Fox News ისრაელის ოფიციალურ პირზე დაყრდნობით აცხადებს, ისრაელის ძალებმა ექსპერტთა შენობაზე იერიში იმ დროს მიიტანეს, როდესაც ასამბლეის წევრები ახალი უზენაესი ლიდერის ასარჩევად ხმის მისაცემად იკრიბებოდნენ.ექსპერტთა ასამბლეა დაახლოებით 90 წევრისგან შედგება და ის ახალი უზენაესი ლიდერის არჩევაზეა პასუხისმგებელი.
Fox News-ის ჟურნალისტმა ეს ინფორმაცია პირდაპირ ეთერში გააჟღერა და აღნიშნა, რომ ეს ნაბიჯი მიანიშნებს, “თუ რა დონის სადაზვერვო ინფორმაცია აქვს ისრაელს ამ ომის ფარგლებში”.
შეერთებული შტატების პრეზიდენტი დონალდ ტრამპი ამბობს, რომ ირანს ამერიკასთან საუბარი სურს, თუმცა აღნიშნავს, რომ ეს უკვე “ძალიან გვიანია”.
“მათი საჰაერო თავდაცვა, საჰაერო ძალები, საზღვაო ძალები და ხელმძღვანელობა აღარ არსებობს. მათ საუბარი სურთ. მე ვთქვი: “ძალიან გვიანია”.”, – წერს დონალდ ტრამპი Truth Social-ზე.
1-ელ მარტს აშშ-სა და ისრაელის მიერ ირანზე განხორციელებული თავდასხმებიდან ერთი დღის შემდეგ, პრეზიდენტმა დონალდ ტრამპმა The Atlantic-ს უთხრა, რომ ირანის ახალ ხელმძღვანელობას მასთან მოლაპარაკება სურს, რაზეც ის თანახმაა.
“მათ საუბარი უნდათ და მე დავთანხმდი საუბარს, ასე რომ მათთან ვისაუბრებ. ეს ადრე უნდა გაეკეთებინათ. უფრო ადრე უნდა შეეთავაზებინათ ის, რაც ძალიან პრაქტიკული და მარტივი გასაკეთებელი იყო. ძალიან დააგვიანეს”, – უთხრა დონალდ ტრამპმა სატელეფონო საუბარში The Atlantic-ს.
“რაღაც შიდა თეატრი ჩამოაყალიბეს, მიზანი მძიმე და შავბნელია” – ამის შესახებ “ქართული ოცნების” პარლამენტის პირველმა ვიცე-სპიკერმა, გია ვოლსკიმ ოპოზიციის ნაწილის გაერთიანებაზე საუბრისას განაცხადა.
„რაღაც შიდა თეატრი ჩამოაყალიბეს და უნდათ, რაც შეიძლება მეტი მაყურებელი ჰყავდეთ. ამ მაყურებლების „ბაბლში“ გარკვეული რაოდენობა შეაგროვეს, მაგრამ მთლიანად საქართველოზე გავლენა ვერ მოახდინეს. დაიშალნენ იმ იდეით, რომ ეჩვენებინათ, თითქოს, პლურალისტური ოპოზიციური საზოგადოებაა, რომელიც სხვადასხვა ფლანგიდან ერთი მიმართულებით უტევს, მაგრამ ქვეყნის განვითარებასთან დაკავშირებით სხვადასხვა მოსაზრებები გააჩნია. ჩამოყალიბდნენ, დავიწროვდა მათი ეს სამოქმედო გეგმა, ერთ კალაპოტში ჩაჯდა და ქვეყნის დანგრევას გულისხმობს. ისინი არც იმ დაშლის ვითომდა პერიოდში, არც ერთად ყოფნის პერიოდში, არასდროს უარყოფდნენ, რომ ლიდერები იყვნენ „ნაცმოძრაობაში”. ამას არასდროს უარყოფდნენ არც მოქმედებებით, არც განცხადებებით.
