newsreport.ge

Category: ახალი ამბები

  • “ემიგრანტების გადმორიცხვებიც რეჟიმის რეპრესიებს დაექვემდებარება” – აშშ-დან შემოწირულობის გამო, კომისიამ „კავკასიის“ მიმართ ადმინისტრაციული წარმოება დაიწყო

    ტელეკომპანია „კავკასიის“ დირექტორი ნინო ჯანგირაშვილი სოციალურ ქსელში წერს, რომ აშშ-დან შემოწირულობის გამო, კომუნიკაციების მარეგულირებელმა კომისიამ  ტელევიზიის მიმართ ადმინისტრაციული წარმოება  დაიწყო.  კომისია „კავკასიისგან“ ითხოვს წერილობით განმარტებას 3 სამუშაო დღის ვადაში.

    „მოგეხსენებათ, კავკასია შემოწირულობებს იხვეწება, ღიად გვაქვს გამოცხადებული ჩვენი ანგარიში. გვირიცხავენ თანხებს სრულიად უცნობი ადამიანები, რაც განსაკუთრებით მიჩუყებს გულს. საუბარია ისეთ თანხებზე, „იმედის“ პროპაგანდისტები ერთ ლანჩში რომ იხდიან. თურმე მარეგულირებელმა აღმოაჩინა, რომ ჩვენი ერთ-ერთი შემომწირველი აშშ-დან არის. მართლა არ ვიცი, ვინ არის ეს ძვირფასი ადამიანი. გვარი და სახელი ქართული აქვს. შეიძლება ორმაგი მოქალაქეც არის. არ ვიცი სად უნდა გამოვიძიო. და აი, ამათ რა უნდა ვუპასუხო. შემომწირველს რა მომსახურება გავუწიე? რა ინვოისი გავუგზავნე? ან რაში დავხარჯე? ალბათ, დენის ფული გადავიხადეთ ან ხელფასი გავისტუმრეთ. რა ვიცი. სხვა რა უნდა გვექნა ამ ფულით? ამათ უნდათ უბრალოდ დაგვღალონ, შეგვაშინონ რომ მოგვბეზრდეს ცხოვრება და აქედან წავიდეთ. ვერ მოესწრებით“, — წერს ნინო ჯანგირაშვილი.

  • რეჟიმი რომელიც არაღიარებაზე ადამიანებს იჭერს, თავად აღიარებს რომ არაღიარებულია – ჩერგოლეიშვილი

    რეჟიმი რომელიც არაღიარებაზე ადამიანებს იჭერს, თავად აღიარებს რომ არაღიარებულია – ჩერგოლეიშვილი

    მეგობრებო, რეჟიმი რომელიც არაღიარებაზე ადამიანებს იჭერს, თავად აღიარებს რომ არაღიარებულია.

    რეალურად, ამ კანონით რეჟიმი აღიარებით ჩვენებას იძლევა, რომ მის ლეგიტიმაციას ძირი გამოთხრილი აქვს.

    Being powerful is like being a lady. If you have to tell people you are, you aren’t. – მარგარეტ ტეტჩერი

    (ტეტჩერს თვითგამოცხადებული აღმაშენებლებიც თუ მოუსმენენ, გაიაზრებენ, რა ფარჩაკებად გამოიყურებიან).

    როცა ხალხის იძულება გჭირდება, რომ გაღიარონ, ნიშნავს, რომ თავადაც ხვდები, რომ აღარ არსებობ.

    ანუ ბოლომდე ვაწვებით – ეს სიგნალი სისუსტისაა და თუ ჭკუით ვიარეთ, 26 წელს ამათ დავასრულებთ და რუსეთი მთელ სამხრეთ კავკასიაში დამარცხდება – ეს საქართველოს და მისი წიაღი დასავლური ცივილიზაციის დიდებულ გამარჯვებად გაფორმდება.

    განაცხადა ფედერალისტების ლიდერმა თამარ ჩერგოლეიშვილმა.

