ტელეკომპანია “იმედის” თანამშრომელი, პაატა შამუგია, იმ პროტესტზე საუბრობს, რომელიც 11 აგვისტოს ტელეიმედის ეთერში აგვიტოს ომზე გადაღებული ფილმის გაშვებას მოჰყვა.
პაატა შამუგია სოციალურ ქსელში წერს, რომ ფილმის ეთერში გაშვებას, ჟურნალისტების მწვავე პროტესტი მოჰყვა და თანამშრომლების ნაწილმა შიდა ჯგუფში კატეგორიულად მოითხოვა ფილმის ავტორის დასახელება და საჯარო ბოდიშის მოხდა.
“ორშაბათს Toresa-მ დაპოსტა „იმედის“ შიდა ჯგუფში ის ავად სახსენებელი ფილმი და ძალიან გაბრაზებული კომენტარიც მოაყოლა. მეც ვნახე ვიდეო და მარტივად იყო საქმე: როცა აგვისტოს ომზე იღებ მავნებლურ „ფილმს“ და იქ პუტინის დანაშაულზე, სულ ცოტა, გადაკვრითაც არ ამბობ არაფერს, ეს მძიმე დიაგნოზია. მშვიდობით ომს მოიგებ კი არა, აგერ, გუგუტიანთკარში მოსახლეობას სახლების ზღურბლებზე უვლებენ მავთულხლართებს, და ასეთი დერჟავნიკული აგრესიის გამართლებას (რაგინდარა მიზეზით) ვინც ცდილობს, ყველა იდიოტია ჩემს თვალში. სამწუხაროდ, რუსეთთან არ გამოდის არც ომი (ფიზიკური განსხვავების გამო შეუძლებელია) და არც მშვიდობა (მორალური განსხვავების გამოა შეუძლებელი. იმპერიალისტური ლოგიკა მხოლოდ კოლონიურ მორალს აღიარებს. აგერ, არ ვეუბნებით არაფერს, ხელისუფლება მთლად ხელებს უკოცნის, მაგრამ მაინც მოიწევენ და მოიწევენ, მოვლენ თბილისამდეც, ერთბაშად ჩვენმა მხეცმა გახარიამ არ აღკვეთოს).
მოკლედ, რამდენიმე ადამიანმა შიდა ჯგუფშივე კატეგორიულად მოვითხოვეთ, ამ მავნებლური ანონიმური „ფილმის“ ავტორის გამოჩენა და პლუს, საჯარო მობოდიშებაც, წინააღმდეგ შემთხვევაში, არხზე ჩვენს დარჩენას აღარ განვიხილავდით. ამ რამდენიმე დღის განმავლობაში პარალიზებული იყო ნიუსრუმი. პარალელურად, გამოვიდა ნიკა ლალიაშვილი და ვიდეოზე პასუხისმგებლობას მე ვიღებო (ტექსტი იყო „ბოკო-ჰარამის“ ტრადიციებში), მაგრამ არანაირი სინდისის ქენჯნა, თუნდაც, ჟურნალისტების დემორალიზების გამო, იმის გამო, რომ ამ დღეების განმავლობაში მისი უდანაშაულო თანამშრომლები ტალახში ათრია მთელმა ქვეყანამ. პირიქით, იქით მამარდაშვილის აჩრდილს ამოეფარა (ეტყობა, მამარდაშვილის იმ ჩანაწერებამდე ჯერ არ მისულა, სადაც რუსული იმპერიალიზმის შესახებ საუბრობს), აქეთ – ქართველი ხალხის სენტიმენტებს, და ვითომც არაფერი.
„იმედიდან“ წამოსვლა ყველაზე იოლი და მსუბუქი გამოსავალი იქნებოდა. ამაზე დღესაც ვისაუბრეთ. როდესაც ჟურნალისტებისა და რედაქტორების ასეთი ერთსულოვანი და ძალიან ღირსეული პროტესტი ვნახეთ, ვფიქრობ, ამ ეტაპზე ამ ღირსეული ადამიანების მიტოვება და ლალიაშვილისთვის სივრცის მოსუფთავება არ იქნებოდა ყველაზე სწორი საქციელი. ლალიაშვილს ამწუთას ნულოვანი ლეგიტიმაცია აქვს არხზე, „იმედის“ უკლებლივ ყველა თანამშრომელმა საჯაროდ დაგმო ის, რაც გავიდა ეთერში, შესაბამისად, ტელევიზიის დამფუძნებლებს, მგონი, ძალიან გასაგები სიგნალი გაეგზავნათ და, იმედია, მიიღებენ შესაბამის გადაწყვეტილებას. რაც მთავარია, სიგნალი გაეგზავნა ყველას – ის, რომ ამ ქვეყანაში რუსოფილიური განწყობის შექმნა არის შეუძლებელი მისია, სულ ტყუილად აფინანსებს კრემლი თავის აგენტებს, წყალში იყრება ეგ ფული, ძვირფასებო.
ასეთი ამბებია.”-წერს პაატა შამუგია.
40 წუთიანი ფილმი 2008 წლის სისხლიან მოვლენებზე სრულ პასუხისმგებლობას მაშინდელ ხელისუფლებას აკისრებს და პუტინ-მედვედევის ბრალეულობას 11 წლის განვითარებულ პროცესებზე მინიმუმამდე დაჰყავს. მას შემდეგ, რაც ფილმს საზოგადოების პროტესტი მოჰყვა, იმედის გენერალური დირექტორის მოადგილემ, ნიკოლოზ ლალიაშვილმა განაცხადა, რომ ფილმი მისი პროდიუსერობით დამზადდა.
“მედია-ჩექერმა” ტელეკომპანიის ფილმი დეტალურად შეისწავლა და დაწერა რომ ფილმში მნიშვნელოვანი ფაქტები მიჩქმალულია და მოვლენები ცალმხრივად არის გადმოცემული. სიუჟეტს 6 რესპონდენტი ჰყავს და ფორმალური ბალანსისთვისაც კი არ არის წარმოდგენილი წინა ხელისუფლების არც ერთი წარმომადგენელი.
