Category: კავკასია

„ავერსის“ კლინიკიდან 3 პატიმრის გაქცევის საქმეზე დაკავებულ საბადრაგო ჯგუფის უფროსს, ივერი ნატროშვილს თბილისის საქალაქო სასამართლომ აღკვეთის ღონისძიების სახით პატიმრობა შეუფარდა. გადაწყვეტილება მოსამართლე დავით კურტანიძემ მიიღო. სახელმწიფო ბრალდება დაკავებულისთვის ყველაზე მკაცრი აღკვეთის ღონისძიების პატიმრობის გამოყენებას ითხოვდა, დაცვის მხარე კი  5000-ლარიანი გირაოს სანაცვლოდ გათავისუფლებას.

პროცესზე პროკურორის მიერ გაკეთებული განცხადებიდან ირკვევა, რომ გამოძიებას ავტომანქანის ვიდეოჩანაწერი აქვს მოპოვებული, სადაც პატიმრების გაქცევის ფაქტია ასახული. პროკურორის განმარტებით, პატიმრების გაქცევისას უფროსი ოფიცერი იმ ადგილზე არ იმყოფებოდა, სადაც უნდა ყოფილიყო, ის წინა სავარძელზე იჯდა და ტელეფონზე საუბრობდა, განსაკუთრებით მძიმე და მძიმე დანაშაულზე მსჯავრდებულები კი უმეთვალყურეოდ ჰყავდა დატოვებული.

1 ნოემბერს, დაახლოებით 13:00 საათზე კლინიკა “ავერსის” ეზოში, თბილისში, ვაჟა-ფშაველას გამზირზე გაჩერებულ პენიტენციური სამსახურის მანქანაში ოთხი მსჯავრდებული იჯდა. ამ დროს ივერი ნატრიაშვილი მიკროავტობუსის წინა მხარეს იყო და კოლეგებს ესაუბრება გამოკვლევაზე “ავერსში” შეყვანილი მსჯავრდებულების შესახებ. საბადრაგო მანქანაში ორი საკანია, თითოში სამი ადამიანი ეტევა. როგორც პროკურორი აღწერს, კარი გარედან იკეტება ურდულითა და საკეტით. თუ კარი გასაღებით არის ჩაკეტილი, პატიმრის გაქცევა შეუძლებელია. ურდულით დაკეტილი კარის გაღება კი გისოსიდან თითის გამოყოფით არის შესაძლებელი და სწორედ ასე მოხდა ამ შემთხვევაში.

საქმის პროკურორი ამბობს, რომ საბადრაგო ჯგუფის უფროსმა მანქანაში პატიმრების საკნის კარი მხოლოდ ურდულით ჩაკეტა და არ გამოიყენა გასაღები. მისი თქმით, სავარაუდოდ, ეს შეამჩნიეს პატიმრებმა და შეძლეს გაქცევა.

“მსჯავრდებულთათვის სპეციალურ ავტომანქანაში არსებული საკნის კარი უნდა დაეკეტა არა მხოლოდ ურდულით, გასაღებითაც. ამ სივრცის წინ არის ადგილი, სადაც უნდა განთავსდნენ ესკორტის თანამშრომლები, ეს ადგილიც იყო ცარიელი. ეს ბრალდებული [საბადრაგო სამსახურის უფროსი] იჯდა წინა სავარძელზე და მეთვალყურეობის გარეშე ჰყავდა დატოვებული მძიმე დანაშაულში მსჯავრდებული პირები”, – ამბობს პროკურორი ლაშა ამირანაშვილი.

მისივე თქმით, საბადრაგო ჯგუფის უფროსი პატიმრებს “ძალიან მცირე მანძილზე” დაედევნა, შემდეგ კი უკან დაბრუნდა.

დღეს გაირკვა ისიც, რომ ავტომანქანაში იმყოფებოდა  მეოთხე პატიმარიც, რომელსაც გაქცევის შესაძლებლობა ქონდა, თუმცა არ გაიქცა.

ივერი ნატროშვილის ადვოკატის, ინგა შარაშენიძის განმარტებით, ესკორტის უფროსი ტელეფონზე ნამდვილად საუბრობდა, რითაც პატიმრებმა ისარგებლეს და გაიქცნენ, თუმცა ეს, ადვოკატის თქმით, არა შეთანხმების ნაწილი, არამედ შემთხვევითობა იყო. პროკურორმა პროცესზე ბრალდებულის თანამდებობიდან გადაყენების შუამდგომლობაც დააყენა, რასაც დაცვის მხარეც დაეთანხმა და მოსამართლემ შუამდგომლობა დააკმაყოფილა.

