Blog

არასრულწლოვნებით ვაჭრობაში ბრალდებული უკრაინის მოქალაქის სასამართლო სხდომა დახურულია. შუამდგომლობა ბრალდების მხარემ დააყენა, რის საფუძვლადაც არასრულწლოვნების პერსონალური მონაცემების გაჟღერება დაასახელა. შუამდგომლობას დაცვის მხარე და თავად ბრალდებულიც დაეთანხმა. 

იულია სუსლიაკის თქმით, ის თავიდანვე ითხოვდა, რომ მისი შვილები ჟურნალისტებისა და სხვა ადამიანებისგან დაეცვა.

„მე თავიდანვე მქონდა მოთხოვნა, რომ ეს არ ყოფილიყო საჯარო, დაეცვათ ჩემი შვილები ჟურნალისტების ჩარევისგან, ყველა ნებისმიერი სხვა ადამიანისგან, გარდა იმ ხალხისა, რომლებიც დღეისთვის პასუხისმგებლები არიან ჩემი შვილების უსაფრთხოებასა და ჯანმრთელობაზე. ნებისმიერი ჩარევა ჟურნალისტებისა თუ სხვა ორგანოების, უნდა იყოს ჩემთან შეთანხმებული ჩემი ადვოკატის მეშვეობით,“ – განაცხადა იულია სუსლიაკმა.

შსს-ს ინფორმაციით, იულია სუსლიაკი საქართველოში 10 მცირეწლოვან ბავშვთან ერთად რუსეთიდან 2019 წლის 8 აპრილს ჩამოვიდა და აფხაზეთის ოკუპირებულ ტერიტორიაზე გადასვლას აპირებდა.

შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის ზუგდიდის რაიონული სამმართველოს თანამშრომლებმა  ყაჩაღობის ბრალდებით 1997 წელს დაბადებული ე.ე. დააკავეს.

დანაშაული 5-დან 7 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ მიმდინარე წლის 24 აპრილს, ბრალდებულმა, ცივი იარაღის მუქარით ზუგდიდში თამარ მეფის ქუჩაზე მდებარე მარკეტი დააყაჩაღა, 150-ლარამდე ფული გაიტაცა და შემთხვევის ადგილიდან მიიმალა.

პოლიციამ ჩატარებული ოპერატიულ-საგამოძიებო მოქმედებების შედეგად ბრალდებული დანაშაულის ჩადენიდან მეორე დღეს თბილისში დააკავა. გამოძიება ყაჩაღობის ფაქტზე მიმდინარეობს, საქართველოს სისხლის სამართლის კოდექსის 179-ე მუხლით.

დავით გარეჯში მდებარე აღდგომის ტაძართან საქართველოს დროშა ფრიალებს. ის  ადგილზე სამოქალაქო აქტივისტებმა ჩაიტანეს, რომლებიც გარეჯაში თბილისიდან და საგარეჯოდან ჩავიდნენ.

„ერთმანეთს ყველა გვერდში უნდა დავუდგეთ, რომ არ დაისაკუთრონ ეს ჩვენი ადგილები და ტერიტორიები. სადაო არ უნდა იყოს იმიტომ, რომ ჩვენია, მაგრამ თვითონ გვედავებიან,“ – ამბობს მოქალაქე.

მოქალაქეებისთვის კატეგორიულად მიუღებელია ის შეზღუდვები, რომელიც აზერბაიჯანულმა მხარემ დააწესა და რის გამოც, უნიკალური ქრისტიანული ძეგლების ნახვის და ტერიტორიაზე გადაადგილების საშუალება ქართველ მომლოცველებს, ტურისტებს და სასულიერო პირებსაც აეკრძალათ.

„საქართველოს ხელისუფლება, მთავრობა, საპარლამენტო დელეგაცია იქნება ეს თუ საპრეზიდენტო მხარე იქნება, ყველამ უნდა მოაგვაროს ეს საკითხი და იმ პროცესებში არ უნდა გადაიზარდოს, რაც დღესდღეოსობით კავკასიაში სუფევს და მითუმეტეს, ეს ყველაფერი რუსეთს აძლევს ხელს და აქედან გამომდინარე, ჩვენ მოსახლეობაც უნდა ვიყოთ ისე, რომ ეს ყველაფერი არ მივიდეს იმ ზომამდე, რაც გამოიწვევს უკვე ესკალაციას ამ ყველაფრის,“ – აცხადებს ერთ–ერთი აქტივისტი.

დავით გარეჯის უდაბნოში დღეს ვითარება მას შემდეგ დაიძაბა, რაც თბილისიდან და საგარეჯოდან ჩასულმა მოქალაქეებმა და სამოქალაქო აქტივისტებმა ერთ-ერთ ტაძართან ჩიჩხატურთან მისვლა გადაწყვიტეს.

აქციის მონაწილეებს ამის საშუალება არ მისცეს არც ქართველმა და არც აზერბაიჯანელმა მესაზღვრეებმა.

ქობულეთის რეგიონულ საავადმყოფოს საკანალიზაციო მილში  ემბრიონი იპოვეს. ამის შესახებ პოლიციას საავადმყოფოს ადმინისტრაციამ შეატყობინა.

ემბრიონი მას შემდეგ აღმოაჩინეს, რაც საავადმყოფოში  საკანალიზაციო მილი გაიჭედა და კლინიკამ შესაბამისი სამსახური გამოიძახა.

შსს-ს ინფორმაციით, გამოძიება სისხლის სამართლის 116-ე მუხლით მიმდინარეობს, რაც გაუფრთხილებლობით სიცოცხლის მოსპობას გულისხმობს.

აღდგომის დღესასწაულთან დაკავშირებით, დღეს და ხვალ   საზოგადოებრივი ტრანსპორტი გარკვეულ საათებში უფასოდ იმოძრავებს. დადგენილია 8 მარშრუტი საიდანაც მოქალაქეებს უფასო ტრანსპორტს შესთავაზებენ.