Category: კავკასია

ბრიტანულმა სამხედრო-ინდუსტრიულმა კონცერნმა BAE Systems-მა, უკრაინის ომის წყალობით,  66 მილიარდ ფუნტ სტერლინგის (84 მილიარდი აშშ დოლარი) შეკვეთები მიიღო, რაც მისი არსებობის მანძილზე რეკორდული მაჩვენებელია. მთავარი ახალი მომხმარებლები არიან ქვეყნები, რომლებიც ხელახლა იარაღდებიან და ავსებენ თავიანთ არსენალს უკრაინისთვის იარაღის გადაცემის შემდეგ.

შეკვეთების რეკორდული პაკეტის შესახებ BAE Systems-მა ოთხშაბათს გამოაცხადა, როცა  ამ წლის შემოსავლის კორექტირებული პროგნოზით წარადგინა, იტყობინება Times.

მხოლოდ ბოლო ექვსი თვის განმავლობაში, კონცერნმა მიიღო  21 მილიარდი ფუნტი სტერლინგის შეკვეთები, მათ შორის ასობით საბრძოლო მანქანის შეკვეთა ჩეხეთიდან 1,8 მილიარდი ფუნტით,  3,7 მილიარდი ფუნტის შეკვეთა საუდის არაბეთიდან Typhoon–ს განმანადგურებლებზე,  და 2,4 მილიარდის შეკვეთა თავად დიდი ბრიტანეთისგან ახალ წყალქვეშა ნავებზე.

გარდა ამისა, ბრიტანეთის თავდაცვის სამინისტრომ მანამდე შეუკვეთა 280 მილიონი ფუნტის ღირებულების 155 მმ-იანი ჭურვები და სხვა საბრძოლო მასალა, უკრაინისთვის გადაცემული საბრძოლო მასალების ჩასანაცვლებლად.

თავად უკრაინიდან შეკვეთები ზოგად ფონზე მცირეა, მაგრამ BAE Systems-მა ცოტა ხნის წინ გამოაცხადა, რომ აპირებს ტანკებისა და არტილერიის წარმოებისა და შეკეთების ცენტრის აშენებას თავად უკრაინაში, ხოლო კონცერნის ხელმძღვანელმა ჩარლზ ვუდბერნმა ოთხშაბათს განაცხადა, რომ ამ ცენტრის შექმნასთან დაკავშირებით საქმე წინ მიდის:ჯერჯერობით წარმომადგენლობითი ოფისის გახსნაზე მოლაპარაკებები მიმდინარეობს, შემდეგ კი ბრიტანელები ადგილობრივ პარტნიორთან აპირებენ მუშაობას.

BAE Systems აწარმოებს იარაღის ფართო სპექტრს, ბირთვული წყალქვეშა ნავებიდან და Typhoon გამანადგურებლებიდან დაწყებული საბრძოლო მასალებით დამთავრებული.

ირაკლი ღარიბაშვილის ჩინეთში ვიზიტი საქართველოსა და ჩინეთს შორის სტრატეგიული პარტნიორობის დამყარებით დასრულდა, რამაც ბევრი კითხვა და ეჭვი გააჩინა. რამდენად შესაძლებელია დასავლეთზე ორიენტირებული ქვეყანა, რომელიც აშშ–ს სტრატეგიული პარტნიორია, პარალელურად ჩინეთის სტრატეგიული პარტნიორი გახდეს. დღეს მთავრობამ გამოაქვეყნა ჩიენთსა და საქართველოს შორის სტრატეგიული პარტნიორობის დამყარების შესახებ განცხადება, რომელშიც ეკონომიკურთან ერთად პოლიტიკურ პარტნიორობაზეც არის საუბარი. გთავაზობთ დოკუმენტს სრულად:

ჩინეთის სახალხო რესპუბლიკის და საქართველოს ერთობლივი განცხადება სტრატეგიული პარტნიორობის დამყარების შესახებ

