Blog

ვარსკვლავების მძიმე წარსული. ვინ რას აკეთებდა, სანამ მდიდარი და ცნობილი გახდებოდა

წარმატებისკენ მიმავალი გზა ხშირად სულაც არ არის ადვილი. ზოგი ცნობილი ვარსკვლავი, რომელიც დღეს მილიონებს გამოიმუშავებს, ახალგაზრდობაში თავს მძიმე ფიზიკური შრომით ირჩენდა. ჭურჭლის მრეცხავი, სტრიპტიზორი, კლოუნი, მოლარე – რა სამუშაოს ასრულებდნენ ვარსკვლავები, სანამ ცნობილები და წარმატებულები გახდებოდნენ. კარიერის გარიჟრაჟზე მაგალითად ბრედ პიტი წიწილას ფორმაში გამვლელებს ფლაერებს ურიგებდა, უმა თურმანი პიცერიაში ჭურჭელს რეცხავდა, ნიკოლას ქეიჯი პოპკორნს ყიდდა, ჯულია რობერტსი კი ნაყინს. ვნახოთ რა სამუშაოს ასრულებდნენ მილიონობით ადამიანის კუმირები წარსულში.

ბენედიქტ ქამბერბაჩმა სანამ მსახიობი გახდებოდა ტიბეტში ერთერთ მონასტერში ინგლისურის მასწავლებლად მუშაობაც მოასწრო და ლონდონის ერთ–ერთ მაღაზიაში პარფიუმერადაც. ეს არა იმდენად ფულის გამომუშავების გზა იყო, რამდენადაც საკუთარი ჭეშმარიტი სურვილების გარკვევის სურვილი. ის ცდილობდა მოვლენები არ დაეჩქარებინა და მსახიობის პროფესია მისი გაცნობიერებული არჩევანი იყო.

ბიონსე კი ექვსიდან ცხრა წლის ასაკამდე დედას მის სილამაზის სალონში ეხმარებოდა. იატაკს წმენდდა და სალონის სტუმრების სიმღერით ართობდა.

ბრედ პიტი სკოლის დამთავრებისას ჟურნალისტიკას სწავლობდა და ვინ იცის როგორი ჟურნალისტი დადგებოდა, ჰოლივუდზე ოცნებას რომ არ გაჰყოლოდა. უნივერსიტეტის ბოლო კურსზე გადაწყვიტა გაერისკა. ჟურნალისტის დიპლომი ვეღარ მიიღო და ლოს ანჟელესში გადავიდა, სადაც დიდებისკენ გრძელი გზის გავლა მოუხდა. ის მუშაობდა კურიერად, ლიმუზინის მძღოლად და ქუჩის პრომოუტერად – წიწილის ფორმაში ფლაერებს არიგებდა.

გვენ სეფანიმ თავისი პირველი ფული სასაუზმე Dairy Queen–ში მუშაობით იშოვნა.

ევა ლონგორია Wendy’s –ს სასადილოში ჩიზბურგერებს ამზადებდა. მას დღემდე ახსოვს იდეალური ბურგერის საიდუმლო – მაიონეზით ფუნთუშა კარგად უნდა გაიჟღინთოს, მდოგვი კი კატლეტზ უნდა დადოთ.

ევა მენდესი სავაჭრო ცენტრში მდებარე პატარა რესტორანში მუშაობდა და ჰოთდოგებს ყიდდა.

ვუპი გოლდბერგის დედა მედდა იყო, მამა მღვდელი. ღარიბი ოჯახი შვილის სწავლის ფულს ძლივს შოულობდა, ბოლოს კი გოგონამ სკოლა საერთოდ მიატოვა. წიგნები ვუპიმ ჰიპების კომუნის მექაში – სან ფრანცისკოში გაცვალა და ყველა აკრძალულ სიამოვნებას გაუსინჯა გემო. ფეხზე დადგომას დიდხანს ცდილობდა, ნარკოტიკებისგან განკურნებასაც. მუშაობდა დარაჯად, მშენებლობაზე აგურებსაც აწყობდა, მორგში მკვდრებს გრიმს უკეთებდა, სანამ თეატრალურ სააგენტოში არ მოხვდა და მსახიობად არ დაწყო მუშაობა.

კანიე უესტი თინეიჯერობისას Gap –ის მაღაზიაში კონსულტანტად მუშაობდა.

