Blog

” ვერ დაასახელებთ ვერაფერს რაც ამ ქვეყანაში გაიაფდა, გარდა ნარკოტიკისა, თუმცა თავს იწონებთ ეკონომიკური ზრდით, რომელიც რატომღაც მხოლოდ თქვენივე მაღალჩინოსნების ჯიბეებზე აისახება.” –  ამის შესახებ „გახარია საქართველოსთვის“ პარტიის ერთ-ერთმა ლიდერმა, პარლამენტის დეპუტატმა ვიკა ფილფანმა “ქართული ოცნების”  პარლამენტის პლენარულ სხდომაზე განაცხადა.

„პირველ რიგში, მინდა მივუსამძიმრო შუქრუთის მაღაროში გარდაცვლილი მეშახტის ჯეირან ასლანდიას ოჯახს და ყველა მაღაროელს. ამ ქვეყანაში რომ უბრალო მოქალაქეები თქვენთვის ღირებულებას არ წარმოადგენენ, ამას ყოველ დღე თავადაც გვახსენებთ. რამდენიმე კვირის წინ ბატონმა კობახიძემ დებატებზე მაღაროელებთან პირისპირ საუბარს ანომალია უწოდა.

მაღაროელები ამ ქვეყნის უჩინარი გმირები არიან, რომლებიც ოჯახებს უნარჩუნებენ ამ ქვეყანას საათობით მიწის ქვეშ ყოფნით, გაუსაძლის პირობებში და დამამცირებელი ხელფასით. თქვენ ეს ადამიანები მხოლოდ იმიტომ მოიძულეთ, რომ ხმის ამოღება გაბედეს და პირობების გაუმჯობესება მოითხოვეს სამართლიანად. მათ არაერთხელ მოუწიათ საკუთარ ქვეყანაში პროტესტის უკიდურესი ზომებისთვის მიემართათ, 2024 წელს რამდენიმე მათგანი პირამოკერილი შიმშილობდა პარლამენტის შენობის წინ და ელოდა რომელიმე თქვენგანს ვინც მოუსმენდა, იმის ნაცვლად რომ მათი მოთხოვნები დაგეკმაყოფილებინათ მათი დევნა, შევიწროება და გაშავება დაიწყეთ. არათუ მოთხოვნების დაკმაყოფილება 2000 მეშახტე უხელფასოდ დატოვა თქვენმა დამფინანსებელმა, სამაგიეროდ „რუსთავი ორის“ დირექტორს ნახევარი მილიონი ლარი უსახსოვრა.

ვერ იპოვით ქვეყანას, სადაც დედებს ორჯერ მოუწიათ აქციების მოწყობა საკუთარი შვილებისთვის წამლის მოსაპოვებლად, გილოცავთ ჩვენს ქვეყანაში ეს უკვე ორჯერ მოხდა, ორჯერ გამოვიდნენ სასოწარკვეთილი დედები ქუჩაში, პირველად აქონდროპლაზიით დაავადებული ბავშვების მშობლები, სულ ახლახან კი დიუშენის სინდრომის სამკურნალო წამლის მოსათხოვად. განა რა შეიძლება იყოს ბავშვზე და მათ ჯანმრთელობაზე უფრო მნიშვნელოვანი, მაგრამ არა თქვენთვის, ამ ქვეყანაში 77 000 ბავშვი შიმშილობს, რადგან ბოლო 10 წელიწადში ამ ქვეყანაში არაფერი გაიაფებულა, პირიქით, გაძვირდა. გაძვირდა საკვები, წამალი, ექიმთან ვიზიტი, თქვენ გუშინ დენი გააძვირეთ 30% ით, გაძვირდა გაზიც და წყალიც; აქვე შეგახსენებთ რომ გაზი, წყალი და დენი ამ ქვეყნის დიდ ნაწილს ჯერ კიდევ არ მიეწოდება. გაძვირდა საწვავი, გაძვირდა პირველადი მოხმარების ნივთები. ვერ დაასახელებთ ვერაფერს რაც ამ ქვეყანაში გაიაფდა, გარდა ნარკოტიკისა, თუმცა თავს იწონებთ ეკონომიკური ზრდით, რომელიც რატომღაც მხოლოდ თქვენივე მაღალჩინოსნების ჯიბეებზე აისახება.

