Category: არქივი

დაზარალებულის სტატუსის მინიჭების გამარტივების მოთხოვნით მალხაზ მაჩალიკაშვილისა და ქობულეთის მუსლიმური თემის ლიდერის, მერაბ მიქელაძის ერთობლივი სარჩელი საკონსტიტუციო სასამართლოში უკვე შეტანილია. პანკისში სპეცოპერაციის დროს მოკლული თემირლან მაჩალიკაშვილის მამა დაზარალებულის სტატუსს მოითხოვს, რადგან ოჯახმა საქმის მასალების გაცნობა შეძლონ და დაამტკიცონ, რომ 19 წლის თემირლანს ტერორიზმთან კავშირი არ ჰქონია.

სამართლიანობის აღდგენის მოთხოვნით, შვილმოკლული მამების პროტესტი ისევ გრძელდება. დღეს მალხაზ მაჩალიკაშვილი პარლამენტთან ტელეკომპანია კავკასიის გადამღებ ჯგუფს მარტო დახვდა, რადგან ხორავას ქუჩაზე მოკლული დავით სარალიძის მამა თავს შეუძლოდ გრძნობს. ზაზა სარალიძემ გასული ღამე კლინიკაში გაატარა, თუმცა ახლა სახლში იმყოფება. მიუხედავად არაერთი იმედგაცრუებისა, შვილმოკლული მამები საკანონმდებლო ორგანოს ტერიტორიის დატოვებას არ აპირებენ, ვიდრე ხელისუფლება შვილების მკვლელებს და დანაშაულის დამფარველებს არ დასჯის.

{{ARTICLEIMAGE}}

საპარლამენტო უმრავლესობის ლიდერი არჩილ თალაკვაძე აცხადებს, რომ მოსამართლეთა სიის გაწვევა-არგაწვევის საკითხი დღის წესრიგიდან უკვე მოხსნილია და კანონს, რომელსაც პარლამენტი უზენაესი სასამართლოს მოსამართლეების არჩევასთან დაკავშირებით მიიღებს, უკუძალა ექნება.

“უზენაესი სასამართლოს მოსამართლეობის კანდიდატებთან დაკავშირებით მიღებულია ორი პოლიტიკური გადაწყვეტილება – ჩვენ აღნიშნულ საკითხს საგაზაფხულო სესიაზე განვიხილავთ და შემუშავდება სპეციალური პროცედურა და კრიტერიუმები. ასეთია გუნდის გადაწყვეტილება. ჩვენ ყველნაირად ვეცდებით, რომ სასამართლოსთან დაკავშირებით ისეთი გადაწყვეტილება მივიღოთ, რომელიც ქვეყნისა და საზოგადოების ინტერესებში იქნება. ჩვენთვის ამოსავალია, რომ სასამართლოს დამოუკიდებლობა იყოს დაცული და უზენაესი სასამართლოს შემადგენლობა დროულად დაკომპლექტდეს, რადგან უზენაეს სასამართლოში 28 მოსამართლიდან არის მხოლოდ 10 მოსამართლე, რაც იმას ნიშნავს, რომ არაერთი ჩვენი თანამოქალაქე მისთვის მნიშვნელოვან საქმეებზე გადაწყვეტილების მიღებას ელოდება. დაუშვებელია, რომ მოსამართლეთა არჩევის საკითხი კიდევ დიდხანს გადაიდოს”, განუცხადა ჟურნალისტებს არჩილ თალაკვაძემ.

უზენაეს სასამართლოში უვადოდ დასანიშნი მოსამართლეების სიასთან დაკავშირებით, “ევროპული საქართველო” პარლამენტს რეზოლუციის მიღებისკენ მოუწოდებს. საპარლამენტო უმცირესობის ლიდერების თქმით, რეზოლუციის საფუძველზე მოსამართლეთა არსებული სია იუსტიციის უმაღლესმა საბჭომ უკან უნდა გაიწვიოს. ახალი სია კი კონკრეტული კრიტერიუმების გათვალისწინებით უნდა შედგეს. “ევროპული საქართველოს” ინიციატივა 6 პუნქტისგან შედგება და დეტალურად არის გაწერილი ის კრიტერიუმები, რასაც უვადოდ დასანიშნი მოსამართლე უნდა აკმაყოფილებდეს.

