Category: სლაიდერი

“აღსანიშნავია ის წინსვლა, რომლის თვითმხილველნიც საქართველოში გავხდით დამოუკიდებლობის აღდგენის დღიდან. ბოლო 30 წლის განმავლობაში, გაერთიანებული სამეფო და საქართველო თანამშრომლობენ მნიშვნელოვანი პარტნიორობის გასავითარებლად, რაც მრავალ სფეროს მოიცავს და მათ შორისაა პოლიტიკური, სავაჭრო-ეკონომიკური, უსაფრთხოების, თავდაცვის, განათლებისა და კულტურული მიმართულებები. მახარებს ის, თუ როგორ გაფართოვდა და აყვავდა ის ურთიერთობა, რომლის სიმბოლოდ იქცა უორდროპის სტრატეგიული დიალოგის ყოველწლიური ფორმატი ისევე, როგორც ჩვენი ორმხრივი პარტნიორობისა და თანამშრომლობის ახალი შეთანხმება.

ასევე ვაფასებთ ჩვენს თანამშრომლობას რეგიონალურ და გლობალურ საკითხებზე, მათ შორის გარემოსდაცვით და კლიმატის ცვლილების მიმართულებით.

კარგად ვაცნობიერებ იმ ფაქტს, რომ პროვოცირების გარეშე, ვლადიმერ პუტინის მხრიდან წინასწარი განზრახვით განხორციელებული ბარბაროსული თავდასხმა უკრაინაზე კიდევ უფრო ამძაფრებს იმ გამოწვევებს, რომლებსაც საქართველო მრავალი წელია მამაცად უპირისპირდება. გაერთიანებული სამეფო და საერთაშორისო თანამეგობრობა მსოფლიო ერების თავისუფლებისთვის, დემოკრატიისა და სუვერენიტეტისთვის ამ ღია აგრესიის პირისპირ დგანან. მინდა ასევე გარწმუნოთ, რომ მტკიცედ ვდგავართ საქართველოს სუვერენიტეტის, ტერიტორიული მთლიანობისა და ქართველი ხალხის ევრო-ატლანტიკური არჩევანის სადარაჯოზე.
მოუთმენლად ველი მომდევნო წლებში ჩვენი პარტნიორობის უწყვეტ განვითარებას”

სწერს დიდი ბრიტანეთის პრემიერმინისტრის, ბორის ჯონსონი ირაკლი ღარიბაშვილს. წერილს საქართველოს მთავრობა ავრცელებს.

რუსეთის საგარეო მინისტრი სერგეი ლავროვი აცხადებს, რომ არ შეაჩერებენ სამხედრო ოპერაციას უკრაინაში სამშვიდობო მოლაპარაკებების მომდევნო რაუნდებისთვის.

Reuters-ის ცნობით, რუსი ოფიციალური პირები აცხადებენ, რომ უკრაინასთან სამშვიდობო მოლაპარაკებები არ მიმდინარეობს ისე სწრაფად, როგორც მათ სურთ და ადანაშაულებენ დასავლეთს მოლაპარაკებების ჩაშლაში, უკრაინაში რუსეთის ჯარების წინააღმდეგ ომის დანაშაულის ბრალდებების გამოყენებით, რასაც მოსკოვი უარყოფს.

რუსული სახელმწიფო ტელევიზიისთვის მიცემულ ინტერვიუში ლავროვმა თქვა, რომ ვერ ხედავს მიზეზს უკრაინასთან მოლაპარაკებების არ გაგრძელებისთვის.

მისივე თქმით, პრეზიდენტმა პუტინმა თებერვლის ბოლოს რუს და უკრაინელ მომლაპარაკებლებს შორის მოლაპარაკებების პირველი რაუნდის დროს სამხედრო მოქმედებების შეჩერების ბრძანება გასცა, მაგრამ მას შემდეგ მოსკოვის პოზიცია შეიცვალა.

„მას შემდეგ რაც დავრწმუნდით, რომ უკრაინელები არ გეგმავდნენ საპასუხო ქმედებას, მივიღეთ გადაწყვეტილება, რომ მოლაპარაკებების შემდეგი რაუნდის განმავლობაში არ იქნებოდა პაუზა [სამხედრო მოქმედებებში], სანამ საბოლოო შეთანხმება არ იქნება მიღწეული“, – აღნიშნა ლავროვმა.

“მარიუპოლის დაცვა გრძელდება.

თავდაცვის ძალების ქვედანაყოფებთან კავშირი, რომლებიც გმირულად იკავებენ ქალაქს, სტაბილური და მხარდაჭერილია.

ხაზს ვუსვამ, რომ თავდაცვითი ოპერაციების ჩატარება არ არის საჯარო განხილვის თემა.