მოზარდი მეგან ფოქსი ხილის კოქტეილების და ნაყინის გამყიდველად მუშაობდა. ძირითად დროს დახლთან ატარებდა, კვირაში ერთხელ კი, როცა რიგი უწევდა, რომელიმე ხილის ფორმას იცვამდა და მყიდველს ქუჩიდან იზიდავდა. როგორც თვითონ აღიარა, მას ძირითადად ბანანის ფორმა ეცვა.

19 წლის ასაკში საცხოვრებლად ნიუ იორკში გადასული მადონა ცოტა ხნით Dunkin Donuts–ის ფუნთუშებს ყიდდა. ამ სამსახურიდან ის სიზანტის გამო გამოუშვეს.

ბრიტანეთის პრინცის, ჰარის მეუღლე სანამ კინოში და სერიალებში გადაიღებდნენ პროფესიონალ კალიგრაფად მუშაობდა. მეგან მარკლი მოსაწვევებზე და მისალოც ბარათებზეც აწერდა ხელს.

მეთიუ მაკკონახი ახალგაზრდობაში ფულს ტეხასის ქალაქგარე კლუბში გოლფის მოედანზე ქვიშის გაწმენდით შოულობდა. მის მოვალეობაში შედიოდა მინდორზე ბალახის დაცვაც. მსახიობი სტუდენტობისას ბევრს მოგზაურობდა, როცა იურიდიულ ფაკულტეტზე სწავლობდა. გაცვლითი პროგრამით ავსტრალიასაც ეწვია, სადაც საქათმეებს წმენდდა და თეფშებს რეცხავდა.

ორლანდო ბლუმი მოზარდობისას ტირში მუშაობდა, სადაც მონადირეები ვარჯიშობენ. ის ავტომატს თიხის თეფშებით ავსებდა, რომლებსაც ტირის სტუმრები ესროდნენ.

როცა ნიკოლ ქიდმანის დედას სიმსივნის დიაგნოზი დაუსვეს, გოგონამ სკოლა მიატოვა, მასაჟის კურსებზე ჩაეწერა და მუშაობა დაიწყო. მსახიობს მასაჟისტის პროფესია შემთხვევით არ აურჩევია: ის თან დედას ეხმარებოდა სიმსივნის მკურნალობით გამოწვეული კუნთების ტკივილის დაძლევაში.

სილვესტერ სტალონე სანამ საკულტო ფილმის “როკის“ სცენარს დაწერდა და გაყიდდა, კვირობით მანქანაში ცხოვრობდა, ღამეს ავტობუსის გაჩერებებზე ათევდა და 200 დოლარად პორნოშიც კი გადაიღეს. თავად მსახიობი ამ ისტორიებს მშვიდად იხსენებს: “მაშინ საჭმლის ფულიც კი არ მქონდა. ბინიდან გამასახლეს და ზედიზედ ოთხი ღამე ავტობუსის სადგურში გავათენე. სასოწარკვეთილებაში ვიყავი. როცა გშია, ბევრ ისეთ რამეს აკეთებ, რასაც ჩვეულებრივ სიტუაციაში არ გააკეთებდი. “ ერთ–ერთი ასეთი საქმიანობა ზოოპარკში ლომების გალიის წმენდა იყო. ამ საქმეში სტალონეს საათში დოლარს უხდიდნენ.

ტეილორ სვიფტი ბავშვობაში ფერმაში მუშაობდა სადაც ნაძვებს ზრდიდნენ.

უმა თურმანი მსახიობად მხოლოდ მისი სიჯიუტის და შრომისმოყვარეობის წყალობით გახდა. ვერ ვიტყოდით, რომ მას ბედი სწყალობდა. მის ოჯახში კინოსამყაროსთან არავინ იყო დაკავშირებული. ნიუ იორკში ჩასვლისას მისი კაპიტალი 300 დოლარი იყო. უმამ დიდ ქალაქში თავის გადარჩენის გზების ძებნა დაიწყო. მუშაობდა ჭურჭლის მრეცხავად, თავისუფალ დროს კი კასტინგებზე დადიოდა და ცდილობდა ფოტომოდელობა დაეწყო. მოგვიანებით ის კინოში მეორეხარისხოვან როლებში გადაიღეს. სწორედ ერთ–ერთი ეპიზოდური როლის დროს შეამჩნიეს ის და მისი წარმატებული კარიერაც ამით დაიწყო.

