ჭიათურაში მაღაროელების გაფიცვა გრძელდება.გაფიცულები “ჯორჯიან მანგანეზის” ოფისის წინ არიან შეკრებილები და ადმინისტრაციის გადაწყვეტილებას ელოდებიან.
ამ დროისთვის არსებული ინფორმაციით, შეთანხმება ამ დრომდე შეთანხმება მიღწეული არ არის.
მაღაროელები გუშინ გაიფიცნენ, ისინი ხელფასების გაზრდას და სამუშაო პირობების გაუმჯობესებას მოითხოვენ.
ზუგდიდის მუნიციპალიტეტის სოფელ ახალ კახათში ავტოსაგზაო შემთხვევის დროს დაშავებული მოზარდებიდან ერთ-ერთი მოზარდი მართვით სუნთქვაზე იმყოფება. ექიმების შეფასებით, მისი მდგომარეობა მძიმეა.
შედარებით მძიმეა კიდევ ერთი მოზარდის მდგომარეობა. გოგონა მუცლის ღრუს ორგანოების დაზიანებით შეიყვანეს და მას ოპერაცია ესაჭიროება.
ექვსი მოზარდის მდგომარეობა სტაბილურია.
სოფელ ახალ კახათში ავტოსაგზაო შემთხვევის შედეგად რვა მოზარდი დაშავდა.
ადგილობრივების ინფორმაციით, მსუბუქი ავტომანქანის მძღოლი კერძო სახლის ეზოში შევარდა, სადაც სკოლის მოსწავლეები იმყოფებოდნენ.
ტაივანში გეი ქორწინება ოფიციალურად დაკანონდა. ტაივანის პარლამენტი პირველია აზიის კონტინენტზე, რომელმაც ერთსქესიანთა ქორწინებას მხარი დაუჭირა.
2017 წელს, კუნძულის საკონსტიტუციო სასამართლომ მიიჩნია, რომ ერთნაირი სქესის მქონე პირებს უფლება აქვთ კანონიერად იქორწინონ.
ამ გადაწყვეტილების შემდეგ პარლამენტს 2 წელი ჰქონდა ვადა (2019 წლის 24 მაისამდე), იმისთვის რომ სასამართლოს გადაწყვეტილება ოფიციალურად დაემტკიცებინა.
ლგბტქ თემის ათასობით წევრი და უფლებადამცველი საბოლოო გადაწყვეტილებას პარლამენტის შენობასთან ელოდებოდა.
თბილისი პრაიდმა ფეისბუქ გვერდზე ლგბტქ თემის წარმომადგენლების ვიდეომიმართვა გამოაქვეყნა სათაურით: “მოგვისმინეთ. თქვენთვის სათქმელი გვაქვს!“ მიმართვის მონაწილეები მათ პრობლემებზე საუბრობენ და ამბობენ, რომ დამალვას და გაქცევას არ აპირებენ.
“ჩვენზე ძალადობენ ოჯახში, სკოლაში, ქუჩასა და სამსახურში. გვივარდებიან სახლებში, გვაგდებენ ოჯახებიდან, ჩვენ გვკლავენ, გვდევნიან, მაგრამ არ ვგინდა გაქცევა. ჩვენ გვინდა ღირსეული ცხოვრება. ჩვენ გვაწუხებს ქვეყანაში არსებული სიღარიბე, უმუშევრობა, ოკუპაცია, სოციალური უთანასწორობა. ჩვენ გვიყენებენ ამ და სხვა სოციალური პრობლემების გადასაფარად. საჯარო სივრცე გვეკუთვნის ჩვენც და არ დავთმობთ მას. ჩვენი ყოფა არ შემოიფარგლება იმით, რომ სახლში რაც გვინდა ის ვაკეთოთ, ის მოიცავს თავისუფლებას, რომ ვიყოთ საჯარო, ვიყოთ ისინი, ვინც ვართ. ჩვენ გვინდა ვიცხოვროთ მშვიდობიან, არაძალადობრივ, შემდგარ საზოგადოებაში, რომელშიც ყველა დაცულია. ჩვენ ვებრძვით უსამართლობას. ყველა ჩაგრული ადამიანის თუ ჯგუფის მიმართ ვართ სოლიდარულები. ჩვენ არ ვაპირებთ დამალვას. ასე ცხოვრება გაუსაძლისია. ჩვენ ვიბრძვით ღირსებისთვის. ჩვენ არ ვართ ცოტა. ჩვენ ვიცავთ და ვაშენებთ ქვეყანას. ვზურნავთ გარემოზე. ვმსახურობთ და ვიხდით გადასახადებს. ჩვენ ვართ თქვენი შვილები, დები, მშობლები, ძმები, ნათესავები, მეგობრები, თანამშრომლები და მეზობლები. ჩვენ ვართ თქვენ.“– ამბობენ ვიდეოს მონაწილეები
17 მაისს, მთელს მსოფლიოში ჰომოფობიასთან ბრძოლის საერთაშორისო დღეს აღნიშნავენ, საქართველოში ჩაგვრას აქციით არ გააპროტესტებენ. თბილისში ამ დღეს მსვლელობას მხოლოდ ოჯახის სიმტკიცის დღეს მიუძღვნიან. 17 მაისს დედაქალაქის მასშტაბით, რამდენიმე ღონისძიებაა დაგეგმილი, რომელიც საღამოს სამების ეზოში, დავითიანის კონცერტით დასრულდება.
უკვე რამდენიმე წელია ლგბტ თემი და მათი მხარდამჭერები ძალადობის შიშით თბილისის ქუჩებში ვეღარ გამოდიან. თბილისი პრაიდი ღონისძიებების გამართვას ივნისში გეგმავს.
ზუგდიდის საკრებულოს თავმჯდომარის მოადგილემ თაზო ფაცაციამ მის მიერ დაწერილი პოსტისთვის ბოდიში მოიხადა.
“ნაციონალური მოძრაობის” მხრიდან ჩადენილი პროვოკაციული და დესტრუქციული ქმედებების გამო, როდესაც ადგილი ქონდა საკრებულოში შეჭრის მცდელობას, ვიყავი აღშფოთებული და ემოციურ ფონზე, ფეისბუქის პირად გვერდზე გამოვაქვეყნე მიუღებელი სტატუსი, რის გამოც, მინდა ბოდიში მოვუხადო ადრესატს და საზოგადოებას”, – წერს საკრებულოს თავმჯდომარის მოადგილე ფეისბუქზე.
თინა ბოკუჩავას შესახებ სექსისტური და შეურაცხმყოფელი შინაარსის პოსტი მან დღეს განათავსა.
ანაკლიაში ავტომანქანა საცხოვრებელ სახლში შევარდა. ავარიის შედეგად 7 ადამიანი დაშავდა. ერთი დაშავებული საავადმყოფოში გადაიყვანეს, დანარჩენებს პირველადი სამედიცინო დახმარება ადგილზე ჩაუტარდათ.
ადგილობრივების ინფორმაციით, დაშავებულები დამამთავრებელი კლასის მოსწავლეები არიან და მათ ბოლო ზარი ჰქონდათ.
“ვიზრუნებ, რომ ზუგდიდი გახდეს საერთაშორისო რეპუტაციის ქალაქი”-სანდრა რულოვსმა განმუხურში გამართულ შეხვედრაზე ამომრჩეველს მიმართა.
მე როცა მერი ვიქნები და ნამდვილად გავხდები, იმ ფეოდალების ბედით ნაკლებად დავინტერესდებით, დავინტერესდებით ზუსტად იმ ადამიანების ბედით, ვისზეც ახლა გესაუბრეთ… ბაჩანა შენგელიას, როგორც თქვენ, რომ ზუგდიდს ჰყავდეს ევროპული სტილის მმართველობის მერი, რომ ჰყავდეს მზრუნველი მერი, რომელსაც უყვარს და სჯერა საქართველოსი. რომელიც დაამთავრებს იმ იდეას და გამოაცოცხლებს ანაკლიას და ლაზიკას თქვენთვის, რომ თქვენ იქ დასაქმდეთ, თქვენ იქ იცხოვრებთ და ასეთი ქალაქი გახდება ზუგდიდი, რომ საერთაშორისო დონეზე ყველა მის შესახებ გაიგებს, მე ამაზე ვიზრუნებ, რომ ზუგდიდი გახდეს საერთაშორისო რეპუტაციის მქონე და აქედან დაიწყება სამაგალითო გამარჯვება მთელი საქართველოსთვის,“ – განაცხადა რულოვსმა.
თიბისი კაპიტალი ანახლებს თბილისის საცხოვრებელი უძრავი ქონების კვლევას 2019 წლის პირველი კვარტლის ტრანზაქციების მონაცემებით. ახალი საკრედიტო რეგულაციების ფონზე, კვლევის განახლება სექტორის მსხვილი მონაწილეების მზარდმა დაინტერესებამ განაპირობა, მიიღონ რელევანტური, სანდო და კომპეტენტური ინფორმაცია სექტორის შესახებ. კვლევის მიზანია, კომპანიებსა და პოტენციურ ინვესტორებს პერიოდულად მიაწოდოს ინფორმაცია ბაზრის მიმდინარე მდგომარეობისა და სექტორის განვითარების პოტენციალის შესახებ.
კვლევის მიხედვით ირკვევა, რომ 2019 წლის პირველ კვარტალში, 2018 წლის პირველ კვარტალთან შედარებით გაყიდვები არ შემცირებულა, მათ იგივე დონე შეინარჩუნეს. როგორც მოსალოდნელი იყო, 2018 წლის მეოთხე კვარტალთან შედარებით გაყიდვების კლება ფიქსირდება, რაც ნაწილობრივ სეზონურობით, ნაწილობრივ 2018 წლის ბოლო კვატალში ბაზარზე რეკორდული აქტივობით აიხსნება.
ხელშესახები კლების არარსებობის მიუხედავად, სახეზეა ტრენდისგან გადახვევა: წლების მანძილზე გაყიდვები ყოველი წლის პირველ კვარტალში სჭარბობდა წინა წლის პირველი კვარტლის გაყიდვებს. 2019 წლის პირველი კვარტალი ამ მხრივ გამონაკლისია.
2019 წლის იანვრის გაყიდვები წინა წლის იანვართან შედარებით 6%-ით არის გაზრდილი, მცირე, 1%-ანი მატებაა თებერვალში, ხოლო მარტში 6% კლება ფიქსირდება, თუმცა ამ დინამიკიდან დასკვნის გამოტანა ნაადრევია.
2019 წლის პირველ კვარტალში ახალი აშენებული ბინების გაყიდვები გაიზარდა, ხოლო ძველი აშენებული ბინების გაყიდვები შემცირდა, რაც ამ სეგმენტში მცირე ზომის ბინების გაყიდვის კლებით იყო განპირობებული. იპოთეკური პორტფელი კვარტლის მანძილზე უმნიშვნრლოდ გაიზარდა. გაცემული სესხების რაოდენობა და მოცულობა ნაკლებია ვიდრე 2018 წლის პირველ კვარტალში გაცემული სესხებისა.
როგორც მოსალოდნელი იყო, ლარში დენომინირებულ ახალ იპოთეკურ სესხებზე საპროცენტო განაკვეთები კლებულობს, რაც მოთხოვნის სტიმულირებას იწვევს.
გაყიდვებით შეწონილი საშუალო გასაყიდი ფასი მეტწილად სტაბილურია და წინა კვატალთან შედარებით უმნიშვნელო კლება განიცადა. ამავდროულად, ახალი აშენებული ბინების ფასი მცირედ მზარდია, ხოლო ძველი აშენებული ბინებისა – კლებადი.
თიბისი კაპიტალი განახლებულ კვლევაში მკითხველს იპოთეკური სესხების ხელმისაწვდომობის კალკულაციის სენსიტიურობის ანალიზს სთავაზობს, ბინის ზომის და ფასის მიხედვით.