ჩვენ ვაკეთებთ შესაძლებელს და შეუძლებელს, რათა გავიმარჯვოთ და გადავარჩინოთ პერსონალი და მშვიდობიანი მოსახლეობის სიცოცხლე.

გჯეროდეთ უკრაინის შეიარაღებული ძალების!”

წერს უკრაინის შეიარაღებული ძალების მეთაური ვალერი ზალუჟინი.

უკრაინის უსაფრთხოების სამსახურის განცხადებით, რუსი ოკუპანტები უკრაინელ ბავშვებს უკრაინული სამხედრო პოზიციების დასაზვერად იყენებენ. უწყების ცნობით, მათ ინფორმაციის სანაცვლოდ ფულს სთავაზობენ.

“ხარკოვში ოკუპანტებმა ტელეგრამის მესინჯერის საშუალებით დაამყარეს კონტაქტი არასრულწლოვანთან. რასისტები ქალაქში შეიარაღებული ძალების პოზიციების შესახებ ინფორმაციისთვის ფულის გადახდას დაპირდნენ.

ამავდროულად, ლუგანსკის რაიონში ორი რუსი ჯარისკაცი მოქმედებდა არა მესენჯერის მეშვეობით, არამედ პირდაპირ – 16 წლის ბიჭს ფული შესთავაზეს უკრაინის ჯარების ადგილმდებარეობისა და მარშრუტების შესახებ ინფორმაციის სანაცვლოდ. ბიჭს შეეშინდა, მაგრამ ოკუპანტებმა “დაამშვიდეს” და უთხრეს, რომ კარგად იქნებოდა. უკრაინის უშიშროების ძალების ჩარევის წყალობით, ბიჭს არ ჰქონდათ დრო, რომ ინფორმაცია მტრისთვის გადაეცა”,– აცხადებს უსაფრთხოების სამსახური.

უწყება მოუწოდებს ყველა უკრაინელ მშობელს, ყურადღებით იყოს მათი ვაჟებისა და ქალიშვილების მიმოწერისა და კონტაქტების შესახებ.

“როცა დიპლომატიის ენით მუშაობ, შედეგებს ვერ იღებ. ეს ყველაფერი ძალიან ბიუროკრატიულია. შესაბამისად, საუბრის ეს ფორმა, აბსოლუტურად გამართლებულია. უკრაინას აღარ აქვს მეტი სიცოცხლის დაკარგვის საშუალება. მე აღარ მაინტერესებს მათი დიპლომატია, რომელიც ჩემი ქვეყნის განადგურებას იწვევს.

ეს არის ალიანსი, რომელსაც თქვენ აშენებდით?”

ამის შესახებ, უკრაინის პრეზიდენტმა, ვოლოდიმირ ზელენსკიმ,  CBS-თან ინტერვიუში განაცხადა. ზელენსკი აღნიშნავს, რომ NATO-ს სისუსტეს უკრაინაში უამრავი ადამიანის სიცოცხლე შეეწირა.

უკრაინის დაზვერვის ინფორმაციით, რუსები თავიანთ ტერიტორიაზე პარტიზანული ომისთვის ემზადებიან.

მათი ცნობით, რუსეთის ფედერაციის ტრანსპორტის სამინისტროს დაევალა, უზრუნველყოს რუსეთის რკინიგზის ურთიერთქმედება შინაგან საქმეთა სამინისტროსა და FSB-სთან.

“უსაფრთხოების ზომების გაძლიერება დაკავშირებულია „როსტოვის ოლქისა და კრასნოდარის ტერიტორიის საზღვრებთან მდებარე სატრანსპორტო ინფრასტრუქტურის ობიექტების მუშაობაში ჩარევის საფრთხესთან“,– აცხადებს დაზვერვა.

მათივე ინფორმაციით, მზადყოფნის გაძლიერება ასევე უკავშირდება რუსეთის ქალაქ ბელგოროდის მახლობლად ნავთობისა და საბრძოლო მასალი საცავის აფეთქებას, რამაც პანიკა გამოიწვია მეზობელ რეგიონებში. დაზვერვა კიდევ ერთ მიზეზს ასახელებს – ბელარუსის “სარკინიგზო პარტიზანების“ ქმედებებს, რომლებიც მიზანმიმართულად აზიანებენ სარკინიგზო კავშირს უკრაინასთან, რათა გაართულონ საბრძოლო ზონაში მხარდაჭერის მიწოდება.

