Blog

საახალწლოდ დახარჯული მილიონები, უტენდერო შესყიდვები და უკონკურენტო ტენდერები

„საერთაშორისო გამჭვირვალობა – საქართველომ“ საქართველოს 5 თვითმმართველი ქალაქის (თბილისი, ბათუმი, ქუთაისი, რუსთავი, ფოთი) ბიუჯეტებიდან საახალწლო და საშობაო ღონისძიებებზე გაწეული ხარჯები შეისწავლა.

საახალწლო ღონისძიებებთან დაკავშირებული სახელმწიფო შესყიდვები, როგორც წესი, გამოირჩევა იმით, რომ მაღალია უტენდერო, პირდაპირი შესყიდვების წილი. პირდაპირი შესყიდვის საფუძვლად კი ძირითადად გადაუდებელი აუცილებლობა ან სახელმწიფოებრივი და საზოგადოებრივი მნიშვნელობის ღონისძიება სახელდება. მიუხედავად იმისა, რომ ახალი წელი ყოველთვის 1 იანვარს არის, მუნიციპალიტეტები ვერ ახერხებენ დროულად დაიწყონ ახალი წლის ღონისძიებებისთვის მზადება და წლის ბოლოს დაჩქარებულად და მითუმეტეს, პირდაპირი შესყიდვებით არ დახარჯონ ბიუჯეტის ფული.

საერთაშორისო გამჭირვალობის დასკვნით ეს მიანიშნებს ტენდერების დაგეგმვის არასათანადო პრაქტიკაზე, რაც მნიშვნელოვან პრობლემად რჩება.

2019 წლის საახალწლო და საშობაო ღონისძიებებზე საქართველოს 5-მა თვითმმართველმა ქალაქმა: თბილისმა, ბათუმმა, ქუთაისმა, რუსთავმა და ფოთმა ჯამში დაახლოებით 6.5 მილიონი ლარი დახარჯა ბიუჯეტიდან. ამ თანხის 82% თბილისზე მოდიოდა. ტენდერების კუთხით მთავარი პრობლემა კონკურენციის დაბალი დონე იყო. მაგალითად, თბილისის მერიის 2 მილიონ ლარიანი ტენდერი იტალიურმა კომპანიამ „IDO SRL“-მა კონკურენციის გარეშე მოიგო. ბათუმის მერიის 428 ათას ლარიან ტენდერში „აჭარგანათებამ“ ასევე უკონკურენტოდ მოიგო, ხოლო რუსთავის მერიის გამოცხადებულ 208 ათას ლარიან ტენდერში მხოლოდ 2 კომპანია მონაწილეობდა, საიდანაც ერთმა დისკვალიფიკაცია მიიღო.

რაც შეეხება პირდაპირ შესყიდვებს, მაგალითად ფოთის მერიამ, რომელმაც საახალწლო ღონისძიებებზე ყველაზე ცოტა გაიღო, მთლიანი თანხა პირდაპირი შესყიდვის გზით დახარჯა. ქუთაისის მერიის შემთხვევაში თანხის 68% დაიხარჯა პირდაპირ შესყიდვაზე.

თბილისი

თბილისის მერიამ (მათ შორის შპს „თბილსერვის ჯგუფმა”) საახალწლო ღონისძიებებისთვის ჯამში დაახლოებით 5.3 მილიონი ლარი გაიღო, საიდანაც 36% უტენდეროდ, გამარტივებული შესყიდვის გზით დაიხარჯა.

თბილისის მერიის ინფორმაციით, ქალაქის მთავრობის განკარგულებით შპს „თბილსერვის ჯგუფს“ საახალწლო ღონისძიებების განსახორციელებლად 4 მილიონი ლარი გამოეყო. 2019 წლის 5 თებერვლისთვის ამ თანხიდან 3 560 735 ლარი იყო დახარჯული. გარდა ამისა, ილუმინაციების მონტაჟისთვის შრომის ანაზღაურების სახით გაიცა 63 567 ლარი.

„თბილსერვის ჯგუფმა“ ახალი 2019 წლის დღესასწაულისთვის გასანათებელი მოწყობილობების შესაძენად ორი მსხვილი შესყიდვა ელექტრონული ტენდერით განახორციელა. ტენდერებში შპს „ალპა+“-მ (578 000 ლარის შესყიდვა) და იტალიურმა კომპანიამ „IDO SRL“-მა (2 123 000 ლარის შესყიდვა) გაიმარჯვა. აღსანიშნავია, რომ ორივე კომპანიამ კონკურენტის გარეშე მოიგო ტენდერი. „თბილსერვის ჯგუფმა“ გამარტივებული შესყიდვის წესით 160 300 ლარი დახარჯა.

