Category: არქივი

შინაგან საქმეთა მინისტრის სატელევიზიო ინტერვიუს სოციალურ ქსელში პოლიტიკოსები, აქტივისტები, არასამთავრობო ორგანიზაციები, მედიის წარმომადგენლები აფასებენ. ტაბულას დირექტორი, თამარ ჩერგოლეიშვილი გახარიას ინტერვიუს ასე აფასებს:

“ბატონო გახარია, ჰედლაინებს გადავავლე მხოლოდ თვალი – თქვენ გქონდათ შესაძლებლობა (სასამართლოში – უფლებაც) დუმილი შეგენარჩუნებინათ და გადამდგარიყავით. ამის ნაცვლად, თქვენ პოსტზე დარჩენა და ტყუილების ლაპარაკი არჩიეთ.

ყველაფერი, რაც თქვით, თქვენ წინააღმდეგ იქნება გამოყენებული.

არ მოგასვენებთ არსად.

სადაც წახვალთ, ყველგან დაგხვდებით.

ყველგან პოლიციის კორდონები დაგჭირდებათ.

ყველგან შერცხვებათ თქვენს დაქვემდებარებულ პირებს თქვენ გამო.

ყველა მნიშვნელოვანი სტუმარი გაიგებს, რომ არალეგიტიმური ბრძანდებით.

კეთროვნად გაქცევთ, სწორედ იმ ცინიზმის გამო, რაც თქვენ ტვ პირველის ეთერში დაღვარეთ.“– წერს ჩერგოლეიშვილი.

რუსთავი2–ის გენერალური დირექტორი, ნიკა გვარამია ინგა გრიგოლიასთან შს მინისტრის ინტერვიუს შემდეგ გახარიას შეუმდგარ ჩიკატილოს და არაადეკვატურ ფსიქოპატს უწოდებს.

“ნამდვილად კარგად ვართ გადარჩენილები. ამ სისხლიან კაცს სტოპი არა აქვს, ნამდვილი ფსიქოპატია და თუ უბრძანეს, მიტინგს ცეცხლსაც დაუშვებს. თუმცა, გადარჩენილები ვართ თუ არა, ჯერ არავინ არ იცის – არსად არ აპირებს წასვლას და არსად არ უპირებენ გაშვებას.

მოკლედ, შსს მინისტრი და უშიშროების საბჭოს მდივანი გვყავს რუსეთის გავლენის აგენტი, ფსიქიურად არამდგრადი, ისტერიული ბოროტი ადამიანი.“– წერს გვარამია.

საერთაშორისო კონფერენცია ბათუმში და შს მინისტრის შეცვლილი დღის წესრიგი – კონფერენციის პროგრამიდან გიორგი გახარიას გამოსვლის ამოღებას, საქართველოს პარლამენტის თავმჯდომარე, არჩილ თალაკვაძე ეხმაურება.

თალაკვაძე განმარტავს, რომ შს მინისტრს სხვა გეგმები ჰქონდა, რის გამოც, ვერ დაესწრო კონფერენციას.

„მე მგონი, ცოტა უცნაური კითხვა არის, როდესაც პარლამენტის თავმჯდომარეს სთხოვთ განმარტებას, თუ მინისტრს, როგორ შეეცვალა თავის სამუშაო განრიგი. თუმცა, მე მაინც არ ავარიდებ თავს კითხვას და გეტყვით, რომ მას ჰქონდა სხვა გეგმები დღის მეორე ნახევარში და შესაბამისად, ვერ დაესწრო კონფერენციის პირველ სამუშაო დღეს,“ – განაცხადა თალაკვაძემ.

საქმე ეხება ბათუმში მიმდინარე საერთაშორისო კონფერენციას, სადაც დღეს სიტყვით შს მინისტრიც უნდა გამოსულიყო, თუმცა, მოულოდნელად, პროგრამაში ცვლილებები შევიდა. გახარია კონფერენციაზე თავდაცვის მინისტრმა ლევან იზორიამ ჩაანაცვლა.