ქ. პეკინი, 2023 წლის 31 ივლისი

საქართველოს პრემიერ-მინისტრი ბატონი ირაკლი ღარიბაშვილი 2023 წლის 26 ივლისიდან 1 აგვისტომდე ჩინეთში ვიზიტის დროს ქ. ჩენგდუში ესწრებოდა საერთაშორისო საუნივერსიტეტო სპორტული ფედერაციის (FISU) 31-ე მსოფლიო საზაფხულო თამაშებს. ვიზიტის განმავლობაში ჩინეთის სახალხო რესპუბლიკის პრეზიდენტი სი ძინპინი საქართველოს პრემიერ-მინისტრ ირაკლი ღარიბაშვილს ქ. ჩენგდუში შეხვდა, ხოლო ჩინეთის სახალხო რესპუბლიკის პრემიერ-მინისტრი ლი ციანი – ქ. პეკინში. მხარეებს შორის წარიმართა სიღრმისეული საუბარი ორმხრივი ურთიერთობების, ურთიერთ-ხელსაყრელი საერთაშორისო და რეგიონალური საკითხების შესახებ და მიღწეული იქნა ფართო კონსენსუსი. მხარეებმა მიიღეს გადაწყვეტილება, რომ სტრატეგიული პარტნიორობის ხარისხში აიყვანონ ორმხრივი ურთიერთობები.

მხარეები მიიჩნევენ, რომ 1992 წლის 9 ივნისს დიპლომატიური ურთიერთობების დამყარების დღიდან ორ ქვეყანას შორის არსებული ორმხრივი თანამშრომლობა ნაყოფიერი შედეგების მომტანია სხვადასხვა მიმართულებით. საერთაშორისო და რეგიონალური ვითარების ინტენსიური და კომპლექსური განვითარების ფონზე, მხარეები იზიარებენ ვალდებულებას გააფართოვონ თანამშრომლობა პოლიტიკურ, ეკონომიკურ და კულტურულ სფეროებში, გააძლიერონ თანამშრომლობა საერთაშორისო საკითხებში, გააღრმავონ ორმხრივი ურთიერთობები და ერთობლივად  უზრუნველყონ რეგიონალური და გლობალური მშვიდობა, სტაბილურობა და განვითარება.

1. პოლიტიკური განზომილება
   • მხარეები ადასტურებენ პატივისცემას ყველა ქვეყნის სუვერენიტეტის, დამოუკიდებლობისა და ტერიტორიული მთლიანობისადმი. საქართველო მტკიცედ ემხრობა ერთიანი ჩინეთის პრინციპს.
   • მხარეები ხაზგასმით აღნიშნავენ, რომ არსებული საერთაშორისო მდგომარეობისა და ეკონომიკური გლობალიზაციის პირობებში, ჩინეთსა და საქართველოს შორის არსებული ორმხრივი კავშირების მნიშვნელობამ საგრძნობლად იმატა. მხარეები ერთმანეთს მიიჩნევენ მნიშვნელოვან სტრატეგიულ პარტნიორებად, ხოლო ორმხრივი ურთიერთობების გაღრმავებას თავიანთი საგარეო პოლიტიკის პრიორიტეტად მიიჩნევენ.
   • საქართველოს სწამს, რომ ჩინეთის მოდერნიზაცია ახალ გზას და ახალ არჩევანს სთავაზობს კაცობრიობას მოდერნიზაციის მისაღწევად. მხარეები გამოთქვამენ მზაობას მმართველობის სფეროში არსებული გამოცდილების გაცვლის კუთხით, საერთო განვითარებისა და კეთილდღეობის უზრუნველსაყოფად.
   • მხარეები მზად არიან გააძლიერონ მაღალი დონის პოლიტიკური კონსულტაციები საერთო ინტერესების მქონე საკითხებზე და გაამყარონ სტრატეგიული ურთიერთ-ნდობა.
   • მხარეები ხაზს უსვამენ ცენტრალური და ადგილობრივი ხელისუფლების ორგანოებს, ისევე როგორც პოლიტიკურ ჯგუფებსა და პარტიებს შორის კავშირების გაფართოების აუცილებლობას, რათა მოხდეს გამოცდილების გაზიარება და ურთიერთობის გამყარება სხვადასხვა მიმართულებით.
   • ორმხრივი ურთიერთობების გაფართოებისა და განვითარების მიმართულებით ჩინეთისა და საქართველოს საკანონმდებლო ორგანოებს შორის თანამშრომლობის მნიშვნელოვანი როლის გათვალისწინებით, მხარეები ხაზს უსვამენ ორი ქვეყნის საკანონმდებლო ორგანოებს შორის ურთიერთობისა და თანამშრომლობის გაძლიერების მნიშვნელობას მრავალი მიმართულებით და სხვადასხვა დონეზე, ისევე როგორც კომუნიკაციისა და კონსულტაციების მნიშვნელობას შესაბამის რეგიონალურ და საერთაშორისო ორგანიზაციებში.

