ანკარა აცხადებს, რომ სურს მიაღწიოს უკრაინასა და რუსეთს შორის გრძელვადიან მშვიდობას.
თურქეთი მხარს უჭერს უკრაინის პრეზიდენტის ვოლოდიმირ ზელენსკის მიერ შემოთავაზებულ სამშვიდობო გეგმას. ამის შესახებ თურქეთის საგარეო საქმეთა მინისტრმა მევლუთ ჩავუშოღლუმ სამხრეთ აფრიკის რესპუბლიკაში ვიზიტისას განაცხადა, რასაც თურქული სააგენტო Anadolu ციტირებს.
მისი თქმით, თურქულმა დიპლომატიამ და პირადად პრეზიდენტმა რეჯეფ თაიფ ერდოღანმა დიდი ძალისხმევა გასწიეს უკრაინასა და რუსეთს შორის დიალოგის დასამყარებლად.
- “რა თქმა უნდა, ჩვენი მიზანია გრძელვადიანი მშვიდობა და ორმხრივად მისაღები გადაწყვეტა. ჩვენ გვჯერა, რომ ეს ომი მოლაპარაკების მაგიდასთან დასრულდება. რაც უფრო მალე, მით უკეთესი”, – განაცხადა ჩავუშოღლუმ.
მან აღნიშნა, რომ რუსეთი აცხადებს მზადყოფნას მოლაპარაკებებისთვის ამ დროისთვის, ხოლო უკრაინის პრეზიდენტმა ვოლოდიმირ ზელენსკიმ შესთავაზა 10-პუნქტიანი სამშვიდობო გეგმა.
- „ჩვენ, როგორც თურქეთი, მხარს ვუჭერთ ამ გეგმას და ვაგრძელებთ მუშაობას“, – განაცხადა ჩავუშოღლუმ.
ზელენსკის სამშვიდობო გეგმა: რაზეა საუბარი
ნოემბრის შუა რიცხვებში G20-ის სამიტზე გამოსვლისას პრეზიდენტმა ზელენსკიმ თქვა, რომ უკრაინას სჭირდება სრულფასოვანი მშვიდობა რუსეთთან და არა დროებითი ზავი.
ზელენსკიმ წარმოადგინა თავისი გეგმა მშვიდობიანი მოგვარების შესახებ, რომელიც შეიცავს 10 პუნქტ-ამოცანას, რომლებიც შესასრულებელია. სხვა საკითხებთან ერთად, ეს გეგმა ითვალისწინებს ყველა პატიმრის გათავისუფლებას, უკრაინის ტერიტორიული მთლიანობის სრულ აღდგენას და მთელი რუსული ჯარის გაყვანას უკრაინის ტერიტორიებიდან.
ეროვნული უსაფრთხოებისა და თავდაცვის საბჭოს მდივანმა ოლექსი დანილოვმა ხაზგასმით აღნიშნა, რომ ზელენსკის სამშვიდობო გეგმა აუცილებლად განხორციელდება.
