Category: ახალი ამბები

შსს–მ პირადი ცხოვრების ხელყოფის ბრალდებით სამეგრელო-ზემო სვანეთის საექსპერტო კრიმინალისტიკური სამსახურის თანამშრომელი დააკავა.

„საქართველოს შინაგან საქმეთა სამინისტროს გენერალურმა ინსპექციამ, თბილისის პროკურატურასთან ერთად, სისხლის სამართლის კოდექსის 157-ე პრიმა მუხლის პირველი ნაწილითა (პირადი ცხოვრების საიდუმლოს ხელყოფა) და 151-ე მუხლის პირველი ნაწილით (მუქარა) გათვალისწინებული დანაშაულისთვის, სამეგრელო-ზემო სვანეთის საექსპერტო კრიმინალისტიკური სამსახურის თანამშრომელი დააკავა.

მომხდართან დაკავშირებით მიმდინარეობს გამოძიება“, -წერია სამინისტროს განცხადებაში.

სამოქალაქო მოძრაობა “ხალხისთვის” დამფუძნებელი და დიდუბე-ჩუღურეთის მაჟორიტარი დეპუტატობის კანდიდატი, ანა დოლიძე ამბობს, რომ დიღმის მასივიდან შეიძლება პოსტინდუსტრიული სამოთხე გამოვიდეს.

დოლიძის თქმით, ამ უბანს ორგანულად იცნობს და იცის მისი პოტენციალი.

„მე დიდუბის რაიონში ვცხოვრობდი, დიღმის მასივში, მეთერთმეტე სართულზე. ბავშვობა მაქვს გატარებული, უშუქობაში მეთერთმეტე სართულზე იქით-აქეთ სიარულში. ძალიან კარგად ვიცი დიღმის მასივის სოციალური სამყარო, მისი თვითმყოფადობა. დიღმის ტყე-პარკში დავდიოდი, ვვარჯიშობდი, დავრბოდი. ორგანულად ვიცნობ ამ უბანს და პლიუს ამისა, ვიცი რამხელა პოტენციალი აქვს, მართლაც პოსტინდუსტრიული სამოთხე შეიძლება იქიდან გამოვიდეს, რის საშუალებასაც არ გვაძლევს ეს ხელისუფლება“, – განაცხადა დოლიძემ.

მანვე გუშინ განაცხადა, რომ თამარ მეფემ ქორწილი დიდუბეში გადაიხადა, რადგან ეს ადგილი “აბსოლუტური წალკოტი” იყო.

თბილისში, გმირთა მოედანზე მსუბუქი ავტომობილი scroll–ის სკუტერს დაეჯახა. სკუტერის მძღოლი ადგილზე გარდაიცვალა, ავტომობილის მძღოლი კი პოლიციას ჩაბარდა. შემთხვევა გვიან ღამით მოხდა.

შსს–ს ინფორმაციით, გამოძიება საქართველოს სისხლის სამართლის კოდექსის 276-ე მუხლის მე-6 ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

საქართველოში კორონავირუსით ინფიცირების 8 ახალი შემთხვევა დადასტურდა და საერთო რაოდენობა 1168–მდე გაიზარდა. გამოჯანმრთელდა კიდევ 5 პაციენტი, ჯამში – 940. ამის შესახებ ინფორმაცია stopcov.ge–ზე განახლდა.

კორონავირუსით ქვეყანაში 17 ადამიანი გარდაიცვალა.

ბოლო მონაცემებით, საქართველოში კორონავირუსით ინფიცირების 211 აქტიური შემთხვევაა.

კარანტინის რეჟიმში 6 596 პირი რჩება, სტაციონარში მეთვალყურეობის ქვეშ კი 327 პაციენტია.

20 ოპოზიციური პოლიტიკური პარტია „მთავარი არხის“ ერთ-ერთი მეწილის, გიორგი რურუასთვის გამოტანილ განაჩეჩნთან დაკავშირებით ერთობლივ განცხადებას ავრცელებს:

“ბიძინა ივანიშვილს ჯერჯერობით არ აქვს ქართული და საერთაშორისო საზოგადოების წინაშე აღებული ვალდებულებები შესრულებული. გიორგი რურუას გათავისუფლება და პოლიტიკურად მოტივირებული საქმეების დაუშვებლობა, 8 მარტის შეთანხმების საკვანძო ნაწილია.

