Category: არქივი

საარჩევნო უბნებზე ხმის მიცემა შეწყდა და მალე ბიულეტენების დათვლა დაიწყება.  ქვეყნის მასშტაბით 410 უბანი იყო გახსნილი, რომელიც ამ დროისთვის უკვე დაიხურა.

შეგახსენებთ, დღეს პარლამენტის შუალედური არჩევნები მთაწმინდის ოლქში ჩატარდა, ასევე გაიმართა მერების რიგგარეშე არჩევნები ხუთ მუნიციპალიტეტში, ესენია: მარნეული, ზესტაფონი, ჭიათურა, ზუგდიდი და ხულო. ასევე, დღეს გაიმართა საკრებულოების შუალედური არჩევნები საგარეჯოს, ახმეტის, ადიგენის, ზესტაფონის, ჭიათურის, ტყიბულის, წყალტუბოსა და ოზურგეთის მუნიციპალიტეტებში.

საარჩევნო პროცესს 49 ადგილობრივი სადამკვირვებლო ორგანიზაციის 6 139 და 7 საერთაშორისო ორგანიზაციის 47 დამკვირვებელი აკვირდებოდა.

17:00 საათის მონაცემებით,ამომრჩეველთა აქტივობა ყველაზე დაბალი ისევ მთაწმინდის მაჟორიტარულ ოლქშია. ცენტრალური საარჩევნო კომისიის ინფორმაციით, მთაწმინდაზე ხმა ამომრჩეველთა 26,6% – მა მისცა, რაც რაოდენობრივად არის 11 669 ამომრჩეველი.

ყველაზე მეტი აქტივობა საგარეჯოში ფიქსირდება.აღნიშნულ მუნიციპალიტეტში კენჭისყრაში მონაწილეობა მიიღო 67,8%-მა, რაც რაოდენობრივად არის 309 ამომრჩეველი.

საგარეჯოს შემდეგ აქტივობით გამოირჩევა ხულო – 49,5% (11 931 ამომრჩეველი).

რაც შეეხება დანარჩენ მუნიციპალიტეტებს, ამომრჩეველთა აქტივობა შემდეგნაირად განაწილდა:

ახმეტა – 44,1% (538 ამომრჩეველი), მარნეული – 27,2% (27 098 ამომრჩეველი), ადიგენი – 45,8% (515 ამომრჩეველი), ზესტაფონი – 37% (20 325 ამომრჩეველი), ჭიათურა – 37% (15 890 ამომრჩეველი), ტყიბული – 33,9% (1208 ამომრჩეველი), წყალტუბო – 40,9% (1724 ამომრჩეველი), ოზურგეთი – 37,4% (1902 ამომრჩეველი), ზუგდიდი – 38,6% (46 702 ამომრჩეველი).

საარჩევნო უბნების დახურვამდე საათზე ცოტა დრო რჩება. გაერთიანებული ოპოზიციის ზუგდიდის მერობის კანდიდატი სანდრა რულოვსი  მოუწოდებს ამომრჩეველს გამოიყენოსეს დრო და დააფიქსიროს საკუთარი არჩევანი.

პარლამენტში მთაწმინდის მაჟორიტარი დეპუტატობის კანდიდატი ლევან იოსელიანი ”სამოქალაქო მოძრაობიდან”, მოქალაქეებს აქტივობისკენ მოუწოდებს.იოსელიანის თქმით, ამ დროისთვის ამომრჩევლების აქტივობა 21%-ია რაც ძალიან დაბალია.

„ჩვენს მიერ თავის დროზე შეგროვილი ჩვენი მხარდამჭერების სია, რომელიც წარვადგინეთ სარეგისტრაციოდ, როცა მე უნდა გამევლო რეგისტრაცია, ამ სიიდან ნაწილი მათგანი 10-მდე ადამიანი არის ამოღებული საარჩევნო სიიდან. ეს ადამიანები დაგვიკავშირდნენ და თავიანთი თავი ვერ აღმოაჩინეს სადაც აძლევდნენ ხმას. მნიშვნელოვანია, რომ ყველაზე დაბალი აქტივობა არის მთაწმინდაზე. 5 საათის მონაცემებით ეს არის 21% , რაც მთელი ქვეყნის მასშტაბით არის ყველაზე დაბალი და ეს იძლევა იმის საშუალებას, რომ ხელისუფლებას გაეხსნას გზა და ეს არჩევნები დაასრულოს ისე როგორც მას სჭირდება. თუ არ მოხვალთ არჩევნებზე და არ გააკეთებთ თავისუფალ არჩევანს სხვა შემთხვევაში ხელისუფლება მოუტანს თავის მხარდამჭერებს და დადგება ის შედეგი რაც ხელისუფლებას უნდა,“-განაცხადა ლევან იოსელიანმა.

