Blog

დეპუტატები ახალ კანონპროექტზე მუშაობას იწყებენ. შინაგან საქმეთა სამინიტროს მიერ მომზადებული ახალი ცვლილებების მიხედვით, ე.წ. ქუჩური გარჩევები დასჯადი ხდება.

დანაშაულის მიხედვით გათვალისწინებული იქნება როგოც ფულადი ჯარიმა, ისე საზოგადოებისათვის სასარგებლო შრომა, ერთ წლამდე შინაპატიმრობა ან ორ წლამდე თავისუფლების აღკვეთა.

სასჯელი მძიმდება იმ შემთხვევაში, თუ დანაშაული ჩადენილია ცეცხლსასროლი იარაღით ან სხვა საგნით და იმ შემთხვევაშიც, თუ სრულწლოვანი არასრულწლოვანს დაიყოლიებს ქუჩურ გარჩევაში მონაწილეობაზე.

„არის გარკვეული რომანტიული სენტიმენტები ზოგიერთი ჯგუფის მხრიდან სწორედ ამ ქუჩურ გარჩევებთან მიმართებით და ვფიქრობთ, რომ იმისთვის, რომ ჩვენ ეფექტურად დავძლიოთ კრიმინალის ეს გამოვლინება, შესაძლოა მიზანშეწონილი იყოს კიდევ უფრო მეტი გამკაცრება ასეთ საკითხებთან მიმართებით, რომ კიდევ არ მოუწიოს პრემიერ-მინისტრს მოსვლა პარლამენტში და იმის ახსნა, თუ რატომ გაიზარდა კრიმინალი,“-განაცხადა სოფიო კილაძემ.

„მთელი ქვეყანა ხედავდა როგორ თანამშრომლობდა „ქართული ოცნება“ კრიმინალთან, უბნებთან ამომრჩეველზე ზეწოლის განსახორციელებლად. პრობლემის გადასაჭრელად თუ მოიხმობს „ქართული ოცნება“ კვლავაც კრიმინალის და ქურდული სამყაროს დახმარებას, რომელიც არაერთხელ გაუკეთებია აქამდე, მაშინ ამ და სხვა კანონებსაც ფასი არ ექნება,“-ამბობს “ევროპული საქართველოს” წევრი გიორგი კანდელაკი.

„ამ ხელისუფლებას ჰგონია, რომ თუ კანონს მიიღებ, ამით ყველა პრობლემა მოგვარდება. კანონს უნდა აღსრულება და კანონი უნდა იყოს ისეთი რომლის აღსრულების უნარიც გააჩნია ქვეყანას იმ ვითარებაში და რესურსებით, რომელსაც იგი ფლობს,“-განაცხადა რომან გოცირიძემ.

ოპოზიციაში ფიქრობენ, რომ კანონის მიღებას აზრი არ აქვს, თუ ხელისუფლება კრიმინალთან თანამშრომლობას გააგრძელებს.

ხელისუფლების ოპონენტების თქმით, მნიშვნელოვანი არა კანონის მიღება, არამედ მისი აღსრულებაა.

საქართველოს შინაგან საქმეთა სამინისტრომ „ქურდული სამყაროს“ წევრობისა და „კანონიერი ქურდისთვის“ მიმართვის ბრალდებით სამი პირი დააკავა.
ამის შესახებ შინაგან საქმეთა სამინისტროში რამდენიმე წუთის წინ ბრიფინგი ჩატრადა.
შინაგან საქმეთა სამინისტროს ცენტრალური კრიმინალური პოლიციის დეპარტამენტის და საქართველოს მთავარი პროკურატურის თანამშრომლების მიერ ერთობლივად ჩატარებული ოპერატიულ-სამძებრო და საგამოძიებო ღონისძიებების შედეგად, მიმდინარე წლის 23 მარტს დაკავებულია წარსულში სხვადასხვა მძიმე დანაშაულისთვის ნასამართლევი 3 პირი.

