამ ჯაშმა. 

შეგახსენებთ, რომ უმრავლესობის წევრმა მარიამ ჯაშმა  ნიკა მელიასთვის იმუნიტეტის შეჩერებას ხმა არ მისცა.

„მე დარწმუნებული ვარ, ჩემი გადაწყვეტილების სისწორეში. ვწუხვარ, თუკი უხერხულობა შევუქმენი ჩემს კოლეგებს, მაგრამ გადაწყვეტილებას არ შევცვლი, არც შევცვლიდი, თუნდაც ყოფილიყო დამატებითი კონსულტაციები.მე ვფიქრობ, დგება საკითხები, სადაც განსხვავებული აზრი არსებობს. მე მიმაჩნია, რომ ჩემი გადაწყვეტილება იმუნიტეტის შეჩერებასთან დაკავშირებით იყო მართებული და ეს არის ჩემთვის მთავარი,“-ამბობს მარიამ ჯაში.

ნიკა მელიასთვის იმუნიტეტის შეჩერებას მხარი უმრავლესობის 91 დეპუტატმა დაუჭირა.

ხოლო “ქართული ოცნების” ოთხმა წევრმა გუნდისგან განსხვავებით პროკურატურის მოთხოვნას  მხარი არ დაუჭირა. ეს წევრები  მარიამ ჯაში, რომან კაკულია, ბიძინა გეგიძე და ალექსანდრე ერქვანია, არ არის გამორიცხული, გუნდიდან გარიცხონ. 

“მინდა მადლობა გითხრათ და გთხოვოთ, ვინც ამ აქციებს აორგანიზებთ, გადაიფიქრეთ,” – ამ სიტყვებით  შს მინისტრმა, გიორგი გახარიამ მხარდამჭერებს მიმართა. დღეს ცნობილი გახდა, რომ  რესპუბლიკის მოედანზე გახარიას  მხარდამჭერი აქცია იმართება.

გახარიამ განაცხადა, რომ კონტრაქციის შესახებ ინფორმაცია მედიისგან შეიტყო. 

“მსგავსი ღინისძიებები დღეს საერთოდ არ არის საჭირო. მიუხედავად იმისა, რომ მე თითოეულ ადამიანს მინდა ადამიანური მადლობა ვუთხრა, მინდა ვთხოვო, რომ დღეს, როდესაც ჩვენ ყველა ერთად, მოქალაქეებთან ერთად ვცდილობთ მაქსიმალურად დავწიოთ ტემპერატურა, ვებრძოლოთ პოლარიზებას საზოგადოებაში, მსგავსი აქციები მხოლოდ და მხოლოდ გვიშლის ხელს.

მინდა გულწრფელად ვთხოვო მათ და დავარწმუნო, რომ მსგავსი აქციები არ არის საჭირო. ჩვენ ჩვენს საზოგადოებასთან, მოქალაქეებთან ერთად ვცდილობთ ვიპოვით გზა და ყოველთვის გვექნება საშუალება ვისაუბროთ იმ ენაზე, რომ ერთმანეთს არა აქციებით ველაპარაკოთ, არამედ კონსტრუქციულ დიალოგში გადავიყვანოთ ჩვენი საუბარი. მინდა ვთხოვო თითოეულ მოქალაქეს რომელიც მსგავს ღონისძიებას აანონსებს, გადაიფიქრონ, არ არის ეს საჭირო” – განაცხადა  გიორგი გახარიამ.

რუსი კომუნისტი დეპუტატი სერგეი გავრილოვი საქართველოში ჩამოსვლას ისევ გეგმავს. ამის შესახებ დუმის წევრმა რუსულ მედიასთან განაცხადა. “არ შემოვუშვებ, არ შემოვუშვებ საერთოდ გავრილოვი, ახლა, დღეს, არ მაინტერესებს, არის მეათეხარისხოვანი,“ – განაცხადა გახარიამ სერგეი გავრილოვის საქართველოში მორიგი ვიზიტის განზრახვის თაობაზე დასმული კითხვის საპასუხოდ.

“მე იქ პირადი გეგმები მაქვს. ჩვენ შემოდგომაზე ბავშვებთან ერთად წასვლას და მოლოცვას ვგეგმავდით, როცა სიცხეები გადაივლიდა. მე მინდა, რომ ჩემმა შვილებმა ამ ქვეყნის შესახებ იცოდნენ, რადგან მეორე ასეთი ადგილი, როგორიც საქართველოა, ჩვენ არ გვაქვს.” – განაცხადა გავრილოვმა.

შეგახსენებთ, რომ რუსი დეპუტატის საქართველოში ჩამოსვლას ქვეყანაში მძიმე პოლიტიკური პროცესები და საპროტესტო აქციები მოჰყვა. 20 ივნისის მოვლენები უკვე შეფასდა როგორც “გავრილოვის ღამე”.

გავრილოვმა 20 ივნისს, პარლამენტის თავმჯდომარისთვის განკუთვნილი სკამიდან მართლმადიდებლური საპარლამენტთაშორისო ასამბლეის წევრებს სიტყვით მიმართა. ამ ფაქტს ოპოზიციის გაღიზიანება მოჰყვა, მათ გავრილოვისთვის განკუთვნილი ტრიბუნა დაიკავეს და სხდომა ჩაშალეს.

