Blog

ეკა ბესელიას და ზვიად კვაჭანტირაძეს ევროსაბჭოს დელეგაციის შემადგენლობა დაატოვებინეს.
ამ ფაქტს პარლამენტში სხდომაზე ხმაური მოჰყვა, ბესელია შურისძიებად აფასებს მათი ჩანაცვლების ფაქტს.

“პარლამენტს ნუ დავამსგავსებთ რაღაც პერსონალური შურისძიების ადგილს,” – ეს განცხადება პარლამენტის წევრმა, ეკა ბესელიამ, ყოფილი თანაგუნდელების მისამართით გააკეთა.

“ეს არ არის პარლამენტის ნორმალური საქციელი და ნუ დავამსგავსებთ რაღაც პერსონალური შურისძიების ადგილს. ეს არის საქართველოს პარლამენტი და კეთილი უნდა ინებოს ყველამ, შენც, როგორც კომიტეტის თავმჯდომარემ, როგორც ამ დელეგაციის წევრმა, სხვამაც, კეთილი უნდა ინებოს და წესებს პატივი უნდა ვცეთ და ჩვენი პერსონალური განწყობები დამტოვოთ სადმე გარეთ,” – განაცხადა ეკა ბესელიამ.

ეკა ბესელია განმარტავს, რომ ევროსაბჭოს დელეგაციის შემადგენლობის ცვლილება იანვრამდე შეუძლებელია და მისთვის გაუგებარია, როგორ ხდება სხვა გვარებით  მათი  ჩანაცვლება.

“ჰგავს ეს პროცესი სადამსჯელო გადაწყვეტილებას და პერსონალურ გადაწყვეტილებებს. ჩემი კითხვა არის შემდეგში, აქ ვნახე, რომ არის შეცვლილი დელეგაციის შემადგენლობა. შენ პირადად, როგორც ამ დელეგაციის წევრი და საპარლამენტო ასამბლეის წევრი, მიგაჩნია, თუ არა, რომ სწორია ის, რომ ახლა, შუალედში, არ ვიცი რის გამო მოხდა ეს და ვისი გადაწყვეტილებაა, ესეც უნდა გვითხრა, რომ ვინ გადაწყვიტა, რომ შეიცვალოს დელეგაციის შემადგენლობა ეროვნულ დონეზე, მაშინ, როდესაც ეს ცვლილება მაინც ვერ აისახება ევროსაბჭოს საპარლამენტო ასამბლეაში,” – განაცხადა ბესელიამ.

მომხდარზე  განმარტებებს  ბესელია საგარეო ურთიერთობათა კომიტეტის თავმჯდომარისგან მოითხოვს.

საპარლამენტო უმრავლესობის წევრები ამბობენ, რომ ეკა ბესელია და ზვიად კვაჭანტირაძე დელეგაციაში საპარლამენტო უმრავლესობის კვოტით იყვნენ წარმოდგენილი და რადგან მათ ოცნება დატოვეს, მმართველ პარტიას სურს, რომ დელეგაციის წევრთა შორის “ქართული ოცნების” წევრები იყვნენ წარმოდგენილი.

ნიკა გვარამიამ მიხეილ სააკაშვილს ინტერვიუს ჩასაწერად ბრიუსელში ჩააკითხა. ინტერვიუ გადაცემა კვირის აქცენტების ფარგლებში ჩაიწერა. ის რუსთავი2–ის ეთერში სამშაბათს საღამოს გავა. ინტერვიუს ჩაწერის შემდეგ კი გვარამიამ და სააკაშვილმა ბრიუსელის ერთ–ერთ რესტორანში ვიდეო სელფი ჩაწერეს და ინტერვიუს შესახებ ისაუბრეს.

“გახარიას დავალებით გამიტაცეს” -ნიკა მელია ომბუდსმენის ანგარიშის იმ ნაწილს აფასებს,რომელიც   ოპონენტების პოლიტიკურ დევნას შეეხება. 

ნინო ლომჯარიას თქმით, ოპოზიციის ლიდერის დაკავება პოლიტიკური ანგარიშსწორების ნიშნებს შეიცავდა, რადგან მას სადეპუტატო იმუნიტეტი იცავს. პოლიციამ მაშინ რამდენიმე საათი მოანდომა იმის გარკვევას, მართლაც იყო თუ არა მელია პარლამენტის წევრი.

მელია აცხადებს, რომ ის გახარიას დავალებით გაიტაცეს.