  • “ფორმულაში” ჩემს წილსმიშა მშვილდაძეს გადავცემ – ზუკა გუმბარიძე

    “ფორმულაში” ჩემს წილსმიშა მშვილდაძეს გადავცემ – ზუკა გუმბარიძე

    ფორმულას ყოფილი გენერალური დირექტორი და თანადამფუძნებელი ზუკა გუმბარიძე აცხადებს, რომ თავის წილს ტელეკომპანიის ამჟამინდელ დირექტორს – მიშა მშვილდაძეს გადასცემს.

    “მივიღე გადაწყვეტილება, რომ ტელეკომპანია „ფორმულაში“ ჩემი წილი გადავცე მის დირექტორსა და ჩემს მეგობარს მიშა მშვილდაძეს, რათა მან საკუთარი შეხედულებით გადაანაწილოს ეს წილი არხის მენეჯმენტზე და თანამშრომლებზე.

    6 წლის განმავლობაში მთელი ჩემი დრო, ენერგია და რესურსი დავუთმე „ფორმულას“ მშენებლობას. იდეა, რომელიც თავიდან ბევრისთვის დაუჯერებელი ჩანდა, დღეს უკვე იქცა რეიტინგულ, სანდო და მაყურებლისთვის საყვარელ არხად.

    მინდა მადლობა გადავუხადო ფორმულა კრეატივის თანადამფუძნებლებს გიორგი ლიფონავას და ირაკლი საღინაძეს, რადგან სწორედ „ფორმულა კრეატივი“ წარმოადგენს იმ ფუნდამენტს, რომელზეც შემდგომ მთლიანად არხი აშენდა.

    ასევე განსაკუთრებული მადლობა ეკუთვნის არხის დამფუძნებელსა და ინვესტორს დავით კეზერაშვილს. სწორედ მასთან პარტნიორობამ გახადა შესაძლებელი ამ არხის დაფუძნება, არსებობა და განვითარება.

    და ბოლოს, მინდა გულით ვუსურვო მხნეობა და გამძლეობა „ფორმულას“ ყველა თანამშრომელს, ვინც ამ მძიმე ფინანსური პრობლემების მიუხედავად ახერხებს, რომ არხი არ ჩაქრეს და ყველაფრის მიუხედავად განაგრძოს მუშაობა და განვითარება. „ფორმულა“ არ არის მხოლოდ ტელევიზია — ეს არის იდეა და ფასეულობები.

    ეს არის თავისუფალი სარედაქციო პოლიტიკა, პროდასავლური ხედვა და ის ერთობა, რომელიც ამ იდეის გარშემო გაერთიანებულმა ადამიანებმა შექმნეს.

    „ფორმულა“ ყოველთვის დარჩება ერთ-ერთ ყველაზე მნიშვნელოვან და ემოციურ პერიოდად ჩემ ცხოვრებაში“, – აცხადებს  ზუკა გუმბარიძე.

  • ვანიშვილს იმაზე მეტად ეშინია ჩემი, ვიდრე პუტინს ეშინოდა ნავალნის – სააკაშვილი

    ვანიშვილს იმაზე მეტად ეშინია ჩემი, ვიდრე პუტინს ეშინოდა ნავალნის – სააკაშვილი

    „დასავლელმა ექსპერტებმა საბოლოოდ დაადასტურეს, რომ ნავალნი ციხეში მოწამლეს იშვიათი, სამხრეთ ამერიკული საწამლავით, რომლის გამოყენება მხოლოდ რუსეთის მთავრობას შეეძლო.

    ნავალნის პუტინი ყოველთვის „რუსეთის სააკაშვილს“ ეძახოდა, ხოლო თვითონ ალექსეი ნავალნიმ ციხიდან მოწამვლამდე ცოტა ხნით ადრე მოუწოდა ოლიგარქის მთავრობას შეეწყვიტა ჩემდამი არასათანადო მოპყრობა. ნავალნი მოკლეს, რათა პატიმართა გაცვლაში არ მოყოლილიყო.