გიორგი რურუას საქმე მხოლოდ ამ ადამიანის პერსონალურ ბედს არ ეხება, მიუხედავად იმისა რომ ნებისმიერი ერთი ადამიანის პოლიტიკური დაკვეთით დაპატიმრება უკვე სერიოზული პრობლემაა. ყალბი მტკიცებულებებით რურუას საპატიმროში დატოვება, წინასაარჩევნოდ პოლიტიკურ კლიმატს განსაზღვრავს. გიორგი რურუას გათავისუფლება ქვეყნისთვის რთული საარჩევნო კამპანიის ნაკლები რისკით გავლის შესაძლებლობას ქმნის. ასე ხედავს ამას როგორც საქართველოს ოპოზიციური პოლიტიკური სპექტრი, ასევე საქართველოს საერთაშორისო პარტნიორები.

სამართლიანი, პოლიტიკური მიკერძოებისგან თავისუფალი და გამჭვირვალე სასამართლო სისტემის შექმნა საქართველოს უახლესო ისტორიის მთავარი გამოწვევაა. დემოკრატიული ოპოზიციის მიზანი, ივანიშვილის არჩევნებში მშვიდობიანად დამარცხების შემდეგ, სწორედ ასეთი მართლმსაჯულების სისტემის შექმნა იქნება,“ – ნათქვამია განცხადებაში.

განცხადებას ხელს აწერენ: „ევროპული საქართველო“ „ლეიბორისტული პარტია“, „გამარჯვებული საქართველო“, „ევროპული დემოკრატები“, „მოძრაობა სახელმწიფო ხალხისათვის“, „ემსახურე საქართველოს“, „რესპუბლიკური პარტია“, „კანონი და სამართალი“, „სამოქალაქო ალიანსი თავისუფლებისათვის“, „ერთიანი საქართველო-დემოკრატიული მოძრაობა“, „ახალი საქართველო“, „თავისუფალი დემოკრატები“, „სამართლიანობისთვის“, „ქრისტიან კონსერვატიული პარტია“, „საქართველო ლიდერებს შორის“, „საქართველოს პარლამენტართა საზოგადოება“, „ერთიანი ნაციონალური მოძრაობა“, „ლელო“, „ეროვნულ დემოკრატიული პარტია“, „ახალი პოლიტიკური ცენტრი გირჩი“.

გიორგი რურუას 30 ივლისს მოსამართლე ვალერიან ბუგიანიშვილმა 4 წლით თავისუფლების აღკვეთა მიუსაჯა.

გიორგი რურუასთვის 4 წლიანი პატიმრობის შეფარდებას ევრონესტის საპარლამენტო ასამბლეის თანათავმჯდომარე     ანდრიუს კუბილიუსი    ეხმაურება.     ევროპარლამენტარი Twitter-ზე წერს, რომ აშშ- ს სახელმწიფო მდივნის გაფრთხილების მიუხედავად, სასამართლოს “პოლიტიზაცია გრძელდება”:

ამერიკის სახელმწიფო მდივანმა მაიკ პომპეომ გაგაფრთხილათ სასამართლო და საარჩევნო პროცესის პოლიტიზაციის თავიდან ასარიდებლად. მაგრამ სასამართლოს პოლიტიზაცია გრძელდება: გიორგი რურუას, ოპოზიციური ტელეარხის ინვესტორს, პატიმრობა მიუსაჯეს. გადადგამს თუ არა პრეზიდენტი ნაბიჯს და დაიცავს 8 მარტის შეთანხმების სულისკვეთებას? – წერს კუბილიუსი.

გიორგი რურუას 30 ივლისს მოსამართლე ვალერიან ბუგიანიშვილმა 4 წლით თავისუფლების აღკვეთა მიუსაჯა

რურუას დაცვის მხარე  განაჩენს პოლიტიკურ გადაწყვეტილებად აფასებს და მის სააპელაციო სასამართლოში გასაჩივრებას გეგმავს.

