უკრაინის შეიარაღებული ძალების მთავარსარდლად გენერალ-მაიორი მიხაილო დრაპატი დაინიშნა. ამის შესახებ პრეზიდენტმა ვოლოდიმირ ზელენსკიმ Telegram-ზე გამოქვეყნებულ პოსტში განაცხადა.
- „გადავწყვიტე, რომ უკრაინის შეიარაღებული ძალების ახალი მთავარსარდალი მიხაილო დრაპატი გახდება. მიხაილოსთან, ევგენი ხმარასთან და პავლო პალისასთან ერთად განვსაზღვრეთ, თუ როგორ უნდა განახლდეს უკრაინის შეიარაღებული ძალების გენერალური შტაბის კონფიგურაცია. ფაქტია, რომ ალექსანდრ სირსკიმ უზრუნველყო უკრაინის შედეგები კიევის დაცვაში, ხარკოვის შეტევით ოპერაციასა და კურსკის ოპერაციაში. მნიშვნელოვანი გზაა გავლილი, უკრაინის დაცვა გრძელდება და საჭიროა ღირსეული მოპყრობა თითოეული მეომრის მიმართ. მე მადლობელი ვარ ალექსანდრ სირსკის და თითოეული ჩვენი მეომრის უკრაინის ძლიერი ფრონტალური პოზიციებისთვის. მადლობელი ვარ მიხაილო დრაპატის ზუსტად ასეთი ხედვისთვის. დღეს ალექსანდრ სირსკისთან და ანდრი ჰნატოვთან ერთად ვისაუბრეთ სამსახურის შემდგომ ფორმატებსა და საქმეების სწორ გადაბარებაზე. ყველა ჩვენგანის სურვილი ერთია — მტერზე გამარჯვება და ფრონტზე ისეთი პირობების მიღწევა, ასევე რუსეთზე იმგვარი ზეწოლა, რაც რუსეთს მშვიდობისკენ აიძულებს. ხვალ ყველა გადაწყვეტილებას ოფიციალურად გავაფორმებთ. ამ სიტუაციიდან უკრაინა უფრო ძლიერი უნდა გამოვიდეს და რუსეთს უფრო გაუჭირდება. დიდება უკრაინას!“- აცხადებს ვოლოდიმირ ზელენსკი.
დრაპატიმ ამ პოსტზე გენერალი ოლექსანდრ სირსკი ჩაანაცვლა.
თავად სირსკის ზელენსკიმ მადლობა გადაუხადა ფრონტზე უკრაინის მტკიცე პოზიციების შენარჩუნებისთვის, ხოლო გამოყო სირსკის წვლილი კიევის თავდაცვაში, ხარკოვის კონტრშეტევასა და კურსკის ოპერაციაში.
ვინ არის მიხაილო დრაპატი
44 წლის გენერალ-მაიორს, მიხაილო დრაპატის დასავლური მედია ახასიათებს, როგორც ახალი თაობის „ბრძოლის ველის ლიდერს“, რომელსაც უდიდესი ავტორიტეტი აქვს უშუალოდ სანგრებში მყოფ ჯარისკაცებს შორის, რადგან მისი მთელი კარიერა მებრძოლების გადარჩენის მაგალითია.
უკრაინული სამხედრო წყაროები დრაპატის ბიოგრაფიიდან რამდენიმე საკვანძო ეპიზოდს გამოყოფენ:
- 2014 წლის მარიუპოლის გარღვევა: როდესაც სეპარატისტებმა უკრაინული ძალები ალყაში მოაქციეს, მაშინდელმა მაიორმა დრაპატიმ პირადი პასუხისმგებლობა აიღო, თავისი ჯავშანმანქანა (BMP) მაქსიმალურად ააჩქარა, მთელი ძალით შეასკდა მტრის ბეტონის ბარიკადებს, დაამსხვრია ისინი და თავისი ბატალიონი განადგურებას გადაარჩინა. ეს კადრები მაშინ სწრაფად გავრცელდა და უკრაინაში ლეგენდარული გახდა.
- “იზვარინოს“ ალყის გარღვევა: იმავე წლის აგვისტოში, როდესაც რუსული „გრადების“ ცეცხლის ქვეშ მისი დანაყოფი საზღვართან მიატოვეს, მან უარი თქვა იარაღის დაყრაზე, ცეცხლის ქვეშ 160 კილომეტრი გაიარა და 260 მებრძოლი ალყიდან უდანაკარგოდ გამოიყვანა.
