newsreport.ge

Category: არქივი

  • საქართველოში დემოკრატიის ინდექსი მკვეთრად დაეცა

    ჟურნალი ეკონომისტი 2018 წლის დემოკრატიის ინდექსს აქვეყნებს. რეიტინგის მიხედვით საქართველო იმ ქვეყნების ჩამონათვალში მოხვდა, სადაც 2017 წელთან შედარებით 2018 წელს დემოკრატიის მაჩვენებელი მკვეთრად გაუარესდა. ამის მიზეზად საპრეზიდენტო არჩევნები სახელდება, რომელმაც გამოცემის ინფორმაციით საქართველო აღმოსავლეთ ევროპაში დემოკრატიის ყველაზე მკვეთრი ვარდნით გამორჩეულ ქვეყნად აქცია.კვლევაში მოყვანილია ციტატა ეუთოს დასკვნიდან, რომელშიც ნათქვამია: “საქართველოს საპრეზიდენტო არჩევნების მეორე ტური კონკურენტული იყო და კანდიდატებს შეძლოთ კამპანიის თავისუფლად წარმოება, თუმცა ერთ მხარეს იყო გაუმართლებელი უპირატესობა. ორივე მხრიდან წარმოებულმა ნეგატიურმა კამპანიამ კი ძირი გამოუთხარა ამ პროცესს.“


    “გაუმართლებელ უპირატესობაში“ იგულისხმება ქვეყნის ყოფილი პრემიერ მინისტრის, მილიარდერ ბიძინა ივანიშვილის ფაქტორი. ანგარიშში ნათქვამია, რომ ივანიშვილის გავლენით მთავრობა ჩაერია საპრეზიდენტო არჩევნების მეორე ტურში და 600 000 მოქალაქეს არჩევნებიდან ორი კვირის თავზე ვალების ჩამოწერას დაპირდა, რამაც ხელისუფლების მიერ მხარდაჭერილ კანდიდატს ოპოზიციურ კანდიდატთან შედარებით დიდი უპირატესობა მიანიჭა. საქართველოს დემოკრატიული ინდექსი 2018 წელს 5.5 –მდე შემცირდა. 2017 წელს ის 5.93–ს შეადგენდა. მსოფლიოს ყველაზე დემოკრატიულ ქვეყნად ეკონომისტის რეიტინგის მიხედვით ნორვეგია დასახელდა. მეორე ადგილზეა ისლანდია. მესამეზე შვედეთი, მეოთხეზე ახალი ზელანდია. მეხუთე ადგილს კი დანია იკავებს.

  • კომპანია APPLE-მა სმარტფონების წარმოება შეამცირა

    {{ARTICLEIMAGE}}კომპანია Apple-მა  iPhone-ების წარმოება შეამცირა, რაც ბოლო ორი წლის განმავლობაში მეორედ მოხდა.

    დეკემბერში, Apple-მა ახალი მოდელების XS Max, XS და XR წარმოება საგრძნობლად შეამცირა. გაზაფხულზე კომპანია 42 მილიონი ძველი და ახალი მოდელის გამოშვებას გეგმავს. წინასწარი ინფორმაციით კი, მხოლოდ პირველ ეტაპზე 47-48 მილიონი სმარტფონის წარმოება იყო დაგეგმილი.

    2018 წლის ნოემბერში, Apple-ის დაბალი მოთხოვნის გამო iPhone XR-ის წარმოება შეამცირა, როგორც მოგეხსენებათ ეს APPLE-ის ყველაზე იაფი მოდელია, ხოლო 2 იანვარს, პირველად 16 წლის განმავლობაში, Apple-მა შემოსავლების ვარდნა დაადასტურა. კომპანიის მონაცემებით, ბოლო სამი თვის შემოსავალი 89 მილიარდის ნაცვლად 84 მილიარდი აშშ დოლარი იქნება.

  • “თიბისი ბანკთან“ დაკავშირებით სისხლის სამართლის საქმის გამოძიება მიმდინარეობს

    {{ARTICLEIMAGE}}”თიბისი ბანკთან“ დაკავშირებით სისხლის სამართლის საქმის გამოძიება უკანონო შემოსავლების ლეგალიზაციის ფაქტზე მიმდინარეობს. ინფორმაციას ამის შესახებ გენერალურლი პროკურატურა ავრცელებს.

