Category: არქივი

{{ARTICLEIMAGE}}
უზენაესი სასამართლოს მოსამართლე კანდიდატების წარდგენასთან დაკავშირებით გადაწყვეტილების მიღება მოსამართლე წევრების მიერ გუნდურად მოხდა, ამის შესახებ იუსტიციის უმაღლესი საბჭოს მდივანმა გიორგი მიქაუტაძემ ჟურნალისტებს განუცხადა.

მიქაუტაძე აცხადებს, რომ სასამართლოს უმაღლეს ინსტანციაში წარსადგენ მოსამართლეთა კანდიდატურებზე მას შემდეგ იმსჯელეს, რაც კონსტიტუციის ახალი რედაქცია ძალაში შევიდა. რაც შეეხება არასამთავრობო სექტორისა და საბჭოს არამოსამართლე წევრების მხრიდან გამოთქმულ პროტესტს, რომელიც წარდგენილ კანდიდატურას უკავშირდება, გიორგი მიქაუტაძე ამბობს, რომ ყველა კანდიდატი სასამართლო სისტემაში მაღალი ნდობითა და რეპუტაციით სარგებლობს, მათ შორის, სააპელაციო სასამართლოს თავმჯდომარე მიხეილ ჩიჩალაძე.

“ჩვენ დავასახელეთ სააპელაციო სასამართლოს ორივე თავმჯდომარე. რაც შეეხება მიხეილ ჩინჩალაძეს, მას უზენაეს სასამართლოში მუშაობის 10-წლიანი გამოცდილება აქვს, მათ შორის ხელმძღვანელ თანამდებობაზე. ის ძალიან მაღალი დონის პროფესიონალია”, განაცხადა მიქაუტაძემ.

რამ განაპირობა განახლებული კონსტიტუცის ძალაში შესვლიდან უმოკლეს ვადაში პარლამენტისთვის წარედგინათ უზენაეს სასამართლოში მოსამართლეთა 10 კანდიდატი, საბჭოს მდივნის განცხადებით, უზენაეს სასამართლოში წლებია, რაც მოსამართლეთა სიმცირის პრობლემაა, რის გამოც დიდი რაოდენობით საქმე დაგროვდა, რამაც თავისთავად, მოქალაქეთა უკმაყოფილება წარმოშვა. მისივე თქმით, ყველა წარდგენილი კანდიდატი შესაბამის კრიტერიუმებს აკმაყოფილებს.

“უზენაესი სასამართლოს კანდიდატურების დასახელება განპირობებულია იმ სიტუაციით, რომელიც შექმნილია უზენაეს სასამართლოში. არის 11 მოსამართლე, სისხლის პალატაში ერთი შემადგენლობაც კი არ არის, რომ საქმეები განიხილონ. ეს არის შეფერხებული პროცესი, ან შეიძლება ითქვას, უფრო უარესი, უზენაესი სასამართლო თავის ფუნქციას ვერ შეასრულებს, თუ ჩვენ გადაწყვეტილებას არ მოვიღებთ და არ იქნებიან მოსამართლეები წარდგენილები. ახალი კონსტიტუციის ძალაში შესვლის შემდეგ, ეს პასუხისმგებლობა გადმოვიდა იუსტიციის უმაღლს საბჭოზე. ვფიქრობ, რომ სწორად მოქმედების და იმ აუცილებელი ნაბიჯების გადადგმის დროა, რომელიც უნდა გადაიდგას, ვინაიდან უზენას სასამართლოში არ შეფერხდეს სამართალწარმოების პროცესი. ნაბიჯი იუსტიციის უმაღლესმა საბჭომ უნდა გადადგას. ეს არის ძალიან დიდი პასუხისმგებლობა, რომელსაც ვაცნობიერებთ და ვფიქრობთ, რომ მივიღეთ სწორი გადაწყვეტილება”, განაცხადა გიორგი მიქაუტაძემ.