2. ეკონომიკური განზომილება
   • მხარეები მიესალმებიან ბოლო წლებში ორმხრივი ვაჭრობის მდგრად ზრდას და გამოხატავენ მზაობას მის შემდგომ მატებასთან მიმართებით, მისი სტრუქტურის ოპტიმიზაციასთან, სასაქონლო ნომენკლატურის გაფართოებასთან, საქართველოდან ჩინეთის მიმართულებით საქონლისა და მომსახურების ექსპორტის ზრდასთან დაკავშირებით.
   • საქართველო მიესალმება ჩინეთის მიერ შემოთავაზებული „სარტყელისა და გზის“ ინიციატივას. მხარეებმა ხელი მოაწერეს დოკუმენტებს, მათ შორის ჩინეთის სახალხო რესპუბლიკასა და საქართველოს მთავრობებს შორის ორმხრივი თანამშრომლობის გეგმას ხსენებული ინიციატივის ფარგლებში, რათა თანამშრომლობა მეტი ძალითა და შესაძლებლობებით წარიმართოს. მხარეები გააძლიერებენ დარგობრივი პოლიტიკის სფეროში კოორდინაციასა და განვითარებაზე ორიენტირებული გეგმების სინერგიას ხსენებული ინიციატივის ფარგლებში; გააღრმავებენ ურთიერთობასა და თანამშრომლობას სხვადასხვა სფეროში; მიემხრობიან კონსულტაციებისა და თანამშრომლობის პრინციპს საერთო სარგებლის მისაღებად; ხელს შეუწყობენ ღია, მწვანე და სუფთა თანამშრომლობას „სარტყელისა და გზის“ ინიციატივის მიზნების რეალიზებისთვის და მდგრადი განვითარების უზრუნველსაყოფად.
   • მხარეები გამოთქვამენ მზადყოფნას ხელი შეუწყონ ორმხრივ ინვესტიციებსა და ვაჭრობას; მხარეები მოახდენენ თანამშრომლობის სტიმულირებას ტრანსპორტის, კომუნიკაციების, ინფრასტრუქტურის მოდერნიზაციის, შუა დერეფნის განვითარებისა და გაძლიერების, ციფრული ტექნოლოგიების, წარმოების, სარკინიგზო ქსელების განახლებისა და განვითარების, სოფლის მეურნეობისა და სურსათის უვნებლობის, წყლის რესურსების, გარემოს დაცვის, გაუდაბნოებასთან ბრძოლის, წყლის დემინერალიზაციის, სტანდარტებთან შესაბამისობის შეფასების, დასავლეთის სამომხმარებლო ბაზრების მიმართულებით ჩინური პროდუქციის შეუფერხებელი ექსპორტისთვის საქართველოს სატრანზიტო ინფრასტრუქტურის გამოყენების, ტექნოლოგიური მიღწევებისა და ნოუ-ჰაუს გაზიარების, საკადრო რესურსების გადამზადების მიზნით.
   • ჩინეთის სახალხო რესპუბლიკა და საქართველო 2018 წლიდან იღებენ სარგებელს თავისუფალი ვაჭრობის შეთანხმებიდან, რამაც მნიშვნელოვანი როლი ითამაშა ორ ქვეყანას შორის ეკონომიკური და სავაჭრო ურთიერთობების განვითარების სფეროში. ქვეყნები გააგრძელებენ თანამშრომლობის გაღრმავებას ხსენებული შეთანხმების ფარგლებში; ურთიერთ-ხელსაყრელი შედეგების მისაღებად მხარს დაუჭერენ ეკონომიკურ და სავაჭრო ურთიერთობებს ჩინეთისა და საქართველოს საჯარო და კერძო სექტორის სუბიექტებს შორის; აქტიურად მოხდება ხსენებული შეთანხმების გაუმჯობესების შესაძლებლობების გამოყენება.
   • მხარეები გამოხატავენ მზაობას ჩინეთ-საქართველოს ეკონომიკური და სავაჭრო თანამშრომლობის კომისიის შემდეგი სხდომის ჩასატარებლად, რათა გაძლიერდეს ინფორმაციის გაზიარება ვაჭრობის, ინვესტიციების, ინფრასტრუქტურისა და სხვა მიმართულებით თანამშრომლობის მიზნით ხსენებული კომისიის ფორმატში, რაც გააძლიერებს ორმხრივი ურთიერთობების ხარისხსა და ეფექტურობას.
   • ჩინეთი მიესალმება საქართველოს აქტიურ მონაწილეობას ჩინეთის იმპორტის საერთაშორისო გამოფენაში. ჩინეთი მხარს უჭერს ქართულ საწარმოებს ჩინეთის ელექტრონული ვაჭრობის პლატფორმებზე საქონლის რეალიზაციის მიზნით.
   • მხარეები გამოხატავენ მზაობას ტურიზმის სფეროში თანამშრომლობის გასააქტიურებლად, რათა მოხდეს დარგის საერთო განვითარება. ჩინეთი მიესალმება საქართველოს მონაწილეობას ისეთ ტურისტულ გამოფენებში, როგორიცაა ჩინეთის ყოველწლიური საერთაშორისო ტურისტული ბაზარი.
   • ჩინეთი მხარს უჭერს და ხაზს უსვამს თბილისში აბრეშუმის გზის მე-4 ფორუმის მნიშვნელობას, რომლის თემა გახლავთ „დღევანდელი დაკავშირებულობა, ხვალინდელი მდგრადობისთვის“ და რომელიც 2023 წლის 26-27 ოქტომბერს გაიმართება ქ. თბილისში.
   • ჩინეთსა და ევროპის ცენტრალურ და აღმოსავლეთ ქვეყნებს შორის თანამშრომლობას საქართველო მიიჩნევს პრაგმატულ, ღია და ურთიერთ-სასარგებლო რეგიონალური თანამშრომლობის პლატფორმად. ჩინეთი მიესალმება საქართველოს ინტერესს ამ თანამშრომლობის მექანიზმში ჩაერთოს დამკვირვებლის რანგში.
   • ჩინეთი შეისწავლის საქართველოს მიერ სოციალური და ინფრასტრუქტურული პროექტების განსახორციელებლად პრეფერენციული დაკრედიტების საკითხს.

