Category: ახალი ამბები

შინაგან საქმეთა სამინისტროს საპატრულო პოლიციის დეპარტამენტის თანამშრომლებმა ორი ან მეტი პირის მიმართ ჯგუფურად ჩადენილი ჯანმრთელობის განზრახ დაზიანების ბრალდებით, 2 პირი – 1993 წელს დაბადებული ლ.ს. და 2001 წელს დაბადებული ნ.ქ. დააკავეს. ამის შესახებ ინფორმაციას შინაგან საქმეთა სამინისტრო ავრცელებს.

მათივე ინფორმაციით, გამოძიებით დადგინდა, რომ ბრალდებულებმა, რომლებიც თბილისში მდებარე ერთ-ერთ ბარში დაცვის თანამშრომლებად მუშაობდნენ, მიმდინარე წლის 22 აგვისტოს, ამავე ბარის სტუმრების, 1986 წელს დაბადებული ორი პირის – ი.ფ.-სა და ი.გ.-ს მიმართ, ურთიერთშელაპარაკების ნიადაგზე, ფიზიკური ძალადობა განახორციელეს. მომხდარის შედეგად, ი.ფ.-მ და ი.გ.-მ ჯანმრთელობის დაზიანება მიიღეს. მათ შესაბამისი სამედიცინო დახმარება გაეწიათ.

,,გამოძიება ორი ან მეტი პირის მიმართ ჯგუფურად ჩადენილ ჯანმრთელობის განზრახ დაზიანების ფაქტზე, საქართველოს სსკ-ის 120-ე მუხლის მე-2 ნაწილის „გ“ და „დ“ ქვეპუნქტებით მიმდინარეობს. დანაშაული 2-დან 4 წლამდე ვადით თავისუფლების აღკვეთას ითვალისწინებს. ასევე, ტარდება ოპერატიულ-საგამოძიებო მოქმედებები ახალი გარემოებებისა და აღნიშნულ სისხლის სამართლის საქმესთან შესაძლო შემხებლობაში მყოფი სხვა პირების გამოკვეთის და დაკავების მიზნით,“ – ნათქვამია ინფორმაციაში.

პარლამენტის თავმჯდომარე არჩილ თალაკვაძეს კოვიდინფექცია განმეორებითი ტესტირებითაც არ დაუდასტურდა. შესაბამისად, პარლამენტის თავმჯდომარე 12-დღიანი თვითიზოლაციის ამოწურვისთანავე, აქტიურ საპარლამენტო საქმიანობასა და საარჩევნო კამპანიას დაუბრუნდება.

განმეორებითი ტესტირების შედეგად, კოვიდინფექცია არ დაუდასტურდა არჩილ თალაკვაძის ოჯახის წევრებსაც.

არჩილ თალაკვაძე თვითიზოლაციაში მას შემდეგ გადავიდა, რაც მისი დაცვის წევრს კორონავირუსი დაუდგინდა.

პარლამენტის პრესსამსახურში მაშინ აცხადებდნენ, რომ უსაფრთხოების პროტოკოლის თანახმად, სხვა პირებთან ერთად, პარლამენტის თავმჯდომარეს და მისი ოჯახის წევრებსაც ჩაუტარდათ PCR ტესტირება, რაზეც პასუხი უარყოფითი იყო.

“ქართული ოცნების“ ისნის მაჟორიტარი დეპუტატობის კანდიდატი, კახა კახიშვილი ამბობს, რომ ეს არჩევნებიც ისე ჩაივლის, რომ მიხეილ სააკაშვილი საქართველოში არ ჩამოვა.

მისი თქმით, სააკაშვილის განცხადებების მიზანი ამომრჩევლისთვის სტიმულის მიცემაა.