მაღალჩინოსნებმა ახლა გადაწყვიტეთ რომ ავტომობილით გადაადგილების პრივილეგიაც მხოლოდ თქვენ გაქვთ და მოქალაქეებს არარსებულ საზოგადოებრივ ტრანსპორტში გადასვლას სთხოვთ, თან ეკოლოგიის სახელით, მაშინ როცა ყველაზე მომწამვლელი გამონაბოლქვი სწორედ იმ ქარხნებიდან მოდის, თქვენ რომ გეკუთვნით, აქვე მინდა შეგახსენოთ რომ წლების მანძილზე ჯარს და პოლიციას ჭიან საჭმელს აძლევდით.

ამ ქვეყანას ჰყავს ეკომიგრანტები რომლებიც უკვე წლებია საკუთარ სამშობლოში იძულებით დევნილობაში ცხოვრობენ, არც ცხოვრებამ დაინდო და არც თქვენ, ასე დევნილობაში გალიეს ცხოვრება, ეკომიგრაცია არჩევანი არ არის ტრაგედიაა და ვერასდროს დადგა დრო რომ ეროვნულ პრიორიტეტად ქცეულიყვნენ ქართული ოჯახები, რათა კვლავ გაიდგან ფესვები და საკუთარ ქვეყანაში ფუძე გააჩნდეთ. თქვენ შექმენით ქვეყანა, სადაც აფხაზეთიდან დევნილმა სამინისტროსთან თავი დაიწვა, რათა კუთვნილი საცხოვრებელი მიეღო, თუმცა არაბებს საუკეთესო მიწებს ჩუქნით.

ხომ დაასრულა პროდუქტების ფასებზე კომისიამ მუშაობა. რა შედეგი დადეთ? ის, რომ დღეს უფრო ძვირია ყველაფერი, ვიდრე 3 თვის წინ. ახლა წამლების ჯერია, ამ ქვეყანაში ავად გახდომა ყველაზე დიდ სასჯელად იქცა, ახალგაზრდისთვისაც და პენსიონერისთვისაც. დღეიდან ღარიბების ყოფა კიდევ უფრო დამძიმდება რადგან ელ-ენერგიის საფასურიც 30 % ით გაუძვირეთ, თუმცა 60 -მდე ჰესი ააშენეთ ქვეყანაში საკუთარი ბიზნესმენებისთვის.

რამდენიც არ უნდა იძახოთ, ვერ გახდებით ეროვნული ხელისუფლება, რადგან ეროვნულ ხელისუფლებას პირველ რიგში საკუთარი მოქალაქის კეთილდღეობა აინტერესებს განურჩევლად პოლიტიკური შეხედულებისა, თქვენ ამ ქვეყნის ახალგაზრდები ციხეში გამოკეტეთ თქვენი კომპლექსების დასამალად. სტუდენტებს დაუნგრიეთ ცხოვრება, საკუთარი პროპაგანდის გასავრცელებლად იკადრეთ და ტერორისტები შეარქვით საკუთარ ახალგაზრდობას.

სირცხვილია, როდესაც თქვენ ეროვნულობაზე საუბრობთ. თქვენ ააშენეთ ეს კედელი, რომლის ერთ მხარეს თქვენი მოპარული ფული და ეკონომიკური ციფრებია, მეორე მხარეს კი, მაღაროელის პროტესტი, შვილის წამლისთვის ქუჩაში გამოსული დედები და თაობა, რომელსაც ქვეყნიდან წასვლის გარდა სხვა არჩევანი არ დაუტოვეთ. თქვენ გძულთ ღარიბები, რადგან ღარიბი ხალხი სამხილია თქვენი კორუფციის და უნიათობის“, – მიმართა ფილფანმა „ქართული ოცნების“ წევრ დეპუტატებს.

თბილისსა და გარდაბნის მუნიციპალიტეტში კომპლექსურად ჩატარებული ღონისძიებების შედეგად, ყალბი ოფიციალური დოკუმენტების დამზადებისა და გასაღების ფაქტებზე ერთი პირი დააკავეს.

