Category: ახალი ამბები

საქართველოს საგარეო საქმეთა სამინისტრო საქართველოდან 16 აგვისტოს ბელარუსში განხორციელებულ ფრენაზე განმარტებას აკეთებს.

როგორც უწყების ინფორმაციაშია ნათქვამი, ბელარუსის რესპუბლიკაში საქართველოს საგანგებო და სრულუფლებიანი ელჩი, ვალერი კვარაცხელია 6 აგვისტოდან იმყოფებოდა საქართველოში და ბოლო დღეებში ბელარუსში განვითარებული მოვლენების გამო საჭირო გახდა მისი მყისიერი დაბრუნება მინსკში.

„გამომდინარე იქიდან, რომ ბელარუსთან შეზღუდულია საჰაერო მიმოსვლა და ელჩი საჭიროებდა მოკლე დროში მინსკში ჩასვლას, მიღებულ იქნა გადაწყვეტილება მისი სამთავრობო თვითმფრინავით გამგზავრების შესახებ.

ბელარუსის რესპუბლიკა არის საქართველოს მეგობარი ქვეყანა, რომელთანაც გვაკავშირებს მჭიდრო თანამშრომლობა, როგორც ორმხრივ ფორმატში, ასევე აღმოსავლეთ პარტნიორობის ინიციატივის ფარგლებში. შესაბამისად, ყურადღებით ვაკვირდებით მოვლენების განვითარებას. აღნიშნულ საკითხზე ჩვენ მჭიდრო კოორდინაციაში ვართ ჩვენს პარტნიორებთან.

ჩვენი აზრით, აუცილებელია ბელარუსში პრობლემები გადაწყდეს მშვიდობიანად. იმედი გვაქვს, ბელარუსი ხალხი მისი მომავლისათვის მნიშვნელოვან საკითხებს თავად, მშვიდობიანად გადაწყვეტს“, – ნათქვამია ინფორმაციაში.

საგანგებო სიტუაციების მართვის სამსახურის ინფორმაციით, ურეკში ორდშიანი ძებნის შემდეგ ახალგაზრდა კაცის ცხედარი იპოვეს.

მამაკაცის ძებნა მაშველებმა 15 აგვისტოს დაიწყეს. საგანგებო სიტუაციების მართვის სამსახურის ინფორმაციით, 2 ახალგაზრდა წყლიდან გამოსვლას ვერ ახერხებდა, მაშველებმა ერთის დახმარება შეძლეს, მერე კი წყალში გაუჩინარდა.

ადვოკატ მიხეილ რამიშვილის ინფორმაციით, თამარ ბაჩალიაშვილის ოჯახი გენერალურ პროკურორს ირაკლი შოთაძეს დღეს შეხვდება. როგორც ადვოკატმა განაცხადა, ოჯახი თამარ ბაჩალიაშვილის საქმის შსს-დან პროკურატურისთვის გადაცემას ითხოვს, ამის მიზეზად კი შინაგან საქმეთა სამინისტროსადმი უნდობლობას ასახელებს.

„უნდობლობის საფუძველი მრავალია, კერძოდ, პირველივე დღიდან, როდესაც მიმდინარეობდა სამძებრო სამუშაოები თუ როგორ ესაუბრებოდნენ მაღალჩინოსნები თამარ ბაჩალიაშვილის მამას, ის თუ როგორ გახსნეს ჩემი თანდასწრების გარეშე კომპიუტერი, მობილური ტელეფონი და ძალიან ბევრი სიცრუის წინაშე დაგვაყენეს, დრონის ჩანაწერები არ მოგვაწოდეს, სათვალთვალო კამერების ძალიან მცირე ნაწილი მოითხოვეს და არაპროფესიონალურად და ძალიან გულგრილად მიუდგნენ საკითხს. ფსიქოლოგიური ზეწოლა განახორცილეს ოჯახის წევრებზე,“- განაცხადა მიხეილ რამიშვილმა.

შინაგან საქმეთა სამინისტროს ქვემო ქართლის პოლიციის დეპარტმენტის თანამშრომლებმა, ჩატარებული ოპერატიულ-საგამოძიებო მოქმედებების შედეგად, 1958 წელს დაბადებული ს.ა. განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით, თეთრიწყაროს მუნიციპალიტეტში დააკავეს.

