Category: ახალი ამბები

თბილისის მერის კახა კალაძის განცხადებით, ,,ნაციონალურმა მოძრაობამ” ზუგდიდში პირბადეების დარიგებით მავნებლობა გააკეთა და ადამიანები საფრთხის ქვეშ დააყენა. მისი თქმით, მეორე მავნებლობა ის არის, რომ ამას მერიის საქმიანობასთან ადარებენ.

,, ჩვენ ყოველდღიურად 20-25 ადამიანი ვიკრიბებით უწყებათაშორის საბჭოს სხდომაზე და უნდა დავჯარიმდეთ? ვერ ხვდებით განსხვავებას ზოგადად?! ეს ყველაფერი კეთდება ჩვენი საზოგადოების, მოსახლეობის, ჯანმრთელობის მდგომარეობიდან გამომდინარე. ის, რაც ვნახეთ მგონი კითხვის ნიშნები არ არსებობს, კითხვის ნიშნები აქვს მხოლოდ „ნაციონალურ მოძრაობას” და ისინი თავისი ქმედებებიდან გამომდინარე არიან ჩვეულებრივი მავნებლები“, – განაცხადა კახა კალაძემ.

სოციალურ ქსელში გავრცელდა კადრები, სადაც ჩანს დახურულ სივრცეში თბილისის მერი, წითელ ჯვართან და სხვა ადამიანებთან ერთად როგორ აგროვებს პროდუქტს. კალაძის განმარტებით, ადგილზე შეკრებილ ადამიანებიდან ყველა იყო გადამზადებული, ჰქონდათ აღჭურვილობა და იცავდნენ უსაფრთხოების წესებს.

,,ახალი ლიდერების ინიციატივამ” საპრეზიდენტო ბიბლიოთეკის წარმომადგენლებთან ერთად 26 მარტს ზუგდიდში პირბადეები, სადეზინფექციო ხსნარები და ხელთათმანები დაარიგეს. ადგილზე ათობით ადამიანი იყო შეკრებილი, რის გამოც ორგანიზაცია შსს-მ 15 ათასი ლარით დააჯარიმა.

პარლამენტის ჯანდაცვის კომიტეტის თავმჯდომარის, დიმიტრი ხუნდაძის თქმით, დღეს არსებული მდგომარეობიდან საყოველთაო კარანტინამდე შორს არ ვართ. მისი თქმით, მთავრობაში ქვეყნის მასშტაბით კარანტინის შემოღებაზე მსჯელობა მიმდინარეობს.

ხუნდაძე აღნიშნავს, რომ კარანტინის გამოცხადება საზოგადოების ადეკვატურ ქცევასა და ეპიდვითარების გართულებაზეა დამოკიდებული. მისივე თქმით, ჯერ ქვეყანაში პანიკის საფუძველი არ არის.

,,ჩვენ ყველაფერი უნდა გავაკეთოთ იმისათვის, რომ შემთხვევების და მითუმეტეს, გართულებული შემთხვევების ზრდა არ მივიღოთ და შემდეგ ეს ტვირთი არ აღმოჩნდეს იმაზე მეტი, ვიდრე ეს ჯანდაცვის სისტემას შეუძლია დაძლიოს და აწიოს”, — განაცხადა ხუნდაძემ.

საქართველოში საგანგებო მდგომარებოა 21 მარტს 21 აპრილამდე გამოცხადდა. კარანტინშია მოქცეული მარნეულისა და ბოლნისის მუნიციპალიტეტები.

საქართველოში კორონავირუსით ინფიცირებულთა მაჩვენებელი 81-მდე გაიზარდა. მათგან 13 უკვე გამოჯანმრთელდა. კარანტინის რეჟიმში იმყოფება 4505 ადამიანი, სტაციონარში მეთვალყურეობის ქვეშ — 247 .

ვაზიანიდან თბილისში გადმოყვანილ 5 ჯარისკაცს კორონავირუსი არ დაუდასტურდა.

,,ხაზგასმით აღვნიშნავთ, რომ დღემდე არც ერთ სამხედრო მოსამსახურეს კორონავირუსი არ დადასტურებია. ასევე, გამოკვლევის შედეგად არ დადასტურდა ერთი სამხედროს პნევმონიის დიაგნოზი”, – წერია თავდაცვის სამინისტროს განცხადებაში.

მათი ინფორმაციით, ჯარისკაცები საუნივერსიტეტო კლინიკიდან სამხედრო ჰოსპიტალში გადაიყვანეს.