    ფინანსური მონიტორინგის სამსახურმა 2018 წლის მაისში დაიწყო “თიბისი ბანკის” ფინანსური აქტივობების შესწავლა და მივიდა დასკვნამდე, რომ ამ აქტივობებში აშკარად იკვეთებოდა უკანონო შემოსავლის ლეგალიზაციის, ანუ ფულის გათეთრებისა და სხვა კანონსაწინააღმდეგო ქმედებების ნიშნები.

    ეროვნულმა ბანკმა საკუთარი კომპეტენციის ფარგლებში შეისწავლა საკითხი და აღმოჩენილ დარღვევებზე მოახდინა შესაბამისი რეაგირება. ხოლო საქართველოს პროკურატურამ 2018 წლის 2 აგვისტოს, დაიწყო სისხლის სამართლის საქმის გამოძიება უკანონო შემოსავლების ლეგალიზაციის ფაქტზე, დანაშაული, გათვალისწინებული საქართველოს სისხლის სამართლის კოდექსის 194 მუხლის მე-3 ნაწილის “გ“ ქვეპუნქტით. გამოძიებით დადგენილია, რომ 2008 წლის აპრილში და მაისში, შპს “სამგორი თრეიდმა“ და შპს “სამგორი M”-მა,  “თიბისი ბანკი”-სგან, სათანადო უზრუნველყოფის გარეშე, დაჩქარებული წესით მიიღეს საერთო ჯამში 17 მილიონ აშშ დოლარამდე სესხი.
    კომპანიების ანგარიშებზე სესხის თანხის განთავსებისთანავე, მამუკა ხაზარაძემ და ბადრი ჯაფარიძემ, ამავე კომპანიებიდან, როგორც ფიზიკურმა პირებმა, ისესხეს ზუსტად იმ ოდენობის თანხა, რაც “თიბისი ბანკმა“ საბრუნავი საშუალებების შევსების მიზნობრიობით ასესხა დასახელებულ კომპანიებს. 2008 წლის ბოლოს, თიბისი ბანკმა, აღნიშნული სესხები, საბანკო რეგულაციებით დადგენილ ვადაზე ადრე, დაუსაბუთებლად ჩამოწერა და გარე საბალანსო ანგარიშზე გადაიტანა, ხოლო 2012 წელს საერთოდ გაათავისუფლა ეს კომპანიები ბანკის წინაშე არსებული სასესხო ვალდებულებისგან, როდესაც დათანხმდა ამ ვალდებულებების ოფშორულ კომპანიაზე გადატანას. საგულისხმოა, რომ „სამგორი თრეიდს“ და შპს „სამგორი M”-ს სესხები ისე ჩამოიწერა, რომ ამ კომპანიებს სესხის მომსახურებისთვის თანხა საერთოდ არ გაუღიათ და აღნიშნული სესხები ბანკს დღემდე არ დაბრუნებია. გარდა ამისა, დადგენილია, რომ მამუკა ხაზარაძეს და ბადრი ჯაფარიძეს ასევე არ გაუსტუმრებიათ შპს “სამგორი თრეიდისა“ და შპს “სამგორი M” – ს, ვალი.
    გამოძიების ფარგლებში ჩატარდა არაერთი საგამოძიებო და საპროცესო მოქმედება, გამოიკითხნენ ფაქტთან შემხებლობაში მყოფი პირები, მათ შორის გამოკითხულია მამუკა ხაზარაძეც. გამოძიების ამ ეტაპზე, შესაძლო დანაშაულებრივი ფაქტების სრულყოფილად შესწავლისთვის, აუცილებელია დამატებითი დოკუმენტაციის და ინფორმაციის მოპოვება და შესწავლა, რისთვისაც საქართველოს გენერალურმა პროკურატურამ 2019 წლის 4 იანვარს შუამდგომლობებით მიმართა თბილისის საქალაქო სასამართლოს სს ,,თიბისი ბანკი“-დან ინფორმაციის გამოთხოვის თაობაზე. სასამართლოს მიერ დაკმაყოფილებული შუამდგომლობები შესასრულებლად ჩაბარდა სს “თიბისი ბანკს“. საქმეზე საჯარო ინტერესის გათვალისწინებით, გენერალური პროკურატურა საზოგადოებას პერიოდულად მიაწვდის ინფორმაციას გამოძიების შესახებ.