“რაც შეეხება რიტორიკას-“მე დავბრუნდები”, ეს პირველ არჩევნები არაა და პირველად არ გვესმის. ძალიან კარგად მახსოვს, მსგავსი რიტორიკა 2016 წელს, როდესაც საუბარი იყო, რომ გვირაბით შემოვიდოდა საქართველოში. ასე , რომ ეს არის პოლიტტექნოლოგიების ნაწილი, როდესაც მისი განცხადებები უკავშირდება იმას, რომ მისცეს უფრო მეტი სტიმული თავის ამომრჩეველს, გამოცოცხლდეს და უფრო მეტი გადავიდეს აქტიურ მოქმედებებზე.

ეს არჩევნებიც ჩაივლის, აგერ მე და აგერ თქვენ, ის ჩამომსვლელი არ არის. მერე არჩევნები რომ იქნება, ისევ გავიგებთ ასეთ განცხადებებს”,- განაცხადა კახიშვილმა პალიტრანიუსის ეთერში.

დიდი ბრიტანეთის პრემიერმინისტრი, ბორის ჯონსონი რუსი ოპოზიციონერის, ალექსეი ნავალნის “ნოვიჩოკის” აგენტით მოწამვლის ფაქტს ეხმაურება. მისი თქმით, რუსეთის მთავრობამ უნდა განმარტოს, თუ რა დაემართა ნავალნის, დიდი ბრიტანეთი კი საერთაშორისო პარტნიორებთან ერთად იმუშავებს სამართლის აღსრულებაზე.

“აღმაშფოთებელია, რომ ალექსეი ნავალნის წინააღმდეგ ქიმიური იარაღი გამოიყენეს. დიდ ბრიტანეთში ჩვენი თვალით ვნახეთ “ნოვიჩოკის” მომაკვდინებელი შედეგები. რუსეთის მთავრობამ ახლა უნდა განმარტოს, რა დაემართა ბატონ ნავალნის – საერთაშორისო პარტნიორებთან ერთად ჩვენ ვიმუშავებთ სამართლის აღსრულებისთვის”, – წერს ბორის ჯონსონი ტვიტერზე.

It’s outrageous that a chemical weapon was used against Alexey Navalny. We have seen first-hand the deadly consequences of Novichok in the UK. The Russian government must now explain what happened to Mr Navalny – we will work with international partners to ensure justice is done.

— Boris Johnson (@BorisJohnson) September 2, 2020

დღეს გერმანიის მთავრობამ განაცხადა, რომ რუსი ოპოზიციონერი, ალექსეი ნავალნი, ნერვული აგენტით, “ნოვიჩოკით” არის მოწამლული.

მათი ინფორმაციით, ტოქსიკოლოგიის ტესტებმა ნოვიჩოკის ჯგუფიდან ქიმიური ნერვული აგენტის “ცალსახა მტკიცებულება” აჩვენა. ეს მომწამლავი ნივთიერება რუსეთში მზადდება.

რუსეთის დუმის თავდაცვის კომიტეტის თავმჯდომარე იური შვიტკინი ამბობს, რომ რუსეთი “ნოვიჩოკის” ჯგუფის ქიმიკატების დამზადებაში არ არის ჩართული. მისი თქმით, “ნოვიჩოკს” საქართველოსა და აშშ–ში ამზადებენ. 

პარტია მოქალაქეების ლიდერი და საბურთალოს მაჟორიტარობის კანდიდატი, ალეკო ელისაშვილი ამბობს, რომ მიხეილ სააკაშვილის, გიორგი ვაშაძის ან გიგა ბოკერიას პრემიერმინისტრობის კანდიდატურებს მხარს არ დაუჭერს.

მისი თქმით, შესაძლოა, ნაციონალური მოძრაობიდან, პრემიერმინისტრის კანდიდატად სხვას დაუჭიროს მხარი, მაგალითად, ხატია დეკანოიძეს.