საბადრაგო ჯგუფის უფროსი, ივერი ნატროშვილი სამართალდამცველებმა 2 ნოემბერს დააკავეს. გამოძიების ინფორმაციით, 1-ელ ნოემბერს, პენიტენციური დეპარტამენტის ესკორტირების მთავარი სამმართველოს საბადრაგო ჯგუფმა, N15 პენიტენციური დაწესებულებიდან, თბილისში მდებარე „ავერსის“ კლინიკაში გამოკვლევის მიზნით ექვსი მსჯავრდებული გადაიყვანა. ბადრაგირების განხორციელებისას, საბადრაგო ჯგუფის უფროსმა ივერი ნატროშვილმა ბადრაგირების დადგენილი წესი არ შეასრულა, მსჯავრდებულები მუდმივი ვიზუალური მეთვალყურეობის გარეშე დატოვა და სპეციალური სატრანსპორტო საშუალების კარები სათანადოდ არ ჩაკეტა, რითაც, სამმა მსჯავრდებულმა ისარგებლა და გაიქცა. „ავერსის“ კლინიკიდან პირველ ნოემბერს გაქცეული სამივე პატიმარი ორ დღეში დააკავეს.

საქართველოდან ამერიკის შეერთებულ შტატებში, 70 მილიონი დოლარის ოდენობის კრიპტოვალუტის მოტყუებით დაუფლების ფაქტზე ბრალდებულის, ციფრულ აქტივებთან დაკავშირებული თაღლითური სქემების ლიდერის, ინტერპოლის წითელი ცირკულარით ძებნილი პირის ექსტრადიცია განხორციელდა. ამის შესახებ ინფორმაციას გენერალუირ პროკურატურა ავრცელებს.

უწყების იფორმაციით, პირის ექსტრადიცია საქართველოს სამართალდამცავ უწყებებსა და აშშ-ის იუსტიციის დეპარტამენტს შორის ტრანსნაციონალური ორგანიზებული დანაშაულის წინააღმდეგ ბრძოლაში თანამშრომლობის შედეგად განხორციელდა.

„ბრალდებული აშშ-ის სამართალდამცავი ორგანოების მიერ ტრანსნაციონალური ხასიათის, განსაკუთრებით დიდი ოდენობით თაღლითობისა და ფულის გათეთრების განსაკუთრებით მძიმე კატეგორიის დანაშაულებისთვის იძებნებოდა. აღსანიშნავია, რომ იგი წარმოადგენდა მის მიერ შექმნილი მასშტაბური დანაშაულებრივი ორგანიზაციის ხელმძღვანელს და ორგანიზებული ჯგუფის ფარგლებში, მან სულ მცირე 20 თაღლითური ონლაინ საინვესტიციო პლატფორმის შექმნა და მათი ფუნქციონირება უზრუნველყო. თაღლითური ონლაინ საინვესტიციო პლატფორმების გამოყენებით, 6 წლის განმავლობაში, მთელი მსოფლიოს მასშტაბით ასეულობით დაზარალებულისგან მოტყუებით მიღებულმა თანხამ 70 მილიონ აშშ დოლარზე მეტი შეადგინა.

ძებნილი პირი აშშ-ში ექსტრადიციის მიზნით, ინტერპოლის არხებით მის მიმართ გამოცხადებული საერთაშორისო ძებნის და მითითებული პირის ექსტრადიციის თაობაზე საქართველოსა და აშშ-ს შორის გაფორმებული ერთობლივი დეკლარაციის საფუძველზე, შინაგან საქმეთა სამინისტროს თანამშრომლებმა ბათუმში დააკავეს“, – ნათქვამია ინფორმაციაში.

გენერალური პროკურატურის განმარტებით, ბრალდებულის აშშ-ში ექსტრადიციის ფაქტს, დღეს აშშ-ს იუსტიციის დეპარტამენტი განცხადებით გამოეხმაურა. აშშ-ს იუსტიციის დეპარტამენტმა მადლობა გადაუხადა საქართველოს პროკურატურას, იუსტიციის სამინისტროს და შინაგან საქმეთა სამინისტროს ძებნილი პირის ექსტრადიციასთან დაკავშირებით მნიშვნელოვანი დახმარების გაწევისთვის.

როგორც ამერიკის იუსტიციის დეპარტამენტის მიერ გავრცელებულ განცხადებაშია აღნიშნული, ბრალდებულის ექსტრადიცია განხორციელდა საერთაშორისო თანამშრომლობისა და გამოძიების ფედერალური ბიუროს მუშაობის შედეგად, რათა აღნიშნული პირი წარმდგარიყო მართლმსაჯულების წინაშე.

