Category: ახალი ამბები

საპარლამენტო ოპოზიცია ხელისუფლებისგან ანტიკრიზისულ გეგმას ითხოვს. ისინი თვლიან, რომ  ანტიკრიზისული ბიუჯეტის შექმნა მნიშვნელოვანია, რათა შემცირდეს ბიუჯეტიდან ზედმეტი ხარჯები და მოიზიდონ საგარეო რესურსები არსებული გამოწვევების დასაძლევად.

„ნაციონალური მოძრაობის“ წარმომადგენლის, რომან გოცირიძის განცხადებით, საქართველო​ში არსებული მდგომარეობს დღითიდღე რთულდება. ქართული ოცნება კი გადაწყვეტილებას ვერ იღებს, რადგან ივანიშვილთან ვერ ათანხმებს:

„დღევანდელი ჩვენი მდგომარეობა კიდევ უფრო მძიმდება ე.წ. არაფორმალური მმართველობის გამო. გადაწყვეტილებების მიღებიდან მის აღსრულებამდე უზარმაზარი დრო იკარგება. ეტყობა, არ არის ჯერ ივანიშვილ​თან შეთანხმებული. ალბათ ბუნკერშია და ოცნების დეპუტატების მასთან კომუნიკაცია რთულდება, ვინაიდან მთავრობა ვერასდროს ვერ მიიღებს ისეთ გადაწყვეტილებას, რომელიც მასთან შეთანხმებული არ იქნება“- აცხადებს რომან გოცირიძემ.

ქვეყანაში კორონავირუსით ინფიცირებული კიდევ ორი პაციენტი განიკურნა, – განაცხადა საქართველოს ჯანდაცვის მინისტრმა, ეკატერინე ტიკარაძემ.

მისი თქმით, ამ ეტაპზე საქართველოში კორონავირუსისგან 16 პაციენტი განიკურნა.

“დღეის მდგომარეობით, უკვე გამოჯანმრთელებულია 16 პაციენტი. ეს, რა თქმა უნდა, მიუთითებს სწორ ნაბიჯებზე და ყველა ის გაიდლაინი, რომელიც გამოყენებულია საქართველოში, წარმატებით მუშავდება ჩვენი ექიმების მხრიდან“, – განაცხადა ეკატერინე ტიკარაძემ.

“საქართველოს მსოფლიოს სხვადასხვა სახელმწიფოებიდან ქვეყნის მოქალაქეების ჩამოყვანაში დახმარება არ სჭირდება,”-ამის შესახებ პრემიერ-მინისტრმა გიორგი გახარიამ სამეგრელოში ვიზიტისას განაცხადა.

ასე უპასუხა პრემიერმა შეკითხვას, რომელიც მიხეილ სააკაშვილის ინიციატივას ეხებოდა.

„საქართველო იყო ერთ-ერთი ქვეყანა, რომელმაც პირველივე დღიდან ოფიციალურად განაცხადა, რომ საქართველოს ყველა მოქალაქეს შეუძლია, მიმართოს ქვეყნის საელჩოებს და ჩვენ მათ ორგანიზებულად ჩამოვიყვანთ. ეს პროცესი გრძელდება და ამაში ქვეყანას არავის დახმარება არ სჭირდება“, – განაცხადა გიორგი გახარიამ.

გურჯაანის მუნიციპალიტეტის სოფელ ვეჯინში, მამამ 3 თვის შვილი მოკლა. დაჭრილია გარდაცვლილი ჩვილის დედაც.

ადგილზე ექსპერტ-კრიმინალისტები მუშაობენ. მკვლელობის მოტივი ამ დროისთვის უცნობია. პოლიციამ შვილის მკვლელობაში ბრალდებული უკვე დააკავა.

გამოძიებით დადგინდა, რომ გურჯაანის მუნიციპალიტეტის სოფელ ვეჯინში, მეუღლესთან და შვილთან ერთად სტუმრად მყოფმა ი.ნ.-მ, ცივი იარაღით სასიკვდილო ჭრილობა მიაყენა, შვილს – 2019 წელს დაბადებულ ქ.ნ.-ს, რომელიც მიღებული ჭრილობის შედეგად, ადგილზე გარდაიცვალა.

ბრალდებულმა ასევე ცივი იარაღის გამოყენებით მრავლობითი ჭრილობები მიაყენა მეუღლეს- 1996 წელს დაბადებულ შ.ც.-ს. დაჭრილი სასწრაფო-სამედიცინო დახმარების ბრიგადამ საავადმყოფოში გადაიყვანა.

დაავადებათა კონტროლის ცენტრის დირექტორის მოადგილემ მოსახლეობას სახლში დარჩენისკენ კიდევ ერთხელ მოუწოდა. პაატა იმნაძემ ამის შესახებ “იმედის” ეთერში ისაუბრა. როგორც მან აღნიშნა, ვირუსის შიდა გავრცელების პრევენციის მხრივ ყველა აუცილებელი ზომა უკვე მიღებულია, ახლა მოვლენათა შემდგომი განვითარება უკვე საზოგადოების მიერ რეკომენდაციების დაცვაზეა დამოკიდებული.

„ის, რაც უკვე გაკეთდა, ეს ყველაფერი იყო შიდა გადაცემის პრევენციისთვის. ახლა ყველაფერი ჩვენს მოსახლეობაზეა უკვე დამოკიდებული. თუ არ გინდათ მივიღოთ იტალია, დარჩით სახლში. აი ეს არის დღეს, მეტი აღარაფერი. დღეს არის მთავარი რა? რომ ყველამ უნდა გაითვალისწინოთ, საქართველოს ყველა მოქალაქემ, ყველა ადამიანმა ქვეყნაში – დღეს უკვე იმ ეტაპზე შევდივართ, რომ თუ ჩვენ არ დავრჩებით სახლში, ინფექცია არ გაჩერდება“, – განაცხადა იმნაძემ.