იუსტიციის უმაღლესმა საბჭომ უზენაეს სასამართლოში წარსადგენი მოსამართლეთა 10 კანდიდატურა დაასახელა.

{{ARTICLEIMAGE}}
იუსტიციის მინისტრის ყოფილი მოადგილის, სანდრო ბარამიძის თქმით, რომელიც დღეს “თავისუფალ დემოკრატებს” შეუერთდა, იუსტიციის სამინისტროში თანამდებობის დატოვების კატალიზატორი სარალიძის საქმე გახდა. მისი თქმით, უთანხმოება ჰქონდა არა ცალკეულ პირებთან, არამედ იმასთან, თუ როგორ იმართებოდა საქმეები “ქართულ ოცნებაში”. მისივე თქმით, უწინდელის მსგავსად, ახლაც ერთი კაცი იღებს გადაწყვეტილებებს ყველაფრის თაობაზე.

“მაგრამ კატალიზატორის როლი, ცხადია, შეასრულა სარალიძის საქმემ, იმიტომ, რომ სარალიძის საქმემ ყველაფერი ამოაყირავა და თავდაყირა დააყენა და სრულიად თვალსაჩნო გახადა ის ამბავი, რომ სისტემური პრობლემები არსებობს ქართულ სამართალდამცავ სისტემაში”, განუცხადა ბარამიძემ “ლიბერალს”.

მისი თქმით, მისთვის შეუძლებელი აღმოჩნდა იმის მოთმენა, რომ პროკურატურის საშუალო დონის ჩინოვნიკის სურვილისამებრ წარიმართება საქმეები და არა ისე, როგორც საჭიროა.

“[…] ხელი დააფარონ ვიღაცას, ან დანაშაული გადააბრალონ სხვას, ის ამას აღწევს და ფაქტობრივად მთელი სისტემა არის ჩარეული ამაში. ამის მოთმენა იყო აბსოლუტურად შეუძლებელი”, თქვა ბარამიძემ.

იგი განმარტავს, რომ ცალკე იუსტიციის მინისტრთან პრობლემა არ ჰქონია, არამედ სისტემურ პრობლემებს ვერ შეეგუა და აპირებს, “ყველანაირი სამართლებრივი საშუალება” გამოიყენოს, რათა ეს შეიცვალოს.

“საქართველოში აღარ შეიძლება მოთმენა იმისი, რომ იყოს ვიღაცის ავტოკრატული რეჟიმი. უკვე გამოვიარეთ შევარდნაძის ეპოქა, გამოვიარეთ სააკაშვილის ეპოქა, ვხედავთ, რომ “ქართულ ოცნებას” ამ კუთხით არაფერი შეუცვლია – როგორც ერთი ადამაიანი ღებულობდა გადაწყვეტილებებს ყველაფრის თაობაზე უწინდელ რეჟიმებში, ახლაც ასეა და არ შემიძლია, ამას შევეგუო. საქართველოში ოდესმე უნდა დამყარდეს ჭეშმარიტი ინსტიტუციური დემოკრატია, სამართლის უზენაესობა და სამართალი პოლიტიკას კი არ უნდა დაექვემდებაროს, ყველაფერი უნდა დაექვემდებაროს სამართალს. ქვეყანა უნდა მართოს კანონებმა და არა ცალკე აღებულმა ინდივიდებმა”, – თქვა ბარამიძემ.

შეკითხვაზე, როგორ აფასებს იუსტიციის მინისტრის, თეა წულუკიანის საქმიანობას, ბარამიძე პასუხობს, რომ მის საქმიანობას არ შეაფასებს, თუმცა მათი გზები რადიკალურად გაიყო.

