Category: ახალი ამბები

სოხუმში ე.წ. პრეზიდენტის „ინაუგურაციის“ ცერემონია მიმდინარეობს. ოკუპირებული აფხაზეთის დე-ფაქტო პრეზიდენტმა ფიცი დადო.

„ვფიცავ, აფხაზეთის მრავალეროვნული რესპუბლიკის წინაშე, რომ გამოვიყენებ ჩემს ცოდნასა და ძალას მისი კეთილდღეობისა და მშვიდობისათვის. ჩემი მოქმედებებით მკაცრად დავიცავ აფხაზეთის კონსტიტუციის მოთხოვნებს, ვიქნები აფხაზეთის ხელისუფლების მიერ კანონის დაცვის გარანტი რესპუბლიკის ყველა მოქალაქის უფლებებისა და თავისუფლებების დაცვისას. დაე, დამსაჯოს ჩემმა ხალხმა, თუ გადავუხვევ ამ წმინდა მოვალეობისგან“,-განაცხადა ბჟანიამ აფხაზურ ენაზე.

მედიის ინფორმაციით, კორონავირუსის პანდემიის გამო, ცერემონიას არ ესწრებიან დელეგაციები „რუსეთიდან და სხვა მეგობარი ქვეყნებიდან“.

სოფლის მეურნეობის მინისტრმა, ლევან დავითაშვილმა განაცხადა, რომ დღეს არ არსებობს ბაზარზე პურის ფასის გაზრდის წინაპირობები.

მინისტრი ამბობს, რომ ჰქონდათ ინტენსიური კომუნიკაცია პურის მრეწველთა კავშირთან და ინდივიდუალურ საწარმოებთან, ვისაც ქმედითი მექანიზმი შესთავაზეს.

დავითაშვილის განმარტებით, მექანიზმი გულისხმობდა, ერთი მხრივ, კომპანიების წახალისებას მეტი მარაგის შესაქმნელად და მეორე მხრივ, იმას, რომ ფქვილის ფასი, რომელიც პურის წარმოების ძირითადი ინგრედიენტია, “ფიქსირებული იყოს”.

,,აქ ჩვენ დავაწესეთ უმაღლესი ზღვარი, რომ კონკრეტულად ტომარა ფქვილის ფასი არ აღემატება 51 ლარს. ეს არის მნიშვნელოვანი წინაპირობა იმისა, რომ პურის ფასი არ გაძვირდეს და მეორე, ძალიან მნიშვნელოვანი კომპონენტი, რომელიც პურის ფასში მონაწილეობს, არის ენერგომატარებლები. ძირითადმა კომპანიებმა, რომლებიც გაზს აწვდიან ჩვენს კომპანიებს, მიიღეს გადაწყვეტილება და მათ 10 თეთრით შეამცირეს ტარიფი პურის საცხობებისთვის”, – ამბობს ლევან დავითაშვილი.

მან ასევე აღნიშნა, რომ პურის ფასის სტაბილურობა ძალიან მნიშვნელოვანია, განსაკუთრებით, ახლა, “როცა ვხედავთ, რომ მოსახლეობის სოციალური ფონი უფრო რთული და მძიმეა”.

პატარა გოგონა, სახელად პეიტონი, შოტლანდიაში ვადაზე 8 კვირით ადრე, 26 მარტს დაიბადა. დაბადებისას იგი მხოლოდ 1,5 კგ-ს იწონიდა. პირველივე კვირებში მას დაეწყო მსუბუქი სიმპტომები – მსუბუქი ხველა და ცემინება. სამი კვირის ასაკში პეიტონს Covid-19-ის დიაგნოზი დაუსვეს. ინფორმაციას BBC ავრცელებს.

,ნუ ღელავთ, პანიკა საჭირო არ არის, უბრალოდ მას კორონავირუსი აქვს”– განუცხადეს ახალბედა დედას ექიმებმა, რომლებიც ყველანაირად ცდილობდნენ მის დამშვიდებას, თუმცა ცნობამ იმის შესახებ, რომ მისი ახალშობილი გოგონა ქვეყნის ყველაზე ახალგაზრდა კოვიდპაციენტი გახდა, ტრეისი შოკში ჩააგდო.

მიუხედავად იმისა, რომ ექიმები გოგონას მშობლებს სახლში წასვლას და ორკვირიანი თვითიზოლაციის გავლას სთხოვდნენ, ბოლოს დედას მაინც დართეს ნება, საავადმყოფოში დარჩენილიყო. პეიტონს სტეროიდებს აძლევდნენ ფილტვების გასაძლიერებლად, მასზე ნეონატოლოგები 24 საათის განმავლობაში ზრუნავდნენ და მიუხედავად იმისა, რომ მშობლები ძალიან ანერვიულა, პატარა გოგონა რამდენიმე დღეში გამოჯანმრთელდა. იგი საავადმყოფოდან ორშაბათს გაწერეს.