  • ბრაზილიელი სერფერის მსოფლიო რეკორდი

    როდრიგო კოხა პირველი ადამიანია, რომელმაც 24.38 მეტრიან ტალღაზე სრიალი მოახერხა. წინა მსოფლიო რეკორდი გარეტ მაკნამარას ეკუთვნოდა, 23.77 მეტრი.

  • ჯანდაცვის მსოფლიო ორგანიზაცია: საქართველოში არ არის გარდაცვლილთა გადაჭარბებული რაოდენობა, საგანგაშო არაფერი ხდება

    {{ARTICLEIMAGE}}
    საქართველოში არ არის საგანგაშო სიტუაცია – არსებული ვითარება დამახასიათებელია გრიპის ყოველწლიური სეზონისთვის და დაახლოებით მსგავსი ვითარებაა მეზობელ ქვეყნებშიც”, განაცხადა ჯანმრთელობის მსოფლიო ორგანიზაციის საქართველოს ოფისის ხელმძღვანელმა მარიან ივანუშამ დღეს გამართულ პრესკონფერენციაზე.

    მისი თქმით, ევროპის რეგიონში ყოველწლიურად დაახლოებით 70 ათასი ადამიანი იღუპება გრიპის ვირუსით.

    ოფიციალური მონაცემებით, საქართველოში გრიპით გარდაცვალების 12 შემთხვევა დაფიქსირდა.

    “პაციენტების უმრავლესობას არ სჭირდება “ტამიფლუ”. სწორედ ამიტომ, რადგან ყველა ადამიანს არ სჭირდება “ტამიფლუ”, ზოგ ქვეყანაში ექიმები არ ნიშნავენ მას. მაგრამ რა თქმა უნდა, თუ არის რაიმე განსაკუთრებული მდგომარეობა, გართულება, პაციენტმა უნდა მიიღოს “ტამიფლუ”. “ტამიფლუ” არის ანტივირუსული პრეპარატი, ანტიბიოტიკის მსგავსია, ოღონდ ის მუშაობს გრიპის ვირუსის წინააღმდეგ, ამიტომ მინდა ძალიან მკაცრად გავაფრთხილო ადამიანები, წამლები არ არის კანფეტი, არ შეიძლება როგორც ტკბილეული, ისე მიიღოს ადამიანმა თავისი გადაწყვეტილებით. თუკი ჩვეულებრივ რესპირატორულ სიმპტომებს დაინახავთ, ნუ გაიქცევით აფთიაქში, ნუ შეიძენთ და მიიღებთ “ტამიფლუს”. ეს არის სერიოზული პრეპარატი, რომელიც კონკრეტული გართულების შემთხვევაში ექიმის დანიშნულებით უნდა მივიღოთ. “ტამიფლუს” შემცვლელი არ არსებობს. ის ამგვარი მოქმედების ერთადერთი პრეპარატია ბაზარზე ამ ეტაპზე”, განაცხადა ჯანმრთელობის მსოფლიო ორგანიზაციის საქართველოს ოფისის ხელმძღვანელმა.

    მისივე თქმით, “საქართველოში ამ ეტაპზე გავრცელებულია ზომიერი, ჩვეულებრივი გრიპის ვირუსი და განსაკუთრებული არაფერი ხდება”.

    მისივე ინფორმაციით, საქართველოში გავრცელებული A ტიპის ვირუსს პანდემიის სახე არ აქვს:

    “გრიპი განსხვავდება ჩვეულებრივი გაციებისგან, მაგრამ მიუხედავად იმისა, რომ ის შედარებით რთული დაავადებაა, შეიძლება, ყოველგვარი გართულებების გარეშე წავიდეს. გრიპის გამომწვევი ძირითადად გახლავთ ვირუსი, ამიტომ ადამიანებს არ სჭირდებათ ანტიბიოტიკების მიღება. თუ არ არის რაიმე განსაკუთრებული შემთხვევა, ადამიანს შეუძლია, მიიღოს თბილი სითხეები და დარჩეს სახლში. თუ ტემპერატურა მაინც აიწევს, მიიღოს აბები სიცხის დასაწევად. განსაკუთრებული რისკის ჯგუფს წარმოადგენენ: ხანდაზმული ადამიანები 65 წელს ზევით, ბავშვები და ორსული ქალები, ასევე ქრონიკული დაავადებების მატარებელი პირები, მათ სჭირდება სპეციფიური მკურნალობა.

    ჩვენ განვასხვავებთ ოთხ სხვადასხვა ვირუსს, რომელიც იწვევს ამ დაავადებას – A,B, C,D ტიპის ვირუსებს. ადამიანისთვის სახიფათო გახლავთ მხოლოდ A და B ტიპის ვირუსები. რაც შეეხება პანდემიას, მას მხოლოდ A ტიპის ვირუსები იწვევს. საქართველოში გავრცელებულია A ტიპის ვირუსი, მაგრამ ჩვენ მას ამ ეტაპზე ვეღარ ვუწოდებთ პანდემიურ ვირსს. პანდემიური ის იყო 10 წლის წინ, როცა ის მსოფლიოში გამოჩნდა. დღეისთვის ჩვეულებრივი ვირუსის ცირკულაციაა და გავრცელებულია ჩრდილო ამერიკაში, კანადაში, ევროკავშირის ქვეყნების ტერიტორიაზე და აღმოსავლეთ აზიაში”. 

    “დაახლოებით, გაზაფხულზე, ჯანდაცვის მსოფლიო ორგანიზაცია გასცემს რეკომენდაციას, თუ რომელი ვაქცინა იქნება საუკეთესო აღნიშნული გრიპის წინააღმდეგ კონკრეტული ქვეყნისთვის. ვაქცინაციისთვის საუკეთესო პერიოდი არის გვიანი შემოდგომა – ოქტომბერ-ნოემბერი. საქართველოში არსებული ვაქცინა არის ძალიან კარგი ხარისხის და სრულად ფარავს ყველა ვირუსს. ვაქცინაცია რამდენადმე დაგვიანებულია, რადგან ამოქმედებისთვის მას 2 კვირა მაინც სჭირდება, თუმცა, არის საშუალება ადამიანებმა ვაქცინაცია ჩაიტარონ. საქართველოში ზომიერი, ჩვეულებრივი გრიპის სეზონია, როგორიც არის უკრაინაში და რეგიონის სხვა ქვეყნებში. განსაკუთრებული არაფერი ხდება”. 

    ჯანდაცვის მსოფლიო ორგანიზაციის წარმომადგენლის ინფორმაციით, ყოველწილიურად ევროპის რეგიონში 70 ათასი ადამიანი იღუპება გრიპის ვირუსით:

    “ძალიან ვწუხვართ თითოეული ადამიანის გარდაცვალების გამო, მაგრამ საქართველოში არ არის გარდაცვლილთა გადაჭარბებული რაოდენობა. ეს არის მოსალოდნელი, ჩვეული რაოდენობა გრიპის სეზონზე. შეიძლება ითქვას, რომ ანალოგიური მდგომარეობაა მეზობელ ქვეყნებშიც”.

  • ისრაელში მოკლული ქართველის დედა შვილის გადმოსვენებაში დახმარებას ითხოვს

    {{ARTICLEIMAGE}}

    ისრაელში მოკლული ქართველის დედა შვილის გადმოსვენებაში დახმარებას ითხოვს – 31 წლის მიშა წიკლაური, რომელიც პირველ იანვარს მოკლეს, თელავივში ცხოვრობდა და ისრაელის მოქალაქე იყო. დედის ინფორმაციით, გამოძიება მიმდინარეობს, თუმცა როგორც მისთვის წინასწარ არის ცნობილი, შვილი “ემიგრანტმა ქალმა მოკლა”.

    “მე ისრაელში ვარ. გამწარებული დედა გწერთ და გაწუხებთ. ჩემი შვილი პირველ იანვარს ქართველმა ემიგრანტმა ქალმა მომიკლა. ასე გაგვამწარა საახალწლოდ, ჩემი შვილი დანით დამისერა. ვინაიდან თანხა არ მქონდა შვილის ცხედარი საქართველოში გადმომესვენებინა, ისრაელში დავკრალეთ. მინდა, სამშობლოში გადმოვასვენო, ძალიან მიჭირს. მე თვითონ ლეიკემიით ვარ ავად, მაგრამ არაფერი მითხოვია – ერთი თხოვნა მაქვს, ვიდრე ცოცხალი ვარ, ჩემი შვილი საქართველოში გადავასვენო. უფალს ვთხოვ, ეს სურვილი ამისრულდეს. გამწარებული დედა, შვილმკვდარი დედა გთხოვთ დამეხმაროთ, რომ ჩემი შვილი საქართველოს მიწას მივაბარო”, წერს ემიგრანტი დედა, კატერინა წიკლაური.