იგივე ხალხია, იგივე გენპროკურორი, იგივე გენერალური მდივანი, იგივე მინისტრი, იგივე პოლიტსაბჭოს წევრი და „ნაცმოძრაობასთან” და სააკაშვილთან დაკავშირებული. სააკაშვილი მათი ლიდერია. რასაკვირველია, ამასაც არავინ მალავს, მაგრამ მთავარი ეგ არ არის. მთავარია, რა არის მათი მიზანი. მიზანი ძალიან მძიმე და შავბნელია. იქით სალომე ზურაბიშვილს საერთოდ აღარ ახსენებენ. იქით „ლელო” და გახარიას პოლიტიკური პარტიები გვერდზე დარჩნენ, თითქოსდა, ამ ხნის განმავლობაში არასდროს უთანამშრომლიათ. ამით ცდილობენ გარკვეული პლურალისტური გარემოს შენარჩუნებას, მაგრამ რეალურად, საზოგადოებამ გადაუსწრო ცოდნაშიც, ინტელექტშიც და ხალხი ასე ადვილად აღარ ტყუვდება. სალომე ზურაბიშვილს ენერგიაც აღარ აქვს. ხელში „ქარტია“ მისცეს, „ქარტიას“ ხელი ყველამ მოაწერა და ახლა მოუწოდებდნენ, რომ ეს „ქარტია“ კაბინეტიდან სააბაზანოში გადაიტანოს. ეგ არის ის პრობლემა, რომელიც ახასიათებს მას. პრაქტიკულად, დატოვეს ისეთ პოზიციაში, როდესაც პრეზიდენტის დროშით ხელში დაიარება და ამბობს პრეზიდენტი ვარო. უკვე ეჭვებს ქმნის საერთოდ ჯანმრთელობის მდგომარეობასთან დაკავშირებით. ამ როლში დატოვეს სალომე ზურაბიშვილი, რომელსაც ყველა მონაცემი გააჩნდა, რომ კარგი, მართალი, სწორი, ინტელექტუალური ლიდერი ყოფილიყო ამ ქვეყანაში,” – განაცხადა ვოლსკიმ.
საბერძნეთში საქართველოს მოქალაქე დააკავეს – ის კრეტაზე აშშ-ის სამხედრო-საზღვაო ბაზაზე ჯაშუშობაშია ეჭვმიტანილი. ინფორმაციას Reuters-ი პოლიციისა და დაზვერვის წყაროებზე დაყრდნობით ავრცელებს. აღნიშნული ბაზა ხმელთაშუა ზღვაში აშშ-ის სტრატეგიულ ობიექტს წარმოადგენს. სუდას ყურეში განთავსებულია საბერძნეთის, აშშ-ისა და ნატო-ს სამხედრო ობიექტები. ბაზას ცოტა ხნის წინ, მარაგების შესავსებად, აშშ-ის ავიამზიდი „ჯერალდ ფორდი“ ეწვია, შემდეგ კი ის ახლო აღმოსავლეთისკენ გაემგზავრა.
წყარომ, რომელიც საბერძნეთის დაზვერვის სამსახურის წარმომადგენელია, განაცხადა, რომ ეჭვმიტანილის ტელეფონში აშშ-ის ავიამზიდის ფოტოები იპოვეს და ხელისუფლება მობილური აპლიკაციის საშუალებით ირანში მყოფ პირთან პოტენციურ კავშირებს იძიებს.
მამაკაცი საბერძნეთში გერმანიიდან 3 თებერვალს ჩავიდა და გასულ თვეში სუდას ბაზის მახლობლად მდებარე სასტუმროში ცხოვრობდა. წყაროების ცნობით, მას ბრალდებებთან დაკავშირებით, ჯერჯერობით, განცხადება არ გაუკეთებია.
შინაგან საქმეთა სამინისტროს ინფორმაციით, ლიბერთი ბანკის სათაო ოფისის შენობაში გაჩენილ ხანძართან დაკავშირებით, გამოძიება სისხლის სამართლის კოდექსის 187-ე მუხლით დაიწყეს, რაც სხვისი ნივთის დაზიანებას ან განადგურებას გულისხმობს.
“საზოგადოებრივი უსაფრთხოების მართვის ცენტრ 112-ში ხანძრის გაჩენის შესახებ შეტყობინება გვიან ღამით შემოვიდა. შეტყობინების მიღებიდან უმოკლეს დროში, ადგილზე გამოცხადდნენ საგანგებო სიტუაციების მართვის სამსახურის მეხანძრე-მაშველები და დაიწყეს ხანძრის ქრობის აქტიური სამუშაოები. ადგილზე, ასევე, მობილიზებულები იყვნენ შინაგან საქმეთა სამინისტროს სხვა შესაბამისი დანაყოფები.
არსებობდა ცეცხლის სხვა არეალზე გავრცელების საფრთხე, თუმცა მეხანძრე-მაშველებმა ხანძრის ლიკვიდირება დროულად მოახერხეს. შემთხვევის შედეგად დაშავებული არავინ არის.
სამართალდამცველების მიერ მოპოვებული ინფორმაციით, ლიბერთი ბანკის შენობის ერთ-ერთ სართულზე სარემონტო სამუშაოები მიმდინარეობდა, რაშიც გამოყენებული იყო შედუღების აპარატი. სავარაუდოდ შედუღების აპარატიდან წარმოქმნილმა ცეცხლის ნაპერწკლებმა გამოიწვიეს აალება, რომელიც სხვა სართულებზეც გავრცელდა.
სამართალდამცველები სხვადასხვა მიმართულებით ატარებენ ოპერატიულ-საგამოძიებო მოქმედებებს.
მუშაობენ ყველა შესაძლო ხანძრის გამომწვევ სხვა ვერსიაზე.
ხანძრის გამომწვევი ზუსტი მიზეზის დასადგენად მიმდინარეობს შესაბამისი ღონისძიებები და დანიშნულია ექსპერტიზა.” – წერია უწყების განცხადებაში.
„ახლავე უნდა გვემოქმედა, რადგან მას შემდეგ, რაც დავაზიანეთ მათი ბირთვული ობიექტები და მათი ბალისტიკური რაკეტების პროგრამა, მათ დაიწყეს ახალი ობიექტების, მიწისქვეშა ბუნკერების მშენებლობა, რომელიც რამდენიმე თვეში მათ ბალისტიკური რაკეტების პროგრამას და ატომური ბომბის პროგრამას იმუნურს გახდიდა“,
ამის შესახებ ირანის საგარეო საქმეთა მინისტრმა აბას არაღჩიმ განაცხადა.
ირანის პოლიტიკის ვეტერანი ალი ლარიჯანი, რომელმაც კვირას განაცხადა, რომ აიათოლა ალი ხამენეის დაღუპვის შემდეგ შეიქმნება დროებითი ლიდერთა საბჭო, ჯერ კიდევ გასულ წელს კვლავ იქცა რეჟიმის უსაფრთხოების სტრუქტურების იერარქიაში ერთ-ერთ ყველაზე გავლენიან ფიგურად.
ის კურირებს საკითხების ფართო სპექტრს – ბირთვული მოლაპარაკებებიდან დაწყებული თეირანის რეგიონული კავშირებითა და შიდა არეულობების სასტიკი ჩახშობით დამთავრებული.
როგორც ისტებლიშმენტის ინსაიდერი და ქვეყნის ერთ-ერთი ყველაზე გავლენიანი ოჯახის წარმომადგენელი, ლარიჯანი ხელმძღვანელობდა ირანის მცდელობებს აშშ-სთან ბირთვული შეთანხმების მისაღწევად – სულ რაღაც ერთი თვის თავზე იქიდან, რაც ვაშინგტონმა იანვარში მას სანქციები დაუწესა ანტისამთავრობო პროტესტების ჩახშობაში მონაწილეობის გამო.