    ივანიშვილს იმაზე მეტად ეშინია ჩემი, ვიდრე პუტინს ეშინოდა ნავალნის, ამიტომ მე ყველაფრისთვის მზად ვარ. სხვათა შორის ჩემი პირველი მოწამვლაც დასავლელმა სპეციალისტებმა დაადასტურეს. როდის იქნება მეორე, მხოლოდ ჯაყომ და მისმა რუსმა პატრონებმა იციან“,

    ამის შესახებ საქართველოს მესამე პრეზიდენტი, მიხეილ სააკაშვილი „ფეისბუქის“ გვერდზე წერს.

  • წელს 4 ათასამდე არალეგალის გაძევებას ვგეგმავთ – გელა გელაძე

    წელს 4 ათასამდე არალეგალის გაძევებას ვგეგმავთ – გელა გელაძე

    “წელს ჩვენ ვგეგმავთ 4 ათასამდე არალეგალის ქვეყნიდან გაძევებას”, – ამის შესახებ შინაგან საქმეთა მინისტრმა გელა გელაძემ ჟურნალისტებს განუცხადა. როგორც მან აღნიშნა, 2025 წელს ქვეყნიდან 1300-ზე მეტი არალეგალი გააძევეს.

    „მხოლოდ მიმდინარე წელს 400-ზე მეტი არალეგალი იქნა გაძევებული. წინა კვირას საზოგადოებას მოვახსენე, რომ 2025 წელს 1300-ზე მეტი არალეგალი იქნა გაძევებული. რა თქმა უნდა, ეს ჩვენი პრიორიტეტია და წელს ჩვენ ვგეგმავთ 4 ათასამდე არალეგალის ქვეყნიდან გაძევებას.[…]ამ მიმართულებით შინაგან საქმეთა სამინისტრო ძალიან აქტიურად მუშაობს როგორც საკანონმდებლო, სტრუქტურული, ტექნოლოგიური და ინფრასტრუქტურული განვითარების კუთხით“, – განაცხადა გელაძემ.

  • 2-წლიანი პატიმრობა – სააპელაციომ ზვიად რატიანის განაჩენი ძალაში დატოვა

    2-წლიანი პატიმრობა – სააპელაციომ ზვიად რატიანის განაჩენი ძალაში დატოვა

    თბილისის სააპელაციო სასამართლომ უცვლელად დატოვა საქალაქო სასამართლოს განაჩენი და პოეტი ზვიად რატიანი პატიმრობაში დატოვა.

    დღევანდელ სასამართლო სხდომას ზვიად რატიანი არ დასწრებია – თავისივე სურვილით.

    9 ოქტომბრის განაჩენით, მოსამართლემ ზვიად რატიანის მიერ პოლიციელისთვის სილის გაწვნა პოლიციელისთვის წინააღმდეგობის გაწევად შეაფასა და 2 წლით თავისუფლების აღკვეთა მიუსაჯა.მოსამართლე გიორგი გელაშვილის განმარტებით, სასჯელი უნდა ემსახურებოდეს მიზანს, ამიტომ ჯარიმა “არაპროპორციული იქნებოდა”.

    ზვიად რატიანს, მზია ამაღლობელის მუხლის მსგავსად შეუცვალეს – პოლიციელზე თავდასხმის ნაცვლად დამნაშავედ ცნეს პოლიციელისადმი წინააღმდეგობაში და 2-წლიანი პატიმრობა შეუფარდეს.

    რატიანი აცხადებს, რომ ეს იყო „სიმბოლური ჟესტი, ერთგვარი პერფორმანსი იმ უსამართლობის წინააღმდეგ, რომელიც დღეს ქვეყანაში ხდება“. ზვიად რატიანმა არაერთხელ აღნიშნა, რომ სინდისი ქენჯნიდა, რადგან პროევროპული პროტესტის არაერთი მონაწილე ციხეში იჯდა, თავად კი თავისუფალი იყო.