{{ARTICLEIMAGE}}
“საქართველოში გრიპით დაავადებულთა მაქსიმალურ უმრავლესობას, 95 პროცენტს H1N1-ი აქვს, ხოლო მცირე რაოდენობას H3N2”, ამის შესახებ რადიო თავისუფლებასთან ინტერვიუში საქართველოს დაავადებათა კონტროლისა და საზოგადოებრივი ჯანდაცვის ეროვნული ცენტრის სამეცნიერო საბჭოს თავმჯდომარემ, პაატა იმნაძემ განაცხადა. მისი განმარტებით, ბოლო ერთი კვირის განმავლობაში გრიპით დაავადების დინამიკა მზარდია, თუმცა ეპიდემიური ვითარება არ არის.

“ამ დროისათვის 221 დაავადებულია 100 000 მცხოვრებზე, საქართველოსთვის ეპიდემიის ზღვარი კი არის 450 -500 დაავადებული 100 000 მცხოვრებზე.”-აღნიშნა პაატა იმნაძემ, რომლის თანახმადაც გასულ კვირაში ავადობის მაჩვენებელი 100 000 მოსახლეზე 185 ადამიანი იყო.

მისივე თქმით, H1N1-ით გარდაცვალების ერთადერთი შემთხვევა 24 დეკემბერს აჭარაში დაფიქსირდა. პაატა იმნაძემ პაციენტის პირადი ინფორმაციის დაცვის გათვალისწინებით არ დაასახელა, რა ტიპის გართულებამ გამოიწვია გრიპით დაავადებული ქალის გარდაცვალება.

53 წლის ქალი ბათუმის რესპუბლიკურ საავადმყოფოშო გარდაიცვალა. წინასწარი ლაბორატორიული კვლევით, მას H1N1 ვირუსის, ე.წ. ღორის გრიპის გართულებული ფორმა ჰქონდა. საავადმყოფოს ექიმების ინფორმაციით, პაციენტი კლინიკაში 17 დეკემბერს მიიყვანეს გრიპის უკვე გართულებული ფორმით და მას შემდეგ რეანიმაციულ განყოფილებაში მართვით სუნთქვაზე იმყოფებოდა. აჭარის საზოგადოებრივი ჯანდაცვის ცენტრის მონაცემებით, ამ დროისთვის რეგიონში ლაბორატორიულად დადასტურებულია H1N1 ვირუსის სამი შემთხვევა. ცენტრი მოსახლეობას მოუწოდებს, გრიპის პირველივე ნიშნების გამოვლენისთანავე ექიმს მიმართონ.

{{ARTICLEIMAGE}}
სოფელ ხურვალეთთან დაკავებული ოთარ სამნიაშვილი გაათავისუფლეს. რუსმა ოკუპანტებმა იგი ე.წ. საზღვრის უკანონოდ გადაკვეთის გამო 23 დეკემბერს დააკავეს. იგი შშმ პირია. მომხდართან დაკავშირებით მუშაობდა ცხელი ხაზი და ინფორმირებული იყო ევროკავშირის მისია.

{{ARTICLEIMAGE}}
საქართველოს პრეზიდენტმა საკუთარი გუნდის წევრების ნაწილი წარადგინა. ქეთევან მახარაშვილი-პრეზიდენტის ადმინისტრაციის ხელმძღვანელის მოადგილე იქნება, იგი ეთნიკურ უცირესობებთან და გენდერული თანასწორობის საკითხებზე იმუშავებს, დროებით შეითავსებს პრეს-სპიკერის ფუნქციებსაც.

სიმონ პეტრიცი – მრჩეველი შშმ პირების საკითხებში; ნათია სულავა – მრჩეველი დიასპორის და მოქალაქეობის საკითხებში; აკია ბარბაქაძე – მრჩეველი სამხედრო საკითხებში; ირინა შენგელია-მრჩეველი საზოგადოებასთან და მედიასთან ურთიერთობის საკითხებში და კოტე ნაცვლიშვილი-მრჩეველი კულტურის, განათლების და მეცნიერების საკითხებში.