ამერიკის შეერთებული შტატების გენერალური პროკურორის მოადგილის ნიკოლ მ. არგენტიერის განცხადებით, ეს ექსტრადიცია ამერიკის იუსტიციის დეპარტამენტის და საქართველოს სამართალდამცავ უწყებებს შორის ტრანსნაციონალური ორგანიზებული დანაშაულის წინააღმდეგ ბრძოლაში უწყვეტი კოორდინაციის და პარტნიორობის შედეგია.

„საქართველოს გენერალური პროკურატურის შუამდგომლობის საფუძველზე, აღნიშნული პირის აშშ-ში ექსტრადიცია თბილისის საქალაქო სასამართლომ დასაშვებად ცნო. ამასთან, საქართველოს უზენაესმა სასამართლომ, დაცვის მხარის საკასაციო საჩივარი ექსტრადიციის დაუშვებლად ცნობის თაობაზე დაუშვებლად ცნო და თბილისის საქალაქო სასამართლოს გადაწყვეტილება დარჩა უცვლელად.

2023 წლის 11 ოქტომბერს საქართველოს იუსტიციის მინისტრმა მიიღო საბოლოო გადაწყვეტილება ძებნილი პირის ამერიკის შეერთებულ შტატებში ექსტრადიციის თაობაზე, რის შემდგომაც ბრალდებული სპეციალური პენიტენციური სამსახურის თანამშრომლების მიერ ამერიკის შეერთებული შტატების კომპეტენტური ორგანოების წარმომადგენლებს გადაეცა. ძებნილი პირის საქართველოდან ამერიკის შეერთებულ შტატებში ტრანსპორტირება აშშ-ის მარშალთა სამსახურის მიერ მოხდა.

საქართველოს პროკურატურა გამოხატავს მზადყოფნას, ძებნილი პირების მართლმსაჯულების წინაშე წარდგენის მიზნით, მომავალშიც წარმატებით ითანამშრომლოს პარტნიორი ქვეყნების კომპეტენტურ ორგანოებთან“, – ნათქვამია ინფორმაციაში.

მსახიობი სკარლეტ იოჰანსონი  22 წამიან რეკლამაში გამოჩნდა, რომელიც გამოქვეყნდა X/Twitter-ზე ხელოვნური ინტელექტის პროგრამის მიერ, რომელიც გამოსახულებების გენერირებას ახდენს სახელწოდებით Lisa AI: 90s Yearbook & Avatar. მსახიობის წარმომადგენლებმა Variety-ს დაუდასტურეს, რომ იოჰანსონი არ არის აპლიკაციის წარმომადგენელი და მისი ადვოკატი კევინ იორნი სიტუაციის იურიდიული გზით მოგვარებით არის დაკავებული.

რეკლამა იხსნება იოჰანსონის ძველი კლიპით, რომელშიც ის ასახულია Marvel’s Black Widow-ის კულისებში. იოჰანსონი ამბობს: “რა ხდება, ბიჭებო? ეს არის სკარლეტი და მინდა, რომ ჩემთან ერთად წამოხვიდეთ…”. ამის შემდეგ მას პირზე გრაფიკა ედება და ეკრანზე გამოჩნდება ხელოვნური ინტელექტის მიერ შექმნილი ფოტოები, რომლებიც მიუთითებს მსახიობის გარეგნობაზე. შემდეგ იოჰანსონის იმიტირებული ხმა აგრძელებს საუბარს და რეკლამას უკეთებს  ხელოვნური ინტელექტის აპლიკაციას. “ეს არ შემოიფარგლება მხოლოდ ავატარებით. თქვენ ასევე შეგიძლიათ შექმნათ სურათები ტექსტით და თუნდაც თქვენი ვიდეოები ხელოვნური ინტელექტით. ვფიქრობ, ეს არ უნდა გამოტოვოთ”, – ამბობს ხმა, იოჰანსონის ონლაინ კლონი.

Convert Software-ის მიერ შექმნილი Lisa AI-ის რამდენიმე აპლიკაცია რჩება App Store-სა და Google Play-ში. აპლიკაციის შემქმნელი კომენტარს არ აკეთებს.

მსახიობის წარმომადგენელმა დაადასტურა, რომ სკარლეტ იოჰანსონს არანაირი შეხება არ ჰქონდა აპლიკაციასთან და აღნიშნა, რომ ეს სიტუაცია შესაბამისი სამართლებრივი მექანიზმებით მოგვარდება.

ცოტა ხნის წინ, მსგავსი შემთხვევა მოხდა ტომ ჰენკსთან დაკავშირებით, რომელმაც საკუთარი თაყვანისმცემლები სოციალურ ქსელში გააფრთხილა, რომ მისი გამოსახულება უნებართვოდ გამოიყენეს სტომატოლოგიურ რეკლამაში.