(more…)

გარემოს დაცვისა და სოფლის მეურნეობის მინისტრი 20 ივნისის მოვლენებს ეხმაურება და შს მინისტრსა და პოლიციელებს მადლობას უხდის – განცხადება ლევან დავითაშვილმა მთავრობის სხდომის დასრულების შემდეგ გამართულ ბრიფინგზე გააკეთა. ჟურნალისტის კითხვაზე, უნდა გადადგეს თუ არა გიორგი გახარია, ის გახარიასთვის მადლობის გადახდით პასუხობს.

დავითაშვილი მიიჩნევს, რომ სამართალდამცველებმა ქვეყანა სახელმწიფო გადატრიალებისგან დაიცვეს.

„შეგვეძლო, პირდაპირ განცხადებით დაგვეწყო და მე ამას ვიტყოდი, რომ მადლობა უნდა გადავუხადო, როგორც ჩემმა კოლეგებმა, ბატონ გიორგი გახარიას, ამავე დროს პოლიციელებს, რომლებმაც უზრუნველყვეს მართლწესრიგის შენარჩუნება ქვეყანაში, ქვეყანა იხსნეს სახელმწიფო გადატრიალებისგან და იმისგან, რომ ქვეყანა არ მოექცა ქაოსში და ჩვენ განავითარებს იმ პოტენციალს, რომელიც გვაქვს, ვინარჩუნებთ,“ – განაცხადა ლევან დავითაშვილმა.

ენგურის ხიდის ჩაკეტვის გამო შესაძლოა, აბიტურიენტებმა ეროვნულ გამოცდებში მონაწილება ვერ მიიღონ.ამის შესახებ განცხადება მთავრობის სხდომის დასრულების შემდეგ, შერიგებისა და სამოქალაქო საკითხებში სახელმწიფო მინისტრმა, ქეთევან ციხელაშვილმა გააკეთა.

ციხელაშვილის თქმით, ხელისუფლება ყველაფერს აკეტებს იმისთვის, რომ პრობლემა უახლოეს დღეებში მოგვარდეს.

„განათლების სამინისტროსთან ერთად ვმუშაობთ იმაზე, რომ ამ ვითარების გამო, რომლის მძევლებიც თავად არიან, არ შეეზღუდოთ, საქართველოს უმაღლეს სასწავლებლებში მოხვედრის შესაძლებლობა, არსებობს გარკვეული მიდგომები. თქვენ იცით, რომ ასევე სამშვიდობო გეგმის ფარგლებში, არაერთი სქემა არის განსაზღვრული, რომლითაც ძალიან გამარტივებულად შეუძლიათ ამ ადამიანებს მოხვედრა, თუმცა, აქვე იგულისხმება, რა თქმა უნდა, ეროვნულ გამოცდებთან დაკავშირებული სპეციფიური რეგულაციები და ცოტა ხანში, განვითარებებიდან გამომდინარე, ამ ინფორმაციას ხელმისაწვდომს გავხდით, კიდევ ერთხელ, მთავარი ამოცანა ის არის, რომ ჩვენ არ დაგვჭირდეს დამატებითი ბევრი ზომის მიღებაზეა და რაც შეიძლება მალე მოიხსნას ის შეზღუდვები, რომელიც არის დაწესებული დღეს ენგურის ხიდზე,“ – განაცხადა ქეთევან ციხელაშვილმა.

შეგახსენებთ, რომ ოკუპირებული აფხაზეთის სეფაქტო მთავრობამ ენგურის ხიდი დღეს დილით ცალმხრივად ჩაკეტა.

მიზეზად 20 ივნისის შემდეგ განვითარებული მოვლენები და ის საპროტესტო აქციები დაასახელეს, რომელიც სხვადასხვა ქალაქებში, მათ სორის ზუგდიდშიც ტარდება.

ოკუპირებული აფხაზეთის მთავრობის შეფასებით, ეს მიტინგები პროვოკაციულ ხასიათს ატარებს.

წინასწარი ინფორმაციით, შეზღუდვა 10 დღის განმავლობაში იქნება ძალაში, ხოლო ერთიანი ეროვნული გამოცდები საქართველოში 1 ივლისს დაიწყება და 23 ივლისს დასრულდება.

„მე ვიცი, რომ გახარიას გადადგომა არ იგეგმება და არც არავის გადადგომა არ იგეგმება,“ – ეს განცხადება იუსტიციის მინისტრმა გააკეთა.

წულუკიანის თქმით, ირაკლი კობახიძეს გადადგომის გადაწყვეტილება უმჯობესი იქნებოდა, რომ უფრო ადრე მიეღო ეს გადაწყვეტილება.

„მე ვფიქრობ, რომ ამ სიტუაციაში თუ ვინმეს აწყობს გახარიას გადადგომა, თუ ვინმეს აწყობს მთავრობის გადადგომა და გადაგდება, ეს არიან ის ძალები, რომლებმაც ის პროტესტი, რომელიც თქვენ გქონდათ, მე მქონდა, რომ აღმოჩნდა ოკუპანტი ქვეყნის მოქალაქე იქ, სადაც არ უნდა აღმოჩენილიყო… დღეს ჩვენს ქვეყანაში ანთია, არ მინდა, რომ ვთქვა დიდი მეთქი, მაგრამ ცეცხლი, რომელზეც თქვენ ამბობთ, ახალგაზრდები აპროტესტებენ”- განაცხადა მინისტრმა.