Category: ბიზნესი / ეკონომიკა

უკრაინის პრემიერი, დენის შმიგალი და სხვა მაღალჩინოსნები ფინანსური სფეროდან მომავალ კვირას ვაშინგტონში ჩავლენ. ამის შესახებ სააგენტო როიტერი საკუთარ წყაროებზე დაყრდნობით წერს და აზუსტებს, რომ შმიგალის გარდა ვაშინგტონში ჩავლენ ფინანსთა მინისტრი, სერგეი მარჩენკო და ცენტრობანკის თავმჯდომარე კირილ შევჩენკო. მათი ვიზიტი ამერიკის დედაქალაქში საერთაშორისო სავალუტო ფონდის და მსოფლიო ბანკის საგაზაფხულო შეხვედრების დროს შედგება.

როიტერის მონაცემებით უკრაინული დელეგაცია ორმხრივ შეხვედრებს გამართავს დიდი შვიდეულის ქვეყნების ფინანსური უწყებების ჩინოვნიკებთან, ასევე მონაწილეობას მიიღებს უკრაინასთან დაკავშირებულ მრგვალ მაგიდაში, რომლის ორგანიზატორი მსოფლიო ბანკია.
ვიზიტი ომის დაწყების შემდეგ პირველი შესაძლებლობა იქნება უკრაინული მხარისთვის პირადად შეხვდნენ განვითარებული ეკონომიკის ქვეყნების ფინანსური უწყებების წარმომადგენლებს, აღნიშნავს სააგენტო.

კოლუმბიის ხელისუფლება პირობას დებს, რომ დაეხმარება დასავლეთის ქვეყნების ნაწილობრივ ან მთლიანად თქვან უარი რუსულ ენერგორესურსებზე და ის კოლუმბიურით ჩაანაცვლონ. ამისათვის ქვეყანა ნავთობის, ქვანახშირის და გაზის მოპოვებას გაზრდის. ამის შესახებ კოლუმბიის პერზიდენტმა, ივან დუკემ სიენენთან საუბარში განაცხადა. მან რუსეთის უკრაინაში შეჭრას გენოციდი უწოდა.

“ჩვენ გვაქვს უზარმაზარი რესურსები, რომლებსაც არ ვიყენებთ. შეიძლება ითქვას, ყველაზე დიდი ქვანახშირის რესურსები გვაქვს, შეგვიძლია უფრო მეტი ნავთობი და გაზი მოვიპოვოთ. კოლუმბიას დღესვე შეუძლია გაზარდოს ქვანახშირის მოპოვება.

რუსეთის ქმედება უკრაინაში არის გენოციდი. ჩვენ ეს უნდა შევაჩროთ. ეს სიგიჟეა“–თქვა კოლუმბიის პრეზიდენტმა.

კოლუმბიის პრეზიდენტი სამდღიანი ვიზიტით ნიუ იორკში იმყოფება.

ევროკომისიის ხელმძღვანელმა, ურსულა ფონ დერ ლაიენმა გამოაცხადა ახალი სანქციების შესახებ, რომელსაც ევროკავშირი რუსეთის წინააღმდეგ დაამტკიცებს:

• რუსული ნახშირის იმპორტის აკრძალვა, რაც წელიწადში 4 მილიარდ ევროს შეადგენს.
• ხიზილალის, ალკოჰოლის, ხე–ტყის, ქიმიური მრეწველობის პროდუქციის და სხვა საქონლის იმპორტის აკრძალვა – წელიწადში 5.5 მილიარდი ევრო.
• რუსეთში ჩიპების, ნახევარგამტარების, კომპიუტერების და გაზის მრეწველობის, ტრანპორტის და სხვა სფეროებისთვის საჭირო აღჭურვილობის ექსპორტის აკრძალვა, წელიწადში 10 მილიარდი ევროს ღირებულებით.
• ევროკავშირის პორტების დაკეტვა რუსული ხომალდებისთვის, გარდა ენერგორესურსების და სურსათისთვის განკუთვნილი გემებისა.
• საზღვრების დაკეტვა რუსული და ბელორუსული სატვირთო მანქანებისთვის.
• სანქციები 4 ბანკის წინააღმდეგ, ВТБ–ს ჩათვლით, რომლებიც უკვე გამორთულია SWIFT–იდან.
• საპასუხო ზომები, რომლებიც მოიცავს რუსული კომპანიების მონაწილეობის აკრძალვას ევროკავშირში სახელმწიფო შესყიდვებში და ნებისმიერი ფინანსური მხარდაჭერის აკრძალვას რუსული სახელმწიფო ორგანოებისთვის.
• სანქციების სიაში ახალი პირების შეყვანა.