    ეს წერილი არასამთავრობო ორგანიზაცია “ემიგრანტების იმედის” დამფუძნებელმა შოთა სიხარულიძემ სოციალურ ქსელში გაავრცელა.

    მოკლულის საქართველოში გადმოსვენებასთან დაკავშირებით, solostudio.agency/ საგარეო საქმეთა სამინისტროს დაუკავშირდა – უწყების ინფორმაციას მოგვიანებით შემოგთავაზებთ.

  • “ორკესტრირებული შავი პიარის ავტორებს” თიბისი ბანკი ხაზარაძის რეპუტაციის შელახვაში ადანაშაულებს

    {{ARTICLEIMAGE}}

    პროკურატურის მიერ “თიბისი ბანკიდან” დოკუმენტების ამოღებას საფინანსო დაწესებულება განცხადებას უძღვნის და ამასთან, 8 იანვრის ღამეს მედიაში (“პორტალი კვირა”) გავრცელებულ იმ ინფორმაციაზე ამახვილებს ყურადღებას, რომლის თანახმად “თიბისი ბანკის” დამფუძნებელს მამუკა ხაზარაძეს მილიონობით დოლარის გათეთრებისა და მითვისების გამო შესაძლოა, ბრალი წარუდგინონ.

    მედიაში გავრცელებულ აღნიშნული შინაარსის სტატიას ბანკი ქვეყნის წამყვანი ფინანსური ინსტიტუტისა და მისი დამფუძნებლების რეპუტაციის შელახვად აფასებს.

    “8 იანვარს, გვიან საღამოს, რამდენიმე მედიაპორტალმა გაავრცელა მცდარი და მიზანმიმართულად დამახინჯებული ინფორმაცია, რომელიც ემსახურება ქვეყნის წამყვანი ფინანსური ინსტიტუტისა და მისი დამფუძნებლების რეპუტაციის შელახვას. ცხადია, რომ ამ ინფორმაციის გამავრცელებლების მიზანია, ზიანი მიაყენოს ქვეყნისთვის უმნიშვნელოვანეს ინსტიტუტს – “თიბისი ბანკს” – ადგილობრივ და საერთაშორისო დონეზე. აღნიშნულთან დაკავშირებით გვინდა განვაცხადოთ, რომ კატეგორიულად უარვყოფთ ამ ორკესტრირებული შავი პიარის ავტორების მიერ შეთითხნილ ბრალდებებსა და შეგნებულად დამახინჯებულ ფაქტებს.

    “თიბისი ბანკი” არის და დარჩება ქვეყანაში და რეგიონში ლიდერ ფინანსურ ინსტიტუტად, რომელიც წარმოდგენს კორპორაციული მართვისა და პასუხისმგებლობის საუკეთესო მაგალითს, რაც აღიარებულია საერთაშორისო ინსტიტუციების და ინვესტორების მიერ. “თიბისი ბანკი” არის ლონდონის საფონდო ბირჟაზე განთავსებული მოწინავე საჯარო კომპანია, რომელიც წარმოდგენილია პრემიუმ სეგმენტში ((Fთშ250 სიაში) და წარმოადგენს მსოფლიოს ხუთივე კონტინენტის ინვესტორთა და აქციონერთა ინტერესებს საქართველოში. სამწუხაროა ის ფაქტი, რომ “თიბისი ბანკის” არსებობის 27 წლის განმავლობაში, ყველა პოლიტიკური მმართველობის პერიოდში, არაერთხელ ყოფილა თავდასხმის ობიექტი.

    “თიბისი ბანკს” და მის მენეჯმენტს გამოუვლია არაერთი კრიზისი და ყველა ხელისუფლების პირობებში ყოველთვის დაუმტკიცებია და მომავალშიც დაამტკიცებს თავის სიმართლეს. რაც შეეხება პროკურატურის მიერ გაკეთებულ კომენტარს დოკუმენტების ამოღებასთან დაკავშირებით, საკითხი ეხება 2008 წლის რიგით, კანონიერ საბანკო ოპერაციას, რომელიც:

    • არაერთხელ იქნა სახელმწიფო სტრუქტურების და ეროვნული ბანკის მიერ შესაბამის პერიოდებში შემოწმებული, როგორც მოქმედი ისე წინა ხელისუფლების დროს;

    • არაერთხელ იქნა საერთაშორისო აუდიტორების მიერ შემოწმებული და მათი სისწორე დადასტურებული;

    • რაც ყველაზე მნიშვნელოვანია, 2014 და 2016 წლებში, ლონდონის საფონდო ბირჟაზე “თიბისი ბანკის” აქციების განთავსებასთან დაკავშირებით, დეტალურად იქნა შემოწმებული და დადებითად შეფასებული, მათ შორის ინგლისის რეგულატორის მიერ;

    • ამასთან, მოცემული ტრანზაქცია ხანდაზმულია.