ისრაელის არმიამ დაადასტურა, რომ ღაზას სექტორში სასწრაფო დახმარების მანქანაზე საჰაერო დარტყმა განახორციელა. IDF-ის განცხადებაში ნათქვამია, რომ მისმა ჯარებმა დაადგინეს, რომ მანქანა გამოიყენებოდა “ჰამასის ტერორისტული უჯრედის” მიერ და დარტყმის შედეგად დაიღუპა ორგანიზაციის რამდენიმე შეიარაღებული წევრი.

”ჩვენ ხაზს ვუსვამთ, რომ ამ ტერიტორიაზე ბრძოლები მიმდინარეობს”, – აცხადებენ ისრაელის სამხედროები. ”რაიონში მცხოვრებ სამოქალაქო პირებს არაერთხელ სთხოვდნენ ევაკუაციას სამხრეთისენ საკუთარი უსაფრთხოებისთვის.”

მანამდე გავრცელდა ინფორმაცია ღაზას ქალაქ ალ-შიფას ჰოსპიტალთან აფეთქების შესახებ.

გადამოწმებული კადრები აჩვენებს დაზიანებულ სასწრაფოს მანქანას და რამდენიმე დაშავებულს, რომლებიც საავადმყოფოს გარეთ იწვნენ.

IDF-ის განცხადებაში არ არის განმარტებული, იყო თუ არა ეს იგივე ინციდენტი.

შეერთებულმა შტატებმა პირველად ოფიციალურად დაადასტურა, რომ ღაზას სექტორზე უიარაღო სათვალთვალო დრონებს იყენებს.

პენტაგონის სპიკერმა, ბრიგადის გენერალმა პეტ რაიდერმა თქვა, რომ დრონები გამოიყენეს „მძევლების გათავისუფლების მცდელობის მხარდასაჭერად“.

„აშშ ახორციელებს უიარაღო უპილოტო თვითმფრინავების ფრენებს ღაზას სექტორზე და აწვდის რჩევებსა და დახმარებას, რათა მხარი დაუჭიროს ჩვენს ისრაელელ პარტნიორს მძევლების დაბრუნების მცდელობებში“, – ნათქვამია განცხადებაში.

”ამ უპილოტო საფრენი აპარატების ფრენები დაიწყო 7 ოქტომბერს ისრაელზე ჰამასის თავდასხმის შემდეგ,” – თქვა რაიდერმა.

მანამდე გავრცელდა ინფორმაცია, რომ ამერიკული MQ-9 Reaper დრონები, რომლებიც არ ატარებდნენ იარაღს, შენიშნეს ღაზას თავზე.

ახალმა კვლევამ აჩვენა, რომ ზომიერი ან ენერგიული ვარჯიშის 22 წუთი მნიშვნელოვნად შეამცირებს სიკვდილიანობის რისკს 50 წელს გადაცილებულ ადამიანებში.

კვლევა მიუთითებს რომ უმოძრაო ცხოვრების წესი ფართოდ არის გავრცელებული და ადამიანების დიდი ნაწილი დღეში 8 საათზე მეტს მჯდომარე მდგომარეობაში ატარებს.

ბრიტანული სპორტული მედიცინის ჟურნალის მიერ გამოქვეყნებულმა ახალმა კვლევამ აჩვენა, რომ დღეში 22 წუთიანი ზომიერი და ენერგიული ფიზიკური აქტივობა ამცირებს სიკვდილის რისკს, თუ თქვენ გაქვთ მჯდომარე ცხოვრების წესი. კვლევა მოიცავდა 11,989 მონაწილის მონაცემების ანალიზს ნორვეგიაში, შვედეთსა და აშშ-ში.

კვლევაში ჩართული ყველა მონაწილე  50 წელზე უფროსი ასაკის იყო.

დოქტორი კარლ ცირინო, ორთოპედი ქირურგი ნიუ-იორკის სპეციალური ქირურგიის ჰოსპიტალში, ამბობს, რომ კვლევაში პრაქტიკოსებისა და პაციენტებისთვის მნიშვნელოვანი  ინფორმაციაა თავმოყრილი:

„ჩვენ ყველანი დატვირთული ცხოვრებით ვცხოვრობთ, გადავედით მონადირე-შემგროვებელი მომთაბარე ცხოვრების წესიდან, ლამაზ ბინებში და სახლებში ცხოვრებაზე, განათებითა და ელექტროენერგიით, კომფორტით. თუმცა, რაც არ უნდა ფუფუნებაში ვცხოვრობდეთ, აუცილებელია გამოვიდეთ გარეთ და ვიყოთ ისეთივე აქტიურები, როგორებიც ასობით წლის წინ ვიქნებოდით.

