„ეს ადამიანები მხოლოდ იმიტომ მოკლეს, რომ ისინი ებრაელები იყვნენ და მათ მშვიდობიანად ცხოვრება სურდათ“, – განუცხადა მაკრონმა ისააკ ჰერცოგს.
შეხვედრაზე მაკრონმა ისრაელის მიმართ მხარდაჭერა გამოხატა და პრეზიდენტ ჰერცოგის აზრი გაიზიარა, იმასთან დაკავშირებით, რომ მძევლების გათავისუფლება დაუყოვნებლივ უნდა მოხდეს.
„მინდა, დარწმუნებულები იყოთ, რომ ტერორიზმის წინააღმდეგ ომში მარტო არ ხართ“,
ამის შესახებ საფრანგეთის პრეზიდენტმა ემანუელ მაკრონმა ისრაელის პრეზიდენტთან შეხვედრისას განაცხადა.
რუსეთის საგარეო საქმეთა მინისტრი, სერგეი ლავროვი ფიქრობს, რომ 3+3 ფორმატში საქართველო, შესაძლოა, მალე ჩაერთოს.
„ჩვენ ვაფასებთ იმ ფაქტს, რომ თბილისი მომავალში ამ გადაწყვეტილების მიღების შანსს იტოვებს. ყველა შემთხვევაში, საქართველოს დღევანდელი ხელისუფლების ყველა მოქმედება ფუნდამენტური ეროვნული ინტერესებიდან გამომდინარეობს, რაც არაერთხელ დაამტკიცა. ეს იმის დაჯერების შესაძლებლობას იძლევა, რომ უახლოეს მომავალში „3+3“ ფორმატი სრულფასოვნად შედგება.[…] ყველა თანხმდება იმაზე, რომ „3+3“ ფორმატის კარი საქართველოსთვის ღიაა. ჩვენ გვესმის, თუ რატომ იკავებს თავს საქართველოს ხელისუფლება „ექვსეულში“ გაწევრიანებისგან “, – განაცხადა ლავროვმა.
“უკრაინის ტერიტორიაზე 400 000-ზე მეტი რუსი სამხედრო იმყოფება” – აცხადებს ამის შესახებ უკრაინის თავდაცვის სამინისტროს მთავარი სადაზვერვო სამმართველოს წარმომადგენელი, ანდრეი იუსოვი.
„რა თქმა უნდა, ეს პირადი შემადგენლობის არცთუ მცირე რაოდენობაა. მიუხედავად იმისა, რომ საქმე გვაქვს არმიასთან, რომელსაც მრავალი თვალსაზრისით ვეღარ ვუწოდებთ თანამედროვე არმიას, არის დიდი რაოდენობით იარაღი, კერძოდ, ჯავშანტექნიკა და ავიაცია. ამიტომ მტერი, რა თქმა უნდა, რჩება სახიფათო“, – განმარტა მთავარი სადაზვერვო სამმართველოს წარმომადგენელმა.
მისი თქმით, რუსეთი აგრძელებს სამობილიზაციო ზომების გატარებას და ეს პროცესი არ შეჩერებულა მთელი ზაფხულის განმავლობაში.
„ამიტომ, ვიფიქროთ, რომ მტერი დაელოდება უკრაინელებს წინსვლას იმისთვის, რომ მათ დაარტყას, ჩვენი მხრიდან, ალბათ, არასწორი იქნებოდა. 2022 წლის სცენარის იმ სახით გამეორებაზე საუბარი არ არის, მაგრამ ზოგიერთ რაიონში მტერი გააგრძელებს ცალკეული შეტევითი ოპერაციების განხორციელების მცდელობას“, – განაცხადა ანდრეი იუსოვმა.
ისრაელის თავდაცვის ძალებმა დილის ანგარიშში განაცხადეს, რომ ბოლო 24 საათში 400-ზე მეტ „ტერორისტულ სამიზნეს“ დაარტყეს, რის შედეგადაც დაიღუპა ჰამასის რამდენიმე მეთაური და ბევრი „ბოევიკი, რომელიც თავდასხმებს ამზადებდა“.
ისრაელის არმიამ დაარტყა “ათობით” ჰამასის მებრძოლს, რომლებიც ემზადებოდნენ რაკეტების გასაშვებად და “ტერორისტული თავდასხმების განხორციელებისთვის ისრაელის ზურგში“– ნათქვამია განცხადებაში.
ისრაელის საჰაერო ძალების მებრძოლებმა შეტევა მიიტანეს ათობით „ტერორისტული ინფრასტრუქტურის“ ობიექტსა და ჰამასის პლაცდარმებზე ღაზას სექტორის რამდენიმე დასახლების მახლობლად. ერთ-ერთი დარტყმა, ისრაელის ცნობით, განხორციელდა ჰამასის გვირაბის შახტზე, რომელიც ბოევიკებს სანაპირო ზოლზე წვდომას აძლევდა.
გარდა ამისა, საჰაერო ძალებმა დაარტყეს მეჩეთებში განლაგებულ სამეთაურო ცენტრებსა და სამხედრო ობიექტებს. ისრაელის არმია ასახელებს სამ მოკლულ მეთაურს.
მთავარი მოკლედ:
საფრანგეთის პრეზიდენტი ემანუელ მაკრონი დღეს თელ-ავივში ჩავიდა რათა გამოხატოს სოლიდარობა ისრაელის მიმართ 7 ოქტომბერს პალესტინის დაჯგუფება ჰამასის მიერ განხორციელებული თავდასხმის შემდეგ.
ვიზიტის დროს საფრანგეთის ლიდერი, სავარაუდოდ, გამოვა მოწოდებით„დაიცვან მშვიდობიანი მოსახლეობა“ ღაზას სექტორში, იმ დროს, როდესაც ისრაელი ახორციელებს საჰაერო დარტყმებს პალესტინის ანკლავზე და ემზადება სახმელეთო შეტევისთვის, წერს AFP პრეზიდენტის ოფისზე დაყრდნობით.
დაგეგმილია საფრანგეთის პრეზიდენტის შეხვედრა პრემიერ-მინისტრ ბენიამინ ნეთანიაჰუსა და პრეზიდენტ ისააკ ჰერცოგთან. გარდა ამისა, AFP-ის ცნობით, თელ-ავივში მაკრონი უნდა შეხვედროდა ჰამასის თავდასხმის შედეგად დაღუპული ან ღაზას სექტორში მძევლად მყოფი საფრანგეთისა და ფრანკო-ისრაელის მოქალაქეების ოჯახებს.
Reuters-ის მიერ გამოქვეყნებული ფოტოების მიხედვით, ეს შეხვედრა თელ-ავივის ბენ გურიონის აეროპორტში შედგა.
საფრანგეთის სულ მცირე შვიდი მოქალაქე ამ დრომდე დაკარგულად ითვლება. ვარაუდობენ, რომ ისინი ყველა ჰამასის მძევები არიან, მაგრამ დადასტურებული მხოლოდ ერთი ფრანგი ქალის მძევლობაა.
მანამდე სოლიდარობის ვიზიტებით ისრაელში ჩავიდნენ აშშ-ის პრეზიდენტი ჯო ბაიდენი, დიდი ბრიტანეთის პრემიერ მინისტრი რიში სუნაკი და გერმანიის კანცლერი ოლაფ შოლცი .
“არ ვიცი რაზე საუბრობთ, იმიტომ, რომ არ მაქვს ეს ინფორმაცია, მაგრამ მეორეს მხრივ, ბატონ ბიძინასთან დაკავშირებით ყველაფერი იქნება კარგად, ნორმალურად, იმიტომ, რომ ეს ადამიანი აკეთებს მხოლოდ კარგ საქმეს და შესაბამისად, მინდა მოგიწოდოთ, რომ ნუ ღელავთ”
ამბობს ვიცე-პრემიერი და ეკონომიკის მინისტრი ლევან დავითაშვილი.
ვაზისუბანში, ერთ-ერთ საცხოვრებელ კორპუსში აფეთქება მოხდა, რამაც ხანძარი გამოიწვია.
არსებული ინფორმაციით, სახლში წყლის გამაცხელებელი აფეთქდა.
ამ დროისთვის უცნობია, აფეთქების დროს იმყოფებოდა თუ არ ვინმე საცხოვრებელ სახლში.
საგანგებო სიტუაციების მართვის სამსახურში აცხადებენ, რომ ამ ეტაპზე დაშავებულების შესახებ ინფორმაცია არ აქვთ.
“ამ ქვეყანაში ნაცების და ოცნების მმართველობა ისტორიას უნდა ჩაბარდეს, ამასთანავე, ისინი არ უნდა გაქრნენ და საკუთარ ქმედებებზე პასუხისმგებლობა აიღონ. ყველაზე მნიშვნელოვანი, რაც ჩვენ უნდა გავაკეთოთ ამ ქვეყნისთვის არის ის, რომ ძალაუფლება ხელში ავიღოთ და ერთ ვადაში ხელიდან გავუშვათ, რადგან დავანახოთ ქართველებს, რომ ძალაუფლება მემკვიდრეობითი არ არის. არ შეიძლება ღარიბ ქვეყანაში ფულის მოპარვა, არ შეიძლება ღარიბ ქვეყანაში ამდენი ფული იყოს პოლიტიკაში, არ შეიძლება მედია სრულად იყოს დამოკიდებული ფულსა და პოლიტიკურ პარტიებზე და არ შეიძლება უსმენდე ქვეყნის 90%-ს, რომელიც ევროპას ირჩევს.”
თქვა პარტია “საქართველოსთვის” ლიდერმა გიორგი გახარიამ.
„თუ მოგვცეს სტატუსი და ვფიქრობ, სწორედ ასე გადაწყდება, ეს გადაწყვეტილება დაფუძნებული იქნება იმაზე, რაც უკეთებია ხელისუფლებას და ამის გარდა, რასაკვირველია, საზოგადოებას ეკუთვნის – არასდროს არ უნდა გამოვყოთ საზოგადოება ხელისუფლებისგან, რა პოლიტიკური გემოვნებისაც არ უნდა იყოს.
არის გარკვეული საკითხები, საგანგებო მნიშვნელობის, ეს არის სასამართლოს თემა, საარჩევნო კოდექსის თემა, ის, რაც 100-პროცენტიანად შესრულებულად გვეთვლება და გარკვეულწილად მიმდინარეობს კიდევ მუშაობა მთელ რიგ საკითხებზე. შესრულდა რეკომენდაციები – იუსტიციის უმაღლესი საბჭოც დაკომპლექტდა და ბევრი თემაა, რომელიც ვთვლით, რომ მაღალპროფესიონალურ დონეზეა შესრულებული, მაგრამ არავინ თქვას, რომ საზოგადოებას გარკვეული ავტორიტეტი ამ გადაწყვეტილების მიღებაში არ აქვს. რასაკვირველია, საზოგადოებაა მთავარი და მთავრობაც საზოგადოების ნაწილია, ჩვენ ერთნი ვართ. ამ ერთობის დარღვევაზე მიდის მუშაობა, რომ როგორმე არ მისცენ „ქართული ოცნების“ ხელისუფლების პირობებში სტატუსი, როგორმე ვითომ საზოგადოება სხვაა და ხელისუფლება სხვა. ესაა პირდაპირი მოწოდება, რომ სტატუსი არ მისცენ ქვეყანას და საზოგადოებას უთხრან, რომ მთავრობაა მიზეზი იმის, რომ სტატუსი არ გვეძლევა და საჭიროა, რომ საზოგადოებამ ხელისუფლება მოიცილოს. ეს არის დესტაბილიზაციისკენ მოწოდება, რომელიც არის მთავარი გეგმა. საერთოდ არ აინტერესებთ სტატუსი გვექნება თუ არა,“
ამის შესახებ პარლამენტის პირველმა ვიცე- სპიკერმა გია ვოლსკიმ განაცხადა.
“ჩვენ ველით, რომ არსებობს ესკალაციის შესაძლებლობა – ესკალაცია ირანის მომხრე ძალების მიერ ჩვენს წინააღმდეგ, ჩვენი პერსონალის წინააღმდეგ. ჩვენ ვიღებთ ზომებს იმისათვის, რომ ეფექტურად დავიცვათ ჩვენი ხალხი და საჭიროების შემთხვევაში გადამწყვეტად ვუპასუხოთ.[…] ჩვენ არ გვინდა მეორე ან მესამე ფრონტი. ჩვენ არ გვინდა, რომ ჩვენი ძალები ან ჩვენი მებრძოლები ცეცხლის ქვეშ მოხვდნენ. მაგრამ თუ ეს მოხდება, ჩვენ ამისთვის მზად ვართ.[…] ჩვენ ყველაფერს გავაკეთებთ, რათა დავრწმუნდეთ, რომ ჩვენი ჯარები არიან სწორ პოზიციაზე, რომ ისინი დაცულნი არიან და რომ ჩვენ გვაქვს პასუხის გაცემის უნარი,”
ამის შესახებ სახელმწიფო მდივანმა ენტონი ბლინკენმა 22 ოქტომბერს, NBC-თან ინტერვიუში განაცხადა.