ჯანდაცვის მინისტრმა, ეკატერინე ტიკარაძემ განაცხადა, რომ ამ ეტაპზე ქვეყანაში 10 000-ზე მეტი PCR და 9 000 სწაფი ტესტია.

მისი თქმით, მაისის დასაწყისში ქვეყანაში ტესტების მარაგი 100 ათასამდე შეივსება.

,,ჩვენ ვაგრძელებთ მრავალსაფეხურიან ტესტირებას, რაც გულისხმობს როგორც სწრაფი ტესტებით, ასევე, PCR ტესტებით ადამიანების გამოკვლევას. დღეს ჩვენ გვაქვს 10 000-ზე მეტი PCR ტესტის სრული კომპლექტაცია. ორშაბათს ველოდებით დამატებით 40 000 ტესტს და მაისის დასაწყისში ეს რაოდენობა შეივსება 100 000-მდე”, — თქვა ეკატერინე ტიკარაძემ.

მინისტრი აღნიშნავს, რომ ქვეყანაში ქვეყანაში უკვე გამოყენებულია 5000 სწრაფი ტესტი, ხოლო 9 ათასი დარიგებულია კლინიკებში თანამშრომლების გადასამოწმებლად.

საქართველოში კორონავირუსის ინფიცირების 420 შემთხვევაა დადასტურებული, მათგან 107 ადამიანი გამოჯანმრთელდა. COVID-19-ით 5 პაციენტი გარდაიცვალა.

ჯანდაცვის მინისტრის, ეკატერინე ტიკარაძის განცხადებით, კორონავირუსი დაუდგინდა 20-მდე ექიმს და შსს-ს რამდენიმე თანამშრომელს, ხოლო ჯარში არ დაფიქსირებულა.

მისი თქმით, ეს მოსალოდნელი იყო.

,,არის რამდენიმე შინაგანს საქმეთა სამინისტროს თანამშრომელი, თუმცა აქ საგანგაშო არაფერია. არიან ექიმები, ვისაც დაუფიქსირდათ – მათი რიცხვი დღეს ოცამდეა. ეს გარკვეულწილად იყო მოსალოდნელიც, რის გამოც ხდება ამ ჯგუფების ტესტირება. ზოგადად, სიტუაცია ამ ჯგუფებში არის კონტროლირებადი”, – განაცხადა ტიკარაძემ ბრიფინგზე.

მინისტრის განმარტებით, პაციენტებმა დაავადება ძირითადად უსიმპტომოდ გადაიტანეს.

ოპოზიციური პარტიები საქართველოს პარტნიორებსა და მხარდამჭერებს ღია წერილით მიმართავენ. ისინი პარტნიორებს მოუწოდებენ, რომ  მთავრობას 8 მარტის შეთანხმების განხორციელების მნიშვნელობა შეახსენონ.

,,გვსურს მოგაწოდოთ ბოლო ინფორმაცია 2020 წლის 8 მარტს საქართველოს მთავრობასა და ოპოზიციას შორის მიღწეული შეთანხმების განხორციელების შესახებ. როგორც მოგეხსენებათ, პოლიტიკურ პატიმართა გათავისუფლება აღნიშნული შეთანხმების მნიშვნელოვან ნაწილს წარმოადგენს. სამწუხაროდ, 13 აპრილს, ირაკლი ოქრუაშვილს, რომლის გათავისუფლებაც გათვალისწინებული იყო 8 მარტის შეთანხმებით, ხუთწლიანი პატიმრობა მიესაჯა, რაც შეთანხმების სულისკვეთებისა და ტექსტის დარღვევა და უკან გადადგმული ნაბიჯია”,- წერია განცხადებაში.

ოპოზიციური ძალები განცხადებაში აღნიშნავენ, რომ შეთანხმებას ზედმიწევნით იცავენ და მათ  მხარი დავუჭირეს საკონსტიტუციო ცვლილებების კომისიის შექმნას პარლამენტში და მონაწილეობა მიიღეს დისკუსიებში საარჩევნო კოდექსის შესახებ.