„გახარიას დავალებით მოხდა ჩემი გატაცება, რომელსაც მერე განრიდება დაარქვეს. და სამარცხვინოა ის რასაც ხელისუფლება ამბობს, რომ თითქოს სამი საათი დასჭირდათ მათ რომ მოეხდინათ იდენტიფიცირება დაკავებულის. და მერე თურმე აღმოჩნდა რომ ეს ხოტორა ადამიანი არის პარლამენტარი ნიკა მელია. სამი საათი არკვევდნენ. ვინმეს სჯერა? ტყუილსაც ვერ იგონებენ. ამასთან დავამატოთ მოცემულობა როდესაც ყველა ის 9 ადამიანი ვინც მე უშუალოდ დამაკავა არც ერთი მათგანი არ იყო რიგითი პოლიციელი. მათშორის შს მინისტრის მოადგილეც. თავის თავს დააბრალოს გახარიამ. რაც უფრო მეტ სისულელეს გააკეთებს, უფრო მეტ კითხვაზე იქნება პასუხი გასაცემი,“-განაცხადა ნიკა მელიამ.

ნიკა მელია გასულ წელს რუსთაველის გამზირზე, პარლამენტის წინ მიმდინარე აქციის დროს   დააკავეს. ის მხოლოდ რამდენიმე საათის შემდეგ გაათავისუფლეს.

დევნილებმა რამდენიმე საათის წინ ულტიმატუმი წამოაყენეს, ისინი პოლიციის კორდონის მოხსნას, ასევეადვოკატებისა და ჟურნალისტების შეშვებას ითხოვენ. წინააღმდეგ შემთხვევაში, შიმშილობის დაწყებით იმუქრებიან.

ისინი “დირსის” გენერალური დირექტორის განცხადებას გამოეხმაურნენ.  დევნილები აცხადებენ, რომ  კორპუსში არაფერი დაუზიანებიათ და მათ მხოლოდ შენობის ფოიე აქვთ დაკავებული.

“ჩვენ არაფერი დაგვიმტვრევია, ღია კარებში შევედით” –  აცხადებს ერთ-ერთი დევნილი.

მათი თქმით, ბესიკ ჯიქურაულმა იცრუა, როცა თქვა, რომ შეჭრილებმა ახალაშენებული კორპუსი ვანდალურად დაიკავეს. ფაქტის დასამტკიცებლად ითხოვენ, ჟურნალისტები შეუშვან და მათ დაათვალიერებინონ ის სადარბაზოები, სადაც ისინი განლაგდნენ.

“რომ ამბობენ, ეს კარები დაამტვრიეს, ეს ფანჯრები დაამტვრიეს, რაღაც დამტვრეულიაო, ვინ ნახა, რომ დამტვრეულია? შეგიშვან ჟურნალისტები და ნახეთ, ერთი კარი თუა გატეხილი, ერთი ფანჯარა თუა გატეხილი. სართულებზეც კი არ შევსულვართ, ფოიეში შევედით ღია კარიდან. წამალზე გავედი და მერე აღარ შემიშვეს,“ – ამბობს ერთ-ერთი დევნილი.

„დირსის“ გენერალური დირექტორი ბესო ჯიქურაული აცხადებს, რომ კომპანიას მნიშვნელოვანი ზარალი მიადგა. მისი თქმით, კერძო საკუთრებაში შეჭრილმა დევნილებმა ვანდალურად დაამტვრიეს სადარბაზოს კარები და ფიზიკურად გაუსწორდნენ დაცვის სამსახურს, რომელმაც შენობის დაცვა ვეღარ მოახერხა.

„ეს არის კერძო საკუთრების შელახვა, რაც არის მიუღებელი. პოლიცია უმაღლეს დონეზე მუშაობს პირველივე დღიდან, თუმცა მათ არ აქვთ უფლება, რომ იძულების გზით გამოიყვანონ ეს ადამიანები. მათი შეჭრით ზიანი ადგება ჩვენს ქონებას, ინვესტიციასა და სამომავლო გეგმებს. დიდი იმედი მაქვს, სახელმწიფო უწყებები კოორდინირებულად იმუშავებენ და მალე აღკვეთენ ამ ფაქტს,კომპანიას ყველა სადარბაზოში ჰყავდა დაცვის სამსახური, ასეულობით ადამიანი მოვიდა და ნამდვილად არ ვიყავით მათი თავდასხმისთვის მზად. კორპუსს ელექტროენერგია და წყალი არ მიწოდება, რადგან სამუშაოები დასრულებული არაა და საფრთხის შემცველია, ზოგიერთ სართულზე კაბელები ღია მდგომარეობაშია. ბინებში შიდა კარები ხის არის და როგორც ვიცით, გუშინ ისინი დაამტვრიეს დაწვეს“, – განაცხადა ბესო ჯიქურაულმა.

