ოკუპირებული აფხაზეთის დე ფაქტო ლიდერი რაულ ხაჯიმბა დღეს ვლადიმერ პუტინს შეხვდება. ამის შესახებ ინფორმაციას ოკუპირებული აფხაზეთის ე.წ. პრეზიდენტის ადმინისტრაცია ავრცელებს. მათი ინფორმაციით, შეხვედრაზე სოციალურ-ეკონომიკური თანამშრომლობისა და ორმხრივი ურთიერთობების შემდგომი განვითარებს საკითხებს განიხილავენ.
მოლაპარაკებები სოხუმის საოკუპაციო რეჟიმის ლიდერსა და რუსეთს პრეზიდენტს შორის სოჭში, სამუშაო ვიზიტის ფორმატში შედგება.
ნინოწმინდაში მომხდარ ავტოსაგზაო შემთხვევას 2 ახალგაზრდა მამაკაცი ემსხვერპლა, ერთი ადამიანი კი დაშავდა.
დაშავებული სასწრაფო სამედიცინო დახმარების ბრიგადამ ნინოწმინდის საავადმყოფოში გადაიყვანა.
მომხდარზე გამოძიება სისხლის სამართლის კოდექსის 276-ე მუხლის მე-6 ნაწილით მიმდინარეობს.
„რუსთავი 2-ის” ახალმა გენერალურმა დირექტორმა, პაატა სალიამ არხის მთავარი იურისტი თანამდებობიდან გაათავისუფლა. თამთა მურადაშვილის თქმით, კონტრაქტის შეწყვეტის შესახებ შეტყობინება ელექტრონული ფოსტით შვებულებაში ყოფნის დროს მიიღო.
როგორც თამთა მურადაშვილი აცხადებს, მას მეილზე დღეს შუადღისას შეტყობინება მიუვიდა, სადაც ეწერა, რომ მას სამსახურიდან ათავისუფლებდნენ. იურისტი ამბობს, რომ შეტყობინებაში მითითებულია, რომ მას ხელშეკრულების დარღვევის საფუძველზე ათავისუფლებენ, თუმცა კონკრეტულად რაში გამოიხატება ეს დარღვევა, ამის შესახებ შეტყობინებაში არაფერი წერია.
თამთა მურადაშვილი ფიქრობს, რომ ეს დასაწყისია იმისა, რომ მომავალში ზეწოლა უკვე ჟურნალისტებზე განხორციელდება, მათ კი იურისტი არ ეყოლებათ, რათა დახმარებისთვის მიმართონ.
„პარასკევს, 2 აგვისტოს, ჩემსა და პაატა სალიას შორის შედგა საუბარი, საუბარი იყო არასასიამოვნო იმ კუთხით, რომ ის, პრაქტიკულად, მაიძულებდა, რომ წავსულიყავი სამსახურიდან. მე ვითხოვდი შვებულებას. შევთანხმდით ამაზე, რომ შვებულებაში გავიდოდი დღეიდან, ანუ 5 აგვისტოდან, თუმცა დღეს, შუადღით ვიღებ HR ხელმძღვანელისგან e-mail შეტყობინებას, რომლითაც მეცნობა, რომ პაატა სალიამ არ დააკმაყოფილა ჩემი შვებულების მოთხოვნა და პლუს, გამათავისუფლა სამსახურიდან. ჩავიბარე შეტყობინება დღეს ხელზე თუ რა საფუძვლებით მიშვებენ სამსახურიდან. მითითებულია, რომ დავარღვიე ხელშეკრულების კონკრეტული პუნქტები და ხელშეკრულების დარღვევის გამო მიშვებენ სამსახურიდან, თუმცა არ არის მითითებული, რა დავარღვიე, კონკრეტულად, რაში გამოიხატა ჩემი მხრიდან დარღვევა. ერთადერთი, რასაც ვფიქრობ, ეს არის რომ, ჟურნალისტები, ალბათ, იქნებიან უფრო საფრთხის ქვეშ იმიტომ, რომ მათ არ ეყოლებათ იურისტი, რომელსაც მიმართავენ და საკუთარი უფლებების დაცვას შეძლებენ. მე ვფიქრობ, ეს არის დასაწყისი იმ ზეწოლისა, რაც შეიძლება განხორციელდეს ჟურნალისტებზე,“ – განაცხადა თამთა მურადაშვილმა.