სალომე ზურაბიშვილმა დღესვე წარადგინა ემიგრაციაში დაბადებული ქართველი, ამერიკის შეერთებულ შტატებში მცხოვრები პიერ ალექსანდრ კრევუ, რომელიც, მისი თქმით, პრეზიდენტის ადმინისტრაციაში სტაჟირების შემდეგ გახდება გუნდის წევრი. 

გიორგი მარგველაშვილის ადმინისტრაცია

{{ARTICLEIMAGE}}
შინაგან საქმეთა სამინისტროს თბილისის პოლიციის დეპარტამენტის ძველი თბილისის სამმართველოს თანამშრომლებმა, ჩატარებული ოპერატიულ-სამძებრო და საგამოძიებო ღონისძიებების შედეგად, 1990 წელს დაბადებული გ.ყ., დამამძიმებელ გარემოებაში 3 პირის განზრახ მკვლელობის მცდელობის ბრალდებით, მოსამართლის განჩინების საფუძველზე თბილისში დააკავეს. დანაშაული 16-დან 20 წლამდე, ან უვადო თავისუფლების აღკვეთას ითვალისწინებს. ინფორმაციას შსს ავრცელებს.

ამავე წყაროს ინფორმაციაში აღნიშნულია:”გამოძიებამ დაადგინა, რომ ბრალდებულმა მიმდინარე წლის 10 დეკემბერს, წყნეთში მდებარე ერთ-ერთ რესტორანში, ურთიერთშელაპარაკებისას, ცივი იარაღით დაზიანებები მიაყენა სპეციალური პენიტენციური სამსახურის ყოფილ და მოქმედ თანამშრომლებს: 1975 წელს დაბადებულ ი.ჭ.-ს, 1977 წელს დაბადებულ ზ.მ.-ს, 1985 წელს დაბადებულ ჭ.გ.-ს, რის შემდეგაც შემთხვევის ადგილიდან მიიმალა. სამართალდამცველებმა სავარაუდო დამნაშავის ვინაობა ოპერატიულად დაადგინეს და ინტენსიური სამძებრო ღონისძიებების შედეგად, გ.ყ. თბილისში, კრწანისში დააკავეს. პოლიციამ აღნიშნულ დაპირისპირებაში მონაწილე კიდევ ერთი პირი – საგანგებო სიტუაციების მართვის სამსახურის თანამშრომელი, 1982 წელს დაბადებული ე.ზ. იმავე დღეს, 10 დეკემბერს, ხულიგნობის ბრალდებით, ცხელ კვალზე დააკავა. მის მიერ ჩადენილი დანაშაული 4-დან 7 წლამდე ვადით თავისუფლების აღკვეთას ითვალისწინებს.

გამოძიება დამამძიმებელ გარემოებაში ორი ან მეტი პირის განზრახ მკვლელობის მცდელობის ფაქტზე, საქართველოს სსკ-ს 19-109-ე მუხლის მე-3 ნაწილის „ა“ ქვეპუნქტით მიმდინარეობს”.

(more…)

{{ARTICLEIMAGE}}
ცესკო-ში კენჭისყრის დასრულების შემდეგ თამარ ჟვანიამ შედეგებზე პირველი კომენტარი გააკეთა. მან საკუთარ უპირატესობაზე მიანიშნა და აღნიშნა, რომ მას განსხვავებული გამოცდილება აქვს.

“მინდა აღვნიშნო, რომ პირველი თავმჯდომარე ვარ, რომელმაც სრული ვადა გავძელი და გავიტანე ასე ვთქვათ ბოლომდე და სრულყოფილად დავასრულე ჩემი პირველი ვადა, რომელიც დასრულდა ამ არჩევნების დასრულებისთანავე. მე ვფიქრობ, რომ ის გამოცდილება არც მე საარჩევნო ადმინისტრაციაში მივიღე არის ძალიან განსხვავებული იმ პერსპექტივიდან, რაც მე 5 წლის წინ მაგალითად მეგონა, რომ საარჩევნო ადმინისტრაციაში იყო”, განაცხადა თამარ ჟვანიამ.