სამართალდამცველებმა, მოსამართლის განჩინების საფუძველზე, „ქურდული სამყაროს“ წევრობის ბრალდებით, კრიმინალური ავტორიტეტები – 1970 წელს დაბადებული ბ.ტ. და 1964 წელს დაბადებული გ.მ., ხოლო „კანონიერი ქურდისთვის“ მიმართვის ბრალდებით – 1959 წელს დაბადებული რ.ღ. დააკავეს. მათ მიერ ჩადენილი დანაშაული 3-დან 10 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ ერთ-ერთმა ბრალდებულმა, რომელიც კერძო კომპანიის მეწილეა, თავისივე ბიზნესპარტნიორთან – აღნიშნული კომპანიის დირექტორთან წარმოქმნილი დავის გადაწყვეტის მიზნით, დახმარებისთვის 2 ნაცნობ კრიმინალურ ავტორიტეტს მიმართა და კრიმინალური გავლენის გამოყენებით, დავის მის სასარგებლოდ გადაწყვეტა სთხოვა.

გამოძიებამ, ასევე, დაადგინა, რომ აღნიშნული პირები შეხვდნენ ბრალდებულის ბიზნესპარტნიორს, მას გაეცნენ საზღვარგარეთ მცხოვრები „კანონიერი ქურდის“ ზაალ მახარობლიძის (მეტსახელად „გლეხოვიჩის“) წარმომადგენლებად და კომპანიის მნიშვნელოვანი წილის დათმობა მოსთხოვეს. ბიზნესპარტნიორებს შორის დავის გადაწყვეტა აღნიშნულ ე.წ. „კანონიერ ქურდთან“ სატელეფონო კომუნიკაციის საშუალებით გაგრძელდა. ზაალ მახარობლიძემ მხარეებს შორის უთანხმოება თავისი კრიმინალური გავლენის გამოყენებით, “ქურდული წესებით”, ბრალდებულის სასარგებლოდ გადაწყვიტა.

სამართალდამცველებმა, ჩატარებული სპეციალური ოპერატიული ღონისძიებების შედეგად, სამივე ბრალდებული საკუთარ საცხოვრებელ სახლებში დააკავეს.

პოლიციამ, დაკავებულების საცხოვრებელი ბინების ჩხრეკისას, ნივთმტკიცებად ამოიღო ცეცხლსასროლი იარაღი – „აკ-74“-ის მოდელის ავტომატი და “არალის” მოდელის პისტოლეტი, ასევე, ავტომატური ცეცხლსასროლი იარაღისთვის განკუთვნილი 21 საბრძოლო ვაზნა, კომპიუტერული ტექნიკა და ბრალდებულების მობილური ტელეფონები, რომელთა საშუალებითაც ისინი ერთმანეთს და საზღვარგარეთ მცხოვრებ ქართველ „კანონიერ ქურდს“ უკავშირდებოდნენ.

გამოძიება “ქურდული სამყაროს“ წევრობისა და “კანონიერი ქურდისადმი” მიმართვის ფაქტებზე, საქართველოს სისხლის სამართლის კოდექსის 223-ე პრიმა მუხლის 1-ლი ნაწილით და 223-ე 4-პრიმა მუხლის 1-ლი ნაწილით მიმდინარეობს.

აღსანიშნავია, რომ 2018 წლის იანვრიდან დღემდე პასუხისგებაში მიეცა 5 ე.წ. “კანონიერი ქურდი”, დაკავებულია “ქურდული სამყაროს” 39 წევრი, ხოლო სამინისტროს მიერ ინიცირებული, კანონში შესული ცვლილებების შედეგად დამატებული ახალი მუხლებით – „ქურდულ შეკრებაში“ მონაწილეობის, „ქურდული სამყაროს“ საქმიანობის მხარდაჭერის, „ქურდული სამყაროს“ წევრის ან „კანონიერი ქურდისთვის“ მიმართვის ან მიმართვის შედეგად მატერიალური სარგებლის მიღებისთვის – 32 პირი.