მიუხედავად ამისა, აღიშნული ძალისხმევა შეიძლება ფუჭი აღმოჩნდეს თუ პოლიტიკური პატიმრები – გიგი უგულავა, გიორგი რურუა და ირაკლი ოქრუაშვილი- არ გათავისუფლდებიან. როგორც კი კორონავირუსის პანდემია გადაივლის, მოვლენათა ამგვარი განვითარება გარდაუვლად გამოიწვევს პოლიტიკურ არასტაბილურობას და გაზრდის რისკებს ოტქომბერში დანიშნული არჩევნების წინ. ჩვენი ამოცანაა რომ ეს არ მოხდეს.  საგანგებო სიტუაციები არასდროს არ უნდა იქნას გამოყენებული დემოკრატიის დასაზიანებლად. დღეს, როცა თქვენ ფოკუსირებულნი ხართ თქვენი ქვეყნების პანდემიასთან ბრძოლაზე, მოგმართავთ თხოვნით, რათა საქართველოს მთავრობას 8 მარტის შეთანხმების სრულად განხორციელების მნიშვნელობა შეახსენოთ“”, – წერს ოპოზიცია.

წერილს ხელს აწერს 27 პოლიტიკური პარტია:

ევროპული საქართველო

ერთიანი ნაციონალური მოძრაობა

საქართველოს ლეიბორისტული პარტია

პოლიტიკური გაერთიანება „ლელო“

სამოქალაქო მოძრაობა

თავისუფალი დემოკრატები

ახალი პოლიტიკური ცენტრი „გირჩი“

ახალი საქართველო

საქართველოს რესპუბლიკური პარტია

ეროვნულ-დემოკრატიული პარტია

ევროპელი დემოკრატები

საქართველოს პარლამენტართა საზოგადოება

ქრისტიან-კონსერვატიული პარტია

მოძრაობა სახელმწიფო ხალხისთვის

ვემსახურები საქართველოს

საქართველო ლიდერთა შორის

მოძრაობა სამართლიანობისთვის

სამოქალაქო ალიანსი

თავისუფლებისთვის

ქრისტიან-დემოკრატიული მოძრაობა

ახალი ქრისტიან-დემოკრატები

კანონი და სამართალი

ერთიანი საქართველო დემოკრატიული მოძრაობა

გამარჯვეული საქართველო

ახალი საქართველოსთვის

დამოუკიდებელი დეპუტატი ნატო ჩხეიძე

ოპოზიციამ და მთავრობამ 8 მარტს ორ რეფერენდუმს მოაწერეს ხელი. ერთი საარჩევნო სისტემას შეეხებოდა, ხოლო მეორე მართლმსაჯულების საკითხს. ოპოზიციის განმარტებით, შეთანხმების თანახმად, უნდა გათავისუფლებულიყვნენ პოლიტიკური პატიმრები.

სასაზღვრო პოლიციის თანაშრომელი, რომელსაც მესტიაში სასაზღვრო პოლიციის დეპარტამენტის თანამშრომლის განზრახ მკვლელობისთვის ეძებდნენ, პოლიციას ჩაბარდა. ინფორმაციას ადასტურებს პროკურატურა.

უწყებამ აღნიშნული პირის მიმართ სისხლის სამართლებრივი დევნა გუშინ დაიწყო და მისი ადგილსამყოფელის დადგენის მიზნით, ოპერატიულ-სამძებრო ღონისძიებებს აწარმოებდა.

მომხდარზე გამოძიება სისხლის სამართლის კოდექსის 108-ე და 236-ე მუხლებით მიმდინარეობს, რაც განზრახ მკვლელობას და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.

20 აპრილს მესტიის რაიონის სოფელ მულახში სასაზღვრო პოლიციის თანამშრომელმა საკუთარ კოლეგას ურთიერთშელაპარაკებისას ორჯერ ესროლა. მიღებული ჭრილობების შედეგად  ის საავადმყოფოში მიყვანისთანავე გარდაიცვალა, ხოლო თავად შემთხვევის ადგილიდან მიიმალა.

პირველი საუნივერსიტეტო კლინიკის დირექტორის, ლევან რატიანი ინფორმაციით, დღეს კლინიკიდან 8 გამოჯანმრთელებული პაციენტი გაეწერება.

,,დღეისთვის 8 პაციენტი ეწერება კლინიკიდან. რაც ბოლო 24 საათსი ყველაზე მეტად გვახარებს, იმიტომ, რომ ამდენი პაციენტი არასდროს გაგვიწერია კლინიკიდან. დაახლოებით, 17 პირველადი უარყოფითი პასუხია მოსული. ველოდებით, თუ ხვალ მოვიდა 17 უარყოფითი ორჯერადად, ხვალ 17 პაციენტი დატოვებს კლინიკას”, – თქვა რატიანმა.

მისივე განცხადებით, რეანიმაციაშია 8 პაციენტი, აქედან 7 მართვით სუნთქვაზეა.

