Category: ახალი ამბები

საქართველოში კორონავირუსისგან კიდევ 2 ადამიანი გამოჯანმრთელდა. მთლიანობაში გამოჯანმრთელებულია 54 პაციენტი.

ინფორმაცია stopcov.ge-ზე ახლახან განახლდა.

ქვეყანაში კორონავირუსის 230 შემთხვევაა დადასტურებული, მათგან COVID-19-ით 3 ადამიანი გარდაიცვალა.

შსს-ის ინფორმაციით, პოლიციამ ბოლო 24 საათის განმავლობაში საგანგებო მდგომარეობის და ე.წ. კომენდანტის საათის წესების დარღვევისთვის 143 მოქალაქე დააჯარიმა.

კომენდანტის საათის დარღვევისთვის დაჯარიმდა 75 პირი.

საჯარო სივრცეში 3-ზე მეტი პირის შეკრების შეზღუდვის და 2-მეტრიანი სოციალური დისტანციის დაუცველობის გამო პოლიციამ 42 მოქალაქე დააჯარიმა.

21 პირი მგზავრთა გადაყვანისა და ავტომობილით გადაადგილების წესის დარღვევის ფაქტზე დაჯარიმდა.

ასევე, დაჯარიმდა 5 ადამიანი თვითიზოლაციის წესების დარღვევისთვის.

შინაგან საქმეთა სამინისტრო მოქალაქეებს მოუწოდებს, დაიცვან საგანგებო მდგომარეობის ფარგლებში დაწესებული შეზღუდვები.

საგანგებო მდგომარეობის რეჟიმის დარღვევა იწვევს ადმინისტრაციულ პასუხისმგებლობას – ფიზიკური პირის დაჯარიმებას 3 000 ლარით, ხოლო იურიდიული პირის – 15 000 ლარით.

ვახტანგ ბოჭორიშვილის სახელობის კლინიკის სამეთვალყურეო საბჭოს თავმჯდომარის, მაკა სოლოღაშვილის განცხადებით, 3 ახალი პაციენტიდან, რომელთაც კორონავირუსი დღეს დაუდასტურდათ, ერთი 6 წლის ბავშვია.

მისი თქმით, სამიდან ერთი ეროვნული ბანკის თანამშრომლის ოჯახის წევრია, დედას და 6 წლის შვილს კი თურქეთში მოგზაურობის ისტორია აქვთ.

„ბოჭორიშვილის კლინიკაში ბოქსირებულ ნაწილში მკურნალობს 51 პაციენტი, აქედან 16-ს დადასტურებული აქვს კოვიდ -19. სამი პაციენტი დაემატა დღეს დადასტურებული დიაგნოზებიდან. ამ სამიდან ერთი არასრულწლოვანია. დედამ და 6 წლის შვილმა თურქეთის საზღვარი რამდენიმე დღის წინ გადმოკვეთა. მათი ჯანმრთელობის მდგომარეობა დამაკმაყოფილებელია. არის მაღალი ტემპერატურა, ხველა, გამოიხატება პნევმონიის სურათი, მაგრამ მათი სუბიექტური მდგომარეობა დამაკმაყოფილებელია.

რაც შეეხება ეროვნული ბანკის კლასტერს, მათგან ჩვენთან ორი ოჯახის წევრი მკურნალობს. დღეს დადასტურებული შემთხვევა კი არის ზრდასრული ახალგაზრდა მამაკაცი,” – განაცხადა სოლოღაშვილმა.

მან ასევე აღნიშნა, რომ მათ კლინიაში 7 არასრულწლოვანი პაციენტი მკურნალობს. საყურადღებოა 2 პაციენტის მდგომარეობა, დანარჩენების – დამაკმაყოფილებელია.

ბოლო მონაცემებით, საქართველოში COVID-19-ის 230 შემთხვევაა დადასტურებული. მათგან 52 ადამიანი გამოჯანმრთელდა, 3 კი გარდაიცვალა.

საქართველოში კორონავირუსისგან კიდევ ერთი ადამიანი გამოჯანმრთელდა. მთლიანობაში გამოჯანმრთელებულია 52 პირი.

ინფორმაცია stopcov.ge-ზე განახლდა.

ქვეყანაში კორონავირუსის 230 შემთხვევაა დადასტურებული, მათგან COVID-19-ით 3 ადამიანი გარდაიცვალა.

საქართველოში კორონავირუსით ინფიცირების კიდევ 12 შემთხვევა დაფიქსირდა და რაოდენობა 230-მდე გაიზარდა.

ინფორმაცია stopcov.ge-ზე რამდენიმე წუთის წინ განახლდა.

230 ინფიცირებულიდან 52 გამოჯანმრთელდა, ხოლო 3 გარდაიცვალა.

კარანტინის რეჟიმში იმყოფება 4908 ადამიანი, ხოლო სტაციონარში მეთვალყურეობის ქვეშ 430 პაციენტი.

100 დღე გავიდა მას შემდეგ რაც ჯანდაცვის მსოფლიო ორგანიზაციამ ჩინეთში COVID19-ის პირველი შემთხვევების შესახებ მიიღო შეტყობინება. ამის შესახებ ჯანდაცვის მსოფლიო ორგანიზაციის ხელმძღვანელმა სოციალურ ქსელ „ტვიტერზე” დაწერა.

