Blog

გერმანიის პრეზიდენტმა, ფრანკ-ვალტერ შტაინმაიერმა ZDF-თან ინტერვიუში განაცხადა, რომ გერმანია ამერიკის შეერთებულ შტატებს უკრაინისთვის კასეტური საბრძოლო მასალის მიწოდებას ხელს ვერ შეუშლის. შტაინმაიერმა თქვა, რომ ის იყო ადამიანი, რომელმაც გერმანიის სახელით ოსლოში კასეტური საბრძოლო მასალის აკრძალვის კონვენციას ხელი მოაწერა.

• “თუმცა, ამჟამინდელ ვითარებაში გერმანია წინ ვერ აღუდგება აშშ-ს.” – თქვა გერმანიის პრეზიდენტმა.

უკრაინაში კასეტური საბრძოლო მასალის მიწოდების საკითხმა აშშ-ს მოკავშირეების ბანაკში უთანხმოება  გამოიწვია , რაც ადრე იშვიათი იყო. დასავლეთის ქვეყნები სათითაოდ აკეთებენ საჯარო განცხადებებს და ვაშინგტონის გადაწყვეტილების გამო შეშფოთებას გამოთქვამენ. კერძოდ, დიდმა ბრიტანეთმა, კანადამ, ახალმა ზელანდიამ და ესპანეთმა უკვე განაცხადეს, რომ ამ იარაღის გამოყენებას ეწინააღმდეგებიან.

პარასკევს გახდა ცნობილი, რომ უკრაინისთვის აშშ-ის სამხედრო დახმარების ახალ პაკეტში 800 მილიონი დოლარის ოდენობის კასეტური საბრძოლო მასალები შევა.

აშშ-ს პრეზიდენტმა ჯო ბაიდენმა CNN-თან ინტერვიუში განაცხადა, რომ ამ რთული გადაწყვეტილების მიღებამდე მან კონსულტაციები გაიარა მოკავშირეებთან და იცის მათი პოზიცია, მაგრამ გადაწყვიტა ემოქმედა უკრაინის ინტერესებიდან გამომდინარე.

კასეტური საბრძოლო მასალები – საარტილერიო ჭურვები და საჰაერო ბომბებია, რომლებიც დიდი რაოდენობით მცირე ფეთქებად მასალებს ფანტავს.  მათი დიდი პროცენტი მაშინვე არ ფეთქდება და ხალხისთვის საშიში რჩება მრავალი წლის შემდეგაც კი, როდესაც საომარი მოქმედებები შეიძლება უკვე დასრულებული იყოს.

მსოფლიოს ასზე მეტმა ქვეყანამ ხელი მოაწერა კონვენციას, რომელიც კრძალავს მის გამოყენებას, რადგან ის უქმნის მზარდ საფრთხეს მშვიდობიან მოსახლეობას. შეერთებულმა შტატებმა, რუსეთმა და უკრაინამ დოკუმენტს ხელი არ მოაწერეს.

კვირას ბაიდენი დიდ ბრიტანეთში ჩადის  ნატოს სამიტის წინ, რომელიც ვილნიუსში 11-12 ივლისს გაიმართება. ამერიკის პრეზიდენტი აპირებს კასეტური საბრძოლო მასალის მიწოდების საკითხს განიხილოს ბრიტანეთის პრემიერ-მინისტრ რიში სუნაკთან, რომელიც უკვე გამოვიდა თეთრი სახლის გეგმების წინააღმდეგ.

ახალი ზელანდიის პრემიერ მინისტრმა კრის ჰიპკინსმა კასეტურ იარაღს უწოდა  “განურჩეველი, რომელსაც შეუძლია მასიური ზიანი მიაყენოს უდანაშაულო ადამიანებს”, როგორც ომის დროს, ასევე გრძელვადიან პერიოდში.