ევროპელ კოლეგებთან თანამშრომლობით, ევროკავშირის წევრ ქვეყნებში ჩატარებული მასშტაბური ერთობლივი ოპერაციების შედეგად კი დაკავებულია – 10 ქართველი ე.წ. „კანონიერი ქურდი“.

ოკუპირებული აფხაზეთის დე ფაქტო საგარეო უწყება“ სტოლტენბერგის განცხადებებზე -“ამგვარი განცხადებები  მილიტარისტურ განწყობებს აღვივებს.”

დე ფაქტო უწყებაში აღნიშნეს, რომ „ამგვარი განცხადებები საქართველოს ხელმძღვანელებს მოლოდინებს უჩენს, მილიტარისტურ განწყობებს აღვივებს და ძირს უთხრის ძალისხმევას ამიერკავკასიაში მშვიდობისა და უსაფრთხოების უზრუნველყოფის კუთხით“.

დე ფაქტო საგარეო საქმეთა სამინისტროს განცხადებაში ასევე ნათქვამია რომ საქართველოსა და ნატო-ს სწავლებები „გამოწვევას წარმოადგენს აფხაზეთის უსაფრთხოებისთვის“.

ქართველ კლასიკოს მწერალს გურამ დოჩანაშვილს დღეს 80 წელი შეუსრულდა. დოჩანაშვილის პირველი მოთხრობები ჟურნალ “ცისკარში” დაიბეჭდა 1961 წელს, თუმცა ხალხის სიყვარული მოგვიანებით მისმა რომანმა მოუტანა.  “სამოსელი პირველი” 1975 წელს გამოიცა და მრავალ ენაზე ითარგმნა. მისი ნაწარმოებები საფუძვლად დაედო ბევრ  ცნობილ კინოფილმსა და ტელესპექტაკლს.

გურამ დოჩანაშვილი „ლიტერატურის განვითარებაში შეტანილი განსაკუთრებული წვლილისთვის“ „საბას“ პრემიის ლაურეატია.

მიმდინარე წლის თებერვალში შენგენის ზონაში საქართველოს 211 მოქალაქე არ შეუშვეს.

შინაგან საქმეთა სამინისტრო საქართველოს მოქალაქეების მიერ შენგენის ზონის ქვეყნებში მოგზაურობის ახალ სტატისტიკას აქვეყნებს.

უწყების მონაცემებით, მიმდინარე წლის თებერვალში ყველაზე მეტი, 5112 ადამიანი გერმანიაში გაემგზავრა. პოლონეთს 3198 მოქალაქე ესტუმრა, საბერძნეთს – 2994, იტალიას – 2594.

ამ მონაცემებზე დაყრდნობით საქაქრთველოს  მოქალაქეებმა ყველაზე მეტი უარი  საფრანგეთის საზღვარზე მიიღეს – 37 მოქალაქე ქვეყნის ტერიტორიაზე არ დაუშვეს.

სხვა ქვეყნების მონაცემები კი ასეთია: იტალია – 34, კვიპროსი – 33, პოლონეთი – 30, ესპანეთი – 25, გერმანია – 20, ავსტრია – 20, უნგრეთი – 11, საბერძნეთი – 7, ლატვია – 6, ჩეხეთი – 4, ლიეტუვა – 2, ნიდერლანდები – 1, ბულგარეთი – 1.

ფინანსთა სამინისტროს საგამოძიებო სამსახურის თანამშრომლებმა ქრთამის აღების ფაქტზე თბილისის მერიის ერთ-ერთი რაიონის გამგეობის სამხედრო განყოფილების უფროსი დააკავეს.