ეს კვლევა განსაზღვრავს, თუ რა დროა საჭირო დღეში ადამიანებისთვის, რათა შეამცირონ სიკვდილიანობის რისკი და მინიმუმამდე დაიყვანოს იგი მართლაც ძლიერი სამეცნიერო მეთოდით.  ვფიქრობ, ეს მართლაც მნიშვნელოვანი მცდელობა იყო.“

რაც კვლევამ დაადგინა

მონაცემები შეგროვდა ბარძაყის აქსელერომეტრით, რათა დაედგინათ, როდის იყვნენ ადამიანები უძრავ და აქტიურ მდგომარეობაში. მკვლევარებმა დაადგინეს, რომ მათთვისაც კი, ვინც დღე-ღამეში 12 ან მეტი საათის განმავლობაში მჯდომარე მდგომარეობაში იყო, სიკვდილიანობის რისკი აღმოიფხვრა, თუ აქტიური მდგომარეობის ზღვარი 22 წუთიანი იყო.

მათთვისაც კი, ვინც ბოლომდე ვერ აღწევდა  22 წუთიან ნიშნულს,  ზოგიერთი ზომიერი ან ენერგიული აქტივობა მაინც ნიშნავდა სიკვდილიანობის რისკის შემცირებას.

მაგალითად, მათთვის, ვინც 10 წუთს უთმობდა ფიზიკურ აქტივობას,  მჯდომარე მდგომარეობაში კი დღეში 6 საათს ატარებდა,  სიკვდილიანობის რისკი 32%-ით მაინც შემცირდა.

მიუხედავად იმისა, რომ კვლევა ფოკუსირებული იყო ხანდაზმულებზე, დოტორი ტრეისი ზასლოუ, პირველადი ჯანდაცვის სპორტული მედიცინის ექიმი Cedars Sinai Kerlan-Jobe Institute-ში, ამბობს, რომ ამ კვლევის შედეგებმა შესაძლოა გავლენა მოახდინოს ახალგაზრდებზეც.

„ვფიქრობ, ეს არის შეხსენება ჩვენი ახალგაზრდა სპორტსმენებისთვის და არასპორტსმენებისთვის, ახალგაზრდებისთვის და მოზარდებისთვის, რომ მათთვის ძალიან მნიშვნელოვანია კუნთების სიძლიერის და გულ-სისხლძარღვთა ჯანმრთელობის შენარჩუნება, რათა შეძლონ ფიზიკური აქტივობის შენარჩუნება. რაც უფრო მეტს აკეთებენ ისინი ახალგაზრდობაში, რაც უფრო ძლიერია ეს საფუძველი, მით უფრო ადვილია მისი შენარჩუნება, როდესაც ისინი მოხუცდებიან. ”

ენერგიული თუ ზომიერი აქტივობა

ისეთ აქტივობას, როგორიც არის სწრაფი  ნაბიჯით სეირნობა და გაზონის კრეჭა სპეციალური აპარტით, ექსპერტები ზომიერი აქტივობის მაგალითებად თვლიან იმ დროს, როცა ლაშქრობები ან კალათბურთის თამაში, როგორც წესი, ენერგიულ აქტივობად ითვლება.

როგორც ცირინო ამბობს,  ზოგიერთი ადამიანი სხვადასხვა მიზეზების, მაგალითად ოპერაციის გამო კარგავს წვდომას მათთვის სასურველ ფიზიკურ აქტივობასთან, ეს კვლევა კი მათ დაეხმარება განსაზღვრონ, რომელი აქტივობა შეესაბამება მათ მიზნებს ჯანმრთელობის თვალსაზარისით და ამავე დროს, მათთვის უსაფრთხო იქნება.

მკვლევარები ამბობენ, რომ არ არის აუცილებელი ყველა ინტენსიურად დარბოდეს ან ველოსიპედით დადიოდეს, ჩოგბურთს თამაშობდეს ან აქტიურად იყოს დაკავებული სპორტის სახეობით ან ვარჯიშით სავარჯიშო დარბაზში. მთავარია იმოძრაოთ, თუნდაც იაროთ შენობაში, გააკეთოთ ჩაჯდომები, ადით და ჩამოდით კიბეზე, გააკეთეთ მსუბუქი ვარჯიშები და მოძრაობები. მოძებნეთ გზა ფიზიკური აქტივობისთვის ნებისმიერ სიტუაციაში. სულ არაფერს ეს ნამდვილად ჯობს.