ესპანეთს ასევე მტკიცედ სწამს, რომ გარკვეული ტიპის იარაღი არ უნდა მიეწოდოს უკრაინას, განაცხადა თავდაცვის მინისტრმა მარგარიტა რობლესმა.

„არა კასეტურ საბრძოლო მასალას და დიახ უკრაინის ლეგიტიმურ დაცვას, რაც ჩვენი გაგებით არ უნდა განხორციელდეს ამ იარაღის დახმარებით“, – თქვა მან.

კანადის მთავრობის განცხადებით ის განსაკუთრებით შეშფოთებულია, რომ წლების შემდეგ ბავშვები შეიძლება დაზარალდნენ აუფეთქებელი საბრძოლო მასალისგან.

ოტავამ კიდევ ერთხელ დაადასტურა თავისი ერთგულება კასეტური საბრძოლო მასალის კონვენციის მიმართ. „ჩვენ სერიოზულად ვეკიდებით ჩვენს ვალდებულებებს და იგივეს ველით სხვებისგანაც“, – ნათქვამია ოფიციალურ განცხადებაში.

იმავდროულად, გერმანიამ, რომელმაც ასევე მოაწერა ხელი კონვენციას, განაცხადა, რომ მიუხედავად იმისა, რომ არ აპირებს უკრაინისთვის ასეთი იარაღის მიწოდებას, მას ესმის შეერთებული შტატების პოზიცია.

„დარწმუნებულნი ვართ, რომ ჩვენი ამერიკელი მეგობრები მთელი პასუხისმგებლობით მიუდგნენ თავიანთ გადაწყვეტილებას“- განაცხადეს მათ ბერლინში.

ვაშინგტონის გადაწყვეტილებას აკრიტიკებენ უფლებადამცველი ორგანიზაციებიც. Amnesty International აფრთხილებს ყველას, რომ უკრაინაში მშვიდობიანი მოსახლეობა ომის დასრულებიდან მრავალი წლის შემდეგ იგრძნობს კასეტური საბრძოლო მასალის ეფექტს.

კასეტური საბრძოლო მასალები უკვე გამოყვენებულ იქნა მიმდინარე კონფლიქტში ორივე მხარის, რუსეთისა და უკრაინის მიერ.

უკრაინის თავდაცვის მინისტრი, ოლექსი რეზნიკოვი ირწმუნება, რომ სადაო იარაღის ამერიკული მიწოდება გამოყენებული იქნება მხოლოდ მტრის თავდაცვის ხაზების გასარღვევად, მაგრამ არა დასახლებულ პუნქტებთან ახლოს. რუსეთის საგარეო საქმეთა სამინისტროს სპიკერმა მარია ზახაროვამ განაცხადა, რომ „კიევის დაპირებები უსარგებლოა“.

ბაიდენის მიერ ხელმოწერილი აღმასრულებელი ბრძანება გვერდს აუვლის კანონს, რომელიც კრძალავს ისეთი კასეტური საბრძოლო მასალის წარმოებას, გამოყენებას ან გადაცემას, რომელთა არაფეთქების მაჩვენებელი ერთ პროცენტზე მეტია.

ამავდროულად, აშშ-ის ეროვნული უსაფრთხოების მრჩეველი ჯეიკ სალივანი ამტკიცებს, რომ ამერიკული კასეტური ბომბები ბევრად უფრო მცირე საფრთხეს წარმოადგენს, ვიდრე ის, რაც რუსეთმა უკვე გამოიყენა კონფლიქტში.

მისი თქმით, აუფეთქებელი ამერიკული ჭურვების რაოდენობა 2,5%-ზე ნაკლებია, ხოლო რუსული ჭურვების 30-40%.

„პრაიდ ფესტივალის“ ტერიტორიიდან მონაწილეთა ევაკუაცია განხორციელდა, – ამის შესახებ განცხადებას „თბილისი პრაიდი“ ავრცელებს.

მათი განცხადებით, პოლიციამ ტერიტორიის დაცვა ვერ მოახერხა.