სიტყვით გამოსვლისას ურსულა ფონ დერ ლაიენმა კიდევ ერთხელ დაადასტურა, რომ ევროკავშირი ჯერჯერობით არ აპირებს ემბარგოს შემოღებას რუსულ ნავთობსა და გაზზე, რომელშიც რუსეთს დღეში 650 მილიონ ევროს უხდის, თუმცა მისი თქმით, მიმდინარეობს მუშაობა დამატებით შეზღუდვებზე, რომელიც რუსული ნავთობის იმპორტს შეეხება.

შემუშავებულ სანქციებს ევროკავშირის 27–მა ქვეყანამ უნდა დაუჭიროს მხარი.

ავიაკომპანია „ჯორჯიან ეარვეისი“ 150 მლნ დოლარად იყიდება.ინფორმაციას ამის შესახებ ქართულ-ამერიკული Georgian Business Brokerage ავრცელებს, რომელიც ქართული ავიაკომპანიისთვის ინვესტორს ეძებს.

“ჯორჯიან ეარვეისი“ კორონავირუსის გამო ფინანსური კრიზისის წინაშე აღმოჩნდა, რის შემდეგაც შეგახსენებთ, რომ გასული წლის მიწურულს ავიაკომპანიის გადახდისუუნარობის (გაკოტრება, რეაბილიტაცია) საქმის წარმოება დაიწყო. ამ მიზნით, სასამართლოს კომპანიის დირექტორმა მიმართა.

როგორც სასამართლოს განჩინებაშია აღნიშნული,  არსებული ფინანსური კრიზისიდან ერთადერთი გამოსავალი კი მოვალის რეაბილიტაცია იყო.

განჩინების მიხედვით ადახდისუუნარობის თაობაზე განცხადების წარდგენისთვის მოვალის აქტივების საერთო ღირებულება უტოლდება 21 378 262 ლარს. ამავდროულად, კომპანიის მიმდინარე ვალდებულებების საერთო ღირებულება აღწევს 175 854 075 ლარს.

„მოვალის ფინანსური მაჩვენებლები ცხადყოფს, რომ რეაბილიტაციის რეჟიმის გარეშე უახლოეს მომავალში ვეღარ შეძლებს მოემსახუროს ვადამოსულ მოთხოვნებს. შესაბამისად, მოვალის გადახდისუუნარობის პირობებში გადახდისუუნარობის საქმისწარმოების დაწყება კრედიტორთა ერთობლივი ინტერესის დაცვის აუცილებელი და სავალდებულოდ გამოსაყენებელი გზაა,“-ნათქვამია  სასამართლოს განჩინებაში.

საქართველოში დაფუძნებული ქართულ-ამერიკული Georgian Business Brokerage-ს პრეზიდენტი „ჯორჯიან ეარვეისის“ ყოფილი გენერალური დირექტორი რომან ბოკერიაა.  ავიაკომპანია მან გასული წლის ნოემბერში დატოვა და მიზეზად ქართულ-ამერიკულ კომპანია „საქართველოს ბიზნეს ბროკერიჯიში“ გადასვლა დაასახელა.

კომპანია უცხოურ ინვესტიციებს, საქართველოსა და მიმდებარე რეგიონებში, სხვადასხვა ბიზნეს პროექტების დასაფინანსებლად იზიდავს.

ორგანიზაციის საქმიანობა მოიცავს: მოქმედი ბიზნესისა და მატერიალური აქტივების ყიდვა-გაყიდვას; შემოსავალის მომტანი მატერიალური აქტივების პორტფელის შეგროვებასა და მართვას; ბიზნესის შეფასებასა და მის იმიგრაციას – საქართველოს მოქალაქეობის მიღებას.

რუსეთში აქციების ბაზარი ვარდნას განაგრძობს რუსეთის ხელისუფლების უშედეგო მოლაპარაკებების შემდეგ აშშ–სა და ნატოსთან. დაძაბულობა იგრძნობა მსოფლიო ბაზრებზეც.