ონლაინ გამოცემა Presa.ge-ის დამფუძნებელმა ფოთის პოლიციის შენობა ცოტა ხნის წინ დატოვა. ჟურნალისტმა გიორგი კაპანაძემ გათავისუფლების შემდეგ კომენტარს აკეთებს.  

„ჩვენ ვასრულებდით ჩვენს ჟურნალისტურ მოვალეობას. მოვიდა, დაახლოებით, 15 პოლიციელი. წრე გააკეთეს და გვითხრეს, რომ ვითომ, მათ მე ფიზიკური შეურაცხყოფა მივაყენე, სიტყვიერი შეურაცხყოფა მივაყენე, არ დავემორჩილე. დარწმუნებული ვარ, რომ ადმინისტრაციული კოდექსით დაკავება კი არ ჰქონდა გახარიას განზრახული ჩემთან დაკავშირებით. მას უნდოდა, რომ გავენეიტრალებინე. მოპარული ვყავდი პოლიციას რამდენიმე საათის განმავლობაში. რომ დამაკავეს, ფოთში კი არ წამომიყვანეს თავიდან, მატარეს ქუჩებში რამდენიმე საათი, მანქანა მიგვყვებოდა წინ, მერე იმ მანქანას მეორე მანქანა ჩაენაცვლა. მერე ტელეფონზე აქტიურად ურეკავდნენ, მიღებდნენ მანქანაში ვიდეოებს.

შინაგან საქმეთა სამინისტროს ინფორმაციით, ჟურნალისტს პოლიციისადმი დაუმორჩილებლობას ედავებოდნენ.

“მე თავს ზესტაფონის მერად ვაცხადებ”-გოგი წულაია ხმის მიცემის დასრულებამდე თავს  ზესტაფონის მერად აცხადებს. 

“არ აქვს მნიშვნელობა რა შედეგს გამოაცხადებს საოლქო კომისია,  მე თავს ზესტაფონის მერად ვაცხადებ. კოორდინატორები, რომლებიც მყავდა საარჩევნო უბნებზე გამოიქცნენ და დააშინენ. 10 კოორდინატორი უკვე ტელეფონსაც არ პასუხობს. ვაცხდებ, რომ ბოლომდე დავიცავ ჩემს ხმას და ჩემი ამომრჩევლის არჩევანს”, – განაცხადა “თავისუფალი საქართველოს” მერობის კანდიდატმა.

ზუგდიდის ქუჩებში სპეცრაზმის დანაყოფები მობილიზებულია. სპეცტექნიკით აღჭურვილი ავტობუსები ზუგდიდის ქუჩებშია განლაგებული.ერთ-ერთი  ავტობუსი რესტორან „მონოპოლთან“ იდგა, რომელიც სავსე იყო სპეციალური დანიშნულების რაზმის წევრებით.

უცნობია გეგმავს თუ არა ხელისუფლება სპეცოპერაციის ჩატარებას ზუგდიდში. დღის განმავლობაში დაფიქსირებული მიკროავტობუსები მოფარებულ ადგილას არის გაჩერებული. მიკროავტობუსებში არის სხვადასხვა სპეციალური აღჭურვილობებიც – ხელკეტები, ცრემლსადენი გაზები და ფარები.

საარჩევნო პროცესის დასრულებამდე 2 საათზე ნაკლები რჩება და ზუგდიდში სამართალდამცავების დიდი რაოდენობაა მობილიზებული.

სასულიერო პირმა ზუგდიდის მე-5 საარჩევნო უბანი აკურთხა.შესაბამისი ფოტომასალა “ლაივპრესმა” გაავრცელა. ადგილზე მისულმა მოძღვარმა კომისიის წევრებიც დალოცა და  განაცხადა, რომ საარცევნო პროცესის დასრულებამდე  სხვა უბნების კურთხევასაც გეგმავს. 

ჟურნალისტი გიორგი კაპანაძემ პოლიციის შენობა დატოვა. ონლაინ გამოცემა PRESA.GE-ის მთავარი რედაქტორი ცოტა ხნის წინ დააკავეს, თუმცა ის უკვე გათავისუფლებულია.

კაპანაძის დაკავება იმ დროს მოხდა, როდესაც ის და მასთან ერთად მყოფი კიდევ ერთი ჟურნალისტი სუზი მიკირტიჩიანი დაინტერესდნენ პოლიციის მანქანით და მისი გადაღება სცადეს.