ტედროს გებრეიესუსის განმარტებით, მიმდინარე პანდემია ბევრად მეტია, ვიდრე ჯანდაცვის კრიზისი და ყველა ქვეყნის მთავრობებისა და საზოგადოების რეაგირებას მოითხოვს. მისი ინფორმაციით, უახლოესი დღეების განმავლობაში ჯანდაცვის მსოფლიო ორგანიზაცია „სტრატეგიული მზადყოფნისა და რეაგირების განახლებულ გეგმას წარადგენს”.

ფორმაულას ეთერში  ექსპერტმა გია ხუხაშვილმა განაცხადა, რომ კორონავირუსის შემდეგ, ხელისუფლებას სხვა პრობლემებთან გამკლავება მოუხდება.

ხუხაშვილის თქმით, ახლა პრემიერ გიორგი გახარიას აქვს შანსი, რომ გამოიჩინოს თავი და არჩევნებზე სასურველი შედეგი მიიღოს.

„ადამიანის ბუნება ასეთია, როდესაც აქვს სიკვდილის შიში, მას აქვს ლოიალური დამოკიდებულება ვისზეც მისი სიცოცხლის გადარჩენაა დამოკიდებული, ამ შემთხვევაში ხელისუფლებაზე. თუმცა, როგორც კი სიკვდილის შიში გადაივლის და წინა პლანზე წამოვა შიმშილის შიში, ამ დროს ხალხი ხდება აგრესიული.

ხელისუფლებას არ უნდა ქონდეს იმედი, რომ ხალხთან თაფლობის თვე დიდხანს გაგრძელდება. როგორც კი კორონავირუსი დამთავრდება, დაიწყება პრობლემები. თუ ისინი ვერ გამოიჩენენ ეფექტურობას, არავის გაახსენდება რა და როგორ იყო. ომი დამთავრდება, მშვიდობის გეშინოდეს, ამ სიტუაციაშია გახარია. დანარჩენი მასზეა დამოკიდებული. უნდა ვიცოდეთ, რომ გადაწყვეტილებებზე პასუხისმგებელი გახარიაა. ჩვენ გვაქვს ძველი კითხვები, გაჩნდება ახალი კითხვებიც და ამ ყველაფერს პასუხი არჩევნებზე გაეცემა. გახარიას მცირე, მაგრამ შანსი აქვს, ივანიშვილს შანსი აღარ აქვს“, – განაცხადა ხუხაშვილმა.

საქართველოში კორონავირუსისგან კიდევ ერთი ადამიანი გამოჯანმრთელდა. მთლიანობაში გამოჯანმრთლებულთა რაოდენობა 51-მდე გაიზარდა.

ინფორმაცია stopcov.ge-ზე ცოტა ხნის წინ განახლდა.

საქართველოში კორონავირუსის 218 შემთხვევაა დადასტურებული – 51 გამოჯანმრთელდა, 3 კი გარდაიცვალა. კარანტინის რეჟიმში რჩება 4722 ადამიანი, ხოლო სტაციონარში მეთვალყურეობის ქვეშ 408 პაციენტი.

სუბსიდირებულმა დოლბანდის პირბადეებმა, რომელიც სააფთიაქო ქსელში გუშინ ჩაეშვა, სოციალურ ქსელში და ოპოზიციაში მწვავე კრიტიკა გამოიწვია. მოქალაქეებსა და პოლიტიკოსებს ეჭვი აქვთ, რომ პირბადე უხარისხოა.

დაავადებათა კონტროლის ცენტრის დირექტორის მოადგილე, პაატა იმნაძემ ამბობს, რომ პირბადეების დამზადების ტექნოლოგია აპრობირებულია და წლობით, ერთჯერადი ნიღბების შექმნამდე, შავი ჭირზე ასეთ პირბადეს იყენებდნენ.

,,ასეთი პირბადეებით შავ ჭირზე ვმუშაობდით წლები. ერთჯერადები საერთოდ არ არსებობდა” – მიწერა იმნაძემ ნეტგაზეთს. ის ასევე აღნიშნავს, რომ პირბადე CDC-ს რეკომენდაციებს არ ეწინააღმდეგება.

,,ნაციონალური მოძრაობის” ლიდერის, ნიკა მელიას განცხადებით, აღნიშნული პირბადეები იმდენად უხარისხოა, რომ თავმოყვარე ადამიანი არ იკადრებს მის გაკეთებას.

საქართველოში წარმოებული პირბადეები სააფთიაქო ქსელებში გასაყიდად გუშინ შეიტანეს. თითოს ფასი 50 თეთრია.

როგორც ეკონომიკის მინისტრმა ნათია თურნავამ განაცხადა, საწყის ეტაპზე სარეალიზაციოდ ჩაეშვა 400 ათასი პირბადე. მისი თქმით, პირბადის დამზადება 1 ლარზე მეტი ჯდება, ამიტომ მთავრობა ფასის სუბსიდირებას მოახდენს და მოქალაქეებს მათი შეძენა პრაქტიკულად განახევრებულ ფასად შეეძლებათ.