სამაუწყებლო კომპანია ”რუსთავი 2-ის” გენერალური დირექტორმა სამსახურიდან იურისტის, თამთა მურადაშვილის გათავისუფლების შესახებ კომენტარი გააკეთა. პაატა სალია ამბობს, რომ მურადაშვილმა ხელშეკრულების კონკრეტული პუნქტები დაარღვია.
„თამთას შვებულებაზე დასტური მე არ მიმიცია. თამთამ წარმომიდგინა დოკუმენტი, რომლითაც, თითქოს, დიტო საძაგლიშვილი უშვებდა მას შვებულებაში, რაზეც მას განვუცხადე, რომ არ არის ეს ის წესი, რაც არის კომპანიაში დადგენილი და, შესაბამისად, ჩემთან უნდა შეთანხმებულიყო და მე ამაზე პასუხს გავცემდი. არ არის სიმართლე, რომ, თითქოს, ის ჩემთან იყო შეთანხმებული. მეორე რაც შეეხება, არსებობდა გათავისუფლების საფუძველი, მე მითითებული მაქვს შეტყობინებაში, რომელიც მას გაეგზავნა, ის ნორმები, რომელიც დაარღვია, შესაბამისად, მას აქვს უფლება, მიმართოს სასამართლოს, იურისტია და თვითონ იცის, რა ზომებს უნდა მიმართოს. თუ მას აქვს პრეტენზია ამ გადაწყვეტილებასთან დაკავშირებით, შესაბამისად, სასამართლოში გავცემთ პასუხს,“ – განაცხადა პაატა სალიამ.
სადღესასწაულო ღონისძიებებთან დაკავშირებული სახელმწიფო შესყიდვები, როგორც წესი, გამოირჩევა იმით, რომ მაღალია უტენდერო, პირდაპირი შესყიდვების წილი. პირდაპირი შესყიდვის საფუძვლად კი ძირითადად გადაუდებელი აუცილებლობა ან სახელმწიფოებრივი და საზოგადოებრივი მნიშვნელობის ღონისძიება სახელდება.
მიუხედავად იმისა, რომ ოფიციალური დღესასწაულების თარიღები ყოველთვის დიდი ხნით ადრე არის ცნობილი რადგან ყოველ წელს იგივე თარიღში იმართება, ცენტრალური ხელისუფლების უწყებები და მუნიციპალიტეტები მაინც ვერ ახერხებენ დროულად დაიწყონ სადღესასწაულო ღონისძიებებისთვის მზადება და დაჩქარებულად და მითუმეტეს, პირდაპირი შესყიდვებით არ დახარჯონ ბიუჯეტის ფული. ორგანიზაციის აზრით, ეს მიანიშნებს ტენდერების დაგეგმვის პროცესის სერიოზულ ჩავარდნაზე,, რაც მნიშვნელოვან პრობლემად რჩება. „საერთაშორისო გამჭვირვალობა – საქართველო“ უკვე წერდა ახალი წლის ღონისძიებებისთვის საჭირო საქონლის და მომსახურების პირდაპირი შესყიდვების ანალოგიურ პრობლემაზე.
კვლევა მოიცავს ცენტრალური ხელისუფლების უწყებების და ხუთი თვითმმართველი ქალაქის (თბილისი, ბათუმი, ქუთაისი, რუსთავი, ფოთი) მიერ დამოუკიდებლობის დღისადმი მიძღვნილი ღონისძიებების დაფინანსებას.
საქართველოს მთავრობის 2019 წლის 3 მაისის N1030 განკარგულებით საქართველოს დამოუკიდებლობის დღის – 26 მაისისადმი მიძღვნილი ღონისძიებების ორგანიზების სამოქმედო გეგმა დამტკიცდა. გეგმის მიხედვით, 20-მდე სახელმწიფო უწყებას, თბილისის მერიას და რამდენიმე სახელმწიფო კომპანიას სხვადასხვა ღონისძიების ორგანიზება დაევალათ.