მოდელი სინდი კროუფორდი სკოლის პერიოდში სიმინდის მოსავლის აღებაზეც მუშაობდა საათში ოთხ დოლარად. სხვათა შორის, ადგილობრივი გაზეთის ფოტოგრაფმა სწორედ ამ დროს გადაუღო ფოტო. ამ ფოტოზე დადებითმა რეაქციამ გოგონა დაარწმუნა, ბედი სამოდელო ბიზნესში ეცადა.

ჩენინგ ტატუმი სამსახიობო კარიერის დაწყებამდე სტრიპტიზს ცეკვავდა. ამ პროფესიაში შეძენილი ჩვევები მოგვიანებით ფილმ “სუპერ მაიკშიც“ გამოადგა, სადაც არა მხოლოდ მთავარი როლი შეასრულა, არამედ ფილმის მთავარი კონსულტანტი და ქორეოგრაფიც იყო.

ტომ კრუზი კი კინოპროდიუსერებისგან წინადადებების მოლოდინში სასტუმროში შიკრიკად მუშაობდა.

ჯენიფერ ენისტონი 11 წლის ასაკიდან დრამატულ წრეზე დადიოდა, შემდეგ კი ნიუ იორკის დრამატული ხელოვნების სკოლაში ჩააბარა და ის წარმატებით დაამთავრა 1987 წელს. განათლების მიღების შემდეგ ჯენიფერმა ვარსკვლავური გზა ბროდვეის რამდენიმე დადგმიდან დაიწყო, თან რადიოში მუშაობდა. დამწყები მსახიობის ცხოვრება ამ პერიოდში ადვილი არ ყოფილა. ცდილობდა დიდი კინემატოგრაფის სამყაროში გზა გაეკვალა, პარალელურად კი ოფიციანტად და კურიერად მუშაობდა, ხან კი ცხელი ხაზის ოპერატორად.

ჯენიფერ ლოპესი სკოლის დამთავრების შემდეგ იურიდიულ კანტორაში მდივნად მუშაობდა. დღისით ამ სამსახურში დადიოდა, საღამოს კი ღამის კლუბში ცეკვით შოულობდა ფულს.

მომავალი მსახიობი ჯორჯ ქლუნი ჩრდილოეთ კენტუკის უნივერსიტეტში სწავლობდა. სტუდენტური ცხოვრების დამთავრების შემდეგ კი ჰოლივუდის დასაპყრობად გაემართა. ამ გადაწვეტილებაზე შოუ–ბიზნესში მოღვაწე მისმა მრავალრიცხოვანმა ნათესავებმა იქონიეს გავლენა. გარდა ამისა, მას ტელეგადაღებების გამოცდილებაც ქონდა. ათი წლიდან მას რეკლამებში და მასიურ სცენებში იღებდნენ. პარალელურად კი ქალის ფეხსაცმლის გამყიდველობით შოულობდა ფულს.

ჯულია რობერტსის მამა წყლის მატრასებს ყიდდა, დედა კი ეკლესიაში მუშაობდა. ოჯახის ფინანსური მდგომარეობა მძიმე იყო და ჯულია 13 წლიდან პიცერიაში ოფიციანტად მუშაობდა.

ჰიუ ჯეკმანი სამსახიერო კარიერამდე საბავშვო ზეიმებზე კლოუნის როლს ირგებდა. “არანაირი ფოკუსების კეთება არ ვიცოდი და ბავშვები ვერ მიტანდნენ“ – ხუმრობს საკუთარ წარსულზე მსახიობი.

ჰარისონ ფორდი კინოგადაღებებთან პირველივე შეხებისას დარწმუნდა, რომ სრულიად ხელმოცარული უნიჭო მსახიობი იყო. მას როლებს ან არ აძლევდნენ, ანდა სცენებს მისი მონაწილეობით მონტაჟისას ჭრიდნენ. ფორდმა გადაწყვიტა მსახიობობაზე ოცნებას დამშვიდობებოდა და გადასაღებ მოედნებზე და კონცერტებზე შემდუღებლად დაიწყო მუშაობა. სწორედ წარსულში შესრულებული წარუმატებელი როლებით აღმოაჩინა ის რეჟისორმა ჯორჯ ლუკასმა და დიდი კინოსკენ მიმავალი გზაც გაუხსნა.

დუეინ ჯონსონი 13 წლის ასაკში პატარა კაფეს სამზარეულოში მუშაობდა. სკოლის შემდეგ ის გვიან საღამომდე ჭურჭელს რეცხავდა.