3. ხალხთა შორისი და კულტურული ურთიერთობის განზომილება
   • ახალ პირობებში ორმხრივი ურთიერთობების გაღრმავების საჭიროების გათვალისწინებით, მხარეები გამოთქვამენ მზაობას აქტიურად აწარმოონ სამეცნიერო და ტექნოლოგიური თანამშრომლობა, განაახლონ შეთანხმება მეცნიერებისა და ტექნოლოგიების სფეროში თანამშრომლობის შესახებ, რომელიც 1993 წელს იქნა ხელმოწერილი ჩინეთის სახალხო რესპუბლიკასა და საქართველოს შორის.
   • ხალხთა შორის კავშირებისა და კულტურული ურთიერთობების სფეროში მეგობრული დამოკიდებულებისა და თანამშრომლობის დიდი პოტენციალის გათვალისწინებით, მხარეები თანხმდებიან გააძლიერონ კულტურული თანამშრომლობა. წახალისდება ორი ქვეყნის მოქალაქეებს შორის ვიზიტები, გაძლიერდება თანამშრომლობა ტურიზმის, ჯანდაცვის, ახალგაზრდობის საქმეთა და სპორტის მიმართულებით. ამასთანავე, გაძლიერდება ურთიერთობები კინემატოგრაფიის, პრესის და საჯარო დიპლომატიის სფეროებში.
   • მხარეები შეისწავლიან ჩინეთისა და საქართველოს კულტურის წლების აღნიშვნის შესაძლებლობას და გააგრძელებენ კონსულტაციებს კულტურული ცენტრების დასაარსებლად, რასაც შესაბამისი ხელშეწყობა ექნება.
   • მხარეები გააძლიერებენ თანამშრომლობას მეცნიერებისა და უმაღლესი განათლების სფეროებში. განხორციელდება პროფესორ-მასწავლებლების და სტუდენტების გაცვლითი პროგრამები, გაძლიერდება თანამშრომლობა მეცნიერებისა და ახალი ტექნოლოგიების კომერციალიზაციის სფეროში, განხორციელდება ერთობლივი პროექტები.
   • მხარეები ხელს შეუწყობენ უნივერსიტეტებს ერთობლივი სასწავლო პროგრამების მსგავსი პრაქტიკული თანამშრომლობის განხორციელებას; წახალისდება უნივერსიტეტების მიერ მაღალი ხარისხის ციფრული საგანმანათლებლო რესურსების სრული გამოყენება და მათი გათვალისწინება თანამშრომლობის ონლაინ და ოფლაინ ფორმატებში. მხარეები ხელს შეუწყობენ სტუდენტების ურთიერთ-გაცვლას და ერთობლივ განვითარებას, სამთავრობო სასტიპენდიო ინსტრუმენტებისა და სხვა საშუალებების გამოყენებით.
   • მხარეები მნიშვნელობას ანიჭებენ ენების შესწავლის მიზნით გაცვლისა და თანამშრომლობის პროგრამებს, წაახალისებენ ორივე ქვეყნის სკოლებს ჩინური და ქართული ენების შესწავლისკენ; მზაობას გამოთქვამენ ენის პედაგოგების გაცვლითი პროგრამების განხორციელებისა და გადამზადებისთვის; მხარს უჭერენ კონფუცის ინსტიტუტების (საკლასო ოთახების) განვითარებას.

4. საერთაშორისო განზომილება
   • მხარეები გააძლიერებენ კოორდინაციას და თანამშრომლობას რეგიონალურ და საერთაშორისო საქმეებში, ჭეშმარიტი მულტილატერალიზმის ერთობლივ მხარდაჭერას; მტკიცედ დაიცავენ გაერთიანებული ერების ორგანიზაციის ირგვლივ შექმნილ საერთაშორისო სისტემას, საერთაშორისო სამართალზე დაფუძნებულ საერთაშორისო წესრიგს, გაეროს წესდების მიზნებსა და პრინციპებზე დამყარებულ საერთაშორისო ურთიერთობების საფუძველზე ძირეულ ნორმებს; წაახალისებენ ახალი სახის საერთაშორისო ურთიერთობების დანერგვას.
   • მხარეები მხარს უჭერენ კაცობრიობის საერთო ღირებულებების – მშვიდობის, განვითარების, თანამშრომლობის, სამართლიანობის, დემოკრატიისა და თავისუფლების ხელშეწყობას; პატივს სცემენ ყველა ხალხის დამოუკიდებელ არჩევანს მათი ეროვნული შესაძლებლობების შესაბამისი განვითარების გზის განსაზღვრაში და ხელს უწყობენ კაცობრიობის საერთო მომავლის მქონე საზოგადოების შექმნას.
   • საქართველო მხარს უჭერს ჩინეთის მიერ შემოთავაზებული გლობალური განვითარების ინიციატივას და მზადაა აქტიური მონაწილეობა მიიღოს ხსენებული ინიციატივის ფარგლებში წარმოებულ თანამშრომლობაში, რათა დაჩქარდეს გაერთიანებული ერების ორგანიზაციის 2030 წლისთვის გაწერილი მდგრადი განვითარების დღის წესრიგის განხორციელება.
   • საქართველო მხარს უჭერს ჩინეთის მიერ შემოთავაზებული გლობალური უსაფრთხოების ინიციატივას. მხარეებს სურთ ურთიერთობისა და თანამშრომლობის გაძლიერება ხსენებული ინიციატივის ფარგლებში და ერთობლივ ძალისხმევას ახორციელებენ მშვიდობიანი და სტაბილური საერთაშორისო უსაფრთხოების გარემოსთვის, რეგიონში ქვეყნების საერთო განვითარების ხელშეწყობისა და დაცვისთვის.
   • საქართველო მხარს უჭერს ჩინეთის მიერ შემოთავაზებული გლობალური ცივილიზაციის ინიციატივას. მხარეები აქტიურად ითანამშრომლებენ ხსენებული ინიციატივის განსახორციელებლად.