“არ მჯერა მაგ ბოდიშის [სააკაშვილის ბოდიში]. შეიძლება, სხვა კანდიდატს დავუჭიროთ მხარი, შესაძლოა, ხატია დეკანოიძეს. ბოკერიას, ვაშაძეს, რომელიც ოსტავ ბენდერია, არ დავუჭერთ მხარეს. ასევე, მეორე კითხვა იქნება, ვინ იქნება შინაგან საქმეთა მინისტრი. თუ გვითხრეს, რომ ვანო მერაბიშვილიო, რა თქმა უნდა, მხარს არ დავუჭერთ, ან ზურაბ ადეიშვილი, ან ა.შ.” — განაცხადა მან პალიტრანიუსის ეთერში.

რაც შეეხება კოალიციური მთავრობის შექმნას, ელისაშვილი ამბობს, რომ თუ მისი პარტიის ხმები გადამწყვეტი იქნება, “შესაბამის ფასსაც დაადებს”.

რუსთავის გზატკეცილზე მდებარე ერთერთ მაღაზიაში კორონავირუსის ახალი შემთხვევები  დაფიქსირდა. ამ იმფორმაციას ადასტურებს დაავადებათა კონტროლის ეროვნული ცენტრის ხელმძღვანელი ამირან გამყრელიძე.

მისი თქმით, “ყველა ზომა მიღებული აქვთ”.

დღეს კორონავირუსი დაუდასტურდა მაღაზიათა ქსელ ნიკორას 2 თანამშრომელსაც, სამედიცინო უნივერსიტეტის მოპირდაპირე მხარს არსებულ ფილილაში.

2 სექტემბრის მონაცემებით, საქართველოში კორონავირუსის 38 ახალი შემთხვევა გამოვლინდა, დადასტურებული შემთხვევებიდან კი 5 პირის წყარო უცნობია.

საქართველოში კორონავირუსის დადასტურებულ შემთხვევათა რაოდენობა 1 548-მდე გაიზარდა, გამოჯანმრთელებულია 1 270 ადამიანი, გარდაცვლილი კი — 19.

გორში მაჟორიტარი დეპუტატობის კანდიდატის წარდგენისას ოცნების გენერალურმა მდივანმა, კახა კალაძემ ომსა და ოკუპაციაზე ისაუბრა და თქვა, რომ ყოფილი ხელისუფლება “წამოეგო რუსულ ოკუპაციას”. მისი განცხადებით, ნაომარი ქალაქის მოსახლეობამ კარგად იცის “რა მძიმე შედეგები შეიძლება მოყვეს პოლიტიკოსების არასწორ ნაბიჯებს”.

“პირდაპირ ვიტყვი, რომ ქართლზე გადის ფრონტის ხაზი. აქ გორში, ყველა იმ საერთო საქმეს, რაც ქვეყნის წინაშეა, ერთვის ის განსაკუთრებულობა, რომ თქვენ უყურებთ ომის დანატოვარს — სისხლზე და ცრემლზე გადახვეულ მავთულხლართს, ჩვენი მიწა-წყლის წაგლეჯილ ნაწილებს, ეს ქალაქი მებრძოლი და გმირი ქალაქია.

თქვენ, გორის მაცხოვრებლებმა ყველაზე კარგად იცით, თუ რას ნიშნავს ოკუპაცია, ეს მოუშუშებელი იარა, რომელიც ყოველდღიურად გვახსენებს თავს. კარგად იცით, რა მძიმე შედეგები შეიძლება მოყვეს პოლიტიკოსების არასწორ ნაბიჯებს. თქვენ გახსოვთ, წინა ხელისუფლებამ, რომელიც წამოეგო რუსულ პროვოკაციას და საკუთარი დანაშაულების გამო ხალხისთვის პატიება ეთხოვა და სახლში წასულიყო, პირიქით, რეპრესიები გააძლიერა”,– თქვა კალაძემ.

მანვე აღნიშნა, რომ მთავარი მიზანი ოკუპირებული ტერიტორიების საბოლოო დეოკუპაციაა.