newsreport.ge

Category: არქივი

  • კორონავირუსით ინფიცირებულ ბენო ქაშაკაშვილის მეუღლე იხსენებს, რა ვითარებში გადაედოთ ვირუსი

    კორონავირუსით დაავადებულ პაციენტთა შორის “ქართული ოცნების” წევრი, სასტუმრო “ვინოტელის” მფლობელი ბენო ქაშაკაშვილი და მისი მეუღლე არიან.  ამის შესახებ მისი მეუღლე თეა ჯოხაძე სოციალურ ქსელში წერს.

    “მეგობრებო, ალბათ ბევრმა უკვე იცით, რომ მე და ჩემი მეუღლე კორონავირუსის დიაგნოზით ვიმყოფებით საავადმყოფოში. ეს რამდენიმე დღეა, გასაგები მიზეზების გამო არ მქონდა საშუალება ჩართული ვყოფილიყავი სოციალურ ქსელებში. მინდა, ნათელი მოვფინო მოვლენებს, რადგან ვიცი რომ ამ საკითხთან დაკავშირებით მაღალი საზოგადოებრივი ინტერესია.

    11 მარტს რესტორან “ვინოტელში” ჩვენი მეგობრის გარდაცვალებიდან 40 დღის თავთან დაკავშირებით გაიმართა სადილი. სტუმრებს შორის ვიყავით მე და ჩემი ოჯახის წევრები. ჯამში, სადილს ესწრებოდა 20 ადამიანი, მათ შორის 16 ქართველი (ჩემი და ჩემი ოჯახის წევრების ჩათვლით) 3 რუსი და ერთი შვეიცარიელი. კვირას, 15 მარტს დამირეკეს დაავადებათა კონტროლის ცენტრიდან და მაცნობეს რომ ჩვენ ქართველ მეგობარს, რომელიც ესწრებოდა ამ სადილს, ლუგარის ლაბორატორიის ტესტირების თანახმად დაუდგინდა კორონავირუსი – SARS-COV2. მე ვიყავი მისი „მჭიდრო კონტაქტი“, რადგან ახლო დისტანციაზე ვისაუბრეთ ნახევარი საათის განმავლობაში, თუმცა არ გადამიკოცნია და არც ხელი ჩამომირთმევია. მე მაშინვე, დაუყოვნებლივ გადავედი თვითიზოლაციაში.

    ბენოზე (ჩემს მეუღლეზე) თვითიზოლაციის რეკომენდაცია არ ვრცელდებოდა. მე, იმავე დღეს განმივითარდა სიმპტომები, კერძოდ დაბალი სიცხე და მსუბუქი ხველება, რის გამოც გამოვიძახე გენეტიკის ლაბორატორიის კერძო ტესტი, რომელიც ორშაბათს, პირველივე შესაძლებლობისთანავე მოვიდა და სამშაბათს უკვე შევიტყვე, რომ ტესტის პასუხი დადებითი იყო. თავდაპირველად, ბენოს პასუხი იყო უარყოფითი, თუმცა განმეორებითმა ტესტმა, რომელიც სამშაბათს გაკეთდა უკვე დადებითი პასუხი დააფიქსირა.

    რაც შეეხება სტუმრებს, ისინი თავს კარგად გრძნობენ და მინდა ავღნიშნო, რომ მათ არ შემოუტანიათ მიმდინარე ვირუსი. კორონავირუსი ჩვენ გადაგვედო ქართველი მეგობრისგან, რომელიც ასევე არ ყოფილა უცხოეთში. ბენოს, ჩემს მეუღლეს, კი მე გადავდე. ჩემი და ბენოს შემდგომ კონტაქტებს შორის, მადლობა ღმერთს ჯერ არავის დაუდგინდა აღნიშნული ვირუსი.

    ვინოტელშიც და საქართველოს თანაინვესტირების ფონდშიც დაუყოვნებლივ ჩატარდა სადეზინფექციო სამუშაოები და ამ ეტაპზე ორივე დაწესებულება დაკეტილია.

    მე და ბენო თავს კარგად ვგრძნობთ და ძალიან მადლობელი ვართ იმ თანადგომისთვის რომელსაც ბევრი თქვენგანისგან ვგრძნობთ.”- წერს თეა ჯოხაძე სოციალურ ქსელში.

  • კორონავირუსით დაინფიცირებული ერთ-ერთ პაციენტი იუნკერია

    თავდაცვის სამინისტროს სამხედრო ჰოსპიტალის დირექტორი, დავით ბარლიანი აცხადებს, რომ კორონავირუსით დაინფიცირებულთაგან ერთ-ერთი იუნკერია. დღეს, 21 მარტს COVID-19-ის სამი ახალი შემთხვევა დაფიქსირდა, აქედან ორი სწორედ სამხედრო ჰოსპიტალშია მოთავსებული. ჯამში კი საქართველოში კორონავირუსის 47 შემთხვევაა დაფიქსირებული. 

    ბარლიაინის თქმით, ორივე პაციენტი 20-დან 25 წლამდეა და საფრანგეთში მოგზაურობის ისტორია აქვს. კლინიკის დირექტორი ამბობს, რომ იუნკერი საქართველოში 16 მარტს ჩამოვიდა და მას შემდეგ კარანტინშია.

  • აშშ-ში ტუალეტის ქაღალდებით სავსე ფურგონი გაიტაცეს

    ჩრდილოეთ კაროლინაში მამაკაცმა ტუალეტის ქაღალდებით სავსე სატვირთო მანქანა გაიტაცა. ამის შესახებ ინფორმაციას Fox News-ი ავრცელებს.  პოლიციამ არ იცოდა გატაცების შესახებ, როდესაც გზატკეცილზე შეამჩნია ფურგონი, რომელიც წესებს არღვევდა.

    პოლიცია მას დაედევნა და მოპარული ტუალეტის ქაღალდები  იპოვა. სამართალდამცველებმა სატვირთო ავტომობილში 8 ტონა ტუალეტის ქაღალდი აღმოაჩინეს.

  • “ჰიგიენის წესების დაცვა ხელს არ უშლის რწმენას, ნუ ჩავყრით წყალში ექიმების შრომას” – სურსათის მართვის შტაბის უფროსი

    სურსათის მარაგებისა და ფასის მონიტორინგის შტაბის უფროსის, პროფესიით ეპიდემიოლოგ თენგიზ კალანდაძის განცხადებით, არ ეთანხმება ეკლესიის მოსაზრებას იმაზე, რომ საეკლესიო ღვთისმსახურებისას ვირუსის გავრცელების რისკი არ არის. მისი თქმით, ადამიანების სიმჭიდროვე საფრთხისშემცველია და დაუშვებელია ერთი კოვზის რამდენიმე პირის მიერ გამოყენება.

    “ვთხოვ ყველას, როგორც მოსახლეობას, ასევე, ეკლესიას ნუ ჩავყრით წყალში ჩვენი ექიმებისა და ეპიდემიოლოგების თავდადებულ შრომას და ნუ მივცემთ საშუალებას, რომ ვირუსი გავრცელდეს ეკლესიიდან

    რატომ არ ამბობენ ამას არ ვიცი, ეტყობა ერიდებიან და ეს გასაგებია, მაგრამ მე პირდაპირ გეტყვით: დიახ, ეს საშიშია… ძალიან მარტივად ვიტყვი, როგორც სპეციალისტი, რომ ჰიგიენური წესების დაცვა ხელს არ უშლის რწმენას.დღეს ჩვენ გავდივართ დანის პირზე, მაქსიმალურად შენარჩუნებელია ეს ჩვენი ექიმების ძალისხმევით და პროფესიონალიზმით და ვთხოვ ყველას, ერთობლივად მივიღოთ ის გადაწყვეტილება, რომ ბოლომდე გავიდეთ გამარჯვებით.რწმენა თუ გაქვს ძალიან კარგია და შესანიშნავია, სახლში ვილოცოთ დროებით, რამე მნიშვნელობა აქვს ამას? ზიარების პროცედურები გასაგებია, მაგრამ რწმენით ვილოცოთ სახლში, გულით გვიყვარდეს უფალი”,-   განაცხადა მან TV პირველის ეთერში.