უშუალოდ თბილისის მერიის ადმინისტრაციამ 2019 წლის შობა-ახალი წლის აღსანიშნავი ღონისძიებებისთვის პირდაპირი შესყიდვის წესით სხვადასხვა კომპანიებისგან 1 720 974 ლარის საქონელი და მომსახურება შეისყიდა. პირდაპირი შესყიდვის საფუძველი გადაუდებელი აუცილებლობა ან სახელმწიფოებრივი და საზოგადოებრივი მნიშვნელობის ღონისძიება იყო. მათ შორის, შპს „თბილისი პარკ”-თან გააფორმა 52 140 ლარის ხელშეკრულება, რომლის დირექტორმაც, გელა დიღმელაშვილმა 2018 წლის 18 ოქტომბერს სალომე ზურაბიშვილის საარჩევნო ფონდს 20 000 ლარი შესწირა; ასევე, შპს „ლუმა დეველოპმენტთან“ გააფორმა 6 752 ლარის ხელშეკრულება, რომლის მფლობელმა ოთარ თედორაძემ 2017 წლის ნოემბერში „ქართულ ოცნებას“ 30 000 ლარი შესწირა.

ბათუმი

საშობაო-საახალწლოდ ბათუმის მერიამ ჯამში 788 623 ლარი დახარჯა და ყველა შესყიდვა ელექტრონული ტენდერის მეშვეობით განახორციელა.

ქალაქს ამჯერად ახალი საახალწლო აქსესუარები არ შეუსყიდია. საშობაო-საახალწლოდ ქალაქის გაფორმების სამუშაოები ა(ა)იპ „საქალაქო ინფრასტრუქტურისა და კეთილმოწყობის სამმართველომ“ შეისყიდა ელექტრონული ტენდერის მეშვეობით. შესყიდვის ღირებულებამ 428 423 ლარი შეადგინა. ტენდერი კონკურენტის გარეშე შპს „აჭარგანათებამ“ მოიგო. კომპანიამ საახალწლო ნაძვის ხის და აქსესუარების მონტაჟისა და დემონტაჟის სამუშაოები განახორციელა.

ბათუმის კულტურის ცენტრმა საახალწლო ღონისძიებებზე 360 200 ლარი დახარჯა. აქედან ღონისძიებების საორგანიზაციო ნაწილზე 177 700 ლარი, ხოლო მოწვეული მომღერლების და მუსიკოსების ანაზღაურებაზე 182 500 ლარი დაიხარჯა.

ქუთაისი

ქალაქ ქუთაისის მერიის ინფორმაციით, 2019 წლის აღსანიშნავი ღონისძიებებისთვის ქალაქის ბიუჯეტიდან 229 485 ლარი დაიხარჯა. ამ თანხის 68% ანუ 156 610 ლარი პირდაპირ შესყიდვებზე მოდის, მათ შორის, 99 485 ლარი საახალწლო განათებებზე დაიხარჯა.

საახალწლო განათებების შესასყიდად ქუთაისის მერიამ 97 141 ლარის ღირებულების ელექტრონული ტენდერი აუქციონის გარეშე 2018 წლის 11 ოქტომბერს გამოაცხადა. ტენდერში მონაწილეობა შპს „გერასკამ“ და შპს „დანდიმ“ მიიღო. შპს „დანდიმ“ 94 804 ლარის შეთავაზებით ტენდერი მოიგო, თუმცა შპს „გერასკამ“ ტენდერი გაასაჩივრა და შპს „დანდის“ დისკვალიფიკაცია მიეცა ტექნიკური დოკუმენტაციის გამო. მერიამ ხელშეკრულება შპს „გერასკასთან“ გააფორმა. 28 დეკემბერს მერიამ „გერასკასთან“ ხელშეკრულება შეწყვიტა, მიზეზად კი შესაბამის ვადაში სამუშაოების შეუსრულებლობა დასახელდა.

2018 წლის 26 დეკემბერს ქუთაისის მერიამ პირდაპირი შესყიდვის წესის გამოყენებით და გადაუდებელი აუცილებლობის საფუძვლით) გასანათებელი მოწყობილობები, საბოლოოდ, შპს „დანდისგან“ 99 485 ლარად შეიძინა, რაც თავდაპირველ ფასზე (ელექტრონული ტენდერის ღირებულებაზე) 2 300 ლარით მეტია.

აღსანიშნავია, რომ შპს „დანდი“ საახალწლო განათებების ერთ-ერთი მთავარი მიმწოდებელია საქართველოს სხვადასხვა მუნიციპალიტეტებისთვის. 2019 წლის საახალწლო გაფორმებისთვის განათებები მისგან შეიძინეს ლანჩხუთის, ლაგოდეხის, წყალტუბოს, ტყიბულის, ყაზბეგის, ახალციხის, გორის, ბორჯომის, ხონის, სამტრედიის, მარტვილის, ქარელის, გარდაბნის, კასპის, სიღნაღის, ფოთის და სხვა მუნიციპალიტეტებმა, ძირითადად პირდაპირი შესყიდვის გზით.