საკითხის შესასწავლად საერთაშორისო გამჭივრვალობა საქართველომ 26 მაისის შესყიდვებთან დაკავშირებული საჯარო ინფორმაცია ცენტრალური ხელისუფლების 17 უწყებიდან და 5 თვითმმართველი ქალაქის მერიიდან 7 ივნისს გამოვითხოვა. მიუხედავად იმისა, რომ ინფორმაციის გამოთხოვიდან თვენახევარზე მეტი გავიდა, ეკონომიკისა და მდგრადი განვითარების სამინისტრომ, საგარეო საქმეთა სამინისტრომ და ტურიზმის ეროვნულმა ადმინისტრაციამ საჯარო ინფორმაცია არ მიაწოდა, რითაც ამ უწყებებმა დაარღვიეს საქართველოს ზოგადი ადმინისტრაციული კოდექსი.
ტურიზმის ეროვნული ადმინისტრაციის და საგარეო საქმეთა სამინისტროს შესყიდვებზე ინფორმაცია ორგანიზაციამ სახელმწიფო შესყიდვების სისტემაში მოიპოოვა. ეკონომიკისა და მდგრადი განვითარების სამინისტროზე კი ინფორმაცია არ აღმოჩნდა ხელმისაწვდომი.
უწყებებიდან მიღებული და მოძიებული ინფორმაციიდან გაირკვა, რომ 26 მაისის ღონისძიებებზე, სულ, 6.8 მილიონ ლარზე მეტი დაიხარჯა, საიდანაც 6.5 მილიონ ლარზე მეტი, მთლიანი ხარჯის 97%, პირდაპირი შესყიდვების გზით დაიხარჯა.
შესყიდვების 95% ტენდერით განახორციელა რუსთავის მერიამ, კერძოდ, ა(ა)იპ ქალაქ რუსთავის სახელოვნებო, სპორტისა და ახალგაზრდობის განვითარების ცენტრმა. თბილისის მერიამ ტენდერის გამოყენებით დახარჯა თანხის 36%. ფოთის მერიას დამოუკიდებლობის დღის ღონისძიებებზე თანხა არ დაუხარჯავს. ყველა სხვა უწყების შემთხვევაში თანხის 100% პირდაპირი შესყიდვების გზით დაიხარჯა.
პირდაპირი შესყიდვებიდან 277 268 ლარი დაიხარჯა მუსიკალური ნომრების შემსრულებლების ანაზღაურებაზე. აქედან, 231 200 ლარი შემოქმედებითმა საქართველომ დახარჯა, 36 500 ლარი – ბათუმის მერიამ და 9 568 ლარი – ქუთაისის მერიამ
დამოუკიდებლობის დღის აღნიშვნასთან დაკავშირებული ღონისძიებებისთვის ერთი ან რამდენიმე პირდაპირი შესყიდვით 100 ათას ლარზე მეტი თანხა 17-მა კომპანიამ მიიღო. ჯამში ამ 17-მა კომპანიამ 4.8 მლნ ლარი მიიღო, რაც პირდაპირი შესყიდვებით დახარჯული თანხის 74%-ია.
საერთაშორისო გამჭვირვალობა საქართველო ხელისუფლებას რეკომენდაციითაც მიმართავს:
ცენტრალური ხელისუფლების უწყებებმა და მუნიციპალიტეტებმა უკეთ უნდა ჩამოაყალიბონ შესყიდვების წლიური გეგმები, სადაც მინიმუმ რამდენიმე თვით ადრე იქნება ცნობილი, თუ რის შესყიდვას გეგმავენ 26 მაისის და სხვა სადღესასწაულო ღონისძიებებისათვის. ეს აამაღლებს კონკურენციის დონეს და შემსყიდველს თანხის დაზოგვის და უფრო ხარისხიანი საქონლისა და მომსახურების მიღების საშუალებას მისცემს;
საქართველოს მთავრობა და სახელმწიფო შესყიდვების სააგენტო მკაცრად უნდა მიუდგენენ სადღესასწაულო ღონისძიებებთან დაკავშირებულ პირდაპირ შესყიდვებზე თანხმობის გაცემას.
ქვიშხეთში, სარკინგზო გვირაბის მშენებლობაზე დასაქმებული მუშებსა და დამსაქმებელს შორის შეთანხმება არ შედგა.
პროფკავშირების წარმომადგენლის თქმით, მშენებლობაზე დასაქმებული სამოცივე მუშა გაფიცულია და ისინი სამუშაოს მანამდე არ დაუბრუნდებიან, სანამ მათი მოთხოვნები არ დაკმაყოფილდება.