მკვლევარები ვარაუდობენ, რომ ხანდაზმული ადამიანების წახალისებას, მონაწილეობა მიიღონ თუნდაც მცირე აქტივობებში, შეიძლება მათთვის მკურნალობის ეფექტი ქონდეს. მათი თქმით, მნიშვნელოვანია ძალისხმევა დაიხარჯოს ახალგაზრდებში და ბავშვებში უმოძრაო ცხოვრების წესით გამოწვეული ზიანისა და რისკების შემცირების კვლევაში.

ჯერჯერობით კი, გამონახეთ დღეში თუნდაც 22 წუთი წუთიანი ზომიერი ან აქტიური ფიზიკური აქტივობისთვის, რაც  მნიშვნელოვნად ამცირებს რისკებს, რომლებსაც ხანგრძლივი ჯდომა და ცხოვრების უძრავი წესი გვიქმნის.

ისრაელელი ქალი, მაიან ზინი ამბობს, რომ მისი მძევლად აყვანილი ქალიშვილების  ვიდეომ, რომელიც ჰამასის ჯგუფმა გამოაქვეყნა, მას იმედი გაუჩინა, რომ ისინი ცოცხლები არიან.

რვა წლის ელა და მისი 15 წლის და, დაფნე, 7 ოქტომბერს ისრაელზე ჰამასის თავდასხმის დროს გაიტაცეს.

ამის შემდეგ ჰამასმა გამოაქვეყნა ვიდეო, სადაც ჩანს შეიარაღებული მამაკაცი, რომელიც ელას მახლობლად დგას. ჯგუფმა ასევე გაუგზავნა დაფნის ფოტო დედას, მაიან ზინის, რომელშიც გოგოს პიჟამო აცვია, ის ღაზას სექტორშია გადაღებული.

ზინმა AFP-ს განუცხადა, რომ ის ფოტოებს ყოველდღე უყურებს, რადგან ეს არის “დადასტურება იმისა, რომ ისინი ცოცხლები არიან”.

”ზოგჯერ წარმომიდგენია, რომ ისინი აუპატიურებენ ან სცემენ მათ”, – განუცხადა მაიან ზინმა ჟურნალისტებს. ”მაგრამ შემდეგ ცოტა ოპტიმიზმი მიჩნდება და საკუთარ თავს ვეუბნები, რომ იქ ბევრი ბავშვია, ისინი ალბათ კარგად ექცევიან მათ.”

ის ამბობს, რომ ყოველთვის ოცნებობს მათ დაბრუნებაზე და თუ მათ კვლავ ნახავს, ​​სურს “დიდი საწოლი იყიდოს, რათა სამივემ ერთად დაიძინოს”.

მაიან ზინს არ უნახავს შვილები მას შემდეგ, რაც მათ თელ-ავივი დატოვეს და მამასთან შესახვედრად წავიდნენ. მამა ჰამასის თავდასხმის დროს მოკლეს.

იმავდროულად, ისრაელის გაზეთ Times of Israel-ისა და Kan News-ის თანახმად, გატაცებული ისრაელელების ზოგიერთმა ოჯახმა დაიწყო ჰამასისგან ტექსტური შეტყობინებების მიღება, რომლითაც მათ სთხოვდნენ დააჭირონ ბმულს, რათა მიიღონ ინფორმაცია საყვარელი ადამიანების შესახებ.

“ეს არის მესიჯი ალ-კასამისგან [ჰამასის სამხედრო ფრთა]”, – ჩვენ შევთავაზეთ თქვენს მთავრობას პატიმრებში მძევლების გაცვლა, მაგრამ უარი გვითხრეს“ –ნათქვამია მესიჯში.

ისრაელის არმიის სპიკერმა დანიელ ჰაგარიმ განაცხადა, რომ ისრაელის სამხედროებმა დაასრულეს ღაზას ჩრდილოეთით მდებარე ქალაქ ღაზას ალყაში მოქცევა.

მან დასძინა, რომ ისრაელის სამხედროები “უტევენ ჰამასის პოზიციებს, სამეთაურო პუნქტებს, რაკეტების გამშვებ პოზიციებს და ინფრასტრუქტურას და კლავენ ტერორისტებს ახლო მანძილიდან ბრძოლაში”.

ადრე ისრაელის არმიის წარმომადგენლებმა უკვე განაცხადეს, რომ სამხედროები ჩართულნი არიან მჭიდრო ბრძოლებში ჰამასის წევრებთან, რომლებიც ახორციელებენ თავდასხმებს მიწისქვეშა გვირაბებიდან.

