რუსეთის ცენტრალური ბანკი ზედიზედ მეექვსე თვეა რეზერვებიდან ოქროს ყიდის, რათა ფედერალური ბიუჯეტის დეფიციტი დაფაროს, რომელმაც ბოლო ექვს თვეში თითქმის 6 ტრილიონ რუბლს მიაღწია. ამის შესახებ სამშაბათს, 21 ივლისს, The Moscow Times-ი ცენტრალური ბანკის მონაცემებზე დაყრდნობით წერს.
2026 წლის ივნისში რუსეთის ცენტრალური ბანკის ოქროს მარაგი, რომელიც მსოფლიოში სიდიდით მეხუთედ ითვლება, 9,33 ტონით შემცირდა. მარეგულირებლის მონაცემებით, წლის დასაწყისიდან რეზერვებიდან უკვე 43,5 ტონა ოქრო გაიყიდა.
ოქროს მსოფლიო საბჭოს მონაცემებით, ეს თანამედროვე რუსეთის ისტორიაში ოქროს გაყიდვის რეკორდული მოცულობაა. ბოლოს რუსეთის ცენტრალურმა ბანკმა მსგავსი რაოდენობის ოქრო 2002 წელს გაყიდა, როდესაც იანვრიდან ივნისამდე ქვეყნის ოქროს მარაგები 36,1 ტონით შემცირდა.
ანალიტიკოსი: ოქროს გაყიდვა ნავთობისა და გაზის შემოსავლების შემცირებას ანაზღაურებს
Freedom Global-ის ანალიტიკოსმა ვლადიმირ ჩერნოვმა Reuters-ს განუცხადა, რომ რუსეთის ცენტრალურ ბანკს ოქროს გაყიდვით დაახლოებით 5,6 მილიარდი დოლარის მიღება შეეძლო.
მისი განმარტებით, როდესაც ნავთობისა და გაზის შემოსავლები ბიუჯეტის წესით განსაზღვრულ დონეზე ნაკლებია, ან ეროვნული კეთილდღეობის ფონდის თანხები ქვეყნის შიგნით ინვესტიციებზე იხარჯება, რუსეთის ცენტრალური ბანკი ლიკვიდური სარეზერვო აქტივებით საპასუხო ოპერაციებს ახორციელებს.
ჩერნოვის თქმით, ცენტრალური ბანკი ამ შემთხვევაში მხოლოდ მექანიზმის ტექნიკურ ნაწილს ასრულებს და ბიუჯეტის დეფიციტის ოქროს გაყიდვით დაფარვის შესახებ დამოუკიდებელ გადაწყვეტილებას არ იღებს.
ანალიტიკოსის შეფასებით, დასავლეთის ქვეყნებში რუსეთის სავალუტო რეზერვების გაყინვის ფონზე ოქრო მსგავსი ოპერაციებისთვის განსაკუთრებით ხელსაყრელი აქტივია, რადგან ის რუსეთში ინახება, ცენტრალური ბანკისთვის ხელმისაწვდომია და ბოლო წლებში მნიშვნელოვნად გაძვირდა.
ჩერნოვის ვარაუდით, ცენტრალურმა ბანკმა ოქროს ძირითადი ნაწილი, სავარაუდოდ, რუსულ ბანკებს საბირჟო და არასაბირჟო ბაზრებზე მიჰყიდა. ამას არაპირდაპირ ადასტურებს მოსკოვის ბირჟის მონაცემებიც: 2026 წელს ოქროთი ვაჭრობის მოცულობა მკვეთრად გაიზარდა და მხოლოდ მარტში 42,6 ტონას მიაღწია, წერს The Moscow Times-ი.