თავად შს მინისტრი კი საერთაშორისო კონფერენციის ნაცვლად, ტვ “პირველის” ეთერში მივიდა.

სისხლიანი ღამის შემდეგ შს მინისტრის პირველ ინტერვიუს, რომელიც „ტვ პირველზე“ მიმდინარეობს, პარლამენტის წინ შეკრებილები უსმენენ.

აქციის მონაწილეები ისმენენ იმ განცხადებებს, რასაც გიორგი გახარია მომხდარი დარბევის შეფასებისას აკეთებს.

მინისტრის თქმით, დარბევის ბრძანება მან გასცა, მიზეზი კი აქციის ძალადობრივი ხასიათი იყო.

გიორგი გახარია ამბობს, რომ პარლამენტის წინ ვითარება საღამოს 10 საათის შემდეგ დაიძაბა და შეკრებილები პარლამენტში შეჭრას ცდილობდნენ. მინისტრის შეფასებით, მომიტინგეებმა პარლამენტზე შტურმი მიიტანეს.

შს მინისტრ გიორგი გახარიას ტელეკომპანია “პირველის” გადაცემა “რეაქციაში“, ჟურნალისტ ინგა გრიგოლიას კითხვებზე პასუხის გაცემა, ტელეკომპანიის შენობის წინ გამართული საპროტესტო აქციის ფონზე მოუწევს.  შს მინისტრი უკვე მივიდა გადაცემაში  და მას  ტელეკომპანიაში შესვლა საპროტესტო აქციის ფონზე მოუწია.  მას ამაზე კომენტარი არ გაუკეთებია.

დღეს 11 ივლისს 8 საათზე  შს მინისტრ გიორგი გახარიას ტელეკომპანია “პირველის” გადაცემა “რეაქციაში“, ჟურნალისტ ინგა გრიგოლიას კითხვებზე პასუხის გაცემა, ტელეკომპანიის შენობის წინ გამართული საპროტესტო აქციის ფონზე მოუწევს.  ანტისაოკუპაციო აქციის ორგანიზატორები და მონაწილეები უკვე შეიკრიბნენ ტვ პირველის შენობასთან სადაც მოითხოვენ შს მინისტრის გადადგომას მოითხოვენ. დღეს ანტისაოკუპაციო  აქციის მონაწილეებმა ბათუმში შს მინისტრს სიტყვით გამოსვლაში შეუშალეს ხელი ხოლო დღეს ტვ პირველში მის  მეორე გამოსვლასაც არ დატოვებენ ხმაურის გარეშე, განაცხადა აქციის ორგანიზატორმა გიგა მაქარაშვილმა.

ნანა ლეჟავა ტელეკომპანია “იმედს” ტოვებს. მის ადგილს პალიტრა ტვ-ის დირექტორი ინგა დადიანი დაიკავებს.  ინგა დადიანი საინფორმაციო სამსახურს უხელმძღვანელებს.

ლეჟავას ტელეკომპანიიდან წასვლის შესახებ ინფორმაცია რამდენიმე თვის განმავლობაში ვრცელდებოდა, არსებული ინფორმაციით ტელეკომპანიას ტოვებს ჟურნალისტი ირაკლი ჩიხლაძეც.

პოლიტიკური გაერთიანება “ქართული ოცნება – დემოკრატიული საქართველოს“ თავმჯდომარემ ბიძინა ივანიშვილმა ევროპული საბჭოს პრეზიდენტს დონალდ ტუსკს ბათუმში უმასპინძლა.

ივანიშვილმა ტუსკს მადლობა გადაუხადა.თავის მხრივ, ტუსკმა ივანიშვილთან შეხვედრა საინტერესოდ შეაფასა და გამოთქვა აზრი, რომ საქართველო კიდევ ბევრ წარმატებას მიაღწევს.