,,ვინაიდან სამინისტროს გადაწყვეტილებით კორონავირუსისთვის ან სეზონური გრიპისთვის დამახასიათებელი ნიშნების მქონე ყველა სამხედრო მოსამსახურე მკურნალობის კურსს სამხედრო ჰოსპიტალში გადის, გუშინ თბილისის პირველ საუნივერსიტეტო კლინიკაში მოთავსებული ხუთი სამხედრო მოსამსახურე სამხედრო ჰოსპიტალში გადაიყვანეს”, — აცხადებს უწყება.

ვაზიანიდან 5 სამხედრო მოსამსახურე საავადმყოფოში ვირუსის სიმპტომებით 25 მარტს გადაიყვანეს.

საქართველოში კორონავირუსით ინფიცირებული ერთ–ერთი პაციენტის ძმა, გიორგი სტურუა  ფეისბუქში სტატუსს წერს და ამბობს, რომ მისი ძმა თავს კარგად გრძნობს.

“მეგობრებო, პირველ რიგში, მინდა დავიწყო იმით რომ მშვიდობაა. ძალიან ბევრი შეტყობინება და ზარი შემოდის და ყველას ჯერ ფიზიკურად ვერ ვუპასუხე, ამიტომ აქ დავწერ საჯაროდ, მოკლედ. პირველ რიგში, ჩემი ძმა Didimi Sturua Junior უკვე აქეთ არის და არა საფრანგეთში, ჩამოვიდა რამდენიმე დღეა. მართალია დღეს დადებითი პასუხი დაუდასტურდა ვირუსზე მაგრამ არანაირი საგანგაშო მდგომარეობა, ვირუსი მიმდინარეობს ძალიან უპრობლემოდ და არანაირი გართულება არ გამოუწვევია ორგანიზმში. თავს გრძნობს ძალიან კარგად (ისვენებს ძალიან მაგარ სასტუმროში)და უბრალოდ დროის საკითხია ტესტის უარყოფით პასუხამდე. დიდი მადლობა ყველას გამოჩენილი ყურადღებისთვის და თანადგომისთვის. მინდა ყველას გთხოვოთ, რომ ამ ისედაც დაძაბულ პერიოდში ნეგატიური ფიქრები არ დაიმატოთ და ინერვიულოთ, მიაქციეთ ყურადღება იმას რომ ვირუსი მიმდინარეობს და უკვე ფაქტიურად სრულდება სეზონურ მსუბუქ გრიპზე უფრო მარტივად! მალე უარყოფითი პასუხის ინფორმაციითაც გაგახარებთ! “– წერს გიორგი სტურუა.

ინფექციური საავადმყოფოს სამედიცინო დირექტორი მარინა ეზუგბაია ამბობს, რომ ინფექციურში კორონავირუსით ინფიცირებული 4 მძიმე პაციენტია, მათ შორის 1 განსაკუთრებით მძიმედაა.

,,ჩვენ გვყავს 4 მძიმე პაციენტი, ამ 4-დან 1 არის განსაკუთრებით მძიმე პაციენტი, მისი მდგომარეობის სტაბილიზირება ჯერჯერობით ვერ ხდება, დაავადება უმნიშვნელოდ, მაგრამ მაინც პროგრესირებს. დანარჩენ 3-თან გარკვეულწილად მიღებულია სტაბილიზირება, მაგრამ ეს არ გვაძლევს სიმშვიდის საშუალებას, მაინც ჯერჯერობით ვლაპარაკობთ, რომ ამ პაციენტების მდგომარეობა მძიმეა და დინამიურ მეთვალყურეობას და ანალიზს მოითხოვს”,- თქვა მარინა ეზუგბაიამ.

ის ასევე აღნიშნავს, რომ მე-12 გამოჯანმრთელებული პაციენტი სავარაუდოდ დღეს დატოვებს კლინიკას. საქართველოში სულ 13 პაციენტი გამოჯანმრთელდა, 1 საჩხერის კლინიკაში.

ამ დროისთვის ქვეყანაში ინფიცირების დადასტურებული შემთხვევა 81-ია.

საქართველოში კორონავირუსით ინფიცირებული კიდევ 2 პაციენტი გამოჯანმრთელდა. მთლიანობაში 13 პაციენტია გამოჯანმრთელებული.