February 17, 2019
როგორ მოვიშოროთ ცხიმი მუცლის არეში

ექიმები იმ საფრთხეზე საუბრობენ, რომელსაც ადამიანის მუცლის ღრუში ვისცერული ცხიმების დაგროვება იწვევს. საქმე იმაშია, რომ ასეთი ცხიმგროვები სასიცოცხლოდ მნიშვნელოვან ორგანოებთან სიახლოვეს ჩნდება და შესაძლოა საფრთხის შემცველი იყოს. თანაც მათი მოშორება არც ისე ადვილია. შეიძლება ჩველუბრივი დიეტა და ვარჯიში უძლური აღმოჩნდეს. ღრმა ცხიმების თავიდან მოშორებაში ცილის დიდი რაოდენობით შემცველი რაციონი დაგეხმარებათ. ეს ნივთიერებათა ცვლასაც აჩქარებს და ადამიანის საკვებისადმი ლტოლვას 60 %–ით ამცირებს.

დიეტოლოგებმა შეადგინეს პროდუქტების სია, რომლებსაც შეუძლიათ მუცლის არეში ცხიმის დაგროვება აგარიდოთ თავიდან.

პირველი ადგილი კვერცმა დაიკავა.

მეორე ადგილზეა ქათმის მკერდი.

მესამე ადგილი – თინუსი

მეოთხე ადგილი – ოსპი

მეხუთე ადგილი – ნუში

მეექვსე ადგილი – გამომშრალი ბარდეული

გარდა ამისა, თუ გინდათ მუცლის ცხიმები დაამარცხოთ, ტკბილეულზე უარი უნდა თქვათ. ასეთ რაციონთან ერთად კარგი იქნება მცირე ფიზიკური დატვირთვაც. ჯობს ხშირად იაროთ ფეხით და იცურაოთ.

მუცლის ცხიმის დაწვის მსურველებს ექიმები სპორტდარბაზში ვარჯიშს არ ურჩევენ, რადგან ასეთ შემთხვევაში წონა პირველ რიგში ნაკლებად პრობლემური ზონებიდან იკლებს. მუცელი და თეძოები კი მოცულობაში ყველაზე ბოლოს მცირდება.

February 17, 2019
იშვიათი ფოტო–პრინცესა ბოტასებში ბავშვის გასეირნებისას

14 თებერვალს დიდი ბრიტანეთის პრინცის, უილიამის მეუღლე, ქეით მიდლტონი კენსინგტონის პარკში შვილის, ლუის გასეირნებისას შენიშნეს. ჩუმად გადაღებული ფოტო ბრიტანეთის სამეფოს ოჯახის თაყვანისმცემლებისთვის ნამდვილი სენსაცია აღმოჩნდა. ჰერცოგინია ცხრა თვის პრინცს ხეივნის გასწვრივ საბავშვო ეტლით ასეირნებდა, შემდეგ კი არხისკენ წავიდა. 37 წლის დედა დაცვის გარეშე იყო და როგორც ჩვეულებრივი ლონდონელი ქალი ბუნებით და შვილთან ურთიერთობით ტკბებოდა.

დიდი ბრიტანეთის მომავალ დედოფალს ლურჯი ჯინსი, ქურთუკი და New Balance – ის ბოტასები ეცვა. თმა კი ყოველგვარი განსაკუთრებული ვარცხნილობის გარეშე ჰქონდა გაშლილი.

სამეფო ოჯახის წევრთა მსგავს ფორმაში გადაღება უიშვიათესი შემთხვევაა და ფოტომ სწრაფადვე მოიარა ონლაინ სივრცე.

February 17, 2019
ბავშვობისას, ვერასოდეს ვიფიქრებდი, რომ ლევილში დავბრუნდებოდი, როგორც საქართველოს პრეზიდენტი – სალომე ზურაბიშვილი

საქართველოს პრეზიდენტი სალომე ზურაბიშვილი, საფრანგეთში ვიზიტის ფარგლებში, ლევილს ეწვია. ლევილის სასაფლაოზე ყვავილებით შეამკო ემიგრაციაში გარდაცვლილ თანამემამულეთა მემორიალი, საქართველოს პირველი დემოკრატიული რესპუბლიკის მთავრობის თავმჯდომარის, ნოე ჟორდანიას და მშობლების საფლავები და მათ ხსოვნას პატივი მიაგო.