დღეს მოსკოვის საფონდო ბირჟის ინდექსი 3600 პუნქტზე დაბლა დაეცა, რაც გასული წლის 14 დეკემბრის შემდეგ ყველაზე დიდი ვარდნაა, დოლარის ინდექსი კი 4 მაისიდან პირველად დაეცა 1500 პუნქტით.

ვარდნა ხუთშაბათს დაიწყო: ხუთშაბას ძირითადი სესიის დახურვისას მოსბირჟის რუბლის ინდექსი 4.05%–ით დაეცა, დოლარის ინდექსი კი 5.94%–ით. პარასკევს ვაჭრობა მცირე ზრდით გაიხსნა, თუმცა ის მალევე შეიცვალა ახალი ვარდნით.

პარასკევს გაუფასურება განიცადა რუსულმა ვალუტამ: დღისით ევროს კურსი გასული ზაფხულის მაქსიმუმს გაუთანაბრდა და 88 რუბლს მიაღწია, დოლარი კი 77 რუბლს მიუახლოვდა.

ეკონომისტები თანხმდებიან, რომ მთავარი ფაქტორი, რამაც ბაზრების ვარდნა გამოიწვია გეოპოლიტიკაა.

ინვესტორები გეოპოლიტიკური რისკების გამო ცდილობენ რუსული აქციებისგან გათავისუფლდნენ. რუსი ანალიტიკოსები აღნიშნავენ, რომ მოსკოვის ბირჟის ხუთშაბათის ვარდნა 2020 წლის გაზაფხულის შემდეგ ყველაზე ძლიერია და ამის მიზეზი გეოპოლიტიკური დაძაბულობის განმუხტვის საქმეში პროგრესის არარსებობაა.

ამ კვირას რუსეთსა და აშშ–ს შორის უსაფრთხოების საკითხებზე მოლაპარაკებები გაიმართა, ასევე გაიმართა ნატო–რუსეთის საბჭო. ვერცერთ შეხვედრაზე პუნქტების უმრავლესობაზე მხარეებმა შეთანხმებას ვერ მიაღწიეს.

როგორც მოლაპარაკებების შემდეგ რუსეთის საგარეო საქმეთა მინისტრის მოადგილემ, სერგეი რიაბკოვმა განაცხადა, აშშ და მისი ნატოელი მოკავშირეები არანაირი ფორმით და არანაირი მიზეზით არ არიან მზად რუსეთის მოთხოვნები დააკმაყოფილონ ნატოს გაფართოების შეწყვეტის, ალიანსის ინფრასტრუქტურის შემცირებისა და ნატოს 1997 წლის დროინდელ საზღვრებში დაბრუნების შესახებ.

რიაბკოვის თქმით, მოლაპარაკებების ახალი რაუნდის საფუძველი ახლო მომავალში არ არსებობს, რადგან საუბარი ფაქტიურად ჩიხში შევიდა.

ნატოს გენმდივანმა, იენს სტოლტენბერგმა ასევე განაცხადა, რომ ნატო არანაირ კომპრომისზე არ წავა ორგანიზაციის გაფართოებისა და აღმოსავლეთში ჯარების განთავსების საკითხში.

გეოპოლიტიკური პროცესების კვალდაკვალ სიტუაცია დაძაბულია მსოფლიოს ბაზრებზეც. თუმცა, ბაზრებზე გავლენას აშშ–ს  მიერ ფულად–საკრედიტო პოლიტიკის გამკაცრების მორიგი ციკლის დასაწყისის მოახლოებაც ახდენს. ეს გადაწყვეტილება აშშ–მ ინფლაციის შესამცირებლად მიიღო, რომელიც შესაძლოა მარტში დაიწყოს.

ხუთშაბათს  ვარდნა იყო ამერიკულ ბაზარზეც, სადაც ზეწოლის ქვეშ აღმოჩნდა მაღალტექნოლოგიური სექტორის აქციები, რომელთა ინდექსმა 2.7%–იანი კლება განიცადა, ასევე მეორადი საჭიროების სამომხმარებლო პროდუქტების წარმოების სექტორმა, რომლის დანაკარგმა 2% შეადგინა.

Dow Jones –ის და  S&P500–ის ინდექსებმა ხუთშაბათს  შესაბამისად 0.5% და 1.4% დაკარგეს.

