Category: ახალი ამბები

პრორსული პარტიის, პატრიოტთა ალიანსის მიერ ოკუპირებულ აფხაზეთში, ილორის ტაძარში ჩატანილი ხატი მდინარე ენგურთან მიიტანეს და ე.წ გამშვებ პუნქტთან, საწყობში შეინახეს.

პატრიოტთა ალიანსის ნაჩუქარ ხატზე ოკუპირებული აფხაზეთის ე.წ ეკლესიამ უარი 27 აგვისტოს თქვა.

პატრიოტთა ალიანსის ლიდერები, ირმა ინაშვილი და გიორგი ლომია ოკუპირებულ აფხაზეთში 18 აგვისტოს იყვნენ. ისინი დეფაქტო პრეზიდენტის, ალსან ბჟანიას თანაშემწს, ლაშა საკანიას შეხვდნენ.

ასლან ბჟანიას თქმით, შეხვედრაზე პატრიოტთა ალიანსმა პირობა დადო, რომ ოკუპირებულ აფხაზეთს დამოუკიდებელ სახელმწიფოდ აღიარებენ.

“დოსიემ” გაავრცელა ინფორმაცია, რომ პატრიოტთა ალიანსმა წინასაარჩევნოდ 8 მილიონი დოლარი რუსეთისგან მიიღო. მედიის ინფორმაციით, პარტიას რუსეთი პირდაპირ მითითებსა და დავალებებს აძლევს, რასაც მათი გამოქვეყნებული დოკუმენტები ადასტურებს.

ირმა ინაშვილმა დაიფიცა, რომ რუსული ფული არ აუღია. მან ასევე განაცხადა, რომ აფხაზეთში ისე გადავიდა, რომ ФСБ–სთან შეხება არ ჰქონია. მისი მტკიცებით, მას დუმის თავმჯდომარესთან ჰქონდა მოლაპარაკება, რომელსაც ФСБ–თან არანაირი კავშირი არ აქვს.

პარტია ლელოს ლიდერი, მამუკა ხაზარაძე ამბობს, რომ ანაკლიის პორტის გაჩერება არის დანაშაული ქვეყნის განვითარების წინააღმდეგ, რომელიც ჩაიდინა ბიძინა ივანიშვილმა. ხაზარაძე პირობას დებს, რომ პორტი მაინც აშენდება.

“თავის დამქაშებთან ერთად საუკუნის პროექტი ჩააგდო. ყველანაირი მეთოდით ეცადა, რომ ჩირქი მოეცხო ამ იდეისთვის და პირადად ჩვენთვის, მაგრამ მას ეს არ გამოუვა. მე მას ვპირდები, რომ ანაკლიის პორტი აუცილებლად აშენდება. ეს იქნება ჩვენი ქვეყნის კარიბჭე მთელ მსოფლიოში,”– ამბობს ხაზარაძე.

ის ასევე აღნიშნავს, რომ “ქართულმა ოცნებამ” ბევრი ეკონომიკური პროექტი გააჩერა, რამაც ქვეყნის განვითარება ჩიხში შეიყვანა.

საქართველოს მთავრობამ ხანგრძლივი დავის შემდეგ ანაკლიის განვითარების კონსორციუმთან ხელშეკრულება 9 იანვარს გაწყვიტა.

აბაშაში ქვეითად მოსიარულე კაცს სატვირთო ავტომობილი დაეჯახა და გარდაიცვალა. გავრცელებული ინფორმაციით, კაცი 70 წლის იყო.

შსს–ს ინფორმაციით, ფაქტზე, გამოძიება სისხლის სამართლის კოდექსის 276-ე მუხლის მეექვსე ნაწილით დაიწყო, რაც ტრანსპორტის მოძრაობის ან უსაფრთხოების წესების დარღვევას გულისხმობს, რამაც ადამიანის სიცოცხლის მოსპობა გამოიწვია.

დაავადებათა კონტროლისა ეროვნული ცენტრის ხელმძღვანელის, ამირან გამყრელიძის განცხადებით, კარანტინის დღეების რაოდენობა შესაძლოა შემცირდეს.

მისი თქმით, გამორიცხული არ არის, რომ 12-დღიანი საკარანტინო რეჟიმი 8 დღემდე შემცირდეს.

„კარანტინი 14 დღიდან 12 დღემდე შემცირდა, ახლა რამდენიმე მექანიზმია დამუშავების პროცესში, იგივე 8 დღე და შემდეგ ტესტირება, ან კიდევ სხვა მიდგომები. გარკვეული ცვლილებები შეიძლება იყოს“, – თქვა გამყრელიძემ.

რაც შეეხება დიფერენცირებულს კარანტინს, გამყრელიძე ამბობს, რომ მხოლოდ საქართველოს მოქალაქეების კარანტინში გადაყვანა “უხერხული საკითხია” და ამაზე მიმდინარეობს მსჯელობა.

დაავადებათა კონტროლის ეროვნული ცენტრის დირექტორის, ამირან გამყრელიძის თქმით, პირველი ადამიანი, ვისაც ოზურგეთში კორონავირუსი დაუდასტურდა, ქორწილში იყო.

“ოზურგეთში დადასტურებული პირველი შემთხვევა, ვიცი, რომ ნამყოფია ქორწილში. ვიცი, რომ საზოგადოებრივი ჯანდაცვის სამსახურები, როგორც გურიის, ასევე აჭარის მუშაობენ ამ საკითხზე და მიმდინარეობს კონტაქტების კვლევა”,– თქვა ამირან გამყრელიძემ.

დღეს, 5 სექტემბერს, გავრცელდა ინფორმაცია, რომ ოზურგეთში გამოვლენილი პირველი ინფიცირებული 350-კაციან ქორწილში იმყოფებოდა.

შეგახსენებთ, რომ 5 სექტემბერს საქართველოში კორონავირუსის 25 ახალი შემთხვევა გამოვლინდა, 8 ადამიანი კი გამოჯანმრთელდა. მთლიანობაში საქართველოში კორონავირუსის 1621 შემთხვევაა დადასტურებული, მათგან გამოჯანმრთელდა 1302 ადამიანი, ხოლო გარდაიცვალა 19.

რუსთავში გირჩის მაჟორიტარობის კანდიდატი პარტიის ერთ–ერთი ლიდერი, ვახტანგ მეგრელიშვილი იქნება.

გირჩის განცხადებით, არჩევნებზე მეგრელიშვილის მიზანი პროპორციული ხმების გაზრდა და დაცვა, სრულად პოზიტიური კამპანიის ჩატარება და ოპოზიციონერ კოლეგებთან უპრეცედენტო თანამშრომლობა იქნება.

მეგრელიშვილის თქმით, რუსთავი ის ქალაქია, სადაც გირჩმა საპრეზიდენტო არჩევნებზე თბილისის შემდეგ ყველაზე კარგი შედეგი აჩვენა, ამიტომ მისი ამოცანა ამ შედეგის გაუმჯობესებაა.

ცნობისთვის, ქართული ოცნებიდან რუსთავის საარჩევნო ოლქში კენჭს ნინო ლაცაბიძე იყრის, ხოლო ევროპული საქართველოდან ირმა ნადირაშვილი.

აჭარის ტელევიზიამ კორონავირუსის გამო მაუწყებლობა შეწყვიტა. ტელევიზიაში ახალი კორონავირუსი ერთ თანამშრომელს გუშინ დაუდასტურდა.

აჭარის ტელევიზიის ეთერში საქართველოს პირველი არხის ტრანსლირება მოხდება.

“მაუწყებელში შესვლა არის შეჩერებული. მოვიდნენ შესაბამისი სამსახურის წარმომადგენლები, იწყება თანამშრომლების ტესტირება. უსაფრთხოებიდან გამომდინარე, მივიღეთ გადაწყვეტილება, შეჩერდეს მაუწყებლობა. ამ წუთებში უკვე ჩართულია პირველი არხი და მოხდება პირველი არხის ტრანსლირება ჩვენს ეთერში, ვიდრე არ იქნება დაავადებათა კონტროლის ეროვნული ცენტრიდან შესაბამისი რეკომენდაციები”. – ამბობს არხის საინფორმაციო სამსახურის უფროსი, ვახო ხუზმიაშვილი.

ჩოხატაურში, სოფელ ქვენობანში, სამი თვის ჩვილს კორონავირუსი დაუდგინდა. საზოგადოებრივი ჯანდაცვის ადგილობრივი ცენტრის ინფორმაციით, ბავშვის მდგომარეობა ამ დროისთვის დამაკმაყოფილებელია.

მათივე თქმით, ჩვილის ოჯახი დაინფიცირებული ქალის კონტაქტს წარმოადგენდა და თვითიზოლაციაში იმყოფებოდა.

„ბავშვის ოჯახი ისედაც თვითიზოლაციაში იმყოფებოდა. ცოტა ხანში გადავიყვანთ ჩვილს კლინიკაში”, – აცხადებს საზოგადოებრივი ჯანდაცვის ჩოხატაურის ცენტრის ხელმძღვანელი ნატო ჯიბუტი.