“კონტრტერორისტული ცენტრის მიერ გატარებული ოპერატიულ-სამძებრო და საგამოძიებო მოქმედებების შედეგად დადგინდა, რომ საქართველოს მოქალაქე, საკუთარ საცხოვრებელ სახლში, გარკვეული თანხის სანაცვლოდ, სისტემატურად ამზადებდა საქართველოსა და უცხო ქვეყნების ყალბ პირადობის დამადასტურებელ და მართვის მოწმობებს. იგი აღნიშნულ დოკუმენტებს საზღვარგარეთ მყოფ დამკვეთებთან და შუამავალ პირებთან ფოსტით აგზავნიდა.

კონტრტერორისტული ცენტრის თანამშრომლებმა დაკავებულის პირადი და საცხოვრებელი სახლის ჩხრეკის შედეგად ამოიღეს ყალბი დოკუმენტების დასამზადებელი სპეციალური მოწყობილობები, კომპიუტერული ტექნიკა, ათეულობით დასაბეჭდი პლასტიკური ბარათი, ასევე უცხო ქვეყნებში გასაგზავნად გამზადებული ყალბი მართვის მოწმობები, მობილური ტელეფონები. ამასთან, საქართველოს ფოსტიდან ამოღებულია საზღვარგარეთ დაჩქარებულად გასაგზავნი ყალბი დოკუმენტები.” – ნათქვამია სახელმწიფო უსაფრთხოების სამსახურის განცხადებაში.

აღნიშნულ საქმეზე გამოძიება სისხლის სამართლის კოდექსის 362-ე მუხლით მიმდინარეობს, რაც სასჯელის სახით 3 წლამდე თავისუფლების აღკვეთას ითვალისწინებს.

“ელექტროენერგიაზე ტარიფის ზრდის საფუძველი გაზრდილი მოხმარებაა” სემეკის თავმჯდომარის, დავით ნარმანიას შეფასებით, ენერგეტიკისა და წყალმომარაგების მარეგულირებელმა კომისიამ “დაბალანსებული გადაწყვეტილება” მიიღო. მისი თქმით, დენის ტარიფის ზრდის უმთავრესი საფუძველი არის “გაზრდილი მოხმარება, ენერგიის გაზრდილი ფასები, ასევე ქვეყნის ელექტროენერგიაზე იმპორტ დამოკიდებულება.

გათვალისწინებულია ასევე ენერგიის გაზრდილი ფასები და ქვეყნის ელექტროენერგიაზე იმპორტდამოკიდებულება შემოდგომა-ზამთრის თვეებში. ამასთან, განსაზღვრულია ინვესტიციების ოპტიმალური მოცულობა, რათა ქსელში არსებული ავარიები ეტაპობრივად შემცირდეს, გაუმჯობესდეს ელექტროენერგიის მიწოდების ხარისხი როგორც მოსახლეობისთვის, ისე კომერციული სექტორისთვის. ამასთან, საინვესტიციო მოცულობა ბოლო პერიოდში დაკორექტირდა და მარეგულირებელი კომისიის მიერ ისე დამტკიცდა, რომ ტარიფზე მნიშვნელოვანი ზეგავლენა არ ჰქონოდა. კომისიის შეფასებით, ინვესტიციების გარეშე მდგომარეობა გაუარესდებოდა, გაიზრდებოდა ავარიები და ელექტროენერგიის მიწოდების წყვეტები, რის შედეგადაც ყველაზე მეტად მოსახლეობა დაზარალდებოდა. შესაბამისად, კომისიამ მიიღო დაბალანსებული გადაწყვეტილება. ვფიქრობთ, ჩვენ მიერ დადგენილი ტარიფი რამდენიმე წლის განმავლობაში შენარჩუნდება. ხედავთ, რომ ბოლო პერიოდის განმავლობაში, როგორც დედაქალაქში, ასევე რეგიონებში, გახშირებულია ელექტროენერგიის ავარიული გათიშვები, განსაკუთრებით უამინდობის დროს. სწორედ ამიტომ, მარეგულირებელი კომისია სპეციალური პროგრამის მეშვეობით ახორციელებს წყვეტების მონიტორინგსა და ანალიზს. გამოვლინდა, რომ რიგ მიმართულებებში ავარიების რაოდენობა იზრდებოდა. ტექნიკური დეპარტამენტის გასვლითი მონიტორინგის შედეგად დადგინდა, რომ ინფრასტრუქტურის მდგომარეობა წლიდან წლამდე უარესდებოდა. ჯერ კიდევ ორი წლის წინ მიღებული იქნა გადაწყვეტილება საინვესტიციო მოცულობის გაზრდასთან დაკავშირებით და ეს ტენდენცია შენარჩუნებულია.
გახსოვთ, ამის შესაძლებლობა როცა არსებობდა, მარეგულირებელმა კომისიამ ორი წლის წინ ტარიფი სამი თეთრით შეამცირა, რის შედეგადაც 2024–2025 წლებში სამი თეთრით ​შემცირებული ტარიფი მოქმედებდა. ამიტომ ჩვენ იმ პერიოდის მდგომარეობას ვუბრუნდებით და დამატებით ორი თეთრით იზრდება. ასევე, 2025 წლის ბოლოს სამი თვის ვადით დაწესდა დროებითი ტარიფი, რათა შევჯერებულიყავით საინვესტიციო საჭიროებებზე, ელექტროენერგიის მოსალოდნელ გენერაციასა და ბალანსზე

