Category: ახალი ამბები

დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის, ამირან გამყრელიძის განცხადებით, კორონავირუსის 17 ახალი შემთხვევიდან 11 ლენჯერის კლასტერს უკავშირდება.

„დღეს, დილის 09:00 საათისთვის ქვეყანაში კორონავირუსის 17 ახალი შემთხვევა გვაქვს, მათგან 11 უკავშირდება მესტიის მუნიციპალიტეტის ლენჯერის თემის კლასტერს, თუმცა, თვითონ ლენჯერში დადასტურებულია 7, ხოლო 4 შემთხვევა გახლავთ მესტიის მუნიციპალიტეტის გარეთ. ერთი არის დადასტურებულ შემთხვევასთან კონტაქტი, რომელიც უკავშირდება ყაზბეგის კლასტერს. 5 გახლავთ იმპორტირებული შემთხვევა, მათგან 3 სატვირთო ავტომობილის მძღოლია. ყველა შემთხვევის წყარო ვიცით, გაურკვეველი არცერთი არ არის”,– ამბობს გამყრელიძე.

მანვე აღნიშნა, რომ ბოლო 3 დღეში 1052 პირის ტესტირება მოხდა.

“ბოლო სამი დღეა მესტიის მუნიციპალიტეტში ინტენსიური ტესტირება მიმდინარეობს. მოგეხსენებთ, კარანტინში მყოფი ადამიანებიდან ბევრს უმთავრდება 12 – დღიანი ვადა. ბოლო 3 დღის განმავლობაში მესტიის მუნიციპალიტეტის მასშტაბით ასეთი 1052 პირი გამოიკვლიეს. როგორც მოგახსენეთ, დადებითი შემთხვევები გვაქვს მხოლოდ ლენჯერში, კარანტინში მყოფი ადამიანების პასუხი ყველა უარყოფია და ისინი საკარანტინო სივრცეს დატოვებენ“, – განაცხადა გამყრელიძემ.

საქართველოში კორონავირუსის 17 ახალი შემთხვევა გამოვლინდა და ინფიცირებულთა რაოდენობა 1 411–მდე გაიზარდა. გამოჯანმრთელებულთა რაოდენობა არ გაზრდილა. ამის შესახებ ინფორმაცია stopcov.ge-ზე განახლდა.

ამჟამად კარანტინის რეჟიმში იმყოფება 6848 მოქალაქე, სტაციონარში მეთვალყურეობის ქვეშ – 269.

კორონავირუსის შედეგად ქვეყანაში 17 პაციენტი გარდაიცვალა.

შინაგან საქმეთა სამინისტრომ, სენაკში, 8 აგვისტოს მომხდარი ყაჩაღობის ფაქტზე წარსულში მრავალჯერ ნასამართლევი პირი დააკავა.

შსს–ს ინფორმაციით, ბრალდებულმა, თანამზრახველებთან ერთად, სოფელ ძველ სენაკში, ერთ-ერთ საცხოვრებელ სახლში შევიდა, სახლში მყოფ ადამიანებს იარაღის მუქარით მობილური ტელეფონები და ფული გასტაცა. სამართალდამცველებმა პირადი ჩხრეკის დროს ამოიღეს ყაჩაღობის გზით დაუფლებული მობილური ტელეფონი, მართლსაწინააღმდეგოდ შეძენილი პისტოლეტი, მჭიდი და 5 ცალი ვაზნა. დანიშნულია შესაბამისი ექსპერტიზები.

მომხდარ ფაქტზე გრძელდება საგამოძიებო ღონისძიებები დანაშაულში მონაწილე სხვა პირების დადგენა-დაკავების მიზნით.

ბინაში უკანონო შეღწევით, ჯგუფურად ჩადენილ ყაჩაღობის ფაქტზე გამოძიება სისხლის სამართლის კოდექსის 179-ე მუხლის მე-2 ნაწილის ბ და მე-3 ნაწილის ბ ქვეპუნქტებით მიმდინარეობს.დანაშაული 8-დან 12 წლამდე ვადით თავისუფლების აღკვეთას ითვალისწინებს.

სამართალდამცავებმა არასრულწლოვნის მიმართ ჩადენილი ძალადობის ბრალდებით, 1973 წელს დაბადებული ლ.ლ. თბილისში დააკავეს.

„გამოძიებით დადგინდა, რომ ბრალდებული თბილისში, ერთ-ერთ ოჯახში ძიძად მუშაობდა, სადაც 2 სხვა ძიძასთან ერთად, 5 მცირეწლოვანს უვლიდა. ლ.ლ. ინტენსიურად, ფიზიკურად ძალადობდა 2 წლის ბავშვზე, რომლის ამსახველი ვიდეომასალაც ძიძებმა – შ.დ.-მ და ი.ბ.-მ სამართალდამცველებს მიაწოდეს”,– აცხადებს შსს.

უწყების ცნობით, პოლიციის მყისიერი რეაგირების შედეგად, ლ.ლ.-ს დაკავება დაუყოვნებლივ განხორციელდა.

გამოძიება არასრულწლოვნის მიმართ ჩადენილ ძალადობის ფაქტზე, საქართველოს სსკ-ის 126-ე მუხლის 1-ლი პრიმა ნაწილის „ა“ ქვეპუნქტით მიმდინარეობს. დანაშაული 2 წლამდე ვადით თავისუფლების აღკვეთას ითვალისწინებს.