„მოგვიწია ტერიტორიის დატოვება. სამართალდამცველებმა ვერ შეძლეს ტერიტორიის დაცვა. განხორციელდა ევაკუაცია სამარშუტო ტაქსებით”, – აღნიშნულია განცხადებაში.

გარდა ამისა, “თბილისი პრაიდის” განცხადებით, “დღეს განვითარებული მოვლენები მიანიშნებს, რომ თავდასხმა წინასწარ კოორდინირებული და შეთანხმებული შინაგან საქმეთა სამინისტროსა და ძალადობრივ დაჯგუფება “ალტ-ინფოს” შორის”.

პრეზიდენტი ზურაბიშვილი განცხადებას ავრცელებს “პრაიდის ფესტივალის“ წინააღმდეგ დაანონსებულ ძალადობასთან დაკავშირებით:

“საქართველოს პრეზიდენტს მიაჩნია, რომ სიტყვისა და გამოხატვის თავისუფლება ადამიანის ფუნდამენტური უფლებაა და ნებისმიერი რამ, რაც ამ პრინციპს ეწინააღმდეგება მიუღებელია! დაუშვებელია ძალადობა და ძალადობრივი ჯგუფების წახალისება.

საქართველოს პრეზიდენტი მოუწოდებს შესაბამის ორგანოებს უზრუნველყონ ,,პრაიდის ფესტივალის“ უსაფრთხოდ ჩატარება და მონაწილეთა სიტყვისა და გამოხატვის თავისუფლება, რომელიც დაცულია კონსტიტუციით.

,,პრაიდის ფესტივალს“, პრეზიდენტის დავალებით, დაესწრება პრეზიდენტის მრჩეველი ადამიანის უფლებათა საკითხებში.“–ნათქვამია განცხადებაში.

მეუფე შიოს მოწამვლის ფაქტზე, შსს-მ გამოძიება სისხლის სამართლის კოდექსის 19-108-ე მუხლით დაიწყო რაც განზრახ მკვლელობის მცდელობას გულისხმობს.

უწყებაში აცხადებენ, რომ გამოძიების შედეგების მიხედვით შესაძლოა მუხლი გადაკვალიფიცირდეს.

საქართველოს საპატრიარქოს საზოგადოებასთან ურთიერთობის სამსახურის ხელმძღვანელის, მამა ანდრია ჯაღმაიძის ინფორმაციით, მეუფე შიოს სისხლის ანალიზში გარკვეული ცვლილებებია და მძიმე მეტალების შემცველობა დაშვებულზე უფრო მეტია.

ხვალ 8 ივლისს, თბილი პრაიდის დახურული ფესტივალი გაიმართება – საქართველოს შინაგან საქმეთა სამინისტრო “თბილისი პრაიდის” უკვე გამართულ და დაგეგმილ დახურულ ღონისძიებებთან დაკავშირებით განხორციელებული პრევენციული ღონისძიებების შესახებ განცხადება ავრცელებს და კონტრაქციის მონაწილე მოძალადეებს აფრთხილებს

• “შინაგან საქმეთა სამინისტროს წარმომადგენლების ჩართულობით, გაეროს, სხვა საერთაშორისო ორგანიზაციების, საქართველოს სახალხო დამცველის აპარატის, ასევე, დიპლომატიური კორპუსის წარმომადგენლების მონაწილეობით, შეკრებების უსაფრთხო გარემოში ჩატარების მიზნით, რამდენიმე სამუშაო შეხვედრა გაიმართა.მიმდინარე წლის 2 და 6 ივლისს, მშვიდ ვითარებაში ჩატარდა 2 დახურული ღონისძიება.
  8 ივლისს კონკრეტულ ლოკაციაზე, შემოსაზღვრულ ადგილას, დაგეგმილი დახურული ღონისძიების უსაფრთხო გარემოში ჩატარების მიზნით, სამინისტროს წარმომადგენლები კომუნიკაციაში არიან შეკრების ორგანიზატორებთან.აღნიშნული დახურული ღონისძიების მშვიდ ვითარებაში ჩატარების მიზნით, პოლიციის შესაბამისი დანაყოფები მობილიზებულნი იქნებიან ყველა საჭირო ლოკაციაზე და კომპეტენციის ფარგლებში დაიცავენ მართლწესრიგს და უსაფრთხოებას. შინაგან საქმეთა სამინისტრო მიიღებს ყველა შესაბამის ზომას, რათა უზრუნველყოს ღონისძიების უსაფრთხო ფორმატში ჩატარება, აგრეთვე, თითოეული ადამიანის გამოხატვისა და შეკრების თავისუფლების დაცვა, რომელიც არ გასცდება კანონით დასაშვებ ფარგლებს.გარდა ამისა, მასობრივი ინფორმაციის საშუალებებით ვრცელდება ინფორმაცია, რომ ადამიანების რამდენიმე ჯგუფი თბილისში, კონკრეტულ ლოკაციაზე გეგმავს შეკრებას, ღონისძიების ადგილზე მისვლას და კონტრაქციის გამართვას.შინაგან საქმეთა სამინისტრო მოუწოდებს კონტრაქციის ორგანიზატორებს და მონაწილეებს, დაიცვან კანონი, დაემორჩილონ პოლიციის კანონიერ მოთხოვნებს და არ გასცდნენ კანონით დასაშვებ შეკრებისა და მანიფესტაციის უფლებით სარგებლობის ფარგლებს, წინააღმდეგ შემთხვევაში, პოლიცია იმოქმედებს საკუთარი მანდატის შესაბამისად.ასევე, მოვუწოდებთ ღონისძიების ჩატარებისა და კონტრაქციის ტერიტორიაზე მომუშავე მედიის წარმომადგენლებს, კოორდინაციაში იყვნენ შინაგან საქმეთა სამინისტროს სტრატეგიული კომუნიკაციების დეპარტამენტის თანამშრომლებთან და გაითვალისწინონ ადგილზე მყოფი სამართალდამცველების მითითებები” – ნათქვამია უწყების განცხადებაში.

თბილისი პრაიდის“ განცხადებით, 8 ივლისს დაგეგმილი „პრაიდ ფესტივალის“ ფარგლებში არავითარი ქუჩის მსვლელობა არ ტარდება, ხოლო ფესტივალი კერძო, დახურულ ტერიტორიაზე გაიმართება.„თბილისი პრაიდის“ განმარტებით, აქვთ მყარი გარანტიები, რომ ფესტივალი იქნება დაცული.

• ”ხვალ პრაიდის ფესტივალი გაიმართება – დახურული ღონისძიება, რომელსაც უკვე მესამე წელია ვატარებთ.რადიკალურ ჯგუფებს განზრახ შეჰყავთ საზოგადოება შეცდომაში პრაიდის ფესტივალთან დაკავშირებით. ისინი ავრცელებენ ცრუ ინფორმაციას, რომ თბილისის ქუჩებში ე.წ.“გეიაღლუმი” ტარდება, რათა საზოგადოების გარკვეულ სეგმენტში სიძულვილი გააღვივონ.კიდევ ერთხელ გვინდა ხაზი გავუსვათ ფაქტს, რომ არ ტარდება არავითარი ქუჩის მსვლელობა, ხოლო ფესტივალი კერძო, დახურულ ტერიტორიაზე, დარეგისტრირებული სტუმრებისთვის იმართება. მას აქვს საგანმანათლებლო, კულტურული და სოციალური ხასიათი.ჩვენი გუნდი უკვე თვეებია, საერთაშორისო პარტნიორების ჩართულობით, მოლაპარაკებას აწარმოებს შინაგან საქმეთა სამინისტროსთან. გვაქვს მყარი გარანტიები, რომ ფესტივალი იქნება დაცული.ფესტივალზე ველით როგორც ქვიარ თემის წევრებს, ასევე ჩვენს მხარდამჭერებს, დიპლომატიურ კორპუსს და საერთაშორისო პარტნიორებს. უსაფრთხოების საკითხებიდან გამომდინარე, ტერიტორიაზე დაიშვებიან მხოლოდ სრულწლოვანი სტუმრები.მოვუწოდებთ ყველა თანამოქალაქეს, დაგმოს რადიკალური ჯგუფების ძალადობრივი მუქარები პრაიდის ფესტივალის მიმართ. ნუ გახდებით დეზინფორმაციის მსხვერპლი და გამავრცელებელი. დადექით დემოკრატიის, ადამიანის უფლებებისა და სიყვარულის მხარეს”-ნათქვამია განცხადებაში.

ამასთანავე, საქართველოს მართმადიდებელი ეკლესიის საპატრიარქო მორიგ ჰომოფობიურ განცხადებას ავრცელებს და კიდევ ერთხელ ამბობს, რომ კანონის მიღება ე.წ. ლგბტ პროპაგანდის დასარეგულირებლად მიზანშეწონილად მიაჩნიათ. მათი თქმით არავის არასოდეს არ მოუწოდებენ ძალადობისკენ. საპატრიარქოში ამბობენ, რომ საქართველოში მოქმედ სხვადასხვა რელიგიის წარმომადგენელთა ერთობლივი პოზიცია და განცხადებაა, რომ „ამას არ შეეგუებიან“.

განცხადება საპატრიარქოს საზოგადოებასთან ურთიერთობის სამსახურის უფროსმა ანდრია ჯაღმაიძემ მეტეხის ეზოში წაიკითხა.

• „ჩვენ ერთმანეთთან ძალადობით არ ვწყვეტთ საკითხებს, არც არავის არასდროს მოვუწოდებთ ძალადობისკენ და გვაქვს გულწრფელი სურვილი, ძალადობით, ცბიერებითა და მოტყუებით არავინ მოგვახვიოს თავს ის, რაც ჩვენთვის მიუღებელია“, – წერია განცხადებაში.

7 ივლისს გავრცელდა თბილისის სინაგოგის განცხადება „პრაიდის კვირეულთან“ დაკავშირებით. ამ განცხადებას სოციალურ ქსელში ავრცელებს საქართველოს საპატრიარქოს საზოგადოებასთან ურთიერთობის სამსახური:

• „ჩვენც მიგვაჩნია, რომ ლგბტ პროპაგანდა დაუშვებელი და მიუღებელია, განსაკუთრებით მიუღებელია მათი გაუკუღმართებული ქმედებების პროპაგანდა მოზარდებთან და ახალგაზრდებთან, რადგან უარყოფით გავლენას ახდენს მოზარდების ჯერ კიდევ ჩამოუყალიბებელ ცნობიერებაზე და ამ ქმედებებს ძალადობის გარდა სხვა შეფასებას ვერ მიუსადაგებ… მოგიწოდებთ ქვეყნის მოქალაქეებს – ნუ აჰყვებით წინასწარ დაგეგმილ პროვოკაციებს და მოარიდეთ მათ ახალგაზრდები“, – წერია თბილისის სინაგოგის განცხადებაში.

წერილის თანახმად, „ე.წ. ლგბტ მოძრაობის“ ნამდვილი მიზანია „გაუკუღმართებული ცხოვრების წესის პოპულარიზაცია“:

„მათ შორის, მოზარდ თაობაში პროპაგანდა, ერთნაირსქესიან წყვილთა ოჯახებად დარეგისტრირება, ბავშვების აყვანა და, ზოგადად, კულტურული კოდის ცვლილება. დღეს ყველაფერი ხელის გულზე დევს და კარგად ვხედავთ ბავშვებში ამ პროპაგანდის დასაწყისის მცდელობებს“.

როგორც სხვადასხვა რელიგიის წარმომადგენელთა ერთობლივ განცხადებაში ვკითხულობთ, ისინი მიზანშეწონილად მიიჩნევენ „საკითხის საკანონმდებლო წესით დარეგულირებას“.

კოალიცია თანასწორობისთვის” მოუწოდებს სამართალდამცავ უწყებებს, მიიღონ ყველა შესაძლო ზომა არასამთავრობო ორგანიზაცია “თბილისი პრაიდის” მიერ “პრაიდ კვირეულის” ფარგლებში დაანონსებული ღონისძიებების უსაფრთხოების უზრუნველსაყოფად.განცხადებაში აღნიშნულია, რომ წელს 2022 წლისგან განსხვავებით, შინაგან საქმეთა სამინისტროს ჯერჯერობით არ გაუვრცელებია განცხადება დაგეგმილი ღონისძიებების უსაფრთხოდ ჩატარების უზრუნველყოფის შესახებ.

• ”ასეთი განცხადება განსაკუთრებით მნიშვნელობას იძენს იმის ფონზე, რომ „პრაიდ კვირეულის“ ღონისძიებების დაანონსებას მალევე მოჰყვა კრემლისტური, ულტრამემარჯვენე ექსტრემისტული ჯგუფის (კონკრეტულად, „ალტ ინფოს“) წარმომადგენლების მუქარა. კერძოდ, გავრცელდა ვიდეო, რომელშიც, ალტ ინფოს ერთ-ერთი ლიდერი, ზურა მახარაძე ითხოვდა ფინანსების მობილიზებას „პრაიდ ფესტის“ ჩაშლის მიზნით.ამას გარდა, 1 ივლისს გავრცელდა საქართველოს მართლმადიდებელი ეკლესიის საპატრიარქოს ჰომოფობიური შინაარსის შემცველი განცხადება. აღნიშნული განცხადების ფარგლებში, საპატრიარქო გამოთქვამს მოსაზრებას, რომ „ლგბტ კვირეული“ არ უნდა ჩატარდეს დახურულ სივრცეშიც კი მისი „უარყოფითი გავლენებიდან“ გამომდინარე. განცხადება შეიცავს არაერთ ჰომოფობიურ ფორმულირებებას, რამაც შესაძლოა “პრაიდ კვირეულის” ორგანიზატორებსა და მონაწილეებზე ძალადობა წაახალისოს, როგორც ეს წარსულში არაერთხელ ვიხილეთ. აღსანიშნავია, რომ 2023 წელი და კონკრეტულად უკანასკნელი თვეები გამოირჩეოდა ხელისუფლების წარმომადგენლების მხრიდან ჰომოფობიური შინაარსის შემცველი განცხადებების სიმრავლით, მათ შორის, საქართველოს პრემიერ მინისტრმა არაერთი საჯარო გამოსვლისდროს გამოიყენა ისეთი ჰომოფობიური ფორმულირება, როგორიცაა „ლგბტ პროპაგანდა“ და ისაუბრა გარკვეული რეგულაციების საჭიროებაზე აღნიშნულის საპასუხოდ, ასევე, 2023 წლის მაისის თვეში, უნგრეთში, ის სიტყვით გამოვიდა კონსერვატიული პოლიტიკური მოქმედების კომიტეტის (CPAC) კონფერენციაზე, რა დროსაც, არაერთი ჰომოფობიური განცხადება გააკეთა, აღნიშნა, რომ „უმცირესობის მიერ უმრავლესობაზე ძალადობა დაუშვებელია”.

არასამთავრობოები ამბობენ, რომ “უცხოური გავლენის გამჭვირვალობის” შესახებ კანონის ჩაგდების შემდეგ, ხელისუფლების წარმომადგენლები აქტიურად საუბრობდნენ არასამთავრობო სექტორის მიერ საქართველოში გატარებული „ლგბტ პროპაგანდის“ შესახებ, რასაც მოჰყვა ჰომოფობიური კამპანიის განსაკუთრებული გააქტიურება სამთავრობო მედიების მხრიდან. განმცხადებლების თქმით, აშკარაა, რომ ამავდროულად ხელისუფლება და მოძალადე ჯგუფები ჰომოფობიას იყენებენ საქართველოს დასავლური ინტეგრაციის დასაკნინებლად. ეს 2021 წლის 5 ივლისსაც ნათელი იყო, როდესაც მოძალადეებმა ორჯერ ჩამოხიეს და დემონსტრაციულად დაწვეს ევროკავშირის დროშა.

• ”გვინდა ხაზი გავუსვათ იმ გარემოებასაც, რომ დღეის მდგომარეობით, კვლავ არ დასჯილან 2021 წლის 5 ივლისს ჯგუფური დანაშაულების ორგანიზატორი პირები, რომელთა მიზანიც, სწორედ, „პრაიდის კვირეულის“ დარბევა იყო.ჰომოფობიის პოლიტიკური გამოყენება ხელისუფლების მხრიდან და დაუსჯელობის ის გარემო, რომელიც კრემლისტური, ექსტრემისტული ჯგუფების ძალადობის აშკარა პოლიტიკურ და სამართლებრივ შეწყნარებაში ჩანს, გარდა იმისა, რომ არაუსაფრთხო და მტრულ გარემოს ქმნის ლგბტი ადამიანებისთვის და აქტივისტებისთვის, ის აზიანებს სოციალურ მშვიდობას და აღრმავებს პოლარიზაციას. სახელმწიფოს მხრიდან უსაფრთხოების დაცვის საბაზისო ვალდებულებების შეუსრულებლობას ნეგატიური გავლენა ექნება ევროინტეგრაციის პროცესისითვისაც”. – ნათქვამია განცხადებაში რომელსაც “კოალიცია თანასწორობისთვის”  ავრცელებს. 

გამოცემა “პუბლიკას” ინფორმაციით, “თიბისიმ” და “საქართველოს ბანკმა” ძალადობრივი ჯგუფების წარმომადგენლებს ანგარიშები დაუბლოკეს. კონკრეტულად რომელი პირების ანგარიშები, ან რამდენი ანგარიში დაიბლოკა, უცნობია.ძალადობრივი ჯგუფები თანხას აგროვებდნენ 8 ივლისს “თბილისი პრაიდის” ფესტივალის ჩასაშლელად რეგიონებიდან ხალხის ჩამოსაყვანად, ასევე, ძალადობრივი, ჰომოფობიური აქციის დასაორგანიზებელად. ანგარიშის ნომრები მათ სოციალურ ქსელებში ჰქონდათ გავრცელებული. “პუბლიკა” ამბობს, რომ ბანკები ამ საკითხზე ოფიციალურ კომენტარს არ აკეთებენ.

NATO-ს გენერალური მდივანი, იენს სტოლტენბერგი განმარტავს, ზოგიერთი მოკავშირე კასეტური ბომბების აკრძალვაზე თანხმდება, ზოგიერთი კი ვერა.   სტოლტენბერგის განცხადებით, ალიანსს “არ აქვს პოზიცია” უკრაინისთვის კასეტური ბომბების გადაცემასთან დაკავშირებით.

• “ეს თავად უნდა გადაწყვიტონ სახელმწიფოებმა და არა NATO-მ”, – ამბობს სტოლტენბერგი. 

მისივე თქმით, ახლა მსოფლიო ბრუტალური ომის წინაშე დგას, ამ ბრუტალურ ომში კი ორივე მხარე იყენებს კასეტურ საბრძოლო მასალებს, მათ შორის ის განსხვავებაა, რომ რუსეთი მას თავდასხმისთვის იყენებს, ხოლო უკრაინა თავდაცვისთვის.