    “თიბისი ბანკი” ვერ შეეგუება მიზანმიმართული დისკრედიტაციისა და რეპუტაციის შელახვის მცდელობას, ვისგანაც არ უნდა მომდინარეობდეს ის და საჭიროების შემთხვევაში გამოიყენებს მის ხელთ არსებულ ყველა ადგილობრივ და საერთაშორისო სამართლებრივ ბერკეტს “თიბისი ბანკის”, მისი დამფუძნებლებისა და საერთაშორისო აქციონერების კანონიერი ინტერესების დასაცავად”, აღნიშნულია “თიბისი ბანკის” განცხადებაში.

    “თიბისი ბანკის” დამფუძნებელს მამუკა ხაზარაძეს რომ მილიონობით დოლარის გათეთრებისა და მითვისების გამო შესაძლოა, ბრალი წარუდგინონ, ამის შესახებ ინფორმაცია მედიაპორტალმა კვირამ 8 იანვრის ღამეს გამოაქვეყნა. ტექსტს უცვლელად გთავაზობთ:

     

    “ექსკლუზიურად ცნობილი გახდა იმ სისხლის სამართლის საქმის შესახებ, რომლის გამოძიებასაც საქართველოს მთავარი პროკურატურა აწარმოებს. “ჩვენს ხელთ არსებული ინფორმაციით, ჯერ კიდევ 2018 წლის მაისში ფინანსური მონიტორინგის სამსახურმა გაშიფრა დანაშაულებრივი სქემა, რომლის თანახმად “თიბისი ბანკის” დამფუძნებლებმა მამუკა ხაზარაძემ და ბადრი ჯაფარიძემ მრავალსვლიანი ფინანსური მაქინაციების მეშვეობით მიითვისეს და გაათეთრეს ბანკის კუთვნილი ათობით მილიონი ლარი. ფინანსური მონიტორინგის სამსახურის მიერ გამოვლენილი მაქინაციების შესწავლა ორი მიმართულებით მიმდინარეობს. ერთის მხრივ საქმეს სწავლობს ეროვნული ბანკი, ხოლო სისხლის სამართლებრივ გამოძიებას აწარმოებს საქართველოს მთავარი პროკურატურა. ჩვენი ინფორმაციით, ეროვნულმა ბანკმა უკვე გამოიყენა სანქციები და “თიბისი ბანკს” მამუკა ხაზარაძესთან და ბადრი ჯაფარიძესთან ყოველგვარი ურთიერთობა აუკრძალა. ეროვნული ბანკის ეს გადაწყვეტილება საბანკო სფეროსთვის დაახლოებით იგივეა, რაც საყოფაცხოვრებო დონეზე მოძალადე მშობლისთვის ოჯახის წევრთან კონტაქტის აკრძალვა, ანუ შემაკავებელი ორდერი. ამას გარდა რეგულატორმა ადმინისტრაციული წესით, საკუთარ აქციონერებთან საეჭვო გარიგებებში შესვლის გამო “თიბისი ბანკს” 1 მილიონი ლარის ოდენობის ჯარიმა დააკისრა.