პარტიები მხარდაჭერას გარეთ ეძებენ, ავიწყდებათ, რომ გადაწყვეტილებებს ქართველი ხალხი იღებს –  ამის შესახებ “ქართული ოცნების” იურიდიულ საკითხთა კომიტეტის თავმჯდომარემ, არჩილ გორდულაძემ ჟურნალისტებთან “ოპოზიციური ალიანსის” აშშ-ში დაგეგმილ ვიზიტზე საუბრისას განაცხადა.

“ძველი “ნაციონალური მოძრაობა” სხვადასხვა პარტიაში იყო დაქსაქსული, ახლა გაერთიანებულია. მათი გაყრა და შეყრა არაერთხელ გვინახავს, რის უკანაც მხოლოდ მათი პატრონების გადაწყვეტილება დგას. მათ არავინ ეკითხება, არც რაიმე შეთანხმებაზე ხელმოწერას, არც ერთმანეთთან თანხმობას, არც ერთმანეთთან დაპირისპირებას და არც სადმე გამგზავრებაS. მთავარია ის, რაზე შეიძლება წავიდნენ “კოლექტიურ ნაცმოძრაობაში” გაერთიანებული პირები? – იმაზე, რომ ჩვენი ქვეყანა დააზიანონ, გააშავონ და როგორმე, თავიანთი წარმატების რაიმე შანსი მაინც გააჩინონ. ეს პარტიები თავიანთ მხარდაჭერას გარეთ ეძებენ და ავიწყდებათ, რომ ქვეყანაში გადაწყვეტილებებს ქართველი ხალხი იღებს და არა რომელიმე უცხო სახელისა და გვარის მქონე პირი”, – განაცხადა გორდულაძემ.

“საქართველომ გადაინაცვლა 90-იანების ნიშნულზე..ნატოსთან ინტეგრაციის პროცესი ოცნებამ ინსტიტუციურად მოკლა” – ასე ეხმაურება დროას ლიდერი ელენე ხოშტარია NATO-ს ყოველწლიურ ანგარიშს.

“წლები დასჭირდა “ასპირანტის” სტატუსის მოპოვებას და საქართველოს პოტენციურ წევრად რეალურად აღქმას, რაც 2012 წლისთვის უკვე დოკუმენტურად იყო აღბეჭდილი. მხოლოდ ინერციაც კი იყო საკმარისი, რომ არ ჩამოშლილიყო.

დღევანდელი ანგარიში ასახავს ამ ჩამოშლას.

პარტნიორული ურთიერთობები, მათ შორის თავდაცვის სფეროში, ნატოს 90-იანი წლების მერე, მთელ პოსტსაბჭოთა სივრცესთან ჰქონდა; PFP – Partnership For Pace ერქვა.