ტენდერის გზით ქუთაისის მერიამ 42 955 ლარი საახალწლო ღონისძიების ორგანიზებაზე დახარჯა, ხოლო 19 900 ლარი საახალწლო კონცერტის სცენითა და გახმოვანებით უზრუნველყოფაზე. ნაძვის ხის გაფორმებაზე 10 000 ლარი დაიხარჯა.

რუსთავი

ქალაქ რუსთავის მერიამ საახალწლო ღონისძიებებზე 208 000 ლარი დახარჯა. მან საჭირო საქონელი და მომსახურება აუქციონის გარეშე ელექტრონული ტენდერით შეისყიდა. ტენდერში ორი კომპანია მონაწილეობდა: შპს „ახალგაზრდობის საერთაშორისო ცენტრი“ და შპს „ჯეოტურისტ+“. „ჯეოტურისტის+“-ის შეთავაზებული ფასი 198 041 ლარი იყო, ხოლო „ახალგაზრდობის საერთაშორისო ცენტრის“ 205 900 ლარი. ფასის მიხედვით ტენდერში „ჯეოტურისტ+“-მა გაიმარჯვა და მერიამ მასთან 19 დეკემბერს 198 041 ლარის ღირებულების ხელშეკრულება გააფორმა. თუმცა, 5 დღეში, 24 დეკემბერს ხელშეკრულება შეიცვალა და კონტრაქტის ღირებულება 208 000 ლარამდე გაიზარდა. შეცვლილ ხელშეკრულებაში მითითებულია, რომ შეიცვალა სატენდერო დოკუმენტაციაში ატვირთული „შესყიდვის ობიექტის ტექნიკური პირობები“. საბოლოო ჯამში, „ჯეოტურისტ+“-მა უფრო მეტი თანხა მიიღო, ვიდრე მის კონკურენტს ჰქონდა მითითებული ფასის შეთავაზების დროს.

208 000 ლარიდან მომსახურების შესყიდვაზე (კონცერტის ჩატარება, საბავშვო პროგრამა, საახალწლო განათება, საახალწლო დეკორაციები და ა.შ.) 176 959 ლარი დაიხარჯა, ხოლო საქონელზე (საჩუქრები და საახალწლო აქსესუარები) 31 041 ლარი.

ფოთი

ქალაქ ფოთის მერიის ინფორმაციით, 2019 წლის შობა-ახალი წლის ღონისძიებების დასაფინანსებლად 19 600 ლარი გამოიყო. 2018 წლის 4 დეკემბერს მერიამ ახალი წლისადმი მიძღვნილი ღონისძიების მომსახურების შესყიდვაზე 16 610 ლარის ღირებულების ტენდერი გამოაცხადა, თუმცა პრეტენდენტების არ არსებობის გამო ტენდერი არ შედგა და საბოლოოდ, პირდაპირი შესყიდვის წესით ინდივიდუალურ მეწარმე ნანა ჭითანავასგან შეისყიდა 16 610 ლარის მომსახურება.

საქონელი და მომსახურების შესყიდვის მიზნით (საახალწლო ინვენტარი), პირდაპირი შესყიდვის საშუალებით ფოთის მერიამ შპს „დანდისგან“ 4 862 ლარის ქალაქის გასაფორმებელი ინვენტარი შეიძინა.

ჯამში, საახალწლო ღონისძიებებზე ფოთის მერიამ 21 472 ლარი დახარჯა. ეს თანხა სრულად პირდაპირი შესყიდვის გზით დაიხარჯა.

March 1, 2019
რა მოუვა თავში ივანიშვილს, როგორ შეიძლება ვიმსჯელო – ხოშტარია “თიბისის“ საქმეზე

March 1, 2019
ქობულია ფაქტობრივად რუსულ ბაზებს აფინანსებს – სამადაშვილი

(more…)

March 1, 2019
ლუკაშენკო: სააკაშვილი იბრძოდა ბელარუსისთვის

ბელარუსის პრეზიდენტმა მედიასთან და ექსპერტებთან შეხვედრაზე საქართველოც ახსენა და ქვეყნის ყოფილ პრეზიდენტზე ისაუბრა. ლუკაშენკო ამბობს, რომ სააკაშვილი ბელარუსისთვის იბრძოდა.