IDF-ის ინფორმაციით, ბოლო რამდენიმე საათის განმავლობაში ჰამასის 130 წარმომადგენელი დაიღუპა. ღაზაში სახმელეთო ოპერაციის დაწყებიდან 20-მდე ისრაელელი ჯარისკაციც დაიღუპა.

საფრანგეთის დედაქალაქის ხელისუფლებამ განაცხადა, რომ პარიზში ანტიტერორისტულმა პოლიციელებმა ბურკაში გამოწყობილ ქალს ცეცხლი გაუხსნეს, რომელიც მატარებლის მგზავრებს ემუქრებოდა.

გავრცელებული ინფორმაციით, ქალმა პოლიციის მოთხოვნების შესრულებაზე უარი თქვა. მის მიმართ 8 გასროლა მოხდა და ქალი დაიჭრა.

როგორც მოგვიანებით გაირკვა, ქალი შეიარაღებული არ იყო.

განგაში სამგზავრო მატარებლის მგზავრებმა პარიზის მე-13 ოლქში გამოაცხადეს. საქმეში პოლიცია ფრანსუა მიტერანის ბიბლიოთეკის სადგურზე ჩაერია..

კონკრეტულად როგორ დაემუქრა ქალი მგზავრებს, უცნობია, მაგრამ ცნობილია, რომ ის ყვიროდა „ალაჰ აკბარ“ (ანუ „ალაჰი დიდია!“).

პოლიციის ცნობით, ოფიცრებს შეეშინდათ მათი და მგზავრების უსაფრთხოების გამო, და ამიტომ ქალს ცეცხლი გაუხსნეს. ქალს ჭრილობა მუცელში აქვს მიყენებული და ახლა მძიმე, მაგრამ სტაბილურ მდგომარეობაშია საავადმყოფოში, სადაც მას ოპერაცია ჩაუტარდა.

პარიზის პრეფექტის, ლორან ნუნესის თქმით, ეს შეიძლება იყოს იგივე ქალი, რომელიც 2021 წელს უკვე დაემუქრა უსაფრთხოების ძალებს, რომლებიც იცავენ მნიშვნელოვან ობიექტებს შესაძლო ტერორისტული თავდასხმებისგან.

შემდეგ ეს ქალი ფსიქიკური მდგომარეობის გამო გარკვეული დროით იზოლირებული იყო.

როგორც მთავრობის სპიკერმა ოლივიე ვერანმა აღნიშნა, პოლიციელებს, რომლებმაც ეჭვმიტანილს ესროდნენ, დამაგრებული ჰქონდათ ვიდეოკამერები, რაც ხელს შეუწყობს ინციდენტის ზუსტი გარემოებების გარკვევას, რაზეც ერთდროულად ორი გამოძიება დაიწყო. ერთი ეხება თავად ეჭვმიტანილის ქმედებებს, მეორე გამიზნულია იმის გასარკვევად, თუ რამდენად გამართლებული იყო იარაღის გამოყენება.

ინციდენტი მოხდა საფრანგეთში დაძაბულობის ფონზე, რომელიც  ისრაელსა და ჰამასს შორის ომით არის გამოწვეული.

ამ თვის დასაწყისში ქვეყნის სამხრეთით სკოლის მასწავლებელი მოკლეს და ორი ადამიანი მძიმედ დაშავდა, თავდამსხმელი ასევე ყვიროდა „ალაჰ აკბარ“. ამ ინციდენტის შემდეგ საფრანგეთში ანტიტერორისტული განგაშის უმაღლესი დონე შემოიღეს.

საფრანგეთის ხელისუფლება შეშფოთებულია ქვეყანაში ანტისემიტიზმის ზრდის გამო
ბოლო დღეებში ასევე მოხდა რამდენიმე ანტისემიტური ინციდენტი პარიზში და მის გარშემო. ზოგიერთ რაიონში დავითის ვარსკვლავები კედლებზეა დახატული, როგორც ეს ერთ დროს ნაცისტურ გერმანიაში იყო.

ზოგადად, შინაგან საქმეთა მინისტრის ჯერალდ დარმანინის თქმით, 7 ოქტომბრიდან, როცა ჰამასმა ისრაელზე თავდასხმა დაიწყო, 850-ზე მეტი ასეთი აქტი დაფიქსირდა.

„ვტირი, რადგან ისევ ვხედავ იმავე სიძულვილს, რომლითაც ბავშვობაში გვეპყრობოდნენ და ამის გაგება არ შემიძლია“, განუცხადა BFMTV-ს იმ სახლის ერთ-ერთმა მცხოვრებმა, სადაც დავითის ვარსკვლავი გამოჩნდა.