  • პაციენტებს, რომლებიც 15-16 დღეა საავადმყოფოში იმყოფებიან, ტესტირება უტარდება და მათი მდგომარეობა გაუმჯობესებულია – ეზუგბაია

    თბილისის ინფექციური საავადმყოფოს სამედიცინო დირექტორის მარინა ეზუგბაიას განცხადებით, იმ ინფიცირებულ პაციენტებს, რომლებიც 15-16 დღეა ინფექციურში იმყოფებიან, პერიოდულად უტარდება ტესტირება და მათი მდგომარეობა დინამიურად გაუმჯობესებულია. როგორც ეზუგბაიამ ჟურნალისტებს განუცხადა, მათი ტესტის პასუხები სუსტი დადებითია.

    მისივე თქმით, გუშინ 21 პაციენტზე ჩატარდა ტესტი და მათგან დადებითი მხოლოდ 1 იყო.

    “დღეისთვის საქართველოში 47 შემთხვევა დასტურდება. გუშინ ჩვენთან 21 ტესტი ჩატარდა და ერთთან მივიღეთ დადებითი, დანარჩენთან – უარყოფითი პასუხია. პარალელურად, როგორც იცით, ის პაციენტები, რომლებიც შემოსულები არიან და გავიდა დაახლოებით 15-16 დღე, პერიოდულად ტარდება მათთან ტესტირება. ჯერჯერობით, დინამიურად გაუმჯობესელია, სუსტი დადებითი მაჩვენებელი აქვთ ტესტის შედეგის, რაც უკვე ნიშნავს, რომ ალბათ, იმ კრიტერიუმით, რამდენ დღეშიც გამეორება უნდა, ალბათ უკვე ნეგატიური, ანუ უარყოფითი პასუხი იქნება”, – განაცხადა ეზუგბაიამ.

  • საქართველოში კორონავირუსით ინფიცირებულთა რიცხვი 47-მდე გაიზარდა

    საქართველოში ამ დროისთვის კორონავირუსით ინფიცირების 47 შემთხვევა დაფიქსირდა. ამის შესახებ ინფორმაცია მთავრობის მიერ შექმნილ სპეციალურ ვებ-გვერდზე stopcov.ge-ზე გამოქვეყნდა.

    ამჟამად კარანტინის რეჟიმში 1966 ადამიანია, ხოლო სტაციონარში მეთვალყურეობას 259 ადამიანი გადის.

  • ” მე მომადგნენ ამ უნამუსობის გასაპრავებლად” – ნინო ჯანგირაშვილი ტელევიზიების ინკასოზე

    ” მე მომადგნენ ამ უნამუსობის გასაპრავებლად” – ნინო ჯანგირაშვილი ტელევიზიების ინკასოზე

    ” არ ვიცი ვის რა პოზა გაქვთ და რატომ თვლით, რომ დღეს ხელისუფლების კრიტიკის დრო არ არის, მაგრამ იცოდეთ, ამათ ხელში კორონამ კი არა ერთმა პატარა კენჭმა შეიძლება ერთ დღეს დაანგრიოს ეს სახელმწიფო.” – ასე ეხმაურება ტელეკომპანია ,,კავკასიის” დირექტორი, ნინო ჯანგირაშვილი სოციალურ ქსელში, ტელევიზიების ინკასოს.

    ‘გრძელი რამე დავწერე, მაგრამ მინდა რომ წაიკითხოთ.

    ახლა მოგიყვებით ამბავს, რომლის მოყოლა მეზარებოდა, ნერვი არ მქონდა, ვერც მოვიცალე. როგორც ყველა, მეც დათრგუნული ვარ ჩვენი ყოფით და ყოველდღიური პრობლემების მოგვარებაში გადის დრო. ტვ პირველს და მთავარ არხს ინკასო დაადეს. მეც დამადებდნენ ალბათ, უბრალოდ საფუძველი არ ქონდათ ამჯერად. მიმდინარე დავალიანება არ მაქვს, ძველზე კიდევ რამდენიმე თვიანი გრაფიკი მაქვს.