  • ეს ხელისუფლება არის დასამხობი, ყველა მოქალაქის ვალდებულებაა, დაამხოს რუსი ხელისუფლება – ბაჩო ახალაია

    ეს ხელისუფლება არის დასამხობი, ყველა მოქალაქის ვალდებულებაა, დაამხოს რუსი ხელისუფლება – ბაჩო ახალაია

    გახსენით სასამართლო პროცესი, რატომ უნდა დახუროთ? ჯანდაბას, ახალაია ბევრს არ უყვარს ამ ქვეყანაში, დაინახონ რა ხდება… ერთი მტკიცებულება მოიტანონ, დადონ და მე აქვე ავწევ ხელებს და ვაღიარებ! – ასე მიმართა თავდაცვის ყოფილმა მინისტრმა, ბაჩო ახალაიამ მოსამართლე ლევან გელოვანს.  თბილისის საქალაქო სასამართლოში 4 ოქტომბრის მოვლენების საქმეზე ბრალდებული თავდაცვის ყოფილი მინისტრის, ბაჩო ახალაიას საქმეზე წინასასამართლო სხდომა მიმდინარეობს. სხდომას ესწრება ბრალდებული ბაჩო ახალაია.

    „ვთვლი, რომ ეს ხელისუფლება არის დასამხობი. ერთადერთი გზა ეს არის იმისთვის, რომ მოვიპოვოთ თავისუფლება. ჩვენ გვაქვს ვალდებულება, რომ ივანიშვილი დავამხოთ. მე გეუბნებით, ივანიშვილი დასამხობია…დასამალი არაფერია, ეს არის ჩემი მყარი პოზიცია და ყველა კეთილსინდისიერი მოქალაქის ვალდებულებაა, დაამხოს რუსი ხელისუფლება. დასამხობი და გამოსაყრელია ყველა მისი ჩინოვნიკი კაბინეტიდან, წიხლებითაა გამოსატანი“, – განაცხადა ახალაიამ.

     

  • საბოტაჟს და ექსტრემიზმს კანონმდებლობა უნდა დაუპირისპირდეს – კობახიძე

    საბოტაჟს და ექსტრემიზმს კანონმდებლობა უნდა დაუპირისპირდეს – კობახიძე

    “ქართული ოცნების” პრემიერმა, ირაკლი კობახიძემ სისხლის სამართლის კოდექსში ცვლილებების შეტანასთან დაკავშირებულ კითხვას უპასუხა და განმარტა, რომ არიან “ექსტრემისტული ძალები”, რომლებიც არ აღიარებენ “საქართველოს ხელისუფლების იურისდიქციას ქვეყნის ტერიტორიის 100%-ზე”, მიღებული ცვლილებები კი მათ დაუპირისპირდება.

    “ჩვენ გვაქვს კონსტიტუციური წყობილება, კონსტიტუციური წესრიგი, რომელიც უნდა იყოს განსაკუთრებით დაცული, ამას უზრუნველყოფს კონსტიტუცია და ეს დამატებით უნდა უზრუნველყოს კანონმდებლობამ, თუ კონკრეტული პირების ქმედებები საფრთხეს უქმნის ქვეყნის კონსტიტუციურ წყობილებას, რა თქმა უნდა, ამ შემთხვევაში უნდა იმოქმედოს კანონმდებლობამ.
    თქვენ იცით, რომ არის 5 კონკრეტული ქვეყანა, რომელიც საქართველოს იურისდიქციას, საქართველოს ხელისუფლების იურისდიქციას, არ აღიარებს საქართველოს ტერიტორიის 20%-ზე, ასეთია 5 ქვეყანა, რუსეთი და პლიუს 4 ქვეყანა.

    ქვეყნის შიგნით არიან ძალები, რომლებიც დანარჩენ 80%-ზე არ აღიარებენ საქართველოს ხელისუფლების იურისდიქციას, ჩვენთვის ერთნაირი პრობლემაა ისიც და ისიც. ერთია საერთაშორისო სუბიექტები, რომლებიც არ აღიარებენ ქვეყნის ტერიტორიის 20%-ზე საქართველოს იურისდიქციას და მეორეა – ქვეყნის შიგნით ძალები, რომლებიც საქართველოს ტერიტორიის 100%-ზე არ აღიარებენ საქართველოს ხელისუფლების იურისდიქციას.