როგორც ამ ტელეარხის მიერ ჩატარებული გამოკითხვის შედეგები აჩვენებს, ანტისემიტური გამოხტომები ქვეყნის მოსახლეობის 83%-ს აშფოთებს.

პარიზის ერთ-ერთი ჩრდილოეთ გარეუბნის მერმა, კარიმ ბუმრანმა მოითხოვა „ანტისემიტური და რასისტული“ გრაფიტის ავტორების კანონის სრული სიმკაცრით დასჯა.

პარიზის მერის მოადგილემ, ემანუელ გრეგუარმა განაცხადა, რომ კედლებზე დახატული დავითის ყველა ვარსკვლავი გადაიღებება და ამ ინციდენტებზე გამოძიება ჩატარდება.

2016 წელს ისრაელის მაშინდელმა თავდაცვის მინისტრმა ავიგდორ ლიბერმანმა მოამზადა დოკუმენტი, რომელშიც აფრთხილებდა ისრაელის ხელისუფლებას და სპეცსამსახურებს, რომ ჰამასი გეგმავდა  ღაზას სექტორის საზღვრის გარღვევას, სამხრეთ ისრაელის დასახლებების ხელში ჩაგდებას, ხოცვა-ჟლეტას და მძევლების აყვანას, იტყობინება ისრაელის მედია.

11 გვერდიანი დოკუმენტი, რომლის ნაწილი ორშაბათს გამოაქვეყნა გაზეთმა “იედიოთ აჰრონოტმა“, წინასწარმეტყველებს 7 ოქტომბრის ტრაგედიის ბევრ დეტალს და მიუთითებს იმაზე, რომ ისრაელის ხელისუფლებამ რამდენიმე წელი იცოდა ჰამასის ასეთი თავდასხმის შესაძლებლობის შესახებ, მაგრამ, როგორც ჩანს, ვერ იმოქმედა.

„ჰამასი აპირებს კონფლიქტის გადატანას ისრაელის ტერიტორიაზე კარგად გაწვრთნილი ძალების მნიშვნელოვანი რაოდენობის გაგზავნით (მაგალითად, ნუხბი , კომანდოს ქვედანაყოფი ჰამასის სამხედრო ფრთაში ) ღაზას სექტორის საზღვარზე  მდებარე  ისრაელის თემის (ან შესაძლოა რამდენიმე თემის) ხელში ჩაგდებით და მძევლების აყვანით“, – წერს ლიბერმანი დოკუმენტში, რომელსაც გრიფი საიდუმლო აქვს.

შაბათს, დილით, 7 ოქტომბერს, ჰამასის დაახლოებით 2500 ბოევიკი ისრაელში ხმელეთით, ზღვითა და ჰაერით შეიჭრა, რის შედეგადაც 1400-ზე მეტი ადამიანი დაიღუპა, უმეტესობა მშვიდობიანი მოქალაქე იყო. ჰამასმა და მასთან დაკავშირებულმა ტერორისტულმა დაჯგუფებებმა აიყვანეს სულ მცირე 239 მძევალი, მათ შორის 30-მდე ბავშვი და წაიყვანეს ღაზას სექტორში, სადაც ისინი  ამ დრომდე ტყვეობაში არიან.

„ადამიანებისთვის  ფიზიკური ზიანის მიყენების გარდა, ეს მძიმე დარტყმას მიაყენებს ისრაელის მოქალაქეების მორალურ მდგომარეობას და გრძნობებს“, – გააფრთხილა ლიბერმანმა შესაბამისი სტრუქტურები.

შაბათს საღამოს მიცემულ ინტერვიუში ავიგდორ ლიბერმანმა გაიხსენა ეს დოკუმენტი და თქვა, რომ მან იგი გადასცა პრემიერ მინისტრ ბენიამინ ნეთანიაჰუს 2016 წლის დეკემბერში და გააფრთხილა, რომ ჰამასი “ზუსტად ისე დაესხმებოდა თავს ისრაელს”, როგორც  7 ოქტომბერს მოხდა, თუ მისი შესაძლებლობები არ განადგურდებოდა.

თავდაცვის ყოფილი მინისტრის თქმით, ნეთანიაჰუ იძულებული გახდა ეს საკითხი დაეყენებინა კაბინეტის სხდომაზე, სადაც დოკუმენტი “საერთოდ უგულებელყვეს”, მათ შორის უსაფრთხოების სამსახურის ხელმძღვანელებმა.

პრემიერ-მინისტრ ნეთანიაჰუს ოფისს ჯერ არ გაუკეთებია კომენტარი ლიბერმანის განცხადებასა და მისი დოკუმენტის გამოქვეყნებაზე.