გიორგი რურუა 2019 წლის 18 ნოემბერს დააკავეს. გამოძიება მას ცეცხლსასროლი იარაღის მართლსაწინააღმდეგო შეძენა-შენახვა-ტარებას ედავებოდა, თუმცა საქმეში არსებული არც ერთი მტკიცებულება პროკურატურის ვერსიას არ ადასტურებდა. რურუას დაცვის მხარემ რამდენიმეთვიანი სასამართლო პროცესების განმავლობაში, არაერთხელ დააყენა მისი გათავისუფლების შუამდგომლობა, თუმცა სასამართლო ამ გადაწყვეტილებას არ იღებდა.

სალომე ზურაბიშვილმა გიორგი რურუა უნდა შეიწყალოს, – ასე ეხმაურება “მთავარი არხის” დამფუძნებლის გიორგი რურუასთვის ოთხწლიანი პატიმრობის მისჯას, შეერთებული შტატების სენატის საგარეო საქმეთა კომიტეტის თავმჯდომარე, ჯიმ რიში.

“ამერიკის ხმის” შეკითხვის პასუხად, თუ როგორ აფასებს ის ამ ნაბიჯს, სენატორი აცხადებს, რომ სასამართლო სისტემა არ უნდა იქნას გამოყენებული პოლიტიკური მიზნებისთვის.

“მე ვრჩები ძალზედ შეშფოთებული, დღეს ბატონი გორგი რურუას ფიქტიურ ბრალდებებზე გამოტანილი განაჩენის გამო. სასამართლო სისტემა, არასდროს არ უნდა იყოს გამოყენებული პოლიტიკური მიზნების მისაღწევად. არჩევნების მოახლობასთან ერთად, პოლიტიკური კლიმატის პოლარიზების შემცირების ინტერესიდან გამომდინარე, როგორც გიორგი უგულავას და ირაკლი ოქრუაშვილის შემთხვევებში გააკეთა, სალომე ზურაბიშვილმა ასევე უნდა შეიწყალოს ბატონი რურუა.

მე ძალიან მახარებს ის, რომ საქართველოს საარჩევნო სისტემაში საჭირო ცვლილებები შეტანილ იქნა და მოველი რომ ოქტომბერში თავისუფალ და სამართლიან არჩევნებს ვიხილავ. თუმცა, არჩევნები თავისუფალი და სამართლიანი მხოლოდ იმ შემთხვეევაში იქნება, თუ პოლიტიკურ პარტიებს ექნებათ საშუალება თავისუფლად იმოქმედონ, პოლიტიკური დევნის შიშის გარეშე“, – აცხადებს სენატორი.

გიორგი რურუა დღეს თბილისის საქალაქო სასამართლომ დამნაშავედ ცნო და ოთხწლიანი პატიმრობა მიუსაჯა იარაღის უკანონოდ შეძენა-შენახვა-ტარების გამო. გიორგი რურუა 2019 წლის ნოემბერში დააკავეს.

ეს პირველი განცხადება არაა, რომელიც სენატორმა რიშმა აღნიშნულ საკითხზე გააკეთა. 12 მაისს მან საქართველოს “პოლიტიკური პატიმრების” გათავისუფლებისკენ მოუწოდა.

„მე მოველი საქართველოს პოლიტიკური პარტიებისგან, რომ სრულად შეასრულონ მარტის შეთანხმება, მათ შორის, პოლიტიკური პატიმრების გათავისუფლება და პროგრესი ახალი საარჩევნო სისტემისკენ“, – ნათქვამია სენატორის მაშინდელ განცხადებაში.

ხელისუფლებასა და ოპოზიციას შორის, ელჩების შუამავლობით, 8 მარტს მიღწეული შეთანხმება გულისხმობს, 2020 წლის ოქტომბერში საპარლამენტი არჩევნების შერეული საარჩევნო სისტემით გამართვას. პარლამენტის პროპორციული წესით არჩეული – 120 და მაჟორიტარული წესით არჩეული – 30 დეპუტატით ფორმირებას.