    რაც შეეხება სისხლის სამართალს, აქ საქმე გაცილებით მძიმედაა, ვინაიდან საქართველოს მთავარი პროკურატურა საქმის გამოძიებას უკანონო შემოსავლების ლეგალიზაციის მუხლით აწარმოებს. ჩვენი წყაროს ინფორმაციით, ფულის გათეთრების დანაშაულებრივი სქემა ასე გამოიყურება: 2008 წლის გაზაფხულზე ბიზნესმენ ავთო წერეთლის კუთვნილ კომპანიებზე (“სამგორი M” “სამგორი თრეიდი”) “თიბისი ბანკმა” ყოველგვარი უზრუნველყოფის გარეშე, ერთ დღეში ჯამურად 16.6 მილიონი აშშ დოლარის დაუსაბუთებელი კრედიტი გასცა. იმავე დღეს ამ კომპანიებმა “თიბისი ბანკისგან” მიღებული კრედიტი გადაასესხეს ფიზიკურ პირებს მამუკა ხაზარაძეს და ბადრი ჯაფარიძეს. წერეთლის კომპანიები ერთი დღე არ მომსახურებიან ბანკისგან მიღებულ კრედიტს, ბანკში ერთი თეთრი არ შესულა და მიუხედავად ამისა, იმავე წლის დეკემბერში “თიბისი ბანკმა” ეს სესხები ბალანსს გარეთ გაიტანა, ანუ ჩამოწერა. ბანკმა სესხები კი ჩამოწერა, მაგრამ ზემოხსენებულ კომპანიებს ფორმალური ვალდებულება ბანკისადმი მაინც უნარჩუნდებოდათ, შესაბამისად უნარჩუნდებოდა ვალდებულება მამუკა ხაზარაძეს და ბადრი ჯაფარიძესაც. ჩვენი წყაროს ინფორმაციით, 2012 წლის შემოდგომის საპარლამენტო არჩევნების მოახლოების კვალდაკვალ, ავთანდილ წერეთელმა ულტიმატუმის ფორმით მოსთხოვა ფულის გათეთრების სქემის ავტორს და სარგებლის მიმღებ მამუკა ხაზარაძეს, გაეთავისუფლებინა მისი კომპანიები “თიბისი ბანკის” წინაშე არსებული ფორმალური ვალდებულებებისაგან. ამისთვის კი, როგორც წყარო ამბობს, მამუკა ხაზარაძემ ახალი სქემა შეიმუშავა: ვირჯინიის კუნძულებზე თავის მოადგილეს პაატა ღაზაძეს დააფუძნებინა ოფშორული კომპანია “Martello Group, რომელმაც “თიბისი ბანკის” დირექტორის ვახტან ბუცხრიკიძის თანხმობით გადაიბარა წერეთლის კომპანიების ვალდებულებები “თიბისი ბანკის” მიმართ, ასევე მოთხოვნები ხაზარაძის და ჯაფარიძის მიმართ. “სხვა გარემოებებს თავი რომ დავანებოთ, მხოლოდ ის ფაქტი, რომ ბანკის გენერალური დირექტორი ბუცხრიკიძე დათანხმდა – საქართველოში მოქმედი, წარმატებული, აქტივების მქონე კომპანიის ვალდებულებები გადაებარებინა ოფშორში ჩაკარგული, ქაღალდზე არსებული კომპანიისათვის, საკმარისი მტკიცებულება იქნებოდა იმის დასტურად, რომ ხაზარაძე, ჯაფარიძე და ტოპმენეჯმენტი საკუთარ ბანკს ძარცვავდნენ.


    ნიშანდობლივია, რომ “თიბისი ბანკს”, წერეთლის კომპანიებს და მამუკა ხაზარაძეს შორის ვალდებულებების გადაბარების შესაბამისი მიღება-ჩაბარების აქტები 2012 წლის 29 სექტემბრით არის დათარიღებული. ჩვენი წყაროს ინფორმაციით, თარიღი მიღება-ჩაბარების აქტზე გაყალბებულია და მხოლოდ 2012 წლის 1 ოქტომბრის შემდეგ უკანა რიცხვით არის შედგენილი. როგორც ჩანს, ხაზარაძე არჩევნების შედეგებს ელოდებოდა და სააკაშვილის დამარცხების შემდეგ ისტერიულად დაიწყო დანაშაულებრივი კვალის წაშლა. სიჩქარეში მას გამორჩა, რომ 2012 წლის 29 სექტემბერი კვირა დღე იყო, როცა საქმიანი დოკუმენტები არ დგება.


    “მიღება-ჩაბარების აქტის გამყალბებელი ვარაუდობდა, რომ სააკაშვილის დამარცხების შემდეგ ავთო წერეთელი და მამუკა ხაზარაძე ინგასი და მურტალოსი არ იყოს არავის გაახსენდებოდა, რადგან პირველ ოქტომბერს ნაცებისთვის დიდი სამამულო ომი დაიწყო. გაიზიარებს თუ არა მურტალოს ბედს ხაზარაძე, ამ კითხვაზე პასუხი თემიდას მივანდოთ. დაიჭერენ თუ არ დაიჭერენ მამუკა ხაზარაძეს, არც ეს უნდა იყოს მისთვის ტრაგედია. ციხეში ბევრი მჯდარა, უბრალოდ, ტრაგედია ის არის, რომ გეპეის კომკავშირის მდივნობიდან მოყოლებული, ათეული წლების განმავლობაში ნალოლიავები რეპუტაცია ასეთი იაფფასიანი მაქინაციებით იმსხვრევა. მსხვრევა და ტრაგედიაა, როცა მეცენატი, ლიტერატურის ქომაგი, ჩოხოსანი, ცხენზე სომბრეროთი მოჯირითე არისტოკრატი ბიზნესმენი მამუკა ხაზარაძე მის მიერვე დაფუძნებულ ბანკში დეპოზიტარების ფულს მოპარვაში იქნა მხილებული”, ამბობს “კვირას” რესპონდენტი.

     

  • ზემო თელეთში შვილმა დედა დაჭრა

    {{ARTICLEIMAGE}}
    შინაგან საქმეთა სამინისტროს ინფორმაციით, შემთხვევა 8 იანვარს მოხდა. ამავე წყაროს ცნობით, ბრალდებული უკვე დაკავებულია: “გამოძიებამ დაადგინა, რომ მან 8 იანვარს, საკუთარ საცხოვრებელ სახლში, ურთიერთშელაპარაკებისას, დანის გამოყენებით დაზიანება მიაყენა დედას – 1953 წელს დაბადებულ გულნარა ბადრიშვილს”.

    დაჭრილი საავადმყოფოში გადაიყვანეს, სადაც ოპერაცია ჩაუტარდა. ექიმის ინფორმაციით, გულმკერდის არეში დაჭრილი ქალის ჯანმრთელობის მდგომარეობა ამ ეტაპზე სტაბილურია. რა გახდა დედასა და შვილს შორის დაპირისპირების მიზეზი, ამ ეტაპზე უცნობია. დანაშაული 3-დან 6 წლამდე ვადით თავისუფლების აღკვეთას ითვალისწინებს.

  • სალომე ზურაბიშვილმა ბანკ “ქართუს” მილიონი დაუბრუნა

    {{ARTICLEIMAGE}}
    საქართველოს პრეზიდენტმა სალომე ზურაბიშვილმა საარჩევნო კამპანიისთვის ბანკ “ქართუდან” აღებული მილიონი ლარის სესხი დაფარა. სესხის გადახდამდე სალომე ზურაბიშვილმა სახელმწიფო ბიუჯეტიდან მიიღო მილიონი ლარის დაფინანსება. ამდენივე მიიღეს პარტიებმა “ნაციონალურმა მოძრაობამ” და “ევროპულმა საქართველომ,” რომელთა პრეზიდენტობის კანდიდატებმა, გრიგოლ ვაშაძემ და დავით ბაქრაძემ ხმების 10%-ზე მეტი მიიღეს. საქართველოს კანონმდებლობით, საარჩევნო კამპანიისთვის გაწეული ხარჯის დასაფინანსებლად ბიუჯეტიდან მილიონ ლარს იღებს კანდიდატი, რომელსაც ხმას მისცემს არჩევნებში მონაწილეთა 10%-ზე მეტი.

    წყარო- რადიო თავისუფლება

  • ავტოავარია ვაკეში – 1 გარდაცვლილი და 12 დაშავებული

    {{ARTICLEIMAGE}}
    ჭავჭავაძის გამზირზე ავტოსაგზაო შემთხვევისას ერთი ადამიანი გარდაიცვალა, 12 დაშავდა.

    შინაგან საქმეთა სამინისტროში აცხადებენ, რომ სასწრაფო სამედიცინო დახმარების ავტომანქანა ტროტუარზე მდგომ მუშებს იმ დროს შეეჯახა, როდესაც ისინი მშენებლობასთან მდგარ ფარდულში შედიოდნენ.

    გამოძიება სსკ-ის 276-ე მეხუთე ნაწილით მიმდინარეობს, რაც სატრანსპორტო საშუალების უსაფრთხოების წესების დარღვევას გულისხმობს, რამაც ადამიანის სიცოცხლის მოსპობა გამოიწვია.