    ერთ შემთხვევაში, ჩვენ გვაქვს ოკუპაციის შესახებ კანონი, რომელიც უპირისპირდება პირველ პრობლემას, ახლა მიიღება ახალი კანონი, ცვლილებები სისხლის სამართლის კოდექსში, რომელიც დაუპირისპირდება მეორე პრობლემას. კონსტიტუციური წყობილების წინააღმდეგ საბოტაჟი და ექსტრემიზმი, ეს არის ის, რასაც კანონმდებლობა უნდა დაუპირისპირდეს.” – თქვა კობახიძემ ჟურნალისტებთან საუბრისას.

  • წყლის ჭავლში შერეული ნივთიერებებით დაზიანებულების სახელით სამართალწარმოებას ვიწყებთ – საია

    წყლის ჭავლში შერეული ნივთიერებებით დაზიანებულების სახელით სამართალწარმოებას ვიწყებთ – საია

    საქართველოს ახალგაზრდა იურისტთა ასოციაცია  წყლის ჭავლში შერეული ნივთიერებებით დაზიანებული მოქალაქეების სახელით საქართველოს ახალგაზრდა იურისტთა ასოციაცია, სასამართალწარმოებას იწყებს და საქართველოს პროკურატურას შესაბამის კომუნიკაციით მიმართავენ.

    ორგანიზაციის თანახმად, მათ მიერ გენერალურ პროკურატურაში გაგზავნილი განცხადებით საქართველოს კანონმდებლობისა და საერთაშორისო სტანდარტების გათვალისწინებით, მოთხოვნილია:

    • ინფორმაცია გამოძიების მიმდინარეობის შესახებ;
    • დაზარალებული პირების გამოკითხვა;
    • წყლის ჭავლში ნივთიერებების შერევისა და მისი გამოყენების პრაქტიკის შესაბამისობის შეფასება სისხლის სამართლის კოდექსით განსაზღვრულ დანაშაულებთან მიმართებით;
    • პასუხისმგებელ პირთა გამოსავლენად აუცილებელი ყველა საგამოძიებო მოქმედების ჩატარება;
    • იმ 7 პირის დაზარალებულად ცნობა, რომელთაც ჯანმრთელობის სხვადასხვა სახის დაზიანება მიადგათ 2024 წლის ნოემბერ-დეკემბერში შსს-ის მხრიდან სპეციალური საშუალებების გამოყენების შედეგად

    საია აცხადებს, რომ განაგრძობს ამ საკითხზე სამართლებრივ ადვოკატირებას, როგორც ადგილობრივ, ისე საერთაშორისო დონეზე.

  • საინფორმაციო-ანალიტიკური დეპარტამენტის დირექტორად ვლადიმერ კონსტანტინიდი დაინიშნა

    საინფორმაციო-ანალიტიკური დეპარტამენტის დირექტორად ვლადიმერ კონსტანტინიდი დაინიშნა

    სახელმწიფო უსაფრთხოების დეპარტამენტის საინფორმაციო-ანალიტიკური დეპარტამენტსა და მმართველობის სფეროში შემავალ სახელმწიფო საქვეუწყებო დაწესებულებაში, საკადრო ცვლილებები განხორციელდა.

    სუს-ის ინფორმაციით, საინფორმაციო-ანალიტიკური დეპარტამენტის დირექტორად ვლადიმერ კონსტანტინიდი დაინიშნა, ხოლო მმართველობის სფეროში შემავალ სახელმწიფო საქვეუწყებო დაწესებულებას – დაზვერვის სააგენტოს მიხეილ ძაგნიძე უხელმძღვანელებს.

    მანამდე, 2027 წლის სექტემბერს, სუს-ის უფროსმა, მამუკა მდინარაძემ, ვლადიმერ კონსტანტინიდი სუს-ის დაზვერის სააგენტოს ხელმძღვანელად დანიშნა. ასევე, 2020 – 2026 წლებში ქართული ოცნების საგარეო საქმეთა სამინისტროში მინისტრის მოადგილის პოზიცია ეკავა.