“გულწფელი სამძიმარი მინდა, გამოვუცხადო შოვში მეწყერის დროს გარდაცვლილთა ოჯახებსა და ახლობლებს. იმედი მაქვს, სამაშველო და საევაკუაციო ოპერაციები წარმატებული იქნება. ჩვენი ფიქრებითა და ლოცვით ქართველი ხალხის გვერდით ვართ,”
ევროკომისარი ევროკავშირის სამეზობლო და გაფართოების საკითხებში ოლივერ ვარჰეი შოვში ტრაგედიისას დაღუპულთა ოჯახებს და მათ ახლობლებს სამძიმარს უცხადებს.
“ღრმა მწუხარებას გამოვთქვამთ რაჭაში დაღუპულთა გამო. თანავუგრძნობთ მათ, ვინც საყვარელი ადამიანები დაკარგეს და ვის ახლობლებსაც ეძებენ”.
ბრიტანეთის საელჩო საქართველოში რაჭაში, შოვში მომხდარ სტიქიასთან დაკავშირებით განცხადებას ავრცელებს და დაღუპულთა ოჯახებს უსამძიმრებს.
“მოვუწოდებთ მოქალაქეებს, თვითნებურად არ მიიღონ დრონების გამოყენების გადაწყვეტილება…საფრთხის შემცველია სტიქიის ზონაში მომუშავე ვერტმფრენებისთვის” – ამის შესახებ, საგანგებო სიტუაციების მართვის სამსახური განცხადებას ავრცელებს.
“შინაგან საქმეთა სამინისტროს საგანგებო სიტუაციების მართვის სამსახურის განცხადება
ონის მუნიციპალიტეტში, სტიქიის ზონაში, მესამე დღეა, უწყვეტ რეჟიმში მიმდინარეობს ძებნა-შველის ღონისძიება.
ძებნა-შველის სამუშაოებში ჩართულია საგანგებო სიტუაციების მართვის სამსახურის მეხანძრე- მაშველები, პოლიციის დანაყოფები, დრონები, სპეცტექნიკა და სასაზღვრო პოლიციის ვერტმფრენი. ასევე, სამუშაოებში ჩართულია საგანგებო სიტუაციების მართვის სამსახურის კინოლოგთა ჯგუფი.
აქვე მოვუწოდებთ მოქალაქეებს, რომლებიც გამოთქვამენ სურვილს, სტიქიის ზონაში დრონების გამოყენებასთან დაკავშირებით, თვითნებურად არ მიიღონ გადაწყვეტილება, რადგან საფრთხის შემცველია სტიქიის ზონაში მომუშავე ვერტმფრენებისთვის,”- ნათქვამია საგანგებო სიტუაციების მართვის სამსახურის მიერ გავრცელებულ განცხადებაში.
ცნობისთვის, გუშინ მოქალაქე, რომელიც შოვში დაკარგული ადამიანების მოსაძებნად თერმული ხედვის დრონით წავიდა, სტიქიის ზონაში არ შეუშვეს. თერმული ხედვის დრონი ღამით სამძებრო- სამაშველო ოპერაციებისთვის გამოიყენება.
ამ წუთებში დროებით ოკუპირებულ ყირიმის ხიდის სიახლობეს დრონების და უპილოტო კატერების მასირებული შეტევაა.
საზღვაო და საჰაერო დრონების თავდსსხმის გამო ხიდზე მოძრაობა შეწყვეტილია.
ყირიმის ხელმძღვანელის მრჩეველი იუწება,რომ ქერჩის რეგიონში აფეთქებები არ უკავშირდება ყირიმის ხიდს და ეს მხოლოდ საჰაერო განგაშია.
“ყირიმის ხიდის მიმდებარედ მომხდარი აფეთქებების შემდეგ, ხანძარია. მიმდინარეობს მოსახლეობის ევაკუაცია. ჰაერში გამანადგურებლები აფრინდნენ, – წერს ტელეგრამზე რუსული მედია.
“ღრმად თანავუგრძნობთ ქართულ საზოგადოებას სტიქიური უბედურების გამო, რომელმაც ადამიანების სიცოცხლე შეიწირა. ვუსამძიმრებთ გარდაცვლილთა ნათესავებსა და ახლობლებს და მალე გამოჯანმრთელებას ვუსურვებთ რაჭის მაღალმთიან რეგიონში მეწყერის ჩამოწოლის შედეგად ყველა დაშავებულს”.
ომში მყოფი უკრაინის პრეზიდენტი, ვოლოდიმირ ზელენსკი რაჭაში მომხდარ ტრაგედიას Twitter-ზე ქართულად გამოეხმაურა და დაღუპულთა ნათესავებსა და ახლობლებს მიუსამძიმრა.
რაჭაში, შოვში სტიქიის ზონაში ტეტანუსის აცრის მობილური პუნქტები განთავსდა – ინფორმაციას წითელი ჯვრის საზოგადოება ავრცელებს. ადგილზე დაზარალებულებისთვის და მოხალისეებისთვის, მცირე ზომის ჭრილობის ან მეწყრულ მასასთან შემხებლობის შემთხვევაშიც გართულებების თავიდან ასაცილებლად ტეტანუსის აცრის მობილური პუნქტები განთავსდა:
”ყველა დაზარალებულმა ან მოხალისემ, რომელიც იმყოფება ან ასრულებს ფიზიკურ სამუშაოს სტიქიის უბნებში, ნებისმიერი, თუნდაც მცირე ზომის ჭრილობის ან მეწყრულ მასასთან შემხებლობის შემთხვევაშიც კი, უნდა მიმართოს დაავადებათა კონტროლის ტეტნაუსის აცრის მობილურ პუნქტს. აცრის პუნქტი განთავსებულია შოვში, დამეწყრილი ზონიდან 100 მეტრის რადიუსში და იფუნქციონირებს 10:00 – 18:00 საათებში მანამ, სანამ მიმდინარეობს საძიებო სამუშაოები.
დამატებითი დეტალებისთვის გთხოვთ, მოგვმართოთ წითელი ჯვრის ცხელ ხაზზე:
032 2 501 105
ან დაუკავშირდით დაავადებათა კონტროლის ადგილობრივ წარმომადგენლებს.
599 93 11 92 – ნონა ბაკურაძე
599 17 14 85 – ნატო დვალი
გთხოვთ, გაითვალისწინოთ, რომ ცხელი ხაზი იმუშავებს დღეს ღამის 12 საათამდე, ხოლო შაბათ- კვირას 9:00-21:00 -მდე” -ნათქვამია განცხადებაში.
გუშინდელი დღიდან მოყოლებული შინაგან საქმეთა სამინისტრო, საგანგებო სიტუაციების მართვის სამსახური სრულადაა ჩართული შესაბამის ღონისძიებებში. დღეს პრემიერ-მინისტრის დავალებით, პროცესში ასევე, ჩაერთვებიან ჩვენი ჯარისკაცები, რათა მოქალაქეთა გადარჩენა შევძლოთ და სამაშველო სამუშაოები გაგრძელდეს. აქვე, მინდა, გამოვხატო ჩვენი მზაობა, მხარდაჭერა, თანადგომა. კერძოდ, დედაქალაქის მერიის ყველა შესაბამისი სამსახური მზადაა, ჩვენი შესაძლებლობის ფარგლებში, აღნიშნულ ღონისძიებებში ჩავერთოთ, თუ, რა თქმა უნდა, ამის აუცილებლობა იქნება. კიდევ ერთხელ მინდა მშვიდობა ვუსურვო სრულიად საქართველოს, რაჭას, რაჭველებს, იქ მყოფ მოქალაქეებს. ყველამ ვილოცოთ მათი გადარჩენისთვის“,
აცხადებს თბილისის მერი კახა კალაძე შოვში მომხდარ ტრაგედიასთან დაკავშირებით.
“მთელი გულით განვიცდი შოვში დატრიალებულ ტრაგედიას და ვუსამძიმრებ დაღუპულთა ოჯახებს.
7 ვერტმფრენი (სუპერ პუმა) რომელიც ჩვენ ნიკოლა სარკოზის დიდი ჩართულობით შევიძინეთ, სასიცოცხლოდ მნიშვნელოვან როლს შეასრულებდა ახლა შოვში.როცა ჩვენ ამ ვერტმფრენებს ვყიდულობდით, მედვედევი და ლავროვი საფრანგეთს დაემუქრა სანქციებით. თუ საქართველო მიიღებდა ამ ვერტმფრენებს, ისინი ევროკოპტერს აღარ შეუშვებდნენ რუსეთში.
სწორედ ამიტომ ჩვენ ამ სუპერპუმებს მივეცით სამოქალაქო სტატუსტი.
რეალურად ეს იყო ორმაგი დანიშნულების ვერტმფრენები, როგორც სამხედრო, ასევე სამაშველო. მას სამოქალაქო სახე მიეცა მხოლოდ იმის გამო, რომ რუსული სანქციებისთვის აგვევლო გვერდი.
პრეზიდენტი სარკოზი პირადად იყო ამ ვერტმფრენების ყიდვაში ჩართული. სარკოზის პირადი კავშირებით უპრეცედენტო, ფაქტობრივად 0% კრედიტით ვიყიდეთ 7 ევროკოპტერი და დამატებით კიდევ ვგეგმავდით 7 ჩამოყვანას საქართველოში.