რამდენიმე საათში ბათუმის პორტში საკრუიზო ლაინერი უნდა შემოვიდეს, რომელიც სოჭიდან გამოვიდა და თურქეთის სანაპიროს გავლით ბათუმში მოდის. ბორტზე ასეულობით რუსეთის მოქალაქე იქნება. ლაინერის დასახვედრად ემზადებიან სამოქალაქო აქტივისტები და პოლიტიკური პარტიები, რომლებიც საპროტესტო აქციის გამართვას გეგმავენ, თუმცა ბათუმის პოლიციამ ბათუმის პორტისკენ მიმავალი გზები გადაკეტა.

“ამ წუთას პოლიციამ ბათუმის პორტთან მისასვლელი გზაც გადაკეტა. ასე იცავენ ოკუპანტებს ჩვენ ქვეყანაში”, – ამის შესახებ სოციალურ ქსელში ზურაბ ბატიაშვილი წერს და ჭავჭავაძის ქუჩაზე გადაღებულ ფოტოს ავრცელებს.

აქტივისტები საპროტესტო  შეკრებას ღამის 12:00 საათიდან იწყებენ და პორტში გამთენიისას შემოსულ ლაინერს პროტესტით დახვდებიან.

საკრუიზო ლაინერ Astoria Grande–ს პირველი რეისი  საქართველოში 27 ივლისს შედგა. გემზე 800-ზე მეტი რუსი ტურისტი იმყოფებოდა, რომლებსაც ოკუპაციის კანონი დარღვეული აქვთ. ბათუმის პორტში  საკრუიზო გემის ჩამოსვლას მოქალაქეები მაშინაც პროტესტით დახვდნენ.

რომის პაპმა ფრანცისკემ რუსეთის ხელისუფლებას შავი ზღვის პორტებიდან უკრაინული მარცვლეულის ექსპორტის შესახებ შეთანხმების განახლების თხოვნით მიმართა .

ეს შეთანხმება, რომელიც უკრაინას საშუალებას აძლევდა მიეწოდებინა საკვები მსოფლიო ბაზრებზე საკვები მიეწოდებინა, მოსკოვმა ივლისის შუა რიცხვებში შეწყვიტა.

„მოვუწოდებ ჩემს ძმებს, რუსეთის ხელისუფლების წარმომადგენლებს, განაახლონ შავი ზღვის ინიციატივა, რათა შესაძლებელი იყოს მარცვლეულის უსაფრთხო ტრანსპორტირება“, – თქვა პაპმა ვატიკანში მორწმუნეებისთვის საკვირაო მიმართვაში.

ფრანსისკმა დაგმო უკრაინაში მარცვლეულის განადგურება და მას “ღმერთის მძიმე შეურაცხყოფა” უწოდა.

უკრაინის პრეზიდენტმა ვლადიმირ ზელენსკიმ თავის Twitter-ზე პონტიფიკოსის მიმართვას მხარი დაუჭირა. მისი თქმით, „მსოფლიო სულიერი ლიდერების რეაქცია რუსეთის სარაკეტო ტერორზე და უკრაინის სასოფლო-სამეურნეო პროდუქტების განადგურებაზე ძალზე მნიშვნელოვანია, რათა დავიცვათ მთელი მსოფლიო სასურსათო კრიზისისგან და განსაკუთრებით აფრიკისა და აზიის ხალხები, რომლებსაც ყველაზე მეტად ემუქრებათ შიმშილის საფრთხე“.

მარცვლეულის ინიციატივიდან გამოსვლის შემდეგ, რუსეთმა რამდენიმე თავდასხმა განახორციელა ოდესასა და ოდესის რეგიონზე.

უკრაინის ხელისუფლება მიიჩნევს, რომ მოსკოვის მიზანი მარცვლეულის ექსპორტის შეფერხებაა. რუსი სამხედროები ამტკიცებენ, რომ ისინი პორტებში სამხედრო ობიექტებს პორტებში უტევენ და ამ შეტევებს  ყირიმის ხიდზე აფეთქებების გამო “საპასუხო დარტყმებს” უწოდებენ.

კვირას ღამით ორმა დრონმა მოსკოვის ბიზნეს ცენტრში შენობები დააზიანა. კიდევ ერთი, რუსეთის თავდაცვის სამინისტროს ცნობით, მოსკოვის ოლქის ოდინცოვოს რაიონში ჩამოაგდეს. ეს არის დრონებით მეოთხე თავდასხმა მოსკოვზე მაისის დასაწყისიდან.

„წუხელ უკრაინული დრონების შემოტევა იყო. მსუბუქად დაზიანდა ქალაქის ორი საოფისე კოშკის ფასადები. მსხვერპლი და დაშავებული არ არის“, – ნათქვამია მესიჯში, რომელიც მოსკოვის მერის სერგეი სობიანინის ტელეგრამის არხზე კვირას დილის 5-ის ნახევარზე გამოჩნდა.

შედეგად, IQ- კვარტალის 50-სართულიანი კორპუსი მეხუთე და მეექვსე სართულების ირგვლივ დაზიანდა. აქ რუსეთის სამი სამინისტროს ოფისები და საცხოვრებელი აპარტამენტებია განთავსებული.

ტელეგრამის არხმა „ფრთხილად, ახალი ამბები“ გამოაქვეყნა ვიდეო, სადაც ნაჩვენებია ციფრული განვითარების სამინისტროს აფეთქების შედეგად მიმოფანტული დოკუმენტები.

ზოგიერთი ცნობით, თავდასხმის შედეგად ერთიდან ორამდე ადამიანი დაშავდა, თუმცა ხელისუფლებამ ეს ინფორმაცია ოფიციალურად არ დაადასტურა.

ტელეგრამის არხის Mash-ის ცნობით, მოსკოვზე თავდამსხმელი ორი დრონიდან პირველი 3:20 წუთზე აფეთქდა. ამავდროულად, გამოჩნდა ცნობები მოსკოვის რეგიონის ოდინცოვოს რაიონში საჰაერო თავდაცვის მუშაობის შესახებ.

დაახლოებით 4:10 საათზე მიიღეს ინფორმაცია მეორე აფეთქების შესახებ – “ოკო-2“ ბიზნეს ცენტრში.

რუსეთის თავდაცვის სამინისტროს განცხადებით, ერთი უკრაინული უპილოტო საფრენი აპარატი მოსკოვის რეგიონში საჰაერო თავდაცვის სისტემებით განადგურდა ჰაერში, „კიდევ ორი ​​უპილოტო საფრენი აპარატი ჩაახშეს რადიოელექტრონული  ბრძოლის სისტემებმა და და კონტროლი დაკარგა მოსკოვის ტერიტორიაზე, არასაცხოვრებელი შენობების კომპლექს “მასკვა–სითის“ ტერიტორიაზე ჩამოვარდა.

უკრაინას თავდასხმაზე პასუხისმგებლობა არ აუღია.