ტელეწამყვანი ნანუკა ჟორჟოლიანი ფეისბუქ სტატუსში კარანტინის პროცესის მიმართ შერჩევით მიდგომაზე და არასწორ პოლიტიკაზე წერს. მისი თქმით, ხელისუფლებამ შერჩევითი მიდგომა გამოიჩინა მაშინ, როცა საქართველოში საფრანგეთის რეისით ბიძინა ივანიშვილის შვილი ჩამოვიდა. ამავე რეისით იმგზავრა ნანუკა ჟორჟოლიანის შვილმა, მარიამ გეგუჩაძემ. მაშინ პარიზი–თბილისის რეისის მგზავრები ამბობდნენ, რომ უტა ივანიშვილს მათთან ერთად შემოწმება არ გაუვლია და ის თვითმფრინავიდან გამოსვლის შემდეგ აღარ უნახავთ. ამის შემდეგ მარიამ გეგუჩაძე საკუთარ სახლში ორკვირიან თვითიზოლაციაში იყო.

“:მოდი მივყვეთ ქრონოლოგიურად.ხელისუფლების გადაწყვეტილებით რისკის ზონიდან (ქვეყნებიდან) ჩამოსული ადამიანები მიყავდათ სავალდებულო კარანტინში, რაც სწორი იყო.ერთ დღეს, ცნობილი გახდა რომ ყველას, ვისაც საშუალება ჰქონდა საკუთარი “კარანტინის” ჰქონდა უფლება,
მისივე ფართი გამოეყენებინა ამისთვის.

პირველი, ეს გადაწყვეტილება დროში ძალიან დაემთხვა უტა ივანიშვილის ამბავს, როცა ყველა სხვა დანარჩენი წაიყვანეს სავალდებულო იზოლაციაში და ის სახლში, დაემთხვა იმიტომ რომ მეორე დღეს მისცეს სხვებსაც იგივეს უფლება და მეორე, ხელისუფლებას კარანტინში მყოფი ადამიანების შენახვა ძვირი უჯდება და სწორია, ვისაც აქვს საშუალება ბიუჯეტის კისერზე არ დაჯდეს, რატომაც არა.

როგორც გავარკვიე გამონაკლისი მხოლოდ მაშინ დაუშვეს, როცა უტა ჩამოვიდა საქართველოში. რამდენიმე დღეში ჩამოსული სტუდენტები სავალდებულო კარანტინში გადაუყვანიათ. ანუ, ეს ყოფილა რამდენიმე დღით და სწორედ მაშინ, როცა უტა ჩამოვიდა პარიზიდან საქართველოში.

არ მოსულა მეგობრებო ამ დროს შერჩევითი პრივილეგიები. მე უბრალოდ გამიმართლა რომ მარიამი უტას რეისზე იყო და არ მოყვა ამ ახალ გადაწყვეტილებაში, სხვა მშობლებმა რა ქნან?! ან ბიუჯეტიდან რატომ ხარჯავთ ამდენ ფულს, მათთვის ვისაც ეს არ სჭირდება, თორემ ვიცი, რომ არიან ისეთები, ვისაც არსად აქვთ წასასვლელი და ხელისუფლებამ უნდა იზრუნოს მათზე.

რომ იცოდეთ, ჯანდაცვის სამინისტროს მიერ მკაცრად კონტროლდებოდა თითოეული მათგანი.

თვით ჩინეთშიც კი, ვუჰანში ადამიანები საკუთარ სახლში იყვნენ გამოკეტილები და ბიუჯეტი მათზე ფულს არ ხარჯავდა.

ჯანმრთელობას გისურვებთ ყველას და კიდევ ერთხელ, არ მოსულა ამ დროს შერჩევითი არაფერი.”- წერს ნანუკა ჟორჟოლიანი.

ბათუმში, კორონავირუსით ინფიცირებული შვიდი პაციენტიდან ერთის ჯანმრთელობის მდგომარეობა დამძიმდა. როგორც ექიმები აცხადებენ, 70 წლის მამაკაცი მართვით სუნთქვაზეა გადაყვანილი, მას ქრონიკული დაავადებებიც აღენიშნება. 70 წლის მამაკაცს მოგზაურობის ისტორია აქვს. ამასთან, კიდევ ერთი ინფიცირებულის ჯანმრთელობის მდგომარეობა საშუალო სიმძიმისაა, მას ორმხრივი პნევმონია აღენიშნება. რაც შეეხება ხუთ ინფიცირებულს, მათი ჯანმრთელობის მდგომარეობა დამაკმაყოფილებელია.

ბათუმში კორონავირუსისთ ინფიცირებულებს ორ კლინიკაში მკურნალობენ. როგორც აჭარის ჯანდაცვის სამინისტროში აცხადებენ, საკარანტინო სივრციდან ექვსი მოქალაქე კლინიკაში, ვირუსის საეჭვო ნიშნებით მოათავსეს. მოქალაქეებს სინჯები უკვე აუღეს და ლაბორატორიული კვლევის შედეგებს ელოდებიან.

ცნობისთვის, აჭარაში 12 საკარანტინო სივრცე გაიხსნა, სადაც 2000-მდე პირია მოთავსებული, 100-ზე მეტი კი თვითიზოლაციაში იმყოფება