პროფკავშირების წარმომადგენელი, ილია ლეჟავა ამბობს, რომ საქართველოს რკინიგზა პასუხისმგებლობას ვერ გრძნობს, როდესაც დამსაქმებლად ჩინეთის 23-ე ბიურო შემოჰყავს.
“სამწუხაროდ, მოლაპარაკება ვერ შედგა, ადმინისტრაცია არ დათანხმდა, რომ დააკმაყოფილოს ამ ადამიანების მოთხოვნა. რა თქმა უნდა, ამ ადამიანების მოთხოვნა არის სამართლიანი, მათ უნდა მიიღონ ეს ანაზღაურება. პროტესტი გრძელდება და როგორც თავად დასაქმებულები ამბობენ კიდევ უფრო მწვავე ფორმებს მიიღებს”, — აღნიშნა რუსთავი 2-თან საუბრისას ილია ლეჟავამ.
ქვიშხეთის სარკინგზო გვირაბის მშენებლობაზე დასაქმებული მუშები დღეს გაიფიცნენ. ისინი დღიური ხელფასის 20 ლარიდან 30 ლარამდე გაზრდას და შრომის პირობების გაუმჯობესებას მოითხოვენ.
კოალიცია „მედიის ადვოკატირებისთვის“ პროკურატურას მოუწოდებს,“რუსთავი 2“-ის დამფუძნებლების ქონებრივი უფლების იძულებით გადაცემის ფაქტზე გამოძიება ლოგიკურ დასასრულამდე მიიყვანოს.
როგორც კოალიციის მიერ გავრცელებულ განცხადებაშია აღნიშნული, ვინაიდან საკითხი ეხება ერთ-ერთ ყველაზე რეიტინგულ მედიასაშუალებას, რომელიც წლებია მის გარშემო მიმდინარე პროცესებით საზოგადოების ყურადღების ცენტრშია, სახეზეა მაღალი საჯარო ინტერესი და საქმის მასალების გასაჯაროების აუცილებლობა.
„2019 წლის 1 აგვისტოს ცნობილი გახდა, რომ ,,რუსთავი 2“-ის დამფუძნებლები ჯარჯი აქიმიძე და დავით დვალი, ქიბარ ხალვაშის შეთავაზებაზე – მიიღონ კომპანიის 40%, უარს ამბობენ, სამართლებრივ დავას განაგრძობენ და ხალვაშთან მოლაპარაკებებს წყვეტენ. ,,რუსთავი 2“-ის დამფუძნებლების განცხადების საფუძველზე, მათი ქონებრივი უფლების იძულებით გადაცემის ფაქტზე გამოძიება 2012 წლის 08 დეკემბერს დაიწყო და ისევ გრძელდება. აღნიშნულ საქმეზე არაერთი ურთიერთგამომრიცხავი მოსაზრება გამოითქვა თავად ,,რუსთავი 2“-ის გარშემო მიმდინარე პროცესებში ჩართული პირების მხრიდან. კოალიციას მედიის ადვოკატირებისთვის მიაჩნია, რომ ვინაიდან საკითხი ეხება ერთ-ერთ ყველაზე რეიტინგულ მედიასაშუალებას, რომელიც წლებია მის გარშემო მიმდინარე პროცესებით საზოგადოების ყურადღების ცენტრშია, სახეზეა მაღალი საჯარო ინტერესი და საქმის მასალების გასაჯაროების აუცილებლობა. აღსანიშნავია, რომ პროკურატურას მაღალი საჯარო ინტერესიდან გამომდინარე თავისი ინიციატივით არაერთხელ გაუსაჯაროებია კონკრეტული სისხლის სამართლის საქმის მასალები.
კოალიცია მოუწოდებს საქართველოს პროკურატურას, “რუსთავი 2“-ის დამფუძნებლების ქონებრივი უფლების იძულებით გადაცემის ფაქტზე გამოძიება ლოგიკურ დასასრულამდე მიიყვანოს,” – ნათქვამია განცხადებაში.