საქართველოს პრეზიდენტს ლევილში, დაბა ლევილის მერმა, ერიკ ბრეივმა უმასპინძლა. საქართველოს პრეზიდენტი სალომე ზურაბიშვილი ლევილის ქართულ მამულსაც ეწვია, ბავშვობის წლები გაიხსენა და განაცხადა, რომ მისთვის ძალიან ამაღელვებელია ლევილში საქართველოს პრეზიდენტის რანგში სტუმრობა.

“ბავშვობისას, ამ ადგილებში თამაშისას ვერასოდეს ვიფიქრებდი, რომ ერთ დღეს დავბრუნდებოდი, როგორც საქართველოს პრეზიდენტი. ცხოვრებაში ძალიან ბევრი მოულოდნელი და დაუგეგმავი რამ ხდება”, – განაცხადა სალომე ზურაბიშვილმა.

ლევილის ისტორიული მამული საქართველოს დევნილმა მთავრობამ სახელმწიფო სახსრებით 1922 წელს შეიძინა. საქართველოს კი, იგი 2016 წელს გადმოეცა.

სალომე ზურაბიშვილის საფრანგეთში ვიზიტი 17 თებერვალს დაიწყო. პრეზიდენტის პრესსამსახურის ინფორმაციით სალომე ზურაბიშვილი უმაღლესი დონის შეხვედრებს გამართავს საფრანგეთის პრეზიდენტთან ემანუელ მაკრონთან და საფრანგეთის სენატის პრეზიდენტთან ჟერარ ლარშესთან, რომლებზეც საქართველო – საფრანგეთის ურთიერთობების უფრო მაღალ ხარისხში აყვანის საკითხები და საქართველოს საგარეო პოლიტიკის პრიორიტეტები განიხილება.

ემანუელ მაკრონთან შეხვედრის შემდეგ ორი ქვეყნის პრეზიდენტები ხელს მოაწერენ თანამშრომლობის დეკლარაციას “ფრანგულ-ქართული დიმიტრი ამილახვრის სახელობის დიალოგის” დაფუძნების შესახებ, რომლის საფუძველზეც ქვეყნებს შორის დიალოგს ინსტიტუციური ხასიათი მიეცემა და თვისობრივად ახალ ეტაპზე გადავა.

დაგეგმილია შეხვედრა საფრანგეთის საერთაშორისო ურთიერთობათა ინსტიტუტის IFRI წარმომადგენლებთან. საერთაშორისო ურთიერთობათა ინსტიტუტში გამართულ დებატებში მონაწილეობას მიიღებენ: საფრანგეთის საექსპერტო წრეების წარმომადგენლები, დიპლომატები, ბიზნესმენები და პოლიტიკოსები.

საერთაშორისო ურთიერთობების საკითხებზე საჯარო ლექციას, “საქართველო და ევროპა, შესაძლებლობები ცვალებად გარემოში“, საქართველოს პრეზიდენტი პარიზში, პოლიტიკურ მეცნიერებათა ინსტიტუტში SciencesPo წაიკითხავს. სამუშაო ვიზიტის ფარგლებში, საქართველოს პრეზიდენტი შეხვედრას გამართავს ასევე იუნესკოში, პარიზში შეხვდება ქართველ სტუდენტებს და დიასპორის წარმომადგენლებს, სადაც ქვეყანაში მიმდინარე პროცესებში დიასპორის ჩართულობის საჭიროებასა და მექანიზმებზე ისაუბრებს.

ვიზიტის პირველ დღეს კი უკვე ეწვია წმინდა ნინოს სახელობის ეკლესიას, სადაც შვილებთან ერთად წირვას დაესწრო. ზურაბიშვილს შვილები თან ახლდნენ ლევილის მამულში სტუმრობისასაც.

February 17, 2019
სააკაშვილის გენეტიკური ტესტი. ექსპრეზიდენტი ამბობს, რომ 99%–ით ქართველი აღმოჩნდა