ცენტრალური აზიის ქვეყნებსაც ჰქონდათ და აქვთ პარტნიორობა.

საქართველომ გადაინაცვლა 90-იანების ნიშნულზე, მაგრამ სრული პასუხისმგებლობით ვაცხადებ (8 წელი ვმუშაობდი ამაზე) ხელისუფლების ცვლილებების და ევროპული ინტეგრაციის პირობებში, სრულად ავინაზღაურებთ დანაკარგს და დავუბრუნდებით გაწევრიანების გზას, მით უმეტეს, შავი ზღვის და სამხრეთ კავკასიის ახალი გეოპოლიტიკური ვიათრების გათვალისწინებით.

ალიანსმა ნატოსთან კომუნიკაცია ახლავე უნდა დავიწყოთ ამ ალტერნატიული ხედვის გასამყარებლად.

ბოლომდე! რუსთავის ქალთა ციხე.” – წერს ხოშტარია

” როდის აქეთ იყო, რომ დაწყებული გვარამიადან დამთავრებული „ნაცმოძრაობის“ ნებისმიერი მხარდამჭერით, ეკლესიაზე ინტერესდებოდნენ? – მათ ის აინტერესებთ, როგორმე ჩირქი მოსცხონ საპატრიარქოს და ეკლესიას” – ამის შესახებ „ხალხის ძალის” დეპუტატმა, გურამ მაჭარაშვილმა ჟურნალისტებთან ახალი პატრიარქის არჩევის საკითხზე საუბრისას განაცხადა.

„არა მარტო ქართველმა, არამედ მსოფლიო საზოგადოებამ დაინახა, რომ ქართველმა ხალხმა თავისი პრიორიტეტი 17-21 მარტის დღეებში აჩვენა და ამიტომ არიან გამწარებულები, გონებაარეულები უცხოეთიდან დაწყებული, აქაური უცხოური აგენტებით დამთავრებული. ახლა პატრიარქის მოსაყდრეს, ეკლესიას ებრძვიან და ცდილობენ, რომ განხეთქილება შეიტანონ.

საერთოდ, როდის აქეთ იყო, რომ დაწყებული გვარამიადან დამთავრებული „ნაცმოძრაობის“ ნებისმიერი მხარდამჭერით, ეკლესიაზე ინტერესდებოდნენ?

როცა აქციაზე საუბრობს ადამიანი, რომ პატრიარქი ბნელი ძალების წარმომადგენელია და სასულიერო პირები არიან წვეროსანი ძველი ძალების წარმომადგენლები და ხალხი ტაშს უკრავს, როგორ შეიძლება ახლა ვინმემ დაიჯეროს, რომ ამ ხალხს აინტერესებს რა ხდება საპატრიარქოში და როგორ აირჩევენ წმინდა სინოდის წევრები პატრიარქს? მათ ის აინტერესებთ, როგორმე ჩირქი მოსცხონ საპატრიარქოს და ეკლესიას. არ გამოსდით, მაგრამ ინტერესის სფერო არის ეს.[…] სახელმწიფოს და ეკლესიის ფუნქციები, რა თქმა უნდა, გამიჯნულია, მაგრამ ჩვენ ვერ გავექცევით იმ ფაქტს, რომ ეკლესიის მრევლის აბსოლუტური უმრავლესობა არის საქართველოს მოქალაქე.

რაც შეეხება კონკრეტულად პატრიარქის არჩევას, ყველამ კარგად ვიცით, ეს მათ შორის, შეთანხმებით არის უზრუნველყოფილი. რაც შეეხება კანდიდატებს, ბუნებრივია სინოდის წევრებს აქვთ უფლება, რომ თვითონ განაცხადონ ან არ განაცხადონ კანდიდატებზე, ვის დაასახელებენ და ვის არ დაასახელებენ. ეს მართვა-გამგეობის დებულებაშიც კია მითითებული, რომ უფლება აქვს სინოდის წევრს, რომ თავისი კანდიდატურა დაასახელოს”,- განაცხადა მაჭარაშვილმა.