ლარიჯანი 1958 წელს ერაყის ნაჯაფში დაიბადა გამოჩენილი ირანელი სასულიერო პირის, აიათოლა ჰაშემი მირზა ამოლის ოჯახში, რომელიც შაჰმა მოჰამად რეზამ ერაყში გადაასახლა. 1979 წლის რევოლუციის შემდეგ ოჯახი ირანში გადავიდა, სადაც ალი ლარიჯანიმ მოგვიანებით ფილოსოფიის დოქტორის ხარისხი მიიღო. მისი რამდენიმე ძმა ასევე იკავებდა მაღალ თანამდებობებს სახელმწიფო სტრუქტურებში, მათ შორის სასამართლო სისტემასა და საგარეო საქმეთა სამინისტროში.
ის იყო ისლამური რევოლუციის გუშაგთა კორპუსის ერთ-ერთი პირველი წევრი, მოგვიანებით კი გახდა ირანის მთავარი მომლაპარაკებელი ბირთვულ პროგრამაზე. ასევე ხელმძღვანელობდა სახელმწიფო ტელე-რადიოკომპანიას IRIB-ს და მრავალი წლის განმავლობაში აყალიბებდა ირანის მედიის დღის წესრიგს.
2005–2007 წლებში ლარიჯანი ბირთვული პროგრამის მთავარი მომლაპარაკებელი იყო და იცავდა თეირანის უფლებას ურანის გამდიდრებაზე. ერთხელ მან ევროპის მხრიდან ბირთვული საწვავის წარმოებაზე უარის თქმის სანაცვლოდ შეთავაზებული სტიმულები შეადარა „მარგალიტის შოკოლადის ფილაზე გაცვლას“.
მაშინ ირანის ექსპერტები ამბობდნენ, რომ ის დასავლეთის დარწმუნებას დიპლომატიის გზით ცდილობდა და პრაგმატიკოსად ითვლებოდა.
2005 წელს მან წარუმატებლად იყარა კენჭი პრეზიდენტის პოსტზე. მოგვიანებით სცადა მონაწილეობა 2021 და 2024 წლების საპრეზიდენტო არჩევნებში, თუმცა ორივეჯერ მცველთა საბჭომ მოხსნა კანდიდატობიდან.
2008–2020 წლებში ლარიჯანი პარლამენტის სპიკერის პოსტს იკავებდა და პოსტრევოლუციურ ეპოქაში ერთ-ერთ ყველაზე გამორჩეულ პოლიტიკოსად იქცა. მისი სპიკერობის პერიოდში ირანმა 2015 წელს, თითქმის ორწლიანი რთული მოლაპარაკებების შემდეგ, ექვს მსოფლიო ძალასთან ბირთვული შეთანხმება გააფორმა. პრეზიდენტმა დონალდ ტრამპმა ეს შეთანხმება 2018 წელს, თავისი პირველი ვადის დროს, დატოვა.
2021 წელს ხამენეიმ ლარიჯანი დანიშნა ჩინეთთან 25-წლიანი სტრატეგიული შეთანხმების მომლაპარაკებლად — მრავალმილიარდიანი გარიგება, რომელიც ირანის გრძელვადიანი ეკონომიკური გადარჩენისთვის საკვანძო მნიშვნელობისაა.
ლარიჯანი მთელი კარიერის განმავლობაში იკავებდა მაღალ თანამდებობებს, გამოირჩეოდა ხამენეისადმი ერთგულებით და სისტემის ხშირად ერთმანეთთან კონკურირებად ფრაქციებთან ურთიერთობაში პრაგმატიკოსის რეპუტაციით.
მისი ახლო წარსულის ვიზიტი ომანში, როგორც შუამავლისა არაპირდაპირი ბირთვული მოლაპარაკებების მოსამზადებლად აშშ-სთან, კიდევ ერთხელ უსვამდა ხაზს მისი, როგორც ხამენეის ნდობით აღჭურვილი სტრატეგის სტატუსს.