ექსპერტები დღევანდელ დილას მსოფლიო ბაზრებზე არსებულ მდგომარეობას “სუსტად ნეგატიურს“ უწოდებენ.

საქართველოს ეკონომიკის ზრდა 2021 წელს 3.5%-თ არის მოსალოდნელი, კორონავირუსული დაავადების (კოვიდ-19) პანდემიის შეკავების მიზნით დაწესებული შეზღუდვების ეტაპობრივი მოხსნისა და შიდა მოთხოვნის გამოცოცხლების ხარჯზე, ნათქვამია აზიის განვითარების ბანკის (ADB) ახალ ანგარიშში.

აზიის განვითარების პროგნოზის (ADO) 2021 — ბანკის მთავარი ყოველწლიური ეკონომიკური გამოცემის მიხედვით ADB საქართველოს მთლიანი შიდა პროდუქტის (მშპ) ზრდას 2022 წელს 6%-ით ვარაუდობს, რადგან ეკონომიკის სრული გახსნა და ტურიზმის მოსალოდნელი აღდგენა  მოგზაურობისა და ვაჭრობის სტიმულირებას მოახდენს.

“როგორც ტურიზმზე დამოკიდებული ეკონომიკა, პანდემიასთან დაკავშირებული შეზღუდვების ეტაპობრივმა მოხსნამ მიმდინარე წელს ქვეყნის ეკონომიკური ზრდა უნდა განაახლოს და 2022 წელს კიდევ უფრო დააჩქაროს,“ განაცხადა ADB-ის მუდმივი წარმომადგენლობის დირექტორმა საქართველოში შეინ როზენტალმა. “ვაქცინაცია ეკონომიკის სწრაფი აღდგენის გასაღებია. ამავდროულად, მცირე და საშუალო საწარმოების ფინანსებზე წვდომის გამარტივება, ელექტრონული კომერციის გაუმჯობესება და სოფლის მეურნეობის ტრანსფორმაცია საკვები პროდუქტების ექსპორტის გაზრდის მიზნით, საქართველოს ეკონომიკის გრძელვადიანი ზრდისა და მოსახლეობის ეკონომიკური კეთილდღეობის წინაპირობაა.“

ADB 2021 წელს ინფლაციის 5.0%-მდე შენელებას ვარაუდობს, 2022 წელს კი 3.5%-მდე. მიმდინარე ანგარიშების დეფიციტი 2021 წელს მშპ-ს 10 პროცენტამდე შემცირდება, 2022 წელს კი 7 პროცენტამდე, რადგან საქონლის ბალანსი და ტურიზმი ეტაპობრივად მოიმატებს.

მთავრობის მიერ სურსათის უწყვეტი მიწოდებისკენ მიმართული ღონისძიებების შედეგად ADB 2021 წელს სოფლის მეურნეობის 3.2%, ხოლო 2022 წელს 3.9% ზრდას ელოდება. 2021 წელს ინვესტიციები დამუხრუჭდება, რადგან კერძო ინვესტიციები 7.5%-ით დაიკლებს, თუმცა ზრდაა მოსალოდნელი მომავალ წელს.

მსოფლიოში გაჯანსაღების მძლავრი ტენდენციის ფონზე ექსპორტი 2021 წელს 7.1%-ით გაიზრდება, ხოლო 2022 წელს — 20.4%-ით. იმპორტი მოიმატებს ზომიერად, 2021 წელს 3.6%-ით, ხოლო 2022 წელს — 8.9%-ით.

ADB-ის ანგარიშში ხაზგასმულია საქართველოს სოფლის მეურნეობის განვითარების მნიშვნელობა საფერმო მეურნეობის ცოდნის, კავშირების, ფინანსებთან წვდომისა და ტექნიკური შესაძლებლობის გასაუმჯობესებლად. სოფლის მეურნეობის წარმოების ტექნოლოგიური გაუმჯობესება, ბაზარზე წვდომის გამარტივება და კერძო ინვესტიციების მოზიდვა ხელს შეუწყობს კონკურენციის გაძლიერებას და გაზრდის საექსპორტო პოტენციალს.