“ბატონო თავმჯდომარევ, დიდი მადლობა ძალიან საინტერესო შეხვედრისთვის. როგორც მოგეხსენებათ, ბათუმში ვიზიტი აღმოსავლეთ პარტნიორობის 10 წლის იუბილისადმი მიძღვნილ კონფერენციაზე ჩემი მისასალმებელი გამოსვლით დავიწყე. შემდეგ შედგა ჩემი შეხვედრები ქალბატონ პრეზიდენტთან, ბატონ პრემიერ-მინისტრთან, ოპოზიციის ლიდერებთან და ახლა მმართველი პარტიის ლიდერს ვხვდები. დიდი მადლობა, ბატონო ბიძინა! ძალიან საინტერესო და შთაგონების მომცემი შეხვედრაა. დღეს თქვენთან, თქვენს ოპონენტებთან, მთავრობასთან და ქალბატონ პრეზიდენტთან შეხვედრების შემდეგ ვგრძნობ, რომ ძალიან კარგი და იმედის მომცემი მომავალი აქვს საქართველოს, არსებული პრობლემების მიუხედავად. ძალიან ღია და გახსნილი კომენტარები გავაკეთეთ მიმდინარე მოვლენების შესახებ. აბსოლუტურად დარწმუნებული ვარ, რომ ერის გაერთიანებული ძალისხმევის პირობებში, სანამ შეგიძლიათ ერთად მოქმედება აზრთა განსხვავებულობის მიუხედავად, პოლიტიკური დებატების პირობებში და ვიდრე ოპტიმისტურად იქნებით განწყობილნი, ასეც იქნება. მადლობას გიხდით ამ შეხვედრისთვის. თავს განსაკუთრებულად და გამორჩეულად ვგრძნობ. მადლობას ვუხდი ქართველ ხალხს და საქართველოს. ვფიქრობ, საქართველოში ყველაფერი შესანიშნავადაა”,- განაცხადა დონალდ ტუსკმა ბიძინა ივანიშვილთან შეხვედრისას.

ბიძინა ივანიშვილმა ტუსკთან პრემიერ-მინისტრობის პერიოდში გამართული პირველო შეხვედრა გაიხსენა.

“მახსოვს ჩემი პრემიერ-მინისტრობის პერიოდი, როდესაც გამოუცდელი პოლიტიკოსი ვიყავი, მასთან მქონდა ყველაზე თბილი შეხვედრა და იმ დღიდან მოყოლებული ჩვენ ძალიან თბილი ურთიერთობები გვაქვს. მას უყვარს საქართველო, ის საქართველოს მეგობარია. განსაკუთრებით სასიამოვნო იყო, როდესაც დღეს მან ჩვენი კლასიკოსი გაიხსენა – ვაჟა-ფშაველას სიტყვები ქართულად წაიკითხა. ამით მან მოხიბლა მთელი საქართველო და მე მას პირადად გადავეცი დიდი მადლობა. ის უყვართ პოლიტიკოსებს საქართველოში – როგორც პოზიციას, ისე – ოპოზიციას. მან მოხიბლა საქართველოს მთელი მოსახლეობა და საზოგადოება მისი ასეთი პოზიციით. მადლობა მას. დღევანდელი სიტუაცია, ამდენი მეგობარი, ამდენი ევროპელი და ძვირფასი სტუმარი ჩამოვიდა დღეს საქართველოში. ეს კიდევ ერთხელ აჩვენებს იმას, რომ საქართველო სწორი მიმართულებით ვითარდება და ჩვენ მტკიცედ გავაგრძელებთ ამ გზას ევროპისკენ. ჩვენი გზაა ევროატლანტიკური სივრცე, ჩვენი გზაა ევროპა და ჩვენ მტკიცედ დავიჭერთ ამ მიმართულებას. ჩვენი მეგობრების დახმარებით ჩვენ ჩავეწერებით ამ ოჯახში – განვითარებული ევროპული სახელმწიფოების რიგში”,- აღნიშნა ბიძინა ივანიშვილმა.