დანაშაული 8-დან 20 წლამდე ან უვადო თავისუფლების აღკვეთას ითვალისწინებს.

„სამართალდამცველებმა ბრალდებული თეთრიწყაროს მუნიციპალიტეტის ტერიტორიაზე, ავტომობილით გადაადგილებისას შეაჩერეს. დაკავებულის კუთვნილი ავტომანქანის ჩხრეკის შედეგად, პოლიციამ ნივთმტკიცების სახით ამოიღო 2 კილო და 300 გრამი ნარკოტიკული საშუალება, რომელიც „ჰეროინს“, „მორფინს“ და „კოდეინს“ შეიცავს.

განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე გამოძიება საქართველოს სისხლის სამართლის კოდექსის 260-ე მუხლის მე-6 ნაწილის „ა“ ქვეპუნქტით მიმდინარეობს,“- აღნიშნულია შსს-ის მიერ გავრცელებულ ინფორმაციაში.

საქართველოში კორონავირუსის 5 ახალი შემთხვევა გამოვლინდა და ჯამში, ინფიცირებულთა რაოდენობა 1341-მდე გაიზარდა. ამის შესახებ ინფორმაციას დაავადებათა კონტროლის ეროვნული ცენტრი ავრცელებს. რაც შეეხება გამოჯანმრთელებულებს, მათი რიცხვი 4-ით გაიზარდა და 1092-ს შეადგენს.

კარანტინის რეჟიმში 7082 მოქალაქე იმყოფება.

კორონავირუსის შედეგად ქვეყანაში 17 პაციენტი გარდაიცვალა.

უცხოეთიდან სამკურნალოდ გადმოყვანილია საქართველოს 41 მოქალაქე.

ფონიჭალაში მომხდარ ავტოსაგზაო შემთხვევაში ბრალდებული დაკავებულია. ინფორმაციას შინაგან საქმეთა სამინისტრო ავრცელებს.

უწყების ინფორმაციით, დაკავებული ფონიჭალის დასახლებაში ავტომანქანით დაეჯახა ქვეითად მოსიარულე 7 პირს, მათგან 4 ადამიანი გარდაიცვალა.  მძღოლმა კი შემთხვევის ადგილი დატოვა და მიიმალა.

სოციალურ ქსელებში გავრცელებული ინფორმაციით საქართველოს სამთავრობო თვითმფრინავი, რომლითაც საქართველოს პრეზიდენტი გადაადგილდება კვირას საღამოს ბელორუსში ჩაფრინდა. ჯერჯერობით უცნობიბა, ვინ იჯდა თვითმფრინავში.   ინფორმაციას, თითქოს დღეს ბელარუსში თვითმფრინავი ჩაფრინდა, რომლითაც საქართველოს პრეზიდენტი სარგებლობს ხოლმე, საქართველოს პრეზიდენტის ადმინისტრაცია კატეგორიულად უარყოფს. გავრცელებული ინფორმაციის თანახმად, პრეზიდენტმა 1 საათი დაჰყო მინსკის აეროპორტში და თბილისში გვიან საღამოს დაბრუნდა. თუმცა,  პრეზიდენტის ადმინისტაციაში, ასევე თბილისის საერთაშორისო აეროპორტში ამას არ ადასტურებენ.

“კატეგორიულად უარვჰყოფთ და ვამბობთ, რომ არა თუ საქართველო, თბილისიც კი არ დაუტოვებია” – აცხადებს პრეზიდენტის ადმინისტრაცია.

თბილისის საერთაშორისო აეროპორტში რეისის შესრულებას არ ადასტურებენ და ამბობენ, რომ  მინსკის მიმართულებით სამგზავრო რეისი მხოლოდ 20 აგვისტოსაა დაგეგმილი. აეროპორტის საინფორმაციო ცენტრში ამბობენ იმასაც, რომ სამთავრობო რეისები მათ არ ეხებათ.

