Category: ახალი ამბები

თბილისის ინფექციური საავადმყოფოს სამედიცინო დირექტორის მარინა ეზუგბაიას განცხადებით, კორონავირუსით ინფიცირების 7 ახალი შემთხვევიდან 2 სამედიცინო პერსონალია.

“დღეს დაგვემატა 7 ახალი პაციენტი და სულ არის 1436 დადატურებული შემთხვევა. მათგან, ერთი არის დაავადებულთან კონტაქტი, ოთხი არის შემოტანილი, მათ შორის ერთი არის სატვირთო ავტომანქანის მძღოლი და ორი სამედიცინო პერსონალია. გამოჯანმრთელებულები დღეს არ დაგვმატებიან”,- თქვა ეზუგბაიამ.

მანვე აღნიშნა, რომ ქვეყნის მასშტაბით 259 კოვიდინფიცირებული მკურნალობს, მათ შორის 4-ის მდგომარეობა კრიტიკული, 23-ის კი მძიმეა.

მტკვარში ახალგაზრდა მამაკაცს ეძებენ. “მთავარი არხის” ინფორმაციით, ორთაჭალაში, ორთაჭალჰესის მიმდებარე ტერიტორიაზე, თვითმხილველმა დაინახა, როგორ გადახტა მამაკაცი მდინარეში.

ადგილზე მუშაობენ მყვინთავები და სამაშველო სამსახურის წარმომადგენლები. დამატებითი ინფორმაცია ჯერჯერობით უცნობია.

გლდანში, ახლადრეაბილიტირებულ ხიზანიშვილის ქუჩაზე გზის სავალი ნაწილი ჩაინგრა. შემთხვევა ღამით მოხდა. რა გახდა ჩანგრევის მიზეზი, ჯერჯერობით უცნობია.

გზის ნაწილი იმ ადგილას ჩავარდა, სადაც ქართული ოცნების მიერ გლდანის მაჟორიტარი დეპუტატობის კანდიდატად წარდგენილი ლევან კობიაშვილის საარჩევნო ბანერია დაკიდული.

ხიზანიშვილისა და ვეკუას ქუჩების რეაბილიტაცია თბილისის მერიამ 2019 წლის პირველ მაისს დაიწყო და ამავე წლის ოქტომბერში უნდა დასრულებულიყო, თუმცა ის თვეების დაგვიანებით დასრულდა. სარეაბილიტაციო სამუშაოებისთვის მერიის ბიუჯეტიდან 12 მილიონ ლარამდე იყო გამოყოფილი.

საქართველოში კორონავირუსის 7 ახალი შემთხვევა გამოვლინდა და ინფიცირებულთა რაოდენობა 1436-მდე გაიზარდა. გამოჯანმრთელებულების რაოდენობა არ შეცვლილა და ის კვლავ 1150-ს შეადგენს.

ამის შესახებ ინფორმაცია stopcov.ge-ზე გამოქვეყნდა.

ქვეყანაში კორონავირუსით 19 ადამიანი გარდაიცვალა.

ამ დროისთვის კარანტინში რჩება 6018 მოქალაქე, სტაციონარში მეთვალყურეობის ქვეშ –249, უცხოეთიდან სამკურნალოდ გადმოყვანილია საქართველოს 41 მოქალაქე.

საქართველოს პრეზიდენტი სალომე ზურაბიშვილი ფეისბუქზე სტატუსს აზიარებს, რომლის ავტორი   ჟურნალისტებს შატილში, ხევიდან გარდაცვლილების ცხედრების ამოსვენების კადრების გაშვებისთვის აკრიტიკებს.

ზურაბიშვილი წერს, რომ ის მოქალაქის მოსაზრებას იზიარებს და ჟურნალისტებს თავადაც აკრიტიკებს.

“სრულიად ვიზიარებ… მიუღებელია ნებისმიერ საზოგადოებისთვის, რომელიც თავისთავს და საკუთარ ღირებულებებს ელემენტარულ პატივს სცემს.
ეთიკა, ქცევის კოდი და ზრდილობა ოდესღაც გვახასიათებდა”, – წერს პრეზიდენტი.

23 აგვისტოს, შატილის გზაზე ავარიას 17 ადამიანი ემსხვერპლა, 3 კი მძიმედ დაშავდა. სამგზავრო მიკროავტობუსი დაახლოებით 80 მეტრის სიმაღლიდან კლდოვან ფერდობზე გადავარდა.

“მთავარი არხის” გენერალური დირექტორის, ნიკა გვარამიას ინფორმაციით, თამარ ბაჩალიაშვილის მოთვალთვალე ერთ-ერთი მანქანით, რომლის ნომერიცაა WW-558-VV, “შავნაბადას” სპეცდანიშნულების რაზმის ხელმძღვანელი ზვიად ხარებაშვილი გადაადგილდებოდა. როგორც გადაცემა მთავარ აქცენტებში  ნიკა გვარამიამ თქვა, ხარებაშვილი ეჭვმიტანილია აფგან მუხთარლის გატაცებაში და მასზე საუბარი იყო ეროსი კიწმარიშვილის საქმესთან დაკავშირებითაც.

“მთავარი არხის” გენერალურმა დირექტორმა, ნიკა გვარამიამ გადაცემაში სამი ავტომობილის სანომრე ნიშანი 23 აგვისტოს გაასაჯაროვა. მისივე ინფორმაციით, ეს ავტომობილები, თამარ ბაჩალიაშვილს, სავარაუდოდ, დაყვებოდნენ და უთვალთვალებდნენ. მისივე ინფორმაციით, მანქანები ოპერატიულია და სუს-სს ეკუთვნის.

ნიკა გვარამია ამბობს, რომ ეს არის მორიგი მტკიცებულება, რომ თამარ ბაჩალიაშვილს თავი არ მოუკლავს.

შეგახსენებთ, რომ თამარ ბაჩალიაშვილი 18 ივლისს . ახალგაზრდა პროგრამისტი შაბათს სახლიდან გავიდა და სათვალთვალო კამერებმა ბოლოს თეთრიწყაროს რაიონში დააფიქსირეს. 23 წლის თამარ ბაჩალიაშვილი თეთრიწყაროს ტყეში, საკუთარ მანქანაში გარდაცვლილი იპოვეს. ერთ-ერთი ვერსიით, ბაჩალიაშვილის გაუჩინარება მის სამსახურეობრივ საქმიანობას უკავშირდება.

25 ივლისს, პროკურატურამ ბაჩალიაშვილის მამა დაზარალებულად ცნო და საქმის გამოძიებას თვითმკვლელობამდე მიყვანის მუხლი დაუმატა. გამოძიება, ამ ეტაპზე, საქართველოს სისხლის სამართლის კოდექსის 143-ე მუხლის პირველი ნაწილითა და 115-ე მუხლის პირველი ნაწილით მიმდინარეობს.

პროკურატურამ თერჯოლის სოფელ ძევრში გარდაცვლილი 11 წლის მოზარდის თვითმკვლელობამდე მიყვანის და ოჯახში ძალადობის ფაქტზე ფ.ა.-ს ბრალდება წარუდგინა.

უწყების ცნობით, შინაგან საქმეთა სამინისტროს მიერ ჩატარებული გამოძიებით, ამ ეტაპზე დადგენილია, რომ თერჯოლის სოფელ ძევრში, თავის საცხოვრებელ სახლში, ალკოჰოლური თრობის ქვეშ მყოფი ფ.ა. სისტემატურად ძალადობდა, აყენებდა შეურაცხყოფას და ემუქრებოდა თავის არასრულწლოვან შვილს, ა.ა.-ს.

