Category: მსოფლიო

კორონავირუსის პანდემიის გამო აშშ დროებით შეაჩერებს ქვეყანაში ცხოვრების უფლების – ეგრეთწოდებული გრინ ქარდების გაცემას. მწვანე ბარათების გაცემა 60 დღით შეჩერდება. ვადის გასვლის შემდეგ კი შეზღუდვის გაგრძელების გადაწყვეტილებას “ადამიანთა ჯგუფი“ მიიღებს. ამის შესახებ ტრამპმა სამშაბათს პრესკონფერენციაზე განაცხადა, რომელიც კორონავირუსთან დაკავშირებულ სიტუაციას ეძღვნებოდა.

აშშ–ს პრეზიდენტი ამბობს, რომ ცხოვრების უფლების გაცემის აღდგენა ქვეყნის ეკონომიკის მდგომარეობაზე იქნება დამოკიდებული.

“ჩვენ გვინდა ჩვენი, ამერიკელი მშრომელები დავიცვათ. მომავალში ჩვენ მათ უფრო საიმედოდ დავიცავთ“– თქვა ტრამპმა და ხაზი გაუსვა, რომ შეზღუდვები ეხება მხოლოდ მიგრანტთა იმ კატეგორას, რომლებსაც აშშ–ში მუდმივი ცხოვრება უნდათ. დროებითი სამუშაოსთვის ჩასულებს ის არ შეეხება.

ტრამპმა პირობა დადო, რომ შესაბამის ბრძანებას ოთხშაბათს მოაწერს ხელს.

დროებისი სამუშაო მიგრანტები აშშ–ში ჩასულთა ყველაზე მრავალრიცხოვანი კატეგორიაა.

მას შემდეგ, რაც დანიამ ერთი თვის წინ შემოღებული კარანტინი ნაწილობრივ გააუქმა, ქვეყანაში პირველად გაიხსნა საპარიკმახეროები. თუმცა იქ მოხვედრა არც ისე ადვილია, რადგან თმის შეჭრის მსურველი ძალიან ბევრია.

“ნამდვილი სიგიჟეა. უახლოესი ორი კვირის მანძილზე ყველა წუთი დარეზერვებული გვაქვს“ – ეუბნება ბიბისის კოპენჰაგენის ცენტრში მდებარე საპარიკმახეროს მფლობელი, ფილ ოლანდერი.

ის ყვება, რომ მას შემდეგ, რაც პარასკევს ხელისუფლებამ კარანტინის შემსუბუქების შესახებ გამოაცხადა, მისი ჩაწერის ონლაინ სისტემამ დატვირთვას ვერ გაუძლო კლიენტების დიდი რაოდენობის გამო.

კოპენჰაგენის კიდევ ერთი საპარიკმახეროს მფლობელი ამბობს, რომ ყველა თანამშრომლის განრიგი სრულად არის გაწერილი უახლოესი სამი კვირის განმავლობაში და მათ ზეგანაკვეთური მუშაობა მოუწევთ, რომ ყველას მოემსახურონ, ვინც შეკვეთა მოასწრო.

ხელისუფლებამ მუშაობის უფლება მისცა ასევე ტატუ სალონებს, ოპტიკის მაღაზიებს, სტომატოლოგიურ კლინიკებს. მალე განახლდება მანქანის მართვის კურსებიც. თუმცა ყველა ამ კომპანიას ახალი, უფრო მკაცრი სანიტარული ნორმების დაცვა მოუწევს.

მაგალითად, საპარიკმახერომ ყოველი კლიენტის მომსახურების შემდეგ სრულფასოვანი დალაგების პროცედურა უნდა ჩაატაროს, დეზინფექცია გაუკეთოს ყველა სავარძელს, ინსტრუმენტებს, კარის სახელურებს, სალარო აპარატს და ბარათის წამკითხველ ტერმინალს.

ახალ პირობებში საპარიკმახეროების დიზაინიც კი  შეიცვალა. ყველგან, სადაც შესაძლებელი იყო გააფართოვეს მოსაცდელი ადგილები, მოაშორეს პრიალა ჟურნალები, რომლებსაც ტრადიციულად მომლოდინე კლიენტები ფურცლავდნენ ხოლმე.

საპარიკმახეროების უმრავლესობა გახსნისთვის კარგად მოემზადა. ბევრი სტილისტი კლიენტებს ნიღბით ემსახურება. ერთი თვის მანძილზე შემოსავლების გარეშე დარჩენილი საპარიკმახეროები შეზღუდვების და რეგულაციების მიუხედავად ძალიან გახარებულები არიან, რომ მუშაობის უფლება მიეცათ. თუმცა, როგორც ამბობენ ჯერჯერობით ხანდაზმულები მათთან არ დადიან და ძირითადად ახალგაზრდებს ემსახურებიან.

დანიამ ევროპაში ერთ–ერთმა პირველმა შემოიღო კარანტინი და მისი მოხსნაც ერთ–ერთმა პირველმა დაიწყო . გასულ კვირას იქ მუშაობა განაახლეს საბავშვო ბაღებმა და დაწყებითმა სკოლებმა.

თუმცა, ბევრი შეზღუდვა 10 მაისამდე ძალაში რჩება. საზღვრებიც ჯერჯერობით ჩაკეტილია. კვლავ იკრძალება ერთად 10 ადამიანზე მეტის თავშეყრა.

კარანტინის პერიოდში ევროპელებს ბევრ ჩვევაზე მოუწიათ უარის თქმა.თუმცა როგორც ირკვევა ერთ–ერთი მთავარი პრობლემა მათთვის სწორედ საპარიკმახეროების დახურვა იყო. როიტერს საბერძნეთში ჩატარებული სოციოლოგიური კვლევა მოყავს, რომლის მონაწილეთა მესამედმა განაცხადა, რომ კარანტინის გაუქმების შემდეგ მათთვის ყველაზე ღირშესანიშნავი მოვლენა თმის შეჭრა იქნება.

ბერძნებმა ჯერ არ იციან, როდის მიეცემათ ეს უფლება. შვედებს კი უკვე ერთ კვირაში შეეძლებათ თმის შეჭრა.

როიტერის ინფორმაციით ამის შემდეგ სალონები გაიხსნება გერმანიაში, ავსტრიაში და პორტუგალიაში.

დანიაში, რომლის მოსახლეობა 5.8 მილიონია კორონავირუსით დაინფიცირებულთა და გარდაცვლილთა შედარებით დაბალი მაჩვენებელია. აქ დაინფიცირებულთა რაოდენობა 7 695–ს აღწევს, გარდაცვლილია 370 ადამიანი. ამ ხნის მანძილზე დანიაში 100 543 ადამიანი გაიტესტა.

დაახლოებით 2,500 ადამიანი შეიკრიბა ვაშინგტონის შტატში ახალი აკრძალვის გასაპროტესტებლად. შტატის გუბერნატორმა ჯეი ინსლიმ სახლში დარჩენის ბრძანება გამოსცა და 50-ზე მეტი ადამიანის შეკრება აკრძალა.

საპროტესტო აქციაზე ბევრს არ ეკეთა სახის დამცავი ნიღაბი, რომლის ტარებაც ახლა ამერიკაშიც მკაცრდაა რეკომენდებული.

“ბიზნესების დახურვა და მოგებულების და წაგებულების იმით განსაზღვრა, თუ ვისი ბიზნესია აუცილებელი და ვისი არა, არის ფედერალური კონსტიტუციის დარღვევა”, ამბობს ტაილერ მაილერი, 39 წლის ინჟინერი და აქციის ორგანიზატორი.

საპროტესტო აქცია ჩატარდა დენვერშიც. იქ ხალხმა მანქანებით ჩახერგა გზა და კოროლადოს შტატის თავიდან ამუშავება და ბიზნესების გახსნა მოითხოვა. საპროტესტო აქციის მონაწილეებს იქ წინ სამედიცინო მუშაკები გადაუდგნენ.

ექსპერტების თქმით, სახლში დარჩენის ბრძანება უმნიშვნელოვანესია კორონავირუსთან საბრძოლველად. ვირუსის გამო დახურული ბიზნესებისა და შეჩერებული წარმოების გამო, ამერიკაში უკვე 22 მილიონი ადამიანი დარჩა უმუშევრად. საპროტესტო აქციები ეკონომიკის ამუშავების მოთხოვნით უკვე ჩატარდა, ტეხასის, ვისკონსინის, მინესოტას, მიჩიგანისა და ვირჯინიის შტატებში.

წყარო: ამერიკის ხმა

კორონავირუსით ინფიცირებულთა რიცხვი მთელ მსოფლიოში 2.5 მილიონს უახლოვდება. ყველაზე მეტი დაავადებული 787 ათასი ადამიანი აშშ–შია, გარდაცვლილების რიცხვით კი ევროპაში იტალია ლიდერობს. აქ Covid19–ით 24 ათასზე მეტი ადამიანი გარდაიცვალა.

დაინფიცირებულთა ჯამური რიცხვი 181 ათასია, თუმცა ამჟამინდელი პაციენტების რაოდენობა 108 000–ს შეადგენს. ქვეყანაში გამოჯანმთელებულთა რაოდენობა იზრდება და ამ დროისთვის 48 800 ადამიანია.

ბოლო ორი კვირაა ახალ დაინფიცირებულთა და დღეღამის განმავლობაში გარდაცვლილთა მაჩვენებელი სტაბილურად იკლებს.

ორშაბათს კი იტალიის ხელისუფლებამ განაცხადა რომ ქვეყანაში პირველად შემცირდა  დადასტურებული პაციენტების რიცხვი – ანუ ქვეყანაში 20 პაციენტით ნაკლები იყო, ვიდრე ერთი დღით ადრე. ჩინოვნიკები ამას ქვეყნისთვის კარგ ნიშანს უწოდებენ.

კორონავირუსმ შესაძლოა დაანგრიოს სომხეთის იმედები და ოცნებები, რაც ქვეყანას ბოლო დროს გაუჩნდა. ევრონიუსი ამბობს, რომ 2018 წელს ხელისუფლების შეცვლის შემდეგ ქვეყანა არნახულ აღმავლობას განიცდიდა და  ეკონომიკური ზრდის ტემპებით ის “ნავთობით მდიდარ აზერბაიჯანს და დასავლეთის მიერ მხარდაჭერილ საქართველოსაც უსწრებდა“.

გასულ წელს მსოფლიო ბანკის მონაცემებით ბიზნეს აქტივობის ზრდამ 7.6% შეადგინა. სიღარიბის მაჩვენებელი რეკორდულად დაბალ ნიშნულამდე ჩამოვიდა. გაჩნდა ათეულობით ათასი ახალი სამუშაო ადგილი, დაიწყო ფართომაშტაბიანი ინფრასტრუქტურული პროექტები. სამშობლოში დაბრუნება დაიწყეს დიასპორის წარმომადგენლებმა.

თუმცა კორონავირუსის პანდემიამ ქვეყანას მძიმე დარტყმა მიაყენა.

“ძალიან შთაგონებული ვიყავი 2018 წლის რევოლუციით, როცა ნიკოლ პაშინიანი პრემიერ მინისტრი გახდა. სწრაფად მივიღეთ გადაწყვეტილება, ჩავალაგეთ ბარგი და სომხეთში დავბრუნდით. რამდენიმე ხნის შემდეგ საკუთარი კომპანია გავხსენით, წარმოება დავიწყეთ. ყველაფერი შესანიშავად იყო იმ მომენტამდე, სანამ ორი თვის წინ პანდემია არ დაიწყო“– ამბობს შოკოლადის ფაბრიკის თანამფლობელი აიკ არუთუნიანი.

კარანტინის პირობებში ეკონომიკამ მძიმე დარტყმა მიიღო. წარმოება ზოგ სფეროში 90%–ით შემცირდა. ხელისუფლება წელს მინიმუმ 4.5%–იან ზრდას პროგნოზირებდა, თუმცა პროგნოზს გადახედა და 0.7%–მდე შეამცირა.

სომეხი ეკონომისტი, ტატულ მანასერიანი ამბობს, რომ სომხეთის ეკონომიკა პირველ მკაცრ გამოცდას გადის:

“შიდა სირთულეებს კორონავირუსით გამოწვეული პრობლემები დაემატა. ყველაზე მეტად მშენებლობა და ტურიზმი დაზარალდა, რადგან ისინი მჭიდროდ არიან დაკავშირებული ეკონომიკის სხვა სექტორებთან.“

ერევანმა მხარდაჭერის რამდენიმე პაკეტი მიიღო, მათ შორის საგადასახადო არდადეგები და პირდაპირ  დახმარება საწარმოებისთვის. მაგრამ მიუხედავად წარმატებებისა, მისი ეკონომიკა ჯერ არ იყო იმდენად ძლიერი, რომ ევროპული ქვეყნების მსგავსად მაშტაბური პროგრამებისთვის გაეძლო.

“მდგომარეობა სულ უფრო უარესდება. ჩვენი მაღაზია ისევ დახურულია. არ ვიცით როგორ გადავიხადოთ ვალები. იმედი მაქვს მალე მოგვცემენ მუშაობის უფლებას, რომ როგორღაც ამ სიტუაციიდან გამოსვლა შევძლოთ“– ამბობს ნაირა ხანოიანი, სათამაშოების მაღაზიის მფლობელი.

ბოლო მონაცემებით სომხეთში კორონავირუსის 1300–ზე მეტი შემთხვევაა დაფიქსირებული. გარდაიცვალა 20 ადამიანი. რესპუბლიკაში კარანტინი 16 მარტს შემოიღეს და ის მინიმუმ 14 მაისამდე გაგრძელდება. ერევანი პირობას დებს, რომ შემზღუდავ ზომებს თანდათანობით შეამცირებს, პირველ რიგში ეკონომიკის ინტერესებიდან გამომდინარე.

ასობით ადამიანი შეიკრიბა ვლადიკავკაზის ცენტრში ჩრდილოეთ ოსეთის ადმინისტრაციის შენობასთან ხელისუფლების მიერ შემოღებული კარანტინის წინააღმდეგ. საპროტესტო აქციის მონაწილეები საშინაო იზოლაციის რეჟიმის გაუქმებას და მოქალაქეებისთვის პანდემიასთან დაკავშირებული სიტუაციის განმარტებას მოითხოვდნენ.

ისინი აცხადებდნენ, რომ კორონავირუსის შესახებ ოფიციალურ ინფორმაციას არ ენდობიან.

“როშალი გამოვიდა, ლუკაშენკო გამოვიდა, მალიშევა გამოდის, რომ ეს ვირუსი არ არის და რომ ამით არ კვდეიან. ჩვენ კიდევ ჩაგვკეტეს! რა ვირუსი?“– ამბობს აქციის მონაწილე ქალი.

აქციის მონაწილეებთან რეგიონალური მთავრობის წარმომადგენლები და რესპუბლიკის მეთაური, ვიაჩესლავ ბიტაროვი გამოვიდნენ. მათ ხალხს დაშლისკენ მოუწოდეს, სახლებში წასვლა ურჩიეს და იზოლაციის საერთაშორისო პრაქტიკა შეახსენეს. საბოლოოდ ჩრდილოეთ ოსეთის ადმინისტრაციის მეთაური უმუშევრად დარჩენილებს სოციალურ დახმარებას დაპირდა.

აქციის დასაწყისიდანვე ვლადიკავკაზის ცენტრში პოლიციის და როსგვარდიის გაძლიერებული მობილიზაცია იყო. მათ საღამოს დემონსტრანტები დაარბიეს. რამდენიმე ათეული ადამიანი კი დააპატიმრეს.