ცნობისთვის, პირველ აპრილს რუსეთის ქალაქ ბელგოროდში მდებარე ნავთობბაზაზე აფეთქდა. ბელგოროდი უკრაინა–რუსეთის საზღვრიდან 30 კილომეტრში, რუსეთის ტერიტორიაზე მდებარეობს. ის ხარკოვიდან 60 კილომეტრით არის დაშორებული, რომელსაც რუსები ომის დაწყების პირველივე დღეებიდან ბომბავენ.

უკრაინის პრეზიდენტი, ვოლოდიმირ ზელენსკი სამხრეთ კორეას იარაღით დახმარებას სთხოვს.  ამის შესახებ, ზელენსკიმ, სამხრეთ კორეის პარლამენტთან მიმართვისას განაცხადა.

“თქვენ ეს გაქვთ.  როცა დგას გადარჩენის საკითხი ომში, რომელიც ერის მთლიან განადგურებას ისახავს მიზნად, საჭიროა, პრინციპული პასუხი გაეცეს. უნდა გადაიხედოს იარაღის მიწოდების ჩვეული წესები. საჭიროა სწრაფი მოქმედება. საჭიროა დახმარება. უკრაინისთვის აუცილებელი იარაღის მიცემა ნიშნავს არა მხოლოდ ჩვენი ხალხის სიცოცხლის გადარჩენას და ჩვენთვის შესაძლებლობის მიცემას, მოხდეს ჩვენს ქალაქებზე ალყის მოხსნა, არამედ სხვა სახელმწიფოების, სხვა რეგიონების გადარჩენას რუსული აგრესიის შემდგომი გავრცელებისგან”. – თქვა ვოლოდიმირ ზელენსკიმ სამხრეთ კორეის პარლამენტში.

მანამდე, სამხრეთ კორეის თავდაცვის მინისტრმა, ბუ სეუნ-ჩანიმ  განაცხადა, რომ სამხრეთ კორეას საკუთარი “ეროვნული უსაფრთხოების მდგომარეობისა და სამხედრო მზადყოფნის გათვალისწინებით” არ შეუძლია ლეტალური იარაღის მიწოდება.

“საპარლამენტო უმრავლესობა მზადაა, უკრაინაში წავიდეს ” – ამის შესახებ ფრაქცია „ქართული ოცნების“ თავმჯდომარე მამუკა მდინარაძემ პარლამენტში ბრიფინგზე განაცხადა.

„საპარლამენტო უმრავლესობაში ამ საკითხზე ვიმსჯელეთ. საპარლამენტო უმრავლესობა მზადაა, დღესვე, ხვალვე ან როცა საჭირო იქნება და პროტოკოლურად შეთანხმდება ეს საკითხი და ფიზიკურად დალაგდება წასვლის საკითხზე, უმრავლესობის შემადგენლობიდან რამდენიმე ადამიანი წავიდეს უკრაინაში და კიდევ ერთხელ დამატებით გამოთქვას სამძიმარი. რაც შეეხება პარლამენტის თავმჯდომარის ვიზიტს, ეს დამატებითი პოლიტიკური დატვირთვის მატარებელია და მან რამდენიმე დღის წინ გამოაქვეყნა წერილში, რომელშიც მოტანილ არცერთ საკითხთან, კითხვასთან თუ მოთხოვნასთან დაკავშირებით პასუხი არ მიგვიღია. ასევე დღემდე არ მიგვიღია პასუხი ჩვენი მეგობარი ქვეყნის ხელისუფლებისგან, რატომ დაგვაბრალეს გადაუმოწმებლად და უაპელაციოდ, თითქოს საქართველო ამ სიტუაციაში რძესთან და ყველთან დაკავშირებით მოლაპარაკებას აწარმოებდა ოკუპანტ ქვეყანასთან, რატომ დაგვაბრალეს ისეთი ამორალური რამ, რასაც იარაღის კონტრაბანდა ჰქვია, რატომ გაიწვიეს ელჩი, როდესაც საქართველოს მხარდაჭერა უპრეცედენტოა, დღეს ვნახეთ ახალი ამბავი, რომ უკრაინის ფოსტის გავლით საქართველოს ოდენობის დახმარება არავის გაუწევია, მაგრამ ეს პირობითად მეორეხარისხოვან თემად ჩავთვალოთ, რადგან საქართველო ყველა საერთაშორისო ასპარეზზე უპრეცედენტო, შეძლების მაქსიმუმის ზღვარზე უწევს მხარდაჭერას უკრაინას და ამ ყველაფრის ფონზე, რატომ განხორციელდა ის დემარში, რაც განხორციელდა, პასუხი არ მიგვიღია. ამაზე იქნება დამოკიდებული საქართველოს პარლამენტის თავმჯდომარის ვიზიტი. მას არ აქვს ამასთან დაკავშირებით პრობლემა“,- განაცხადა მდინარაძემ.