ფ.ა.-ს ქმედებების გამო ა.ა. მუდმივი სტრესის და შიშის ქვეშ ცხოვრობდა. 2020 წლის 23 აგვისტოს, თავის საცხოვრებელი სახლის ეზოში მდგარ ხეზე ა.ა. თოკით ჩამომხრჩვალი იპოვეს.

სამართალდამცველებმა ფ.ა. იმავე დღეს დააკავეს. 2020 წლის 25 აგვისტოს მას ბრალდება სისხლის სამართლის კოდექსის 126′-ე მუხლის მეორე ნაწილის “ა” ქვეპუნქტით (ოჯახში ძალადობა წინასწარი შეცნობით არასრულწლოვნის მიმართ) და 11′.115-ე მუხლის პირველი ნაწილით (თვითმკვლელობამდე მიყვანა ) წარედგინა.

სისხლის სამართლის საქმეზე გამოძიება ინტენსიურად გრძელდება და მუშაობს ყველა შესაძლო ვერსიაზე. პროკურატურა ბრალდებულისთვის აღკვეთის ღონისძიების სახით პატიმრობის შეფარდების თაობაზე სასამართლოს კანონით დადგენილ ვადაში მიმართავს.

შეგახსენებთ, რომ 49 წლის მამაკაცი საკუთარი შვილის თვითმკვლელობამდე მიყვანის ბრალდებით, 23 აგვისტოს, საკუთარ სახლში დააკავეს. გამოძიება სისხლის სამართლის კოდექსის 11 პრიმა და 115-ე მუხლის პირველი ნაწილით მიმდინარეობს, რაც 2-დან 4 წლამდე ვადით თავისუფლების აღკვეთას ითვალისწინებს.

მეზობლები და ოჯახის ახლობლები ვარაუდობენ, რომ მამას ბავშვი ცემისას შემოაკვდა და თვითმკვლელობის ინსცენირებისთვის ხეზე ჩამოკიდა.

შინაგან საქმეთა სამინისტრო უარყოფს, რომ 11 წლის ბიჭზე ძალადობის შესახებ ინფორმაცია ჰქონდათ. უწყების განცხადებით, გარდაცვლილი ბიჭის ოჯახის არცერთ წევრზე შემაკავებელი ორდერი არ ჰქონდათ გაცემული. ამით შსს გარდაცვლილი ბავშვის ბებიის განცხადებას ეხმიანება, რომელმაც თქვა, რომ ერთხელ მამას თვითონაც უჩივლა, თუმცა პოლიციას რეაგირება არ მოუხდენია.

ამავდროულად, უწყებაში აცხადებენ, რომ 2010 და 2014 წლებში ბრალდებულ პირზე მიმართვა ფიქსირდება, რასაც მათი მხრიდან მოყვა “შესაბამისი რეაგირება”, თუმცა “სამართლებრივი პასუხისმგებლობა არ დამდგარა”.

“გარდა ამისა, 2014 წელს, ადგილი ჰქონდა ბრალდებულს და მის სიძეს შორის სიტყვიერ დაპირისპირებას, რაზეც პოლიციის მხრიდან გატარდა შესაბამისი ზომები.

კიდევ ერთხელ ხაზგასმით გვინდა აღვნიშნოთ, რომ შინაგან საქმეთა სამინისტროსთვის პრიორიტეტია ოჯახში ძალადობის წინააღმდეგ ეფექტიანი ბრძოლა და მსხვერპლის ინტერესებზე მორგებული გამოძიების უზრუნველყოფა. გრძელდება მოძალადეთა მიმართ მკაცრი სისხლის სამართლის პოლიტიკის გატარება”, – აცხადებს შსს.

თერჯოლაში არასრულწლოვანის თვითმკვლელობამდე მიყვანის ბრალდებით მამა 24 აგვისტოს დააკავეს. უწყების განცხადებით, ბრალდებული 11 წლის შვილზე სისტემატურად ძალადობდა.