პარასკევს სამხრეთ კორეის ოფიციალურმა პირებმა განაცხადეს, რომ 91 პაციენტს, რომლებიც ახალი კორონავირუსისგან განკურნებულად ითვლებოდნენ, ტესტმა კვლავ დადებითი შედეგი უჩვენა.
კორეის დაავადებათა კონტროლისა და პროფილაქტიკის ცენტრის დირექტორმა, ჩონ ენ კიონმა ბრიფინგზე განაცხადა, რომ შესაძლოა მოხდა ვირუსის “რეაქტივაცია“ და არა პაციენტების რეინფიცირება.
სამხრეთ კორეის ჯანდაცვის ორგანოების წარმომადგენლები აცხადებენ, რომ გაურკვეველია, რა იმალება ამ ტენდენციის უკან. ეპიდემიოლოგიური კვლევა ჯერ კიდევ გრძელდება.
კორონავირუსით ადამიანების ხელმეორედ დაინფიცირების პერსპექტივა საერთაშორისო დონეზე შეშფოთებას იწევს, რადგან ბევრ ქვეყანას იმედი აქვს, რომ მოსახლეობის დაინფიცირებულ ჯგუფებში საკმარისი იმუნიტეტი გამომუშავდება, რათა პანდემიის განმეორებას ხელი შეუშალოს.
თუმცა სამხრეთ კორეის მონაცემები შესაძლოა საწინააღმდეგოს მეტყველებდეს.
“რიცხვი მხოლოდ გაიზრდება, 91 პაციენტი– ეს მხოლოდ დასაწყისია“– ამბობს კორეის უნივერსიტეტის ინფექციური დაავადებების პროფესორი კიმ ვუ ჯუ.
სამხრეთ კორეელი სპეციალისტები გამოთქვამენ ვარაუდს, რომ შესაძლოა ეს არა განმეორებითი ინფიცირება, არამედ ვირუსის რეაქტივირება იყოს.
ზოგი ექსპერტი თვლის, რომ შესაძლოა საქმე გვქონდეს ტესტების მცდარ შედეგებთან, ანდა ვირუსის კვალი უბრალოდ პაციენტის ორგანიზმში შემორჩა, თუმცა ისინი აღარ არიან გადამდებები და სხვებისთვის საფრთხეს აღარ წარმოადგენენ.
მოკლედ, არსებობს ამ სიტუაციის სხვადასხვა ინტერპრეტაცია და საბოლო პასუხი ჯერჯერობით არ გვაქვს.
სამხრეთ კორეამ პარასკევს 27 ახალი შემთხვევის შესახებ განაცხადა. ეს არის ყველაზე დაბალი ყოველდღიური მაჩვენებელი. ყველაზე მაღალი ამ ქვეყანაში თებერვლის ბოლოს დაფიქსირდა – 900 ახალი ინფიცირებული დღეში. ჯამში დაინფიცირებულთა რიცხვი 10450 –ს შეადგენს. დაახლოებით 7000 სამხრეთ კორეელი კოვიდ 19–ისგან უკვე განიკურნა.
გარდაცვლილია 211 ადამიანი.