- ხერსონის განთავისუფლების ოპერაცია (2022 წლის შემოდგომა): დრაპატი სათავეში ჩაუდგა ოპერატიულ-ტაქტიკურ ჯგუფ „ხერსონს“. სწორედ მან დაგეგმა და მართა სამხრეთ უკრაინაში რუსეთის არმიის ლოგისტიკის ჩაკეტვისა და დნეპრის მარჯვენა სანაპიროს, მათ შორის ქალაქ ხერსონის, განთავისუფლების ურთულესი სამხედრო კამპანია.
- ხარკოვის კრიზისის ჩაქრობა (2024 წლის მაისი): როდესაც რუსებმა ხარკოვის ოლქში ახალი ფრონტი გახსნეს და ვოვჩანსკის მიმართულებით სერიოზული საფრთხე შეიქმნა, ზელენსკიმ კრიზისულ ზონაში საგანგებოდ დრაპატი გაგზავნა. მან უმოკლეს დროში შეაჩერა რუსების წინსვლა და ფრონტის ხაზი სტაბილიზაციამდე მიიყვანა.
უკრაინის ჯარი და სამოქალაქო საზოგადოება ახალი მთავარსარდლისგან სამხედრო სტრატეგიის სრულ ტექნოლოგიურ მოდერნიზაციასა და თითოეული მებრძოლის სიცოცხლის დაფასებას ელოდება.
შეიარაღებული ძალების მთავარსარდლად მიხაილო დრაპატის დანიშვნამდე, ვითარება საკმაოდ დაძაბული იყო: 15 ივლისს თავდაცვის მინისტრის, მიხაილო ფედოროვის გათავისუფლების შემდეგ, რომელმაც თანამდებობაზე მხოლოდ ექვსი თვე გაატარა, მაგრამ სწრაფად მოიპოვა საზოგადოების მხარდაჭერა სამხედრო მიღწევების გამო, ათასობით უკრაინელი გამოვიდა ქუჩებში ქვეყნის მასშტაბით.  ფედოროვმა გათავისუფლების შემდეგ განაცხადა, რომ თავად ითხოვდა სირსკის გადაყენებას და ადანაშაულებდა სამხედრო რეფორმების დაბლოკვაში. 
საპროტესტო აქციები 16, 17, 18, 19, 20 და 21 ივლისს გაგრძელდა კიევსა და სხვა ქალაქებში,
სანამ ზელენსკიმ საბოლოო გადაწყვეტილება არ მიიღო დრაპატის მთავარსარდლად დანიშვნის შესახებ. ამასთან ერთად, ზელენსკიმ შეხვედრა გამართა ფედოროვთან და მას შესთავაზა მნიშვნელოვანი თანამდებობაც რაც, სავარაუდოდ, მიზნად ისახავდა პროტესტების ერთ-ერთი მთავარი მოთხოვნის — ფედოროვის სახელმწიფო საქმიანობაში დაბრუნება.
18-19 ივლისს გავრცელდა ინფორმაცია, რომ განიხილებოდა მისთვის ე.წ. “მილტექ ცარის” (military-tech coordinator) როლის შეთავაზება — სამხედრო ტექნოლოგიების, შეიარაღების წარმოებისა და უსაფრთხოების უწყებებს შორის კოორდინაციაზე პასუხისმგებელი პოზიცია.
ასევე, 20 ივლისს გავრცელდა ცნობა, რომ ფედოროვმა უარყო ასევე ეროვნული უსაფრთხოებისა და თავდაცვის საბჭოს (NSDC) ფარგლებში შეთავაზებული პოსტიც — მიუხედავად იმისა, რომ ეს პოზიცია პრეზიდენტთან პირდაპირ წვდომას და თავდაცვის რეფორმებზე ზედამხედველობის მანდატს ითვალისწინებდა.
21 ივლისს, დრაპატის დანიშვნის დღეს, ზელენსკიმ საჯაროდ განაცხადა, რომ ფედოროვს “მნიშვნელოვანი პოსტი” შესთავაზა სახელმწიფოს ტექნოლოგიური განვითარების მიმართულებით — თუმცა ჯერჯერობით უცნობია, მიღო თუ არა ფედოროვმა ეს კონკრეტული შეთავაზება.