ინფორმაცია მთავრობის მიერ შექმნილ სპეციალურ ვებ-გვერდზე stopcov.ge-ზე გამოქვეყნდა.

დღევანდელი მონაცემებით, ქვეყანაში 81 ინფიცირების შემთხვევა ფიქსირდება. კარანტინის რეჟიმში 4427 ადამიანი რჩება, ხოლო სტაციონარში მეთვალყურეობას 257 ადამიანი გადის.

საქართველოში კორონავირუსით ინფიცირების შემთხვევათა რაოდენობა 81-მდე გაიზარდა.

ინფორმაცია მთავრობის მიერ შექმნილ სპეციალურ ვებ-გვერდზე stopcov.ge-ზე არის განთავსებული.

კარანტინის რეჟიმშია 4427 ადამიანი, ხოლო სტაციონარში მეთვალყურეობის ქვეშ – 257 პირი.

საქართველოს სახალხო დამცველი და სახალხო დამცველთან არსებული ეროვნულ უმცირესობათა და რელიგიათა საბჭოები მხარდაჭერას უცხადებენ მარნეულისა და ბოლნისის მუნიციპალიტეტების მაცხოვრებელთ და შეშფოთებას გამოთქვამენ საზოგადოების ნაწილის მხრიდან ეთნიკურად აზერბაიჯანელი მოქალაქეებისადმი ქსენოფობიური დამოკიდებულების გამოხატვას გამო, რაც კორონა ვირუსის გავრცელებასთან დაკავშირებით,  ამ ტერიტორიების საკარანტინო ზონებად გამოცხადებას მოჰყვა.

„დღეს საზოგადოება, ვირუსთან გამკლავების თვალსაზრისით, განსაკუთრებით მწვავე გამოწვევის წინაშე დგას – საფრთხის ქვეშაა ადამიანების სიცოცხლე და ჯანმრთელობა, რომელთა დასაცავად, სამედიცინო და სხვადასხვა სფეროს წარმომადგენლები ძალისხმევას არ იშურებენ. ამის ფონზე, საქართველოს თითოეული მოქალაქის მოვალეობაა, საკუთარი შესაძლებლობის ფარგლებში, ხელი შეუწყოს პრობლემასთან ბრძოლას და საერთო სიკეთის მიღწევას. აღსანიშნავია, რომ საქართველოში ეთნიკურ უმცირესობათა მიმართ დისკრიმინაციული დამოკიდებულება პერიოდულად იჩენს ხოლმე თავს.

თუმცა, შექმნილი ვითარებიდან გამომდინარე, როდესაც ყველა ადამიანი, წარმოშობის მიუხედავად, თანაბრად დაუცველია ვირუსთან დაკავშირებული რისკების წინაშე, განსაკუთრებით საგანგაშოა კრიტიკა ეთნიკურ წარმომავლობაზე თუ სხვა პირად მახასიათებელზე აქცენტირებით. სამწუხაროდ, საქართველოს დანარჩენ მოსახლეობასთან შედარებით, მომეტებული სავარაუდო რისკის წინაშე დღეს მარნეულისა და ბოლნისის მუნიციპალიტეტებში მცხოვრები მოქალაქეები აღმოჩდნენ.

პრობლემის განხილვა ამ ტერიტორიებზე მცხოვრები მოქალაქეების ეთნიკური კუთვნილების ჭრილში, ერთმნიშვნელოვნად ეწინააღმდეგება ადამიანის ღირსების დაცვის უზენაეს პრინციპს, აძლიერებს ეთნიკური უმცირესობების მიმართ არსებულ სტიგმებს, აღვივებს დეზინტეგრაციულ პროცესს და მათ სოციალურ გარიყვას ახალისებს. ზემოაღნიშნულის გათვალისწინებით, სახალხო დამცველი და სახალხო დამცველთან არსებული ეროვნულ უმცირესობათა და რელიგიათა საბჭოები მოუწოდებენ ყველას, თავი შეიკავონ ეთნიკური უმცირესობების მიმართ შეუწყნარებლობისა და დისკრიმინაციის წამახალისებელი დამოკიდებულების გამოვლენისაგან და სოლიდარობა გამოიჩინონ შექმნილი ვითარებისადმი“, – ნათქვამია სახალხო დამცველის მიერ გავრცელებულ განცხადებაში.

შეგახსენებთ, რომ საქართველოს ხელისუფლებამ ბოლნისში და მარნეულში მკაცრი საკარანტინო ზონა გამოაცხადა.