ინციდენტთან დაკავშირებით, დედაქალაქის ვნუკოვოს აეროპორტი მცირე ხნით დაიხურა გამგზავრებისა და ჩამოსვლისთვის, ხოლო ფრენები აიკრძალა მოსკოვისა და მოსკოვის რეგიონის საჰაერო ზონაში, წერს TASS.

გარდა ამისა, მოსკოვის მიდამოში, ტესტოვსკაიას ქუჩაზე, მოძრაობა გადაკეტილი იყო.

ამერიკელი პოპ-ვარსკვლავის ტეილორ სვიფტის ორმა დიდმა კონცერტმა ქალაქ სიეტლში სეისმური აქტივობა გამოიწვია, რომელიც 2,3 მაგნიტუდის მიწისძვრის ექვივალენტური იყო .

ადგილობრივმა სეისმოლოგმა ჯეკი კაპლან-აუერბახმა დაარეგისტრირა ეს მონაცემები სვიფტის ანშლაგით მიმდინარე კონცერტების   დროს Lumen Field-ის სტადიონზე 22 და 23 ივლისს, რაც  მისი Eras Tour-ის ნაწილია.

მეცნიერის თქმით, მინი მიწისძვრის წყარო შეიძლება გამხდარიყო  მოცეკვავე სვიფტის ფანები ან ხმის სისტემა. კაპლან-აუერბახმა, დასავლეთ ვაშინგტონის უნივერსიტეტის გეოლოგიის პროფესორმა,  თავისი დაკვირვებები CNN-ს გაუზიარა.

ორი საღამოს განმავლობაში ამ კონცერტებზე მომღერლის 144 000 ფანი ცეკვავდა.

წინა მსგავსი რეკორდი სიეტლში 2011 წელს ამერიკული ფეხბურთის მატჩის დროს დაფიქსირდა. მას ერქვა “ბესტ კვაკი” – “ცხოველთა მიწისძვრა”.

მაშინ სეისმური მოვლენის მიზეზი სიეტლ სიჰოუკსის გუნდის გულშემატკივრები გახდნენ. მათ ვერ შეიკავეს სიხარული, როდესაც მარშონ ლინჩმა გაიტანა შთამბეჭდავი 6-ქულიანი დარტყმა განახორციელა და კლუბის გამარჯვება უზრუნველყო  მოქმედ ჩემპიონთან ნიუ ორლეან სენტსის ჩემპიონატზე .

კაპლან-აუერბახის მიხედვით, სხვაობა NFL თამაშისა და სვიფტის ბოლო კონცერტებტს დროს დაფიქსირებულ ბიძგებს შორის მხოლოდ 0,3 ბალი იყო, მაგრამ რყევა ორჯერ ძლიერი იყო, რამაც ეფექტი გააორმაგა.

”მე მივიღე კონცერტების ორივე საღამოს მონაცემები და მაშინვე შევამჩნიე, რომ [ორივე დღეს] იყო ერთი და იგივე სიგნალები,” – განმარტა ექსპერტმა. ”თუ მათ ერთმანეთს გადავადებთ, ისინი თითქმის იდენტური იქნებიან.”

სიეტლში ათასობით კონცერტის შემდეგ, სვიფტმა თავის ინსტაგრამზე დაწერა, რომ შაბათ–კვირას გამართული კონცერტები მის ცხოვებაში მართლაც ყველაზე საყვარელი იყო.  “Მადლობა ყველაფრისთვის.  აპლოდისმენტებისთვის, ყვირილისთვის, ხტუნვის, ცეკვის, სიმღერისთვის”, – დასძინა მომღერალმა.

არსებობს მონაცემები, რომ მუსიკალური კონცერტები ადრეც იწვევდა სეისმურ აქტივობას, მაგალითად, Foo Fighters-ის გამოსვლა ახალ ზელანდიაში 2011 წელს. მაშინ  50 ათასმა გულშემატკივარმა გამოიწვია მიწისქვეშა  ბიძგები ოკლენდის რაიონში, რაც მეცნიერებმა  ვულკანურ აქტივობას შეადარეს.