“ქართული ოცნება – დემოკრატიული საქართველოს” პოლიტიკური საბჭო განცხადებას ავრცელებს. განცხადებაში ნათქვამია, რომ საპარლამენტო არჩევნებთან ერთად, რამდენიმე საარჩევნო ოლქში თვითმმართველი ორგანოების პოლიტიკური თანამდებობის პირთა, ასევე, აჭარის უმაღლესი საბჭოს არჩევნები იმართება. “ქართული ოცნება” დღეს საღამოს პოლიტსაბჭოს სხდომაზე კანდიდატებზე შეჯერდა.

“საზოგადოებას მოეხსენება, რომ საპარლამენტო არჩევნებთან ერთად, რამდენიმე საარჩევნო ოლქში თვითმმართველი ორგანოების პოლიტიკური თანამდებობის პირთა, ასევე, აჭარის ავტონომიური რესპუბლიკის უმაღლესი საბჭოს არჩევნები იმართება.

დღეს გაიმართა პარტია „ქართული ოცნება – დემოკრატიული საქართველოს“ პოლიტიკური საბჭოს სხდომა, რომელზეც შემდეგ კანდიდატებზე მოხდა შეჯერება:

ქუთაისში, “ქართული ოცნების” მერობის კანდიდატია იმერეთის გუბერნატორის პირველი მოადგილე – იოსებ ხახალეიშვილი;

თერჯოლის მერობის კანდიდატი, თერჯოლის მერის მოვალეობის შემსრულებელი – ლაშა გოგიაშვილი;

ხარაგაულის მერობის კანდიდატად წარდგენილია – კობა ლურსმანაშვილი, საქართველოს პარლამენტის დეპუტატი;

ონის მერობის კანდიდატი – დავით ჩიკვაიძე, ონის მერის მოვალეობის შემსრულებელი;

კასპის მერობის კანდიდატი – ვახტანგ მაისურაძე, სახელმწიფო აუდიტის სამსახურის საფინანსო და ლოჯისტიკის დეპარტამენტის უფროსი;

თბილისის საკრებულოს კრწანისის მაჟორიტარი დეპუტატობის კანდიდატი – კრწანისის გამგებელი, ლევან ჯაფარიძე;

ბათუმში, უმაღლესი საბჭოს მაჟორიტარი დეპუტატობის კანდიდატი – ტიტე აროშიძე, აჭარის ავტონომიური რესპუბლიკის სოფლის მეურნეობის მინისტრის მოადგილე;

ქობულეთში, უმაღლესი საბჭოს მაჟორიტარი დეპუტატობის კანდიდატი – ცოტნე ანანიძე;

ხულოს, შუახევის, ქედის, ხელვაჩაურის უმაღლესი საბჭოს მაჟორიტარი დეპუტატობის კანდიდატად წარდგენილია – ფრიდონ ფუტკარაძე, შუახევის მოქმედი მერი,” – ნათქვამია პარტიის განცხადებაში.

ავარია თერჯოლის მუნიციპალიტეტში – ავტომობილი გზის სავალი ნაწილიდან გადავარდა და 4 მგზავრი დაშავდა. ადგილზე გამოძახებული სასწრაფო სამედიცინო დახმარების დაგვიანების გამო დაშავებულები საავადმყოფოში თვითმხილველებმა გადაიყვანეს.

როგორც  შინაგან საქმეთა სამინისტროში განაცხადეს, გამოძიება სისხლის სამართლის კოდექსის, 276-ე მუხლის მე-2  ნაწილით დაიწყო, რაც  ტრანსპორტის მოძრაობის უსაფრთხოების ან ექსპლუატაციის დარღვევას გულისხმობს.  შემთხვევა რამდენიმე საათის წინ მოხდა და ადგილზე საპატრულო პოლიციაც იმყოფებოდა

თამარ ბაჩალაიშვილის ოჯახის ადვოკატი, მიხეილ რამიშვილი ამბობს, რომ ბაჩალიაშვილის მანქანაში ნაპოვნია ბოთლი, რომელშიც საეჭვო ნივთიერებები აღმოაჩინეს. ადვოკატი დღეს მთავარ პროკურტურაში მივიდა. მას გამოძიებასთან კითხვები აქვს  ახალ გარემოებებთან დაკავშირებით.

მისი თქმით, თამარ ბაჩლიაშვილის ორგანზმში მედიკამენტ “კლოფელინის” კვალი დაფიქსირდა, თუმცა როგორც რამიშვილი ამბობს, ავტომობილში ამ მედიკამენტის შუშა ნაპოვნის არ არის.“თვითონ ბოთლში აღმოჩენილია “კარდოლაქსი” და “დოქსილამინი”. “დოქსილამინი” ძალიან იშვიათი მედიკამენტია არ მოიძებნება. ყველაზე საინტერესოა, რომ თამუნას ორგანიზმში აღმოჩნდა კლოფელინი. კლოფელინს ტოქსიკოლოგები ჟარგონულად ეძახიან “კონტროლს” რომელიც ადამიანს თიშვს. ავტომობილშიც კი არ არის აღმოჩენილი კლოფელინის არანაირი შუშა. ეს კიდევ იმას ადასტურებს რომ არანაირ თვითმკვლელობაზე არ არის საუბარი“ – ამბობს მიხეილ რამიშვილი