როცა ივანიშვილი მოვიდა ხელისუფლებაში დაიბარა საფრანგეთიდან წარმომადგენლები და უთხრა, რომ საქართველოს აღარ სჭირდებოდა ფრანგული ვერტმფრენები და გადაწყვიტა ძველი, ამორტიზებული რუსული ვერტმფრენების შეკეთება. მას კარგად აუხსნეს, რომ რუსეთი არ გვაძლევდა მარაგნაწილებთან წვდომას და რომ ეს დაჯდებოდა ბევრად ძვირი. ამ საუბრის მიუხედავად ივანიშვილმა დაიწყო მოლაპარაკება პეტერბურგელ ბიზნესმენთან, ევროკოპტერების გასაყიდად, იმ ევროკოპტერების რომელიც საფრანგეთისგან რუსეთის დიდი ზეწოლის მოუხედავად, მაინც ჩამოვიყვანეთ საქართველოში!”
ასე ეხმაურება, საქართველოს მესამე პრეზიდენტი მიხეილ სააკაშვილი შოვში მომხდარ ტრაგედიას.
“კაბინეტენში სხედხართ, გეგმა ჩამომიწერეთ როგორ გავაგრძელო ცხოვრება.. მარტო მე ვარ ოჯახიდან ცოცხალი..” – ასე მიმართავს, რაჭაში სტიქიის ზონაში გადარჩენილი მარიტა გუტაშვილი ონის მუნიციპალიტეტის მერს სერგო ხიდაშელს, რაჭა-ლეჩუმ-სვანეთის მაჟორიტარს დეპუტატ გოჩა ენუქიძეს და რაჭა-ლეჩხუმისა და ქვემო სვანეთის სახელმწიფო რწმუნებულს პაპუნა მარგველიძეს.
“Papuna Margvelidze Gocha Enukidze Sergi Khidesheli კაბინეტენში სხედხართ მაინც და გეგმა ჩამომიწერეთ როგორ გავაგრძელო ცხოვრება ამის მერე. მარტო მე ვრჩები ოჯახიდან ცოცხალი. ონის მუნიციპალიტეტის მერია” – წერს მარიტა გუტაშვილი.
ამ დროის მონაცემებით, რაჭაში სტიქიას 11 ადამიანი ემსხვერპლა.
სამძებრო სამუშაოებში ჩართულია 400-მდე მაშველი, პრემიერის განცხადებით, პროცესში ჩაერთვება ჯარიც.
სტიქიის ზონიდან გუშინდელიდან დღემდე ჯამში 210 ადამიანის ევაკუაცია განხორციელდა. მათი ნაწილი ვერტმფრენით უსაფრთხო ადგილას დღეს დილით გადმოიყვანეს.
“კალაძის “გამპრავებლები“ ირწმუნებიან, რომ ვერტმფრენი სტიქიამდე რამდენიმე საათით ადრე ჩაფრინდა და არა სტიქიის შემდეგ. თუ ეს ასეა, მაშინ საერთოდ რატომ აფრინდა სახელმწიფო ვერტმფრენი და რა უფლებით სარგებლობენ ქოც-ბანდის მაღალჩინოსნები სახელმწიფო საკუთრებით. და თუ ეს ასე არ არის, მაშინ რატომ უშველა კალაძემ მხოლოდ საკუთარ ოჯახს და ყველა დანარჩენი მოქალაქე ფეხებზე დაიკიდა?! მერამდენედ უნდა დავრწმუნდეთ, რომ ქოც-ბანდას სახელმწიფოც და ქართველი ხალხიც ფეხზე ჰკიდია?!
პროკურატურაში დაუყოვნებლივ უნდა აღიძრას სისხლის სამართლის საქმე ამ ფაქტზე და თუ დადგინდა, რომ კალაძემ პირადი მიზნებისთვის გამოიყენა სახელმწიფოს საკუთრებაში არსებული ძვირადღირებული ტექნიკა, მას პატიმრობა უნდა შეეფარდოს!
ისევ გახსენებთ კლასიკურ ჭეშმარიტებას – ნებისმიერ ხალხს ჰყავს ისეთი ხელისუფლება, როგორსაც იმსახურებს. ჰოდა, თუ ამათ არ ვიმსახურებთ, პირველივე არჩევნებზე პანღურით უნდა გავყაროთ ქოც-ბანდა, კრებითი კალაძეები, კობახიძეები და პოლიტიკურად ჩავრეცხოთ ბიძინიზმი, როგორც მოვლენა ამ ქვეყანაში”
ასე ეხმაურება, შოვში მომხდარ ტრაგედიასთან დაკავშირებით პარლამენტის დეპუტატი კახა ოქრიაშვილი განცხადებას ავრცელებს და ირწმუნება, რომ თბილისის მერმა “სტიქიური უბედურების დროს ჰაერში სახელმწიფოს კუთვნილი ვერტმფრენი ააფრინა და მხოლოდ საკუთარი ოჯახის წევრები გამოიყვანა სტიქიის ზონიდან”.