ბოლო თვეებში ლარიჯანი რამდენჯერმე ეწვია თეირანის მთავარ მოკავშირეს — მოსკოვს, უსაფრთხოების საკითხების განსახილველად, რაც მისი მაღალი დონის დიპლომატიაში დაბრუნების კიდევ ერთ ნიშნად შეფასდა.
ლარიჯანი, რომელიც 20 წლის წინ ეროვნული უსაფრთხოების უმაღლეს საბჭოს ხელმძღვანელობდა, ამ პოსტზე კვლავ დაბრუნდა ირანსა და ისრაელს შორის 12-დღიანი საჰაერო ომის შემდეგ, რომელშიც მაშინ აშშ-ც ჩაერთო.
მისი ზოგიერთი საჯარო განცხადება ბირთვულ საკითხზე საკმაოდ პრაგმატულად ჟღერდა.
„ჩემი აზრით, ეს საკითხი გადაჭრადია,“ — განაცხადა ლარიჯანიმ თებერვალში ომანის სახელმწიფო ტელევიზიასთან ინტერვიუში, აშშ-სთან მოლაპარაკებებზე საუბრისას. — „თუ ამერიკელები შეშფოთებულნი არიან იმით, რომ ირანი არ უნდა მიიწევდეს ბირთვული იარაღის ფლობის მიმართულებით, ეს პრობლემა შეიძლება გადაწყდეს.“
ამასთან, ლარიჯანის არაერთხელ უთქვამს, რომ ირანის ბირთვული პროგრამა „ვერასოდეს იქნება განადგურებული“.
თუმცა იანვრის პროტესტების უსაფრთხოების ძალების მიერ სასტიკ ჩახშობაში ლარიჯანის როლიც ყურადღების მიღმა არ დარჩენილა.
აშშ-ის მთავრობის განცხადების თანახმად, სადაც დეტალურადაა აღწერილი მის წინააღმდეგ და სხვა ჩინოვნიკების მიმართ დაწესებული სანქციები რეპრესიებზე პასუხად, ლარიჯანი ერთ-ერთ საკვანძო როლს ასრულებდა პროტესტების ჩახშობაში.
როგორც სხვა ირანელმა ოფიციალურმა პირებმა, ლარიჯანიმაც განაცხადა, რომ ესმოდა იმ ადამიანების განწყობები, რომლებიც ეკონომიკური სირთულეების გამო დემონსტრაციებზე გამოვიდნენ. თუმცა მან დაგმო შეიარაღებული ქმედებები, რომლებიც მისი თქმით, ირანის „მოსისხლე მტრის“ – ისრაელის მიერ იყო პროვოცირებული.
იანვრის დასაწყისში, როდესაც პროტესტები მთელ ირანში გავრცელდა და თეირანში აშშ-ის შესაძლო სამხედრო მოქმედებების შიში გაიზარდა, აიათოლა ხამენეიმ ლარიჯანს სთხოვა სიტუაციის სტაბილიზაცია. ამის შემდეგ, მაღალი რანგის ინსაიდერების თქმით, ლარიჯანიმ კრიზისის მართვა საკუთარ თავზე აიღო და ფაქტობრივად გვერდზე გასწია არჩეული მთავრობა.
იანვრის პროტესტების ჩახშობის შემდეგ ის პრაქტიკულად ქვეყნის ლიდერად იქცა, უკან ჩამოიტოვა პრეზიდენტი მასუდ ფეზეშქიანი და თავად მართავდა ირანის ურთიერთობებს როგორც მოკავშირეებთან, ისე მოწინააღმდეგეებთან.
ვინაიდან ლარიჯანი სასულიერო პირი არ არის, მას არ შეუძლია ხამენეის მემკვიდრე გახდეს უზენაესი ლიდერის პოსტზე. ეს როლი სასულიერო პირს ეკუთვნის, და ხამენეიმ სამი კანდიდატის სია დატოვა.