რატიანის ინფორმაციით, პირველ საუნივერსიტეტო კლინიკაში მთლიანობაში 700-მდე საეჭვო შემთხვევა იყო დაფიქსირებული, აქედან 119 ადამიანს კორონავირუსი დაუდასტურდა. ამ დროისთვის, კლინიკაში 90 ინფიცირებული აგრძელებს მკურნალობას.

საქართველოში ამ დროისთვის კორონავირუსით ინფიცირების 420 შემთხვევა ფიქსირდება, მათგან 107 გამოჯანმრთელდა, 5 გარდაიცვალა.

,,ქართული ოცნების” წევრის და იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, საგანგებო რეჟიმის, კარანტინის, თვითიზოლაციის დამრღვებებისთვის არანაირი ამნისტიის გამოცემის საკითხი არ განიხილება.

მისი თქმით, ოპოზიციის განცხადებები, რომ ამ ადამიანებს პასუხი არ უნდა მოვთხოვოთ, უპასუხისმგებლობაა, რადგან ისინი მოქალაქეების სიცოცხლეს და ჯანმრთელობას უქმნიან საფრთხეს.

„თუკი ვინმე არ დაიცავს წესს, თუკი ვინმე არის ინფიცირებული ან ჰქონდა შეხება ინფიცირებულთან და წესს არ იცავს, არ აცნობებს ამის შესახებ შესაბამის ორგანოს, არ ახდენს თვითიზოლაციას, ეს ზრდის სხვა მოქალაქეების დაინფიცირების საშიშროებას. ამიტომ თუ ოპოზიცია იმას გვეუბნება, რომ რომ ჩვენ პასუხი არ უნდა მოვთხოვოთ მათ, ვინც ჩვენი მოქალაქეების სიცოცხლეს და ჯანმრთელობას საფრთხეს შეუქმნიან, ეს მათი უპასუხიმსგებლო განცხადებაა. ჩვენი ვალდებულებაა მოსახლეობის სიცოცხლესა და ჯანმრთელობაზე ზრუნვა.

რაც შეეხება ამნისტიის საკითხს, არ დგას დღის წესრიგში არანაირი ამნისტიის გამოცემა იმ პირების მიერ ჩადენილი ქმედებიბისთვის, რომლებმაც დაარღვიეს საგანგებო ან საომარი რეჟიმი, ან კარანტინის და იზოლაციის წესი საგანგებო და საომარი რეჟმის დროს და ამით საფრთხე შეუქმნეს ჩვენი მოქალაქეების სიცოცხლეს და ჯანმრთელობას. აღნიშნული საკითხი, რა თქმა უნდა, პარლამენტის პრეროგატივაა, მაგრამ არანაირი ამნისტია ამ ეტაპზე არ განიხილება,“- განაცხადა ოხანაშვილმა.

შეგახსენებთ, რომ საგანგებო მდგომარეობის, კარანტინის და თვითიზოლაციის დამრღვევებს შსს-მ 22 აპრილის მონაცემებით 15.7 მლნ-ს ჯარიმები გამოუწერა.

21 მარტის შემდეგ 22 აპრილამდე სულ დაჯარიმებულია 5 148 ფიზიკური და 18 იურიდიული პირი.

ფიზიკური პირები საგანგებო რეჟიმის დარღვევისთვის 3 ათასი ლარით ჯარიმდებიან, ხოლო იურიდიული პირები 15 ათასი ლარით.

შინაგან საქმეთა სამინისტროს ინფორმაციით, ბოლო 24 საათის განმავლობაში საგანგებო მდგომარეობის რეჟიმისა და ე.წ კომენდანტის საათის დარღვევისთვის 106 პირი დაჯარიმეს.

სამინსტროს ცნობით, 21 აპრილის 21:00 საათიდან 22 აპრილის 06:00 საათამდე სამართალდამცველებმა მთელი ქვეყნის მასშტაბით ე.წ. კომენდატის საათის დარღვევისთვის 54 მოქალაქე დააჯარიმეს.

გარდა ამისა, საჯარო სივრცეში 3-ზე მეტი პირის შეკრებისა და 2-მეტრიანი სოციალური დისტანციის დაუცველობის გამო, 2 მოქალაქე დაჯარიმდა, ხოლო მგზავრთა გადაყვანისა და ავტომობილით გადაადგილების წესის დარღვევისთვის 50 პირი.

შეგახსენებთ, რომ ფიზიკური პირისთვის ჯარიმის ოდენობა 3 000 ლარია, ხოლო იურიდიული პირისთვის – 15 000.