საქართველოს მესამე პრეზიდენტი, მიხეილ სააკაშვილი ფეისბუქის საკუთარ გვერდზე წერს, რომ გენეტიკური ტესტი გაიარა და დადგინდა, რომ 99% –ით ქვართველია. ექსპრეზიდენტი ტესტის შედეგების ფოტოებსაც აქვეყნებს. “წვეთი სისხლი არაა ჩემში არაქართული”-ცნობისმოყვარეობამ მძლია და გავიარე ამერიკაში ძალიან პოპულარული გენეტიკური ტესტი. თითქმის 99%_ით ქართველი აღმოვჩნდი და 1% ით ბერძენი.ეს ტესტი ზუსტად განსაზღვრავს შენი წინაპრების წარმომავლობას,მინიმუმ ბოლო ათასობით წლის განმავლობაში.
არ აღმომაჩნდა არცერთი კვეთა რეგიონის სხვა მოსახლეობასთან.ამ კვლევის მიხედვით ირანი და თურქეთი დაკავშირებულია საქართველოსთან,ოღონდ,იმის გამო,რომ ამ ორ ქვეყანაში ისტორიულად ბევრი ქართველია.
აღმოჩნდა,რომ ჩემი წინაპრები საერთოდ არავისთან არ არეულან ქართველების გარდა მრავალი საუკუნის განმავლობაში და მე პირველმა დავარღვიე ეს ტრადიცია,ევროპელთან ქორწინებით . ყველა მეზობელს პატივს ვცემ და რა თქმა უნდა ყველა ეთნიკური წარმოშობის საქართველოს პატრიოტი მიყვარს,მაგრამ აბა ახლა მოდით, იმათ გაიარონ გენეტიკური ტესტი, ვინც მუდმივად სხვა ეთნოსს მაკუთვნებდნენ და ედავონ მერე ზუსტ გენეტიკურ მეცნიერებას.“ – წერს საქართველოს მესამე პრეზიდენტი.

February 17, 2019
4 ქართველი კიევში ქურდობისთვის დააკავეს

უკრაინული მედიის ინფორმაციით კიევში ქურდობის სერიის ბრალდებით საქართველოს ოთხი მოქალაქე დააკავეს, რომლებიც უკრაინაში ტურისტული ვიზიტით იმყოფებოდნენ და ჰოსტელში ცხოვრობდნენ.

ეჭვმიტანილებმა წინასწარი მონაცემებით ერთ ღამეში ორი უცხოელი, ერთი ტაქსისტი და კიდევ ერთი ადამიანი გაქურდეს, რომლის ვინაობა ჯერჯერობით არ ხმაურდება. მათ მოიპარეს ორი საათი, პორტმონე, ძეწკვები და სხვა ძვირფასეულობა.

ქართველები ქუჩაში დააკავეს, როცა მათი ავტომანქანა პატრულმა გააჩერა. მათ პოლიციას წინააღმდეგობა გაუწიეს, რის შემდეგაც ადგილზე პოლიციის დამატებითი ძალები გამოიძახეს. მამაკაცები შეეცადნენ ნაქურდალი თავიდან მოეშორებინათ. როგორც მოგვიანებით გაირკვა, სამი მათგანი მთვრალი იყო, მეოთხემ კი განაცხადა, რომ თან ნარკოტიკები ჰქონდა.

დაკითხვაზე დაკავებულებმა ქურდობებთან მათი კავშირი უარყვეს, ამავე დროს ერთ–ერთი მათგანი დაინტერესდა, აძლევენ თუ არა პატიმრებს უკრაინულ ციხეში პლედებს.

როგორც კიევის პოლიციის ვებგვერდზეა ნათქვამი, 16 თებერვალს სამართალდამცავ ორგანოებში 119 შეტყობინება შევიდა ქურდობის შესახებ, 4 ძარცვის და ერთი ყაჩაღური თავდასხმის შესახებ.

February 17, 2019
შარლიზ ტერონი ბრედ პიტთან რომანის შესახებ ჭორებს პასუხობს

44 წლის შარლიზ ტერონმა მონაწილეობა მიიღო ელენ დეჯენერესის შოუში, სადაც პირად ცხოვრებაზეც ისაუბრა. ერთი თვის წინ გავრცელდა ჭორები, რომ მას რომანი აქვს 55 წლის ბრედ პიტთან. მსახიობები ამ ურთიერთობების შესახებ კომენტარს არ აკეთებდნენ, რაც კიდევ უფრო მეტ ჭორებს შობდა. ელენმა თავის შოუში შარლიზს კითხა, რა ხდება მის პირად ფრონტზე.

შარლიზ ტერონმა კითხვას მოკლედ და ცალსახად უპასუხა: “მარტო ვარ და თავისუფალი ვარ.“ გადაცემაში შარლიზ ტერონს Dior– ის წითელი კაბა ეცვა. შოუში ბევრი ისაუბრეს მის ახალ ფილმზე და გადაცემაში შარლიზმა ბევრი იმხიარულა.