    ზუსტად ერთი კვირის წინ დამირეკეს შემოსავლების სამსახურიდან. თუ შეგიძლიათ ორშაბათს ჩვენთან მობრძანდეთო. გადავწყვიტეთ ბიზნესს შეღავათები გავუკეთოთო. ეს ის მომენტი იყო, როცა მანამდე გახარიამ თქვა, ყველაფერს გავაკეთებთ კრიზისმა ბიზნესი რომ არ დაანგრიოსო და ვიფიქრე, ალბათ ამ კონტექსში რამეს გვთავაზობენმეთქი.

    მივედი ორშაბათს. მარტო მე ვიყავი, ანუ არ იყო კოლექტიური შეხვედრა. მითხრეს, გადავწყვიტეთ პირველ ოქტომბრამდე რაც დავალიანება გქონდათ ტელევიზიებს 5 წლით გადაგინაწილოთო. პირველ ოქტომბრამდეო! ხუთი წლითო! )) საიდან მოვიდა ეს ხუთი წელი და პირველი ოქტომბერი ალბათ გახსოვთ. ტვ იმედს, რუსთავს და მაესტროს ხომ 55 მილიონი ქონდათ 1 ოქტომბრის მდგომარეობით და მაშინ მინისტრმა ხომ მიჯნა გაავლო – ჩვენ და ტვ პირველი რომ დაგვაყადაღა წინასაახალწლოდ. პირველ ოქტომბრის მერე რაც არის იხადეთ ყველამო და პირველ ოქტომბრამდე რაც იყო იმას ჯერ არ მოგთხოვთო. მთელი ცინიზმი ის არის, რომ პირველ ოქტომბრამდე მთელი ჩემი დავალიანება იყო 10 000 ლარი, იმედის, რუსთავის და მაესტროს 55 მილიონის წინააღმდეგ. და ამ 10 000 ლარის განაწილებას მთავაზობენ 5 წელიწადზე.

    როგორც ჩანს თვლიან, რომ თავს ბედნიერად ვიგრძნობ ამის გამო და გაუპრავდებათ ის, რომ წვალობენ და ცდილობენ როგორმე ისე აპატიონ თავის სამ ტელევიზიას ბიუჯეტის 55 მილიონი ვალი, რომ ძალიან დიდი სკანდალიც არ ატყდეს. მოკლედ, ბევრი რომ არ გავაგრძელო, ვუთხარი რომ არ მაინტერესებს ეს წინადადება და დაველოდები როდის მიიღებს ხელისუფლება არსებული უმძიმესი ვითარებიდან გამომდინარე ყველა ბიზნესისთვის ადეკვატურ გადაწყვეტილებას, იმიტომ რომ მეც, როგორც ყველა დანარჩენი ბიზნესი უმძიმეს მდგომარეობაში ვარ და სულაც არ ვაპირებ რამე გამორჩეულ მდგომარეობაში ჩავდგე.

    და მთავარი, რაც ყველაზე ამორალური და გულისამრევია ამ ამბავში: ეს ხდება მაშინ, როცა ქვეყანა უმძიმეს მდგომარეობაშია, კოშმარული ვირუსის შიშით ადამიანები საით მიაწყდნენ აღარ იციან, ეკონომიკა ინგრევა, ბიზნესებისგან ნაფლეთები რჩება, ხელისუფლებას ჯერ არავითარი ანტიკრიზისული გეგმა არ დაუდია, არც ადამიანებს დახმარებია და ფეხებზე კიდია, ყველა ერთ დღეს შიმშილით რომ მოკვდეს და ამის ფონზე ყოფნით იმის დრო, სურვილი, ნამუსი (თუ უნამუსობა), რომ ივანიშვილის სამი ტელევიზიისთვის ფულის ჩუქებაზე იფიქრონ, რაღაცეები დაგეგმონ და თან იმდენად უტვინოები არიან, რომ მე მომადგნენ ამ უნამუსობის გასაპრავებლად.