ცესკო-მ ახალი თავმჯდომარე აირჩია. 8 ხმა მიიღო თამარ ჟვანიამ, 1 – ლადო ბოჟაძე. ცესკოს თავმჯდომარის არჩევაში მონაწილეობა არ მიუღია ოპოზიციას. ​ენმ-ს და “ევროპული საქართველოს” წარმომადგენლებს. მათ სხდომა პროტესტის ნიშნად კენჭისყრის დაწყებამდე დატოვეს.

ოპოზიციონერ დავით კირთაძის განცხადებით, კენჭისყრა ფარსია და ხელისუფლება აპირებს, დამსახურება დაუფასოს ცესკო-ს ყოფილ თავმჯდომარეს თამარ ჟვანიას და უპრეცედენტო გაყალბებისა და დარღვევების ფონზე ჩატარებული არჩევნების მიუხედავად, ის მეორე ვადით დატოვოს თავმჯდომარის თანამდებობაზე.

“როდესაც ხელისუფლება აყალბებდა არჩევნებს, ცესკო-ს არათუ რეაგირება მოუხდენია, არამედ, პირიქით, აღნიშნული გაყალბების პროცესში იყო ჩართული და შესაბამისად, ამ ადმინისტრაციის მიერ ხელშეწყობილმა პრეზიდენტმა დაუბრუნა ხარკი ასევე თავმჯდომარეს და წარმოადგინა უკან, რომელიც სავარაუდოდ, დღეს 14:00 საათზე იქნება არჩეული, განაცხადა დავით კირთაძემ.

ლადო ბოჟაძე და მარიამ შელეგია შერჩევის ეტაპზე არათანაბარ და არაკონკურენტულ გარემოზე საუბრობენ და აცხადებენ, რომ თამარ ჟვანიასთან შედარებით მათი არჩევის შესაძლებლობა დაბალია.

საქართველოს ცენტრალური საარჩევნო კომისიის თავმჯდომარეობის კანდიდატი, ლადო ბოჟაძე ამბობს, რომ თამარ ჟვანიასთან კონკურენცია საკმაოდ რთულია, რადგან ის საარჩევნო ადმინისტრაციაში 5 წლის განმავლობაში მუშაობდა.

“ჩვენ ვერ ვართ თანაბარ პირობებში იმ მარტივი მიზეზის გამო, რომ თამარი არის მოქმედი თავმჯდომარე, აქ მხოლოდ ხმის მიცემაზე არ არის საუბარი, აქ საუბარია იმაზე, რომ ის ამ ადამიანებთან მუშაობდა წინა 5 წლის განმავლობაში და მათთან აქვს როგორც პირადი, ასევე საქმიანი ურთიერთობები და აქედან გამომდინარე, მათთვის ჩვენთან შედარებით თამარი არის სწორედ საუკეთესო კანდიდატი”, ამბობს ბოჟაძე.

არათანაბარ პირობებზე საუბრობს საქართველოს ცენტრალური საარჩევნო კომისიის თავმჯდომარეობის კანდიდატი მარიამ შელეგიაც. მისივე თქმით, არასწორია, როდესაც ცესკო-ს წევრებს პარლამენტი ირჩევს, ხოლო თავმჯდომარეს თავად წევრები.

“არ არის სწორი როდესაც ცესკო-ს წევრს ირჩევს პარლამენტი , ხოლო ცესკო-ს თავმჯდომარეს, რომელსაც ყველაზე მაღალი ლეგიტიმაცია უნდა გააჩნდეს, ირჩევს ის 12 წევრი, რომელიც წლების განმავლობაში ერთად მუშაობდნენ, ამიტომ ცოტა არათანაბარი პირობებია სხვა კანდიდატებს და მოქმედ თავმჯდომარეს შორის, რომელიც თვითონ აძლევს ხმას თავის თავს”, ამბობს შელეგია.