მიუხედავად იმისა, რომ შარლიზ ტერონი და ბრედ პიტი თავის რომანზე არ საუბრობენ, ინსაიდერებმა მათი ურთიერთობების შესახებ უკვე არაერთი ინფორმაცია გაავრცელეს. მაგალითად ის, რომ მსახიობები განსაკუთრებით შობის შემდეგ დაახლოვდნენ და დიდ დროს ატარებდნენ ბრედ პიტის კალიფორნიულ სახლში.

მათ ურთიერთობას ბევრი ნიუანსი ახლავს. მაგალითად ის, რომ ბრედ პიტმა უკვე მესამე წელია ანჯელინა ჯოლისთან განქორწინება ბოლომდე ვერ მიიყვანა და სულ ცოტა ხნის წინ მოახერხა შეთანხმება ბავშვების მეურვეობის საკითხთან დაკავშირებით. გარდა ამისა, საყოველთაოდ ცნობილია, რომ ანჯელინას შარლიზ ტერონი ეზიზღება. ორი ვარსკვლავი ერთმანეთს მრავალი წელია კონკურენტად თვლის, ცოტა ხნის წინ კი ანჟელინას მიერ ინიცირებულ სკანდალში აღმოჩნდნენ გახვეული.

2017 წელს ცნობილი გახდა, რომ სტუდია Marvel 1935 წლის ფილმის, “ფრანკენშტეინის საცოლის“ რიმეიკის გადაღებას აპირებდა. პროდიუსერებმა ფილმის სცენარი ჯოლის და ტერონს ერთდროულად გაუგზავნეს. შარლიზის ეგზემპლარში აღნიშნული იყო, რომ როლი მას იმ შემთხვევაში შეხვდებოდა, თუ ჯოლი უარს იტყოდა. ფილმის ჰონორარად 20 მილიონი დოლარი იყო მითითებული.

ბრედ პიტის ექს მეუღლემ სპეციალურად გააჭიანურა პასუხი, რომ კონკურენტისთვის ნერვები მოეშალა. ამ ხნის მანძილზე შარლიზი იძულებული გახდა რამდენიმე მომგებიან წინადადებაზე ეთქვა უარი. საბოლოოდ, მისი მოთმინება ამოიწურა და სტუდიასთან თანამშრომლობაზე უარი თქვა. მოგვიანებით კი ფილმის გადაღება გაურკვეველი ვადით გადაიდო.

ტაბლოიდები ამტკიცებენ, რომ ჰოლივუდელი პროდიუსერები უკვე მრავალი წელია სპეციალურად აქეზებენ ჯოლის და ტერონს ერთმანეთზე . თუმცა ზოგადად, ანჯელინას ცუდი ხასიათის შესახებ საყოველთაოდ არის ცნობილი. მას ჰოლივუდური ბომონდის სხვა წარმომადგენლებთანაც ხშირად აქვს კონფლიქტი. მაგალითად, ცოტა ხნის წინ ჯორჯ ქლუნის ცოლთან, ამალი ქლუნთან მისი კონფლიქტი იქამდე მივიდა, რომ ახლა ორივე ქალი საერთო მეგობრებისგან მოითხოვს აირჩიონ, ვის მხარეს არიან.

ფილმ “მალეფისენტის“ გადაღებისას ჯოლიმ მიშელ პფაიფერთან იჩხუბა. ჯოლი ამტკიცებდა, რომ სწორედ ის იყო ამ პროექტის მთავარი ვარსკვლავი და იმასაც კი ითხოვდა, რომ მისთვის უფრო დიდი საგრიმიორო გამოეყოთ, ვიდრე მიშელს ქონდა.

February 17, 2019
აქცია საპატრიარქოსთან დეკანოზის შეწყალების მოთხოვნით

საქართველოს საპატრიარქოსთან მსჯავრდებული დეკანოზის, გიორგი მამალაძის მხარდასაჭერად გამართული საპროტესტო აქცია დასრულდა. დეკანოზის ძმა თორნიკე მამალაძე საქართველოს პატრიარქს მოუწოდებს დეკანოზის ჯანმრთელობის მდგომარეობის გათვალისწინებით პრეზიდენტს გიორგი მამალაძის შეწყალების თხოვნით მიმართოს.