“მთავარი არხის” ინფორმაციით, თბილისში სპეცრეისით ალექსანდრ ლუკაშენკოს ვაჟი ჩამოიყვანეს. ნიკა გვარამიას თქმით, მას აქვს ინფორმაცია, რომ შესაძლოა რეისზე ვალერი კვარაცხელია იყო, რომელიც საგარეო საქმეთა მინისტრის, დავით ზალკალიანის მძახალია. შეგახსენებთ, რომ დავით ზალკალიანი 2008 წელს ბელორუსში საქართველოს ელჩი იყო.

ინფორმაცია იმის შესახებ, რომ ბელორუსში საქართველოდან თვითმფრინავი ჩაფრინდა სოციალურ ქსელებში ბელორუსი აქტივისტების ჯგუფებშიც გავრცელდა.

მთავარი არხის ეთერში ნორვეგიაში მცხოვრები ქართველის, თეონა ყურუას სატელეფონო ინტერვიუ გავიდა, რომელიც ამბობს, რომ წლის დასაწყისში მას ფეისბუქით თამარ ბაჩალიაშვილი დაუკავშირდა და კითხა, რამდენად შესაძლებელი იყო ნორვეგიაში პოლიტიკური თავშესაფრის მიღება.

ყურუას თქმით ის თამარ ბაჩალიაშვილს ფეისბუქით იცნობდა და რამდენიმე დეტალის დასაზუსტებლად კითხვები დაუსვა – კონკრეტულად, ქონდა თუ არა საკმარისი მტკიცებულებები იმისათვის, რომ პოლიტიკური თავშესაფარი მოეთხოვა, რაზეც თამარმა უპასუხა, რომ საკმარისზე მეტი მტკიცებულებები ქონდა.

თონა ყურუა იმასაც ამბობს , რომ თამარს ისეთ ქვეყანაში უნდოდა წასვლა, საიდანაც უკან დაბრუნება აღარ მოუწევდა.

“უნდოდა წასულიყო ისეთ ქვეყანაში სადაც უკან დაბრუნება არ მოუწევდა, რადგან აღნიშნა, რომ უკან დაბრუნებას ვერ შეძლებდა“- ამბობს თეონა ყურუა “მთავარ აქცენტებში” სატელეფონო საუბრისას.

თეონა ყურუა ყვება, თამარი მას კიდევ ერთხელ მარტში შეეხმიანა, თუმცა მას არ უპასუხია. შემდეგ მისი ძველი ფეისბუქი დაიბლოკა, რის შემდეგაც ახალი ფეისბუქ ანგარიში გახსნა.

ნორვეგიაში მცხოვრები ქართველი ამბობს, რომ მას შემდეგ, რაც თამარის გარდაცვალების შესახებ მედიით გაიგო, ამ თემაზე ბევრს ფიქრობს და ამის შესახებ ერთ–ერთ ქართველ ჟურნალისტს დაუკავშირდა, რის შემდეგაც მის ახალ ფეისბუქ ანგარიშში შეღწევაც სცადეს, თუმცა ამჯერად უშედეგოდ. თეონა ყურუა მზად არის ამ თემაზე კითხვებს მომავალშიც გასცეს პასუხი.

სენატორი ჯიმ რიში 2008 წლის აგვისტოს ომის 12 წლისთავს ეხმიანება და აცხადებს, რომ აშშ არასდროს აღიარებს რუსეთის მიერ საქართველოს უკანონო ოკუპაციას.

“12 წლის შემდეგ, რაც რუსეთი საქართველოს სუვერენულ ტერიტორიაზე შეიჭრა, აფხაზეთი და სამხრეთ ოსეთი კვლავ ოკუპირებულია. აშშ აგრძელებს საქართველოს სუვერენიტეტისა და დემოკრატიისკენ სვლის მხარდაჭერას და არასდროს ცნობს რუსეთის მიერ საქართველოს უკანონო ოკუპაციას”, – წერს სენატორი ჯიმ რიში ტვიტერის პირად გვერდზე.

Twelve years after Russia invaded Georgia’s sovereign territory, Abkhazia and South Ossetia are still occupied. The U.S. continues to support #Georgia’s sovereignty and transition to democracy, and will never recognize #Russia’s illegal occupation of Georgia. #Aug2008War

— Senate Foreign Relations Committee Chairman (@SenateForeign) August 16, 2020