მთავრობამ ასევე უნდა განაგრძოს ინვესტიციების წახალისება საირიგაციო სისტემებში, პროდუქტიულობის გაზრდის, სოფლის მეურნეობის საექსპორტო ნაწარმის ხარისხის გაუმჯობესებისა და ევროკავშირისა და სხვა განვითარებული ბაზრების სტანდარტიზაციის მოოთხოვნებთან შესაბამისობის მიზნით.

კომპანია Coca-Cola პლასტიკურ ბოთლებს ქაღალდის ბოთლებით ჩაანაცვლებს. ინფორმაციას ამის შესახებ, BBC ავრცელებს. გამოცემის ცნობით პირველი ნიმუში დანიურმა კომპანიამ Paper Bottle Company წარმოადგინა. სატესტო რეჟიმში კოკა-კოლა 2000 ბოთლს გამოუშვებს.

ბოთლებს პლასტიკური მხოლოდ სახურავი და შიდა მემბრანა აქვს. ექსპერიმენტის საბოლოო მიზანი ბოთლების მთლიანად ქაღალდისგან დამზადებაა.

 “მთელი ამ პერიოდის განმავლობაში ძალიან სკურპულოზურად ვუყურებდით ქვეყანაში არსებულ ეპიდსიტუაციას და აქედან გამომდინარე, თანაზიარი ვიყავით იმ მოსაზრებისა, რომ პირველ რიგში ეპიდსიტუაცია უნდა დარგეულირებულიყო და ამის შემდგომ შეიძლებოდა უკვე ეკონომიკის გახსნაზე საუბარი და ა.შ. ფაქტია, მთელი საზოგადოება ხედავს, რომ ამ მხრივ სიტუაცია მნიშვნელოვნად გაუმჯობესებულია, რამაც საშუალება მისცა ხელისუფლებას, რომ დღევანდელი დღიდან ბევრი რამ გაეხსნა და ამისთვის ძალიან მადლობლები ვართ, – ამის შესახებ საქართველოს ბიზნესასოციაციის პრეზიდენტმა სოსო ფხაკაძემ პრემიერ-მინისტრ გიორგი გახარიასა და მსხვილ დამსაქმებლებს შორის გამართული შეხვედრის შემდეგ განაცხადა.

მისივე თქმით, ეს პოზიტიური სიგნალია ბიზნესისა და ეკონომიკისთვის.

„ეს პოზიტიური სიგნალია ეკონომიკისთვის და პოზიტიურ ვიბრაციას შექმნის, ბუნებრივია, ბიზნესებისათვის. ასევე, ჩვენ დავაყენეთ ძალიან კონკრეტული საკითხი, დარჩენილი შეზღუდვები რაც არის, მათზე ძალიან მალე ვიმსჯელოთ და ისევ და ისევ მივიღეთ დაპირება, რომ დააკვირდებიან მომავალი ორი კვირის განმავლობაში ეპიდსიტუაციას, ვისაუბრეთ რაღაც პარამეტრებზე კორონავირუსის ახალ შემთხვევებთან დაკავშირებით და ვფიქრობთ, რომ ორ კვირაში ჩვენ იმასაც მივაღწევთ, რომ დარჩენილი შეზღუდვები რაც არის ისიც თანდათანობით გაუქმდეს,“- განაცხადა სოსო ფხაკაძემ.

კითხვაზე – იყო თუ არა პრემიერის მხრიდან რაიმე მითითება, საქართველოს ბიზნესასოციაციის პრეზიდენტმა ასე უპასუხა:

„იყო თხოვნა და ეს ჩვენთვის გასაგებია, რომ ჩვენი თანამშრომლების ჯანმრთელობის დაცვისთვის უნდა გავაკეთოთ ყველაფერი, რაც ნიშნავს იმას, რომ ის მოთხოვნები, რაც გვაქვს ეპიდემიოლოგების მიერ დაწესებული, ზედმიწევნით დავიცვათ. ამას ჩვენ ისედაც ვაკეთებთ და ბუნებრივია, მომავალში კიდევ უფრო მეტად გავაკეთებთ, რათა თითოეული მოქალაქის და ჩვენი თანამშრომლების ჯანმრთელობა იყოს დაცული,“- განაცხადა სოსო ფხაკაძემ.

შეხვედრაში, რომელიც საქართველოს მთავრობის ადმინისტრაციაში გაიმართა, სხვადასხვა სფეროში მოქმედი მსხვილი ბიზნესის 40-მდე წარმომადგენელი მონაწილეობდა.