“მოგწონთ ის, თუ არა, სააკაშვილი ბელარუსისათვის იბრძოდა ევროკავშირსა და ამერიკაში. თავის ხასიათიდან გამომდინარე ყველას არწმუნებდა: თქვენ არ იცნობთ ბელარუსს, არ იცნობთ ბელარუსის პრეზიდენტს, რატომ ახდენთ მათზე ზეწოლას”, განაცხადა ალექსანდრე ლუკაშენკომ.

ლუკაშენკომ ასევე თქვა, რომ ქვეყნის მოსახლეობის 98 პროცენტი არ დაუჭერდა მხარს ბელარუსის შესვლას რუსეთის შემადგენლობაში, თუ რეფერენდუმზე მსგავსი საკითხი დადგებოდა.

მისივე თქმით, ბელარუსს საქართველოსთან არც პოლიტიკური და არც ეკონომიკური პრობლემები არ აქვს – “მზად ვართ, ჩვენი კეთილი ურთიერთობები გამოვიყენოთ საქართველოსა და რუსეთს შორის კარგი, კეთილი ურთიერთობების ჩამოყალიბებაში, რასაც, სხვათა შორის, ვაკეთებთ კიდეც.

ჟურნალისტის კითხვაზე როგორ ვითარდება ურთიერთობები ორ ქვეყანას შორის და რა არის მოსალოდნელი სამომავლოდ, ლუკაშენკომ თქვა, რომ ბელარუსმა და საქართველომ ეკონომიკური ურთიერთობები ნულიდან დაიწყეს და ახლა ვაჭრობა რამდენიმე ათეული მილიონს უტოლდება.

“ჩვენ თქვენთვის მეგობარი სახელმწიფო ვართ და შესანიშნავი ურთიერთობა გვაქვს. საქართველოსთან ტვირთბრუნვა საერთოდ არ გვქონდა და ახლა ეს მაჩვენებელი 87 მილიონს აღწევს. ქვეყანა პატარაა, ბაზარი პატარაა, მაგრამ ჩვენ თანამშრომლობა ნულიდან დავიწყეთ. თქვენ გჭირდებათ ყველაფერი, რასაც ვაწარმოებთ. მე ვიყავი საქართველოში, ვნახე ქვეყანა როგორ ვითარდება და ვნახე, რომ ჩვენ პროდუქციაზე მოთხოვნა დიდია. საქართველოსთან არავითარი პრობლემა არ გვაქვს, არც პოლიტიკური და არც ეკონომიკური. ჩვენი კეთილი ურთიერთობები მზად ვართ გამოვიყენოთ საქართველოსა და რუსეთს შორის კარგი, კეთილი ურთიერთობების ჩამოყალიბებაში, რასაც, სხვათა შორის, ვაკეთებთ კიდეც”, აღნიშნა ბელარუსის პრეზიდენტმა.

ალექსანდრე ლუკაშენკო პრეზიდენტის პოსტს 1994 წლის ივლისიდან იკავებს.

წყარო – რადიო თავისუფლება/საზოგადოებრივი მაუწყებელი

March 1, 2019
NATO-ში ინტეგრაციის წლიური ეროვნული პროგრამა დამტკიცდა

საქართველოს მთავრობის ადმინისტრაციაში ევროკავშირში ინტეგრაციის სამთავრობო კომისიისა და NATO-ში ინტეგრაციის სახელმწიფო კომისიის ერთობლივი სხდომა გაიმართა.

დამტკიცდა საქართველოს წლიური ეროვნული პროგრამა (ANP), რომელიც NATO-ში გაწევრიანების ერთ-ერთი ყველაზე მნიშვნელოვანი მექანიზმია.

პრემიერ-მინისტრმა მამუკა ბახტაძემ განაცხადა, რომ საქართველო NATO-ს განსაკუთრებული და საიმედო პარტნიორია, წელს ქვეყანა უმასპინძლებს ალიანსის გენერალურ მდივანს, სამხედრო კომიტეტსა და ჩრდილოატლანტიკურ საბჭოს, რაც განსაკუთრებულ პატივთან ერთად დიდი პასუხისმგებლობაა და ხაზს უსვამს, რომ საქართველოს-NATO-ს ურთიერთობები ახალ დონეზეა.

ბახტაძის შეფასებით, უმაღლეს დონეზეა ევროკავშირთან ურთიერთობისა და ინტეგრაციის ხარისხი და ქვეყანას აქვს რესურსი ვადაზე ადრე შეასრულის ევროკავშირის წინაშე ნაკისრი ვალდებულებების გარკვეული ნაწილი.

5 მარტს ბრიუსელში დაგეგმილია საქართველო-ევროკავშირის ასოცირების საბჭოს მე-5 სხდომა, რომელზეც ქართული მხარე წარადგენს “ევროკავშირში ინტეგრაციის საგზაო რუკას.”

მთავრობის პრესსამსახურის ინფორმაციით, კომისიების ერთობლივ სხდომაