Category: კავკასია

ამერიკელი დიპლომატი, ყოფილი ელჩი საქართველოში კენეტ იალოვიცი ამბობს, რომ იმედგაცრუებულია საქართველოს მთავრობის პოზიციით, რადგან თვლის, რომ ქვეყანა უკრაინას სათანადო მხარდაჭერას არ უცხადებს. დიპლომატი საქართველოს უფრო მკაფიო პოზიციის დაკავებისკენ მოუწოდებს.

„ახლა არის მომენტი, როცა უკრაინა იბრძვის გადარჩენისთვის. საქართველოც იბრძოდა გადარჩენისთვის… საქართველო აუცილებლად უნდა უჭერდეს მხარს უკრაინას, უფრო პირდაპირ, უფრო მკაფიოდ, სანქციებით და ყველა გზით,“– ამბობს იალოვიცი.

დიპლომატი „ამერიკის ხმის“ სომხურ რედაქციასთან საუბრის დროს განმარტავს, რომ მიუხედავად იმისა, რომ საქართველოს რუსეთთან სავაჭრო ურთიერთობები აქვს, შესაძლოა გადაიდგას მკაფიო ნაბიჯები უკრაინის მხარდასაჭერად, რადგან ეს ძალიან მნიშვნელოვანია თავად საქართველოსთვის და მისი მომავლისთვის.

„მე მახსოვს, რომ პრეზიდენტმა შევარდნაძემ, როდესაც ელჩი ვიყავი, მითხრა რომ თუ უკრაინა არასწორი გზით წავიდოდა, საქართველო ვერ გადარჩებოდა და ახლა სწორედ საქართველომ უნდა შეხედოს ამ მომენტს სწორად, რადგან თუ რუსეთი უკრაინაში დიდწილად გაიმარჯვებს, ეს ძალიან საშიში იქნება საქართველოსთვის. მათ ასე უნდა შეხედონ ამ საკითხს, იმიტომ რომ თქვენ იცით, რომ თუ რუსეთი იმპერიის ნაწილს დაიბრუნებს, რისი მცდელობაც აქვს, ეს არ იქნება კარგი საქართველოსთვის“- ამბობს გამოცდილი ამერიკელი დიპლომატი.

კენეტ იალოვიცი, რომელიც საქართველოში ამერიკის ელჩად 1998-2001 წლებში მუშაობდა, დღეს ამბობს, რომ საქართველოს მთავრობა საფრთხეებს ვერ აცნობიერებს.

„დარწმუნებული არ ვარ, რომ ამაზე ფიქრობენ. მათ აქვთ არგუმენტები, მაგრამ ვფიქრობ რომ ეს არასწორია და იმედგაცრუებული ვარ მათი [საქართველოს მთავრობის] პოზიციით,“- ამბობს იალოვიცი.

საქართველოს მთავრობაში აცხადებენ, რომ ქვეყანა შეუერთდა ყველა საერთაშორისო რეზოლუციას და უკრაინას მიაწოდა ჰუმანიტარული დახმარება. რაც შეეხება სანქციებს, „ქართული ოცნება“ განმარტავს, რომ რუსეთს პირდაპირ სანქციებს არ დაუწესებს.

წყარო: ამერიკის ხმა

თუ მაქვს რაიმე დანაშაული, მზად ვარ კანონის წინაშე პასუხი ვაგო, – ამის შესახებ თბილისის მერმა კახა კალაძე, ჟურნალისტებს „ნიუ ჰოსპიტალსში“ განუცხადა, სადაც ვაკის პარკში მომხდარი ტრაგედიისას დაზარალებული მოზარდის სანახავად მივიდა.

თბილისის მერი ამბობს, გამოძიება ყველაფერს დაადგენს და ვისაც დანაშაული მიუძღვის, ყველა კანონის წინაშე აგებს პასუხს.

„მინდა მივუსამძიმრო ოჯახს, ახლობლებს, ნათესავებს. კარგად წარმომიდგენია, თუ რამდენად მძიმე ვითარებაა. მეც გაუბედურებული ვარ. შემზარავი ფაქტი მოხდა და უმძიმესია ეს ყველასთვის. გამოძიება, რა თქმა უნდა, ყველაფერს დაადგენს. ვისაც დანაშაული მიუძღვის, ყველა კანონის წინაშე აგებს პასუხს, მათ შორის მეც, თუ მაქვს რაიმე დანაშაული, მზად ვარ კანონის წინაშე ვაგო პასუხი“, – განაცხადა კალაძემ.

ტრაგედია დღეს ვაკის პარკში მოხდა, სადაც  შადრევანში სამი ბავშვი ბურთის ამოსატანად ჩავიდა, რა დროსაც მათ დენმა დაარტყა. ბავშვები კლინიკაში სასწრაფო დახმარების ბრიგადამ გადაიყვანა. ერთ-ერთი ბავშვის, 13 წლის მარიტა მეარიშვილის  მდგომარეობა თავიდანვე მძიმე იყო და ის ხეჩინაშვილის კლინიკაში გარდაიცვალა.

შინაგან საქმეთა სამინისტრომ გამოძიება სისხლის სამართლის კოდექსის 240-ე პრიმა მუხლით დაიწყო, რაც უსაფრთხოების წესების დარღვევას გულისხმობს, რასაც მოჰყვა ჯანმრთელობის ნაკლებად მძიმე ან მძიმე დაზიანება. გამოძიების მსვლელობისას დაზუსტდა კვალიფიკაცია და გამოძიება გრძელდება სისხლის სამართლის კოდექსის 240-ე პრიმა მუხლის პირველი და მეორე ნაწილით, რაც გულისხმობს ელექტრო ობიექტზე უსაფრთხოების წესების დარღვევას, რასაც მოჰყვა ადამიანის სიცოცხლის მოსპობა. დანაშაული 4-დან 7 წლამდე ვადით თავისუფლების აღკვეთას ითვალისწინებს.

ბრიტანეთის თავდაცვის სამინისტროს დაზვერვამ დღევანდელი ანგარიში ხერსონის ოლქში მიმდინარე მოვლენებს მიუძღვნა, სადაც საოკუპაციო ხელისუფლება, როგორც ჩანს უკრაინული არმიის ქალაქ ხერსონში შესვლისთვის ემზადება:

• რუსეთის არმია, რომელმაც ოქტომბრის დასაწყისში ხერსონის მიმართულებაზე 20 კილომეტრით უკან დაიხია ჩრდილოეთისკენ, ცდილობს ფრონტის ახალი ხაზი გაამაგროს სოფელ მილოვოს დასავლეთით.
• ამ რაიონებში სასტიკი ბრძოლები გრძელდება, განსაკუთრებით ფრონტის ხაზის დასავლეთით, სადაც რუსული ფლანგი უკრაინული არმიის წარმატებული შეტევის შედეგად  უკვე აღარ არის დაცული მდინარე ინგულეცით. რუსი სამხედროების დიდი ნაწილი ამ მონაკვეთში ეს არის საჰაერო–სადესანტო ძალების დაუკომპლექტებელი ფორმირებები.
• ბოლო დღეებში რუსეთის საოკუპაციო ხელისუფლებამ, როგორც ჩანს გასცა ბრძანება ხერსონიდან მშვიდობიანი მოსახლეობის ნაწილის ევაკუაციის მომზადების შესახებ. დიდი ალბათობით ისინი ელიან, რომ სამხედრო მოქმედებები მალე თავად ქალაქ ხერსონს მოედება.– წერს ბრიტანული სამხედრო დაზვერვა.

ბავშვები, რომელთაც ვაკის პარკში დენმა დაარტყა, ხეჩინაშვილის კლინიკაში, შოკის მდგომარეობაში იმყოფებიან. კლინიკაში ამბობენ, რომ ორივე ბავშვის მდგომარეობა მძიმეა.მესამე არასრულწლოვანი კი იაშვილის კლინიკაშია გადაყვანილი.

ვაკის პარკში თამაშისას ბავშვებს ბურთი შადრევანში ჩაუვარდათ, მის ამოსაღებად შადრევანში ჩასულ ბავშვს კი დენმა დაარტყა. დაშავდა მის დასახმარებლად ჩასული ორი მეგობარიც.

შინაგან საქმეთა სამინისტრომ ვაკის პარკში მომხდარ შემთხვევაზე გამოძიება დაიწყო. მომხდარზე სსკ-ის 240-ე პრიმა მუხლის 1-ლი ნაწილით მიმდინარეობს, რაც ობიექტზე უსაფრთხოების წესების დარღვევას გულისხმობს, რამაც ჯანმრთელობის ნაკლებად მძიმე ან მძიმე დაზიანება გამოიწვია.

12 ოქტომბერს მერიამ გაავრცელა ინფორმაცია, რომ თბილისის მერიის გარემოს დაცვის საქალაქო სამსახურმა ვაკის პარკში არსებული მცირე კასკადისა და მრგვალი შადრევნის რეაბილიტაცია დაასრულა.  მერიის ინფორმაციით, რეაბილიტაციის ფარგლებში, მთლიანად შეიცვალა წყალმომარაგების სისტემა –  დამონტაჟდა თანამედროვე ტექნოლოგია, რომელიც ავტომატიზებულია. ასევე, მოეწყო განათების სისტემა.

დასრულებულ სამუშაოებს დედაქალაქის მერი კახა კალაძე საკრებულოს თავმჯდომარესთან, ვაკის რაიონის მაჟორიტარ დეპუტატ გიორგი ტყემალაძესთან ერთად გაეცნო.

„ვაკის პარკის აღდგენის პროექტი გასულ წელს დავიწყეთ. გვინდა, რომ ეს რეკრეაციული სივრცე, რომელიც ერთ-ერთი უმნიშვნელოვანესია ჩვენი ქალაქისთვის, მთლიანად მოწესრიგდეს. სამუშაოების პირველ ეტაპზე, გამწვანების სამუშაოები ჩატარდა, მოეწყო დასასვენებელი სივრცეები და საბავშვო ატრაქციონები. პარკს დაემატა ახალი ზონები, რომლებიც ასევე მოწესრიგდა. სამუშაოების მეორე ეტაპი იყო მცირე კასკადისა და მრგვალი შადრევნის რეაბილიტაცია, რომელიც დასრულდა და ულამაზესი გამოვიდა. ძალიან მიხარია, როგორც დედაქალაქის მერს და ამ ქალაქში მცხოვრებს, რომ ვაკის პარკი იბრუნებს თავის სილამაზეს და ცოცხლდება. დარწმუნებული ვარ, როდესაც სამუშაოები მთლიანად დასრულდება და ძირითადი კასკადის რეაბილატიაც მოხდება, ეს იქნება ერთ-ერთი საუკეთესო ადგილი თავშეყრის, დასვენებისა და განტვირთვისთვის. გარდა ამისა, რადგან ამ სივრცით ძალიან ბევრი ადამიანი სარგებლობს, მივიღეთ გადაწყვეტილება, რომ ბავშვებისთვის სპეციალური ზონა დავამატოთ, სადაც დამატებით ახალი ატრაქციონები მოეწყობა“, – განაცხადა კახა კალაძემ.

მცირე კასკადისა და მრგვალი შადრევნის სარეაბილიტაციო სამუშაოების ღირებულება 6 500 000 ლარია. ჯამში, ვაკის პარკის განახლების პროექტი, გამწვანებისა და ინფრასტრუქტურული სამუშაობის ჩათვლით, 33 000 000 ლარს შეადგენს.

გაეროს გენერალურმა ასამბლეამ ხმათა დიდი უმრავლესობით მიიღო რეზოლუცია, რომლითაც რუსეთის მიერ უკრაინის ოკუპირებული ტერიტორიების ანექსია დაგმო. რეზოლუციას მხარი დაუჭირა 143–მა ქვეყანამ, 35–მა თავი შეიკავა.

რეზულიციის წინააღმდეგ ხმა მისცეს: რუსეთმა, სირიამ, ნიარაგუამ, ბელორუსმა, ჩრდილოეთ კორეამ.

გაერო აცხადებს, რომ ე.წ. რეფერენდუმები უკრაინის დაპყრობილ ტერიტორიებზე უკანონო იყო და მოითხოვს, რუსეთმა ანექსიის გადაწყვეტილება გააუქმოს.

გაეროს რეზოლუციას გამოეხმაურა უკრაინის პრეზიდენტი და მადლობა გადაუხადა იმ სახელმწიფოებს, რომლებმაც ურაინის ტერიტორიული მთლიანობის შესახებ რეზოლუციას მხარი დაუჭირეს. მან რეზოლუციას ისტორიული უწოდა და ტვიტერზე დაწერა, რომ მსოფლიომ თავისი სიტყვა თქვა:

“რუსეთის ანექსიის მცდელობა უბადრუკია და მას არასოდეს აღიარებენ თავისუფალი ერები. უკრაინა საკუთარ მიწებს დაიბრუნებს“– წერს ზელენსკი.

რუსეთის გამოძიების ფედერალური სამსახური აცხადებს, რომ ყირიმის ხიდის აფეთქებაში მონაწილე რვა პირი დააკავა, ექედან 5 რუსეთის მოქალაქეა, სამი კი უკრაინის და სომხეთის. “ეფესბე“ ამტკიცებს, რომ  ხიდის აფეთქებაში უკრაინის თავდაცვის სამინისტროს დაზვერვის სპეციალური სამმართველო და მისი უფროსი კირილ ბუდანოვი მონაწილეობდნენ. გავრცელებულ განცხადებაში ნათქვამია, რომ  აგენტებმა ასაფეთქებელი ნივთიერება შენიღბეს და სამშენებლო პოლიეთილენის ფირის ხვეულებში დამალეს, 22 პალეტში, რომელთა საერთო წონა   22 770 კილოგრამი იყო.   აგვისტოს დასაწყისში, ტვირთი ოდესის პორტიდან   ბულგარეთის ქალაქ რუსეში გაგზავნეს კონტრაქტით  № 02/08/2022, უკრაინული კომპანია ტრანსლოჯისტიკსა და ბულგარულ კომპანია Baltex Capital S.A.–ს შორის. ბულგარეთიდან ტვირთი საქართველოში, ფოთის პორტში გადაიტანეს, შემდეგ კი სომხეთში.

რუსული მედიის ინფორმაციით ტვირთის გადაზიდვაში მონაწილეობდნენ უკრაინის მოქალაქეები, მიხაილ ციურკალო, დენის კოვაჩი, სოლომკო რომანი, საქართველოს მოქალაქეები: სანდრო ინასარიძე, ბროკერი სახელად ლევანი და სომხეთის მოქალაქე არტურ ტერჩანიანი.

29 სექტემბრიდან 3 ოქტომბრის ჩათვლით, ერევანში, ტრანსალიანსის ტერმინალში, ტვირთის განბაჟება EAEU-ს (ევრაზიის ეკონომიკური კავშირი) წესებით განხორციელდა და საბუთები შეიცვალა. ახლა გამგზავნი არის შპს „GU AR GROUP“ (სომხეთი, ალავერდი), მიმღები კი შპს „ლიდერი“ (მოსკოვი).

საქართველოში რეგისტრირებული DAF-ის სატვირთო მანქანაზე ტვირთმა რუსეთ-საქართველოს საზღვარი 4 ოქტომბერს ზემო ლარსის საგუშაგოზე გადაკვეთა, ორი დღის შემდეგ კი არმავირის საბითუმო ბაზაზე მიიტანეს და გადატვირთეს.

7 ოქტომბერს უკრაინის მოქალაქის რ.სოლომკოს, ვლადიმერ ვასილიევიჩ ზლობისა და რუსეთის კიდევ ხუთი მოქალაქის დახმარებით, ტვირთის საბუთები კვლავ შეიცვალა. გამგზავნად მითითებული იყო შპს TEK-34 ულიანოვსკიდან, ხოლო ყირიმში არარსებული კომპანია მითითებული იყო მიმღებად.

ტვირთის მოძრაობას მთელ მარშრუტზე უკრაინის თავდაცვის სამინისტროს მთავარი სადაზვერვო სამმართველოს თანამშრომელი აკონტროლებდა, რომელიც სქემის მონაწილეებს „ივან ივანოვიჩის“ სახელით გააცნო. ქმედებების კოორდინაციისთვის მან გამოიყენა ვირტუალური ანონიმური ნომერი, ასევე ტელეფონი, რომელიც რეგისტრირებულია კრემენჩუგის მკვიდრ სერგეი ანდრეიჩენკოსთან.”- წერს რუსული მედია “ეფესბეზე“ დაყრდნობით.

“ეფესბეს“ ბრალდებას უპასუხა უკრაინის თავდაცვის სამინისტროს დაზვერვის სამსახურმა.

“ეფესბეს და მთელი მათი საგამოძიებო კომიტეტის საქმიანობა სისულელეა. ისინი პუტინის რეჟიმს ემსახურებიან, ამიტომაც მათ მორიგ განცხადებაზე კომენტარს ჩვენ არ გავაკეთებთ. გასაოცარია, რომ ყირიმის ხიდის რაიონში ჯერ არ უპოვნიათ რამე “სავიზიტო ბარათი“– განაცხადა უკრაინის სამხედრო დაზვერვის პრესსამსახურის უფროსმა ანდრეი იუსოვმა.

გერმანული გამოცემა Spiegel ანონიმურ წყაროებზე დაყრდნობით წერს, რომ უკრაინამ გერმანიისგან უკვე მიიღო პირველი საზენიტო–სარაკეტო დანადგარი IRIS-T SLM

გამოცემის ინფორმაციით გადაცემა სამშაბათს, პოლონეთ–უკრაინის საზღვარზე მოხდა.

ორშაბათს გერმანიის თავდაცვის სამინისტორომ განაცხადა, რომ უკრაინას ამ დანადგარს გადასცემს. სამშაბათს კი სოციალურ ქსელებში გავრცელდა ფოტოები, რომლებზეც ჩანდა IRIS-T SLM  კომენტარებით, რომ ის გერმანიის გზებზე აღმოსავლეთით, პოლონეთისკენ მიემართებოდა.

გერმანიის  კანცლერი, ოლაფ შოლცი ურაინას ამ საზენიტო დანადგარებს ჯერ კიდევ ზაფხულში დაპირდა, მაგრამ მიწოდება მხოლოდ წლის ბოლოსთვის იგეგმებოდა. თუმცა, მას შემდეგ, რაც ორშაბათს რუსეთმა ერთდროულად ათეულობით რაკეტით მიიტანა შეტევა უკრაინის ენერგეტიკულ ინფრასტრუქტურაზე, გერმანიის თავდაცვის მინისტრმა, კრისტინნ ლამბრეხტმა თქვა, რომ დაპირებული ოთხი საზენიტო დანადგარის მიწოდება დაჩქარდებოდა.

IRIS-T SLM – ეს არის ჰაერსაწინააღმდეგო თავდაცვის სისტემა მოქმედების საშუალო რადიუსით: მის რაკეტებს სამიზნის დაზიანება 40 კილომეტრამდე მანძილზე,  20 კილომეტრამდე სიმაღლეზე შეუძლიათ.

ბრიტანული სპეცსამსახურების აზრით, რუსეთის მეთაურობას ესმის, რა სავალალო მდგომარეობაშია მისი სამხედრო მანქანა, რუსები კი იწყებენ იმის გაცნობიერებას, რომ ვლადიმერ პუტინის გადაწყვეტილება უკრაინაში შეჭრის შესახებ შეცდომა იყო. ამის შესახებ ბიბისი–სთან ინტერვიუში დიდი ბრიტანეთის სამთავრობო კავშირის ცენტრის  (GCHQ) ხელმძღვანელმა, ჯერემი ფლემინგმა განაცხადა. ცენტრი ქვეყნის ერთ–ერთი სპეცსამსახურია და რადიოელექტრონულ დაზვერვაზე, ასევე ბრიტანეთის არმიის და სამთავრობო ორგანოების ინფორმაციის დაცვაზე მუშაობს.

ფლემინგი ლონდონის თავდაცვითი კვლევების გაერთიანებულ სამეფო ინსტიტუტშიც გამოვიდა ანგარიშით, რომელიც უსაფრთხოების საკითხებს ეხებოდა. ანგარიშის მთავარი თემა ბრიტანეთის და მთლიანობაში, დასავლეთის კიბერუსაფრთხოება იყო, ასევე რუსეთისგან და ჩინეთისგან მომავალი საფრთხეები ამ თვალსაზრისით.

ანგარიშის გამოქვეყნებამდე კი ფლემინგმა უკრაინასთან დაკავშირებით მისი დეპარტამენტის მუშაობის ზოგიერთი შედეგი ბიბისი–ს გაუზიარა.

“ჩვენ ვთვლით, რომ რუსეთს საბრძოლო მასალები უთავდება. მას თითქმის აღარ დარჩა მეგობრები, და როგორც ვხედავთ, მობილიზაციის გამოცხადება ნიშნავს, რომ მას ჯარისკაცებიც უთავდება. რუსეთი და რუსული მეთაურობა შეწუხებულია სამხედრო მანქანის მდგომარეობით. ისინი სასოწარკვეთილებაში არიან, და ეს სასოწარკვეთა რუსული საზოგადოების ბევრ დონეზე ჩანს.“– თქვა ფლემინგმა.

მისი აზრით, არმიაში სასოწარკვეთილ მდგომარეობაზე მეტყველებს მობილიზაციის გამოცხადება სრულიად გამოუცდელი მამაკაცებისთვის და გადაწყვეტილება, არმიის რიგები პატიმრებით შეავსონ.

რაც შეეხება ორშაბათს უკრაინული ქალაქების მასობრივ დაბომბვას, მისი აზრით, ეს მეტყველებს, რომ რუსეთს ჯერ კიდევ დარჩა გარკვეული არსენალი, თუმცა მთლიანობაში ამ ომმა რუსული არმია გამოფიტა და მისი შესაძლებლობები ზღვარზეა.

რაც შეეხება რუსეთის მიერ ბირთვული იარაღის გამოყენებას, GCHQ–ს ხელმძღვანელს იმედი აქვს, რომ ბრიტანული სპეცსამსახურები დროულად გამოიცნობენ ასეთი ქმედებების ნიშნებს.

ამასთან, ფლემინგის აზრით ბრიტანეთის ნაციონალური ინტერესებისთვის რუსული საფთრთხე სერიოზულია, თუმცა ის ამჟამინდელი და მყისიერია, უფრო სერიოზული პრობლემა კი გრძელვადიან პერსპექტივაში ჩინეთია.

ბრიტანეთს აშფოთებს ტექნოლოგიების განვითარების ტემპები, რომელთა საშუალებითაც ჩინეთის ხელისუფლება განსხვავებულ აზრს ახშობს, უთვალთვალებს საკუთარ მოქალაქეებს , ასევე აქტიურად აწარმოებს სამრეწველო შპიონაჟს. ფლემინგის თქმით, საფრთხეს ასევე წარმოადგენს ჩინეთის მზარდი უნარი, შეუტიოს თანამგზავრულ სისტემებს და აკონტროლოს ციფრული ვალუტების ბაზარი.

ფლემინგის განცხადებით, შეიძლება დადგეს დღე, როცა  ტექნოლოგიური მიღწევები დაეხმარება პეკინს გვერდი აუაროს დასავლეთის მიერ გამოყენებულ დაშიფვრის ყველა სახეს, რაც სამთავრობო და სხვა ობიექტების დაცვისთვის გამოიყენება.

ჯერჯერობით დასავლეთი ახერხებს ჩინეთზე სამხედრო და ტექნოლოგიური უპირატესობის შენარჩუნებას, თუმცა მომავალში ეს გარანტირებული არ არის – თქვა ფლემინგმა.

უკრაინულმა ფორბსმა დათვალა, რომ 10 ოქტომბერს, ერთი დღეში რუსეთმა უკრაინის ტერიტორიაზე 400-700 მილიონი დოლარის რაკეტები გაუშვა.

10 ოქტომბრის 17:00 საათის მონაცემებით უკრაინის მიმართულებით გაუშვეს  84 ფრთოსანი რაკეტა და 24 უპილოტო საფრენი აპარატი. მათი საერთო ღირებულება ფორბსის გათვლებით 400-700 მილიონი დოლარია.

უკრაინელმა სამხედროებმა რაკეტების ნახევარზე მეტი – 43 რაკეტა და 13 უპილოტო საფრენი აპარატი ჩამოაგდეს. დაბომბვების შედეგად თავდაპირველი ინფორმაციით დაიღუპა 11 და დაიჭრა 87 ადამიანი.

ფორბსი გაშვებული რაკეტების შეფასებას ფართო დიაპაზონში აკეთებს, რადგან ჯერჯერობით უცნობია, რომელი ტიპის რაკეტა რა რაოდენობით გაუშვეს. ვრცელდებოდა ინფორმაცია, რომ რუსებმა შემდეგი რაკეტები გამოიყენეს:

Х-101, Х-555, «კალიბრი», «ისკანდერი», С-300, «ტორნადო-С»,ონიქსი“, “ტოჩკა–У“.

ღირებულების გათვლისას ფორბსი იმ ვარაუდს ეფუძნებოდა, რომ მიზანს მოხვედრილი რაკეტების უმრავლესობა ძვირადღირებული და მაღალი სიზუსტის Х-101 რაკეტები, ასევე ტაქტიკური სიშორის რაკეტები С-300, «ტორნადო-С» იყო. დანარჩენები კი ჰაერსაწინააღმდეგო თავდაცვის სისტემამ გაანადგურა. რედაქცია წერს, რომ დამატებითი ინფორმაციის მიღების შემთხვევაში შეფასება გადაიხედება.

ამ დროისთვის კი გათვლები ასე გამოიყურება: თითო გამოყენებული რაკეტის ღირებულება ასეთია– Х-101–13 მლნ. დოლარი, , «კალიბრი»– 6.5 მლნ. დოლარი, «ისკანდერი»-3 მლნ. დოლარი,“ონიქსი“– 1.25 მლნ დოლარი, “ტოჩკა–У“-0.3მლნ დოლარი.

10 ოქტომბერს გაშვებული ყველა დრონის ღირებულება კი რამდენიმე მილიონი დოლარია.