ამასთან, მხარეები 8 მარტს, მართლმსაჯულების სისტემაში უმაღლესი სტანდარტების დაცვის მნიშვნელობაზეც შეთანხმდნენ. ოპოზიციის განმარტებით, შეთანხმების ეს ნაწილი უგულავას, რურუას და ოქრუაშვილის გათავისუფლებას გულისხმობდა, ხოლო მთავრობა ამას უარყოფდა.

პრეზიდენტმა ზურაბიშვილმა გიორგი უგულავა და ირაკლი ოქრუაშვილი შეიწყალა. ოპოზიცია კი აცხადებდა, რომ შეთანხმების სრულად შესრულებისთვის საპატიმრო გიორგი რურუასაც უნდა დაეტოვებინა.

წყარო : ამერიკის ხმა

“ბოდიში და პრემიერ-მინისტრობის რიგში ბოლო ვინაა?”,– წერს პარტია მოქალაქეების ლიდერი, ალეკო ელისაშვილი ფეისბუქზე. ის სავარაუდოდ გიორგი ვაშაძის განცხადებას ეხმიანება, რომელმაც თქვა, რომ დარწმუნებულია, საქართველოს პრემიერ–მინისტრი გახდება.

“დღეს დასახელებული ვარ პრემიერობის კანდიდატად და დარწმუნებული ვარ, რომ გავხდები. სერიოზული განაცხადია და გეტყვით, როგორ. მე ვხედავ კოალიციურ მმართველობას 31 ოქტომბრის შემდეგ. მე ზუსტად ვხედავ იმ სტრატეგიას, როგორც მივალთ აქამდე”,– თქვა ვაშაძემ.

მანვე აღნიშნა, რომ პრემიერ–მინისტრის პასუხისმგებლობის ტვირთს საკუთარ თავზე აიღებს.

“ვაპირებ, ამ ქვეყნის პრემიერ–მინისტრი გავხდე, იმიტომ რომ სხვა გზა არ არსებობს, რომ ის უზარმაზარი პრობლემები, რომელიც დღეს ქვეყანაში არის, მოვაგვაროთ და მზად ვარ, რომ ეს უმძიმესი პასუხისმგებლობა ვიტვირთო, გაწერილი მაქვს დეტალურად რა არის გასაკეთებელი. პირველ რიგში, ხალხმა უნდა დამიჭიროს მხარი”,– განაცხადა გიორგი ვაშაძემ.

პრორუსულმა ჯგუფმა “ქართულმა მარშმა” ფონდ ღია საზოგადოების ოფისთან საპროტესტო აქცია გამართა და საქართველოდან “სოროსის ფონდის გასვლა” მოითხოვა. ძალადობრივმა პარტიამ ოფისთან სოროსის ფიტული დაწვა და მუქარის შემცველი გზავნილები გააჟღერა.

“თუ ჩვენი ულტიმატუმი არ შესრულდება, ისევე დაინგრევა ეს ოფისი, როგორც წმინდა ნინომ დაანგრია არმაზის კერპები” – თქვა ჯგუფის ლიდერმა, სანდრო ბრეგაძემ სიტყვით გამოსვლისას.

“ეს არის ბოლო გაფრთხილება, მეტი გაფრთხილება აღარ იქნება. თუ ჩვენი ულტიმატუმი არ შესრულდება, გამოვალთ ქუჩაში, გამოვალთ ბევრად მეტი ადამიანი, და თუ სახელმწიფო არ აღასრულებს ხალხის ნებას, მაშინ ხალხი თავად იღებს ვალდებულებას, აღასრულოს ქართველი ერის ნება და მაშინ მშვიდობიანად აღარ დავიშლებით”,– განაცხადა ბრეგაძემ.

ქართული მარში, რომელმაც პარტიის ყრილობა ილია ჭავჭავაძის სახლ–მუზეუმში ჩაატარა, 2020 წლის არჩევნებში მონაწილეობას აპირებს.