გამოძიებით დადგინდა, რომ ბრალდებულმა, უკანონო მატერიალური სარგებლის მიღების მიზნით, სამსახურეობრივი მდგომარეობის გამოყენებით და კანონის გვერდის ავლით, მოქალაქეს სამხედრო სავალდებულო სამსახურში გამოძახების გადავადებისათვის ქრთამის სახით მოსთხოვა და გამოართვა 700 ლარი.

საქმეზე გამოძიება საქართველოს სისხლის სამართლის კოდექსის 338-ე მუხლის პირველი ნაწილით გრძელდება, რაც სასჯელის სახით  6-დან 9 წლამდე ვადით  თავისუფლების აღკვეთას ითვალისწინებს.

“2012 წელს საქართველოში არჩევნები ჩატარდა, სადაც რუსეთი აქტიურად ერეოდა” – ამის შესახებ განცხადება, საქართველოს მესამე პრეზიდენტმა მიხეილ სააკაშვილმა fox news-თან ეთერში განაცხადა.

მიხეილ სააკაშვილმა ინტერვიუში, 2012 წლის საპარლამენტო არჩევნებში რუსული ფულის გავლენაზე ისაუბრა. მან ყურადღება აშშ-ს ყოფილი სახელმწიფო მდივნის, ჰილარი კლინტონის ელექტრონულ მიმოწერაზე გაამახვილა, რომელიც ცოტა ხნის წინ გასაჯაროვდა.

მისი თქმით, კლინტონის გარემოცვის ელექტრონული მიმოწერიდან ირკვევა, რომ პირები, რომლებიც ბიძინა ივანიშვილისგან ფულს იღებდნენ, აძლევდნენ რეკომენდაციებს სახელმწიფო მდივანს და მის გარემოცვას პოლიტიკურ საკითხებში.

“2012 წელს საქართველოში არჩევნები ჩატარდა, სადაც რუსეთი აქტიურად ერეოდა. პრორუსი ოლიგარქი, გაზპრომის აქციათა უდიდესი მეწილე, ბატონი ივანიშვილი ატარებდა კამპანიას ჩემს წინააღმდეგ. ამ დროს სახელმწიფო მდივნის ჰილარი კლინტონის გარემოცვასთან კონტაქტი ჰქონდა 3 პიროვნებას. ეს ადამიანები იღებდნენ რუსულ ფულს ივანიშვილისგან და შემდეგ როგორც უკვე ცნობილია, მეილკების საქმიდან, აძლევდნენ რეკომენდაციას სახელმწიფო მდივანს თუ რა ეთქვა პრესკონფერენციაზე როდესაც ის სტუმრობდა ამერიკის მოკავშირე ქვეყანას, ეკონტაქტებოდნენ მის გარემოცვას შეხვედრების დაგეგმვის მიზნით. ეს ადამიანები ეუბნებოდნენ ჰილარი კლინტონის ადმინისტრაციას, რომ თუ სააკაშვილის პარტია მოიგებდა, ეს გაართულებდა ამერიკის ურთიერთობებს მოსკოვთან. მათი ნაწილი ღიად მუშაობდა რუსულ ფულზე, რუსეთის მონაწილეობით და აკეთებდა ამას არაოფიციალური არხებით, რაც კანონით აკრძალულია. ჩვენ მაშინ ხმამაღლა ვაცხადებდით, რომ რუსეთი ერეოდა ჩვენს არჩევნებში, ახორციელებდა დეზინფორმაციის კამპანიებს, პროვოკაციებს, სამხედრო ზეწოლას. ვითხოვდით გადაერჩინათ ჩვენი დემოკრატია. იგივე პირებმა, რომლებმაც ასეთი ხმაური ატეხეს დონალდ ტრამპის არ არსებულ შეთქმულებაზე, მაშინ თვალი დახუჭეს რუსეთის მასშტაბურ ჩარევაზე ჩვენს არჩევნებში“ – განაცხადა მიხეილ სააკაშვილმა.