300-მდე დევნილი კვლავაც დირსის საცხოვრებელ კომპლექსში რჩება. “დირსის”  კორპუსი იძულებით გადაადგილებულმა პირებმა 4 დღის წინ დაიკავეს. ისინი სახელმწიფოსგან ბინებით უზრუნველყოფას მოითხოვენ.

(more…)

თელავის სოფელ ბუშეტის საბავშვო ბაღის  აღსაზრდელები მოიწამლნენ. ინტოქსიკაციით  საავადმყოფოში 10-მდე ბავშვია  გადაყვანილი.

კონკრეტულად რა გახდა მოწამვლის ზუსტი მიზეზი, ამ ეტაპზე უცნობია, თუმცა გავრცელებული ინფორმაციით, შესაძლოა ეს სასმელი წყალი ყოფილიყო.

ბუშეტის ბაღში უკვე იმყოფებიან სურსათის ეროვნული სააგენტოს თანამშრომლები. ბაღი ინტოქსიკაციის მიზეზის დადგენამდე დროებით დაიხურა.

“როდესაც ვნახე კადრები, თუ ვინ იყვნენ ამ აქციის ორგანიზატორები, ჩემთვის ყველაფერი ნათელი გახდა – სოლიდარობის ქსელის აქციას ახლდა პოლიტიკური შემადგენელი, რაც ძალიან სამწუხაროა, “- თბილისის მერმა კახა კალაძემ  ჭავჭავაძის გამზირზე  გუშინ გამართული აქცია შეაფასა.

კახა კალაძის თქმით, ის მზად იყო შეხვედროდა ახალგაზრდებს და მათთვის გაეცნო ის პროექტები, რაც თბილისის მერიამ შრომის უსაფრთხოების დაცვისა და რეგულაციების გამკაცრების მიმართულებით განახორციელა.

„ჩემთვის პირადად გაუგებარია მოთხოვნები. მე ამასთან დაკავშირებით ინფორმაცია არ მაქვს. რაც შეეხება გუშინ მომხდარ ფაქტს, რომელსაც ჩემი გამოხმაურება მოჰყვა, როგორც მითხრეს არის ახალგაზრდების ჯგუფი, რომელიც აპროტესტებს მუშების უფლებებს და ითხოვს შეხვედრას პრემიერ-მინისტრთან, შინაგან საქმეთა მინისტრთან, ჯანდაცვის მინისტრთან და მერთან. მე რა თქმა უნდა, თანხმობა განვაცხადე და აღვნიშნე, რომ მზად ვარ შევხვდე ადამიანებს, მოვუსმინო, მივაწოდოს ინფორმაცია, თუ რა გაკეთდა წლების განმავლობაში ამ მიმართულებით, რაც სერიოზულ პრობლემას წარმოადგენდა. გარკვეული ცვლილებები განხორციელდა საკანონმდებლო დონეზე, თბილისის მერიაც იყო ინიციატორი გარკვეული ცვლილებებისა, რომელთა ინიცირება გასულ წელს მოვახდინეთ, ეს ეხებოდა მშენებლობებზე რეგულაციების გამკაცრებას, თვითონ მშენებლობებზე დასაქმებულების უფლებებს, მათ უსაფრთხოებას და ა.შ. ამ ყველაფერს ავუხსნიდი ახალგაზრდებს, თუმცა თუ როგორც განვითარდა მოვლენები, ყველამ დაინახა. როდესაც მე ვნახე კადრები, თუ ვინ იყვნენ ამ აქციის ორგანიზატორები, თუ ვინ იყვნენ ეს ადამიანები, ჩემთვის ყველაფერი ნათელი გახდა. ამ აქციას ახლდა პოლიტიკური შემადგენელი, რაც ძალიან სამწუხაროა და აღარ გავაგრძელებ, თუ ვინ დგას ამის უკან და ვინ მართავს ამ ჯგუფს,“ – განაცხადა კახა კალაძემ.