    მოკლედ, არ ვიცი ვის რა პოზა გაქვთ და რატომ თვლით, რომ დღეს ხელისუფლების კრიტიკის დრო არ არის, მაგრამ იცოდეთ, ამათ ხელში კორონამ კი არა ერთმა პატარა კენჭმა შეიძლება ერთ დღეს დაანგრიოს ეს სახელმწიფო.

    Nika GvaramiaVato Tsereteli ბოდიში პატივცემულებო, რაღაც უხერხულად ვგრძნობ თავს მეც რომ არ მადევს ინკასო.))”- წერს ნინო ჯანგირაშვილი სოციალურ ქსელში.

  • ლარსიდან დატვირთული მანქანები დაიძრა, შესაბამისად, სურსათის მომარაგების კუთხით შეფერხება არ გვაქვს – ლევან დავითაშვილი

    ლარსიდან დატვირთული მანქანები დაიძრა, შესაბამისად, სურსათის მომარაგების კუთხით შეფერხება არ გვაქვს – ლევან დავითაშვილი

    „ძალიან მნიშვნელოვანია კრიტიკულ სიტუაციაში ქვეყნის მოსახლეობის სურსათით უზრუნველყოფა. გარკვეული პროდუქტების მოწოდებაში გვქონდა წყვეტა უამინდობის გამო. ფოთში გემების დაცლა ვერ მოხდა, ხოლო ლარსზე ვერ ხდებოდა გზის გაწმენდითი სამუშაოები ზვავსაშიშროების გამო.

    მინდა განსაკუთრებული მადლობა გადავუხადო თანამშრომლობისთვის ფინანსთა სამინისტროს შემოსავლების სამსახურს და ეკონომიკის სამინისტროს ტრანსპორტის მიმართულებით კოორდინაციის კუთხით. ასევე, მთის კურორტების კომპანიას, რომელიც მოგვეხმარა ზვავების ჩამოშლის პროცესში და, რა თქმა უნდა, ინფრასტრუქტურის სამინისტროს საგზაო დეპარტამენტს. ჩვენ არაორდინალური გადაწყვეტილებები მივიღეთ. ექსტრემალურ პირობებში, ოპერატიულად მოხდა გზის გაწმენდა, რათა სურსათით მომარაგებაში არ ყოფილიყო დეფიციტი.

    ლარსიდან მანქანები უკვე დაიძრა, შესაბამისად, სურსათის მომარაგების კუთხით არ არის შეფერხება. მნიშვნელოვანია, რომ რეგულარულად, ყოველ დღე ვხვდები საცალო და საბითუმო სავაჭრო ობიექტებისა და ქსელების წარმომადგენლებს, იმპორტიორებს და ადგილობრივ მწარმოებლებს, რათა არ გვქონდეს სურსათის დეფიციტი და ფასები არ გაიზარდოს პანიკის გამო და არ დაფიქსირდეს სპეკულაციური ტრანზაქციები.

    ძირითადი მოხმარების 9 სასურსათო პროდუქტზე მივიღეთ გადაწყვეტილება, რომ მოხდეს კომპენსაციის სქემის შემოღება, რომელიც, ერთი მხრივ, ხელს შეუწყობს მარაგების შექმნას, არამალფუჭებადი პროდუქტების შემოტანას, რაც სტრატეგიულად მნიშვნელოვანია ასეთ პერიოდებში და, მეორე მხრივ, არსებული ფასების შენარჩუნებას”, – განაცხადა ლევან დავითაშვილმა.

  • მადლობა კორონას, უფალმა კორონასთან ბრძოლით გაგვაძლიერა- ემზარ კვიციანი სინოდის განჩინებაზე

    მადლობა კორონას, უფალმა კორონასთან ბრძოლით გაგვაძლიერა- ემზარ კვიციანი სინოდის განჩინებაზე

    ,,პატრიოტთა ალიანსის” დეპუტატი, ემზარ კვიციანი წმინდა სინოდის განჩინებას აფასებს და კორონავირუსს მადლობას უხდის, რადგან ,,,უფალმა კორონასთან ბრძოლით გაგვაძლიერა”.