თუმცა ანალიტიკოსები აღნიშნავენ, რომ აიათოლას გარდაცვალების შემდეგ ირანის, როგორც სასულიერო რეჟიმის, მომავალი გარანტირებული აღარ არის. შესაძლებელია ქვეყანა სათავეში ჩაუდგეს უფრო სეკულარული, მკაცრი ლიდერი ლარიჯანის მსგავსად, და ახალი ხელისუფლების პოლიტიკა კიდევ უფრო მილიტარისტული და ნაკლებად პროგნოზირებადი გახდეს.
ინსაიდერების თქმით, ლარიჯანი უკვე იღებდა ზომებს ძალაუფლების კონსოლიდაციისთვის ხამენეის გარდაცვალების შემთხვევისთვის, იყენებდა რა მჭიდრო კავშირებს გუშაგთა კორპუსის ყოფილ მეთაურებთან და სპეცსამსახურებთან, ასევე თავისი ოჯახის კავშირებს მაღალი რანგის სასულიერო პირებთან.
ყველაზე მძიმე დარტყმები ირანისთვის ჯერ კიდევ წინ არის. აშშ ხვალ დაიწყებს პროგრამის განხორციელებას, რომელიც ნავთობის ფასების მკვეთრი ზრდის შერბილებაზე იქნება მიმართული, — განაცხადა აშშ–ის სახელმწიფო მდივანმა, მარკო რუბიომ.
ამასთან, მან აღნიშნა, რომ ამ ოპერაციაში აშშ-ის მთავარი მიზანია ირანის ბალისტიკური რაკეტების, ასევე მათი წარმოების შესაძლებლობების განადგურება. რუბიომ ხაზი გაუსვა იმ საფრთხის აღმოფხვრასაც, რომელსაც ირანის ფლოტი თავისუფალი ნავიგაციისთვის წარმოადგენს.
შეგახსენებთ, რომ ირანის ფლოტი ბლოკავს ჰორმუზის სრუტეს — ერთგვარ „ბოთლის ყელს“, რომლის გავლითაც მსოფლიო ნავთობის ვაჭრობის დაახლოებით 25% გადის.
ექსპერტების შეფასებით, ჰორმუზის სრუტის დებლოკირება აშშ-ისთვის მარტივი ამოცანა არ იქნება, რადგან ირანი აკონტროლებს სანაპირო ზოლს და ფლობს გემების საწინააღმდეგო რაკეტებს, უპილოტო აპარატებს, სწრაფმავალ კატერებსა და საზღვაო ნაღმების განთავსების შესაძლებლობას. სრუტის ვიწრო აკვატორია ნებისმიერ გემს სანაპიროდან და ჰაერიდან განხორციელებული დარტყმების მიმართ მოწყვლადს ხდის.
თუნდაც სამხედრო უპირატესობის პირობებში, ოპერაცია მოითხოვს მასშტაბურ განნაღმვით სამუშაოებს, სანაპირო სარაკეტო კომპლექსების განეიტრალებას და მუდმივ საჰაერო დაფარვას, რაც ზრდის კონფლიქტის პირდაპირი ესკალაციისა და რეგიონში საბრძოლო მოქმედებების გაჭიანურების რისკს.
ხამენეის და მის მეუღლეს ექვსი შვილი, ოთხი ვაჟი და ორი ქალიშვილი ჰყავდათ.
„ჩემი აზრით, პუტინმა სირიაში უკვე აჩვენა, როგორი მოკავშირეა, როდესაც, ფაქტობრივად, მათ ვერ შეძლეს ასადის რეჟიმის დახმარება. ჩემი შეფასებით, მათ ახლაც აჩვენეს საკუთარი სისუსტე. ანუ, როგორც მოკავშირეები, ისინი უმნიშვნელონი არიან,“ – განაცხადა მან.
ზელენსკის თქმით, ირანში მიმდინარე მოვლენები მნიშვნელოვანი სიგნალია: „რაც ხდება ირანში, ვფიქრობ, კარგი სიგნალია იმისთვის, რომ პუტინმა დაინახოს, როგორ მთავრდება დიქტატურა.“