ხელმომწერი ორგანიზაციები არიან: „საქართველოს ახალგაზრდა იურისტთა ასოციაცია“, „მედიაკლუბი“, „საქართველოს ჟურნალისტური ეთიკის ქარტია“, „ინფორმაციის თავისუფლების განვითარების ინსტიტუტი“, „ღია საზოგადოების ფონდი“, „რეგიონულ მაუწყებელთა ალიანსი“, „ლიბერალური აკადემია თბილისი“, „საქართველოს რეგიონული მედიის ასოციაცია“, „სატელევიზიო ქსელი“, „საქართველოს მცირე და საშუალო სატელეკომუნიკაციო ოპერატორთა ასოციაცია“, „საქართველოს დემოკრატიული ინიციატივა“.
ქობულეთში ზღვაში 52 წლის მამაკაცი დაიხრჩო. შემთხვევა ცოტა ხნის წინ მოხდა. მამაკაცი ადგილობრივი მცხოვრები იყო. არსებული ინფორმაციით, მამაკაცი ზღვაში ძაღლის გამოსაყვანად შევიდა, თუმცა ძლიერი ტალღების გამო, უკან გამოსვლა ვეღარ მოახერხა და დაიხრჩო.
მაშველებმა სანაპიროზე მამაკაცის ტანსაცმელი იპოვეს და მისი ძებნა დაიწყეს. მამაკაცი წყლიდან გარდაცვლილი ამოიყვანეს.
მომხდარზე გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.
დღეს შავ ზღვაში ძლიერი შტორმია, რის გამოც საგანგებო სიტუაციების სამსახურმა უსაფრთხოების ზომები გაამკაცრა. ისინი დამსვენებლებს ზღვაში ბანაობას უკრძალავენ და უსაფრთხოების ზომების დაცვისკენ მოუწოდებენ.
თურქმენეთის პრეზიდენტი გურბანგული ბერდიმუჰამედოვი მისი გარდაცვალების შესახებ გავრცელებული ჭორების შემდეგ ახალ ვიდეორგოლში გამოჩნდა.კლიპში პრეზიდენტი “ჯოჯოხეთის კარიბჭესთან” მანქანით მოგზაურობს და გარს უვლის. ვიდეოს სახლწოდებაა “როგორ გავატარე ზაფხული”
როგორც აღმოჩნდა თურქმენეთის პრეზიდენტის დასვენება სხვადასხვა აქტივობას მოიცავდა – ვარჯიში, ცხენზე ჯირითი, სტუდიაში მუსიკის დაწერა.
ცეცხლმოკიდებული დიდი ორმო,რის გარშემოც პრეზიდენტი ბერდიმუჰამედოვი მანქანით წრეებს უვლის, ქარაკუმის უდაბნოში ბუნებრივი აირის კრატერია. ადგილობრივებმა მას ჯოჯოხეთის კარიბჭე დაარქვეს.
შეგახსენებთ, რომ 20 ივლისს გავრცელდა ინფორმაცია, რომ თურქმენეთის პრეზიდენტი გურბანგული ბერდიმუჰამედოვის გარდაიცვალა.
ოფიციალურმა უწყებებმა ეს ინფორმაცია არ დაადასტურეს.ბერდიმუჰამედოვი კამერებთან 25 ივლისს გამოჩნდა. პრეზიდენტზე ჭორების გავრცელებისთვის კი 3 ადამიანი დააკავეს.
ესტონეთი რუსეთის მიერ უკრაინის აღმოსავლეთ რეგიონებში დარიგებულ პასპორტებს არ აღიარებს. ამის შესახებ ინფორმაციას ადგილობრივი მედია, ქვეყნის საგარეო საქმეთა სამინისტროზე დაყრდნობით ავრცელებს.
ესტონეთის საგარეო საქმეთა მინისტრისგანცხადებით, ეს არის პასუხი აპრილში ვლადიმერ პუტინის მიერ გაცემულ განკარგულებაზე, დონბასის მოსახლეობისთვის პასპორტების დარგების შესახებ.
„ეს არის უკრაინის სუვერენიტეტის ძირის გამოთხრა და ის სავსებით ეწინააღმდეგება მინსკის შეთანხმების იდეას“, – აცხადებს ესტონეთის საგარეო საქმეთა მინისტრი.
შეგახსენებთ რომ 24 აპრილს რუსეთის პრეზიდენტმა, ვლადიმერ პუტინმა დონბასის და ლუგანსკის თვითგამოცხადებული რესპუბლიკების მცხოვრებლებისთვის რუსეთის პასპორტების გაცემის წესის გამარტივების შესახებ განკარგულებას მოაწერა ხელი.