    მისი თქმით, COVID 19-მა ბევრი სიკეთე მოიტანა, ემიგრანტები სამშობლოში დააბრუნა და გლობალიზაცია შეაჩერა.

    ,,ეჭვიც არ მეპარებოდა, რომ ასე იქნებოდა, მადლობა ჩემს გამჩენს, რომელმაც ქართველად, მართლმადიდებლად გამაჩინა! მადლობა კორონას, უფალმა კორონასთან ბრძოლით გაგვაძლიერა და უამრავი სიკეთე მოგვიტანა, ემიგრანტი დედები უბრუნდებიან შვილებს, სოფლად მიტოვებული სახლებში 80% დაბრუნდა, გლობალიზაცია, უსაზღვრო ლიბერალიზმი შეაჩერა. ქართველებს დაუბრუნდათ ქართველებისადმი პატივისცემა. მე პირადად აწი რომც შემეყაროს კორონა , მაინც სამადლობელს ვიტყვი კორონას მიმართ.”მადლობა ჩემო მტერო კორონა საკმარისად სიკეთე გვიყავ, აწი წადი მშვიდობით სხვაგან, დანარჩენ მსოფლიოში დაამყარე წესრიგი, ჩვენ გამოვსწორდით! დიდება და მადლობა უფალს ყველაფრისთვის!!!”,- წერს კვიციანი სოციალურ ქსელში.

    ის რუს ოკუპანტებს მოუწოდებს, მოუსმინონ საკუთარ წმინდანს და საქართველოსთან დაპირისპირება შეაჩერონ.

    ,,ჩემო აფხაზო ძმებო და დებო, აუცილებლად უნდა დაუბრუნდეთ ერთმანეთს, ჩემო ოსებო, ჩავთვალოთ რომ ემიგრაციაში ვიმყოფებით ერთმანეთისგან და დავბრუნდეთ სახლში, ჩვენ ერთნი ვართ! ჩემო რუსო ოკუპანტებო, მოუსმინეთ თქვენს წმინდანს, სერაფიმ საროველს და შეაჩერეთ ჩვენთან დაპირისპირება! ნუ შეუშლით რუს, აფხაზ და ოს ხალხს ქართველებთან მეგობრობაში ხელს, მარიამ ღვთისშობელი შეგეწევათ ამ მძიმე სნეულებასთან ბრძოლაში. უფალს ებარებოდეთ!!! “,- ამბობს ემზარ კვიციანი.

    სინოდის დღევანდელი გადაწყვეტილებით, ზიარების წესი უცვლელი რჩება.

  • “ვერ ვიტყვით, რომ ჩინეთში ან ირანში კორონავირუსის გავრცელების მიზეზი კოვზი გახდა” – ჯაღმაიძე

    “ვერ ვიტყვით, რომ ჩინეთში ან ირანში კორონავირუსის გავრცელების მიზეზი კოვზი გახდა” – ჯაღმაიძე

    დღეს,  სინოდმა განაჩინა, რომ ზიარების წესი არ შეიცვლება. მათი თქმით, ეკლესიის წევრისთვის ზიარების საიდუმლოს არსში დაეჭვება, ყოვლად მიუღებელია. გარდა ამისა, მათი თქმით, ყველა საეკლესიო ღვთისმსახურება ჩვეულ რეჟიმში ჩატარდება და აღდგომის წირვაც არ გაუქმდება.

    “ჯერჯერობით ჩვენ ვერ ვიტყვით, რომ ან ჩინეთში, ან ირანში, ან იტალიაში, სწორედ კოვზი გახდა ვირუსის გავრცელების მიზეზი. ამიტომ დაველოდოთ ვითარება როგორ განვითარდება, შევხედოთ”, — ასე უპასუხა საპატიარქოს საზოგადოებასთან ურთიერთობის სამსახურის ხელმღძღვანელმა, მამა ანდრია ჯაღმაიძემ კითხვას, აიღებს თუ არა ეკლესია პასუხისმგებლობას იმაზე, რომ კორონავირუსი საერთო კოვზით ზიარებისას გავრცელდეს.