{{ARTICLEIMAGE}}
ბოლნისში დღეს საქართველოსა და სომხეთის რესპუბლიკის პრემიერ-მინისტრების არაფორმალური შეხვედრა გაიმართა. მამუკა ბახტაძემ ნიკოლ ფაშინიანს სომხეთის პრემიერ-მინისტრად დანიშვნა მიულოცა. მთავრობის მეთაურებმა კეთილმეზობლურ ურთიერთობებზე ისაუბრეს და ნაყოფიერი თანამშრომლობის გაგრძელების იმედი გამოთქვეს. ინფორმაციას პრემიერის პრესსამსახური ავრცელებს. შეგახსნებთ, რომ სომხეთის პრეზიდენტმა ნიკოლ ფაშინიანის პრემიერ-მინისტრის პოსტზე დანიშვნის თაობაზე განკარგულებას ხელი 14 იანვარს მოაწერა.

{{ARTICLEIMAGE}}თბილისის მერია ვახუშტის ხიდის რეაბილიტაციას იწყებს. ამის შესახებ თბილისის მერმა თბილისის მთავრობის სხდომაზე დღეს განაცხადა. სარეაბილიტაციო სამუშაოები ხუთი თვის მანძილზე გაგრძელდება. ხიდი სააკაძის მოედანს და წერეთლის გამზირს აკავშირებს.

ხიდის რეაბილიტაცია იმ კვლევის მიხედვით გადაწყდა, რომელიც 2015 წელს ჩატარდა თბილისის ხიდების მდგომარეობის დასადგენად. კახა კალძის განცხადებით ვახუშტის ხიდის მდგომარეობა არასახარბიელოა.

“პროექტის ფარგლებში, გათვალისწინებულია ახალი კონსტრუქციის, სავალი ნაწილის, სადეფორმაციო ნაკერების, რკინა-ბეტონის თვალამრიდების მოწყობა, ასევე, გარე განათების ქსელის, ხიდთან მისასვლელი სანიაღვრე ჭების, დაზიანებული კედლების რეაბილიტაცია და სანაპირო ბურჯების დანაგვიანებული შიდა სივრცის დასუფთავება“, – განაცხადა დედაქალაქის მერმა.

ინფორმაციას ხიდის რეაბილიტაციის პერიოდში ტრანსპორტის მოძრაობის სქემის შესახებ მოსახლეობას უახლოეს მომავალში მიაწვდიან.

{{ARTICLEIMAGE}}
ჯვრის მონასტერთან დაკავშირებით შექმნილ ვითარებაზე საქართველოს საპატრიარქო განცხადებას ავრცელებს.


“როგორც ცნობილია, ჯვრის მონასტერთან დაკავშირებით ამჟამად შექმნილი ვითარება გარემოვაჭრეების საქმიანობის მოწესრიგებისათვის გადადგმული ნაბიჯია. სამწუხაროდ, არასახარბიელო მდგომარეობაა სულიერ-კულტურული მნიშვნელობის სხვა ძეგლებთანაც.

ჩვენ გვესმის, რომ ხალხს უჭირს და ლუკმა-პურის საშოვნელად სხვადასხვა საშუალებას მიმართავს, მაგრამ როდესაც ამდენი ტურისტი და მომლოცველი ჰყავს ქვეყანას უხერხულია, ეს ტაძრები თავისი დიდებულებით გვიყურებდნენ წარსულიდან და XXI საუკუნის საქართველო კი მათ გვერდით მიუღებელი და მოუწესრიგებელი სახით იყოს წარმოჩენილი.

საქართველოს საპატრიარქო მიმართავს ხელისუფლებას, და, პირველ რიგში, კულტურის სამინისტროს, ქმედითი ნაბიჯები გადაიდგას, რათა ეკლესიის მიმდებარე ტერიტორიებზე ცივილური სახე მიეცეს გარე-მოვაჭრეთა საქმიანობას”.