დეკანოზ გიორგი მამალაძის მხარდასაჭერად გამართულ საპროტესტო აქციაში პოლიტიკოსებიც მონაწილეობდნენ. საპროტესტო აქციაზე იმყოფებოდა „ევროპული საქართველოს“ წევრი ელენე ხოშტარია“, პოლიტიკური გაერთიანება „გირჩის“ ლიდერი ზურა ჯაფარიძე, რესპუბლიკელების ლიდერი ხათუნა სამნიძე და „სახელმწიფო ხალხისთვის“ ლიდერი ნიკა მაჭუტაძე.

საპროტესრო აქციაზე გიორგი მამალაძის მხარდასაჭერად მივიდნენ ზაზა სარალიძე და მალხაზ მაჩალიკაშვილი და ტელეკომპანია რუსთავი 2-ის დირექტორი ნიკა გვარამია.

„ის, რომ ზიარება მოხდა, ეს არის კარგი, მაგრამ, სამწუხაროდ, სანამ ამ მდგომარეობამდე არ მივიდა, არ მოხდა მისი ზიარება. მივმართავ სრულიად საქართველოს კათოლიკოს პატრიარქს, რადგანაც ჩემი ძმა არის სასულიერო პირი და მისი მღვდელია. ასეთი განმეორებით შემთხვევაში, ჩემი ძმის სიცოცხლეს საფრთხე ემუქრება. ამიტომაც მივმართავ საქართველოს პრეზიდენტს შეწყალების თხოვნით“.- განაცხადა თორნიკე მამალაძემ.

ჯანმრთელობის მდგომარეობის გაუარესების გამო, დეკანოზი გიორგი მამალაძე ღუდუშაურის სახელობის კლინიკაში 15 თებერვალს საღამოს გადაიყვანეს. გუშინ, გვიან საღამოს კი ის ბათუმის წმინდა ნიკოლოზის ტაძრის წინამძღვარმა, დეკანოზმა ნიკოლოზმა ღუდუშაურის კლინიკაში აზიარა. საავადმყოფოდან გამოსვლის შემდეგ მან განაცხადა, ინსულტის გამო, მამა გიორგი მამალაძეს ლაპარაკი არ შეუძლია.

დეკანოზი გიორგი მამალაძე საკმაოდ დიდი ხანია, რაც ზიარებას ითხოვდა, თუმცა, ამ დრომდე თანხმობა არ ჰქონდა მიღებული.დეკანოზის ზიარების მოთხოვნით გიორგი მამალაძის ოჯახი საპატრიარქოსთან აქციას რამდენიმე დღის განმავლობაში მართავდა.

ზიარების შემდეგ ოჯახის წევრებს ერთადერთი მოთხოვნა რჩებათ – მისი შეწყალება.

February 17, 2019
მოზარდის ცხედარი ფოთში მაშველებმა იპოვეს

მაშველებმა ფოთში 20-დღიანი სამძებრო-სამაშველო სამუშაოების შემდეგ 16 წლის მოზარდის ცხედარი იპოვეს.

მოზარდი ფოთში მდინარე რიონში ხიდის მოაჯირიდან 29 იანვარს გადავარდა. მას შემდეგ, საგანგებო სიტუაციების მართვის სამსახურის ცნობით, სამძებრო სამუშაოებში 30-მდე მაშველი იყო ჩართული, მათ შორის, მყვინთავები თბილისიდან და აჭარის რეგიონებიდან.

სამძებრო– სამაშველო ღონისძიებები თითქმის სამი კვირის განმავლობაში როგორც მდინარეში, ისე ზღვაში 24 საათიან რეჟიმში მიმდინარეობდა.

ცხედარი შავი ზღვის სანაპირო ზოლზე, მდინარე რიონის შესართავიდან 1 კილომეტრში ნახეს.

February 17, 2019
რობერტ სტურუა და გია ყანჩელი ერთ პალატაში მკურნალობენ

{{ARTICLEIMAGE}}ისრაელი–საქართველოს კლინიკა ჰელსიკორი საკუთარ გვერდზე ფოტოს აქვეყნებს წარწერით:

“წლის ფოტო ჰელსიკორიდან: გია ყანჩელი და რობერტ სტურუა ერთმანეთს ამხნევებენ! გამოჯანმრთელება ვუსურვოთ ამ საოცარ ადამიანებს❤!“

როგორც ირკვევა, კომპოზიტორი და რეჟისორი ერთ პალატაში მკურნალობენ. მათი დიაგნოზის და ჯანმრთელობის მდგომარეობის შესახებ კლინიკა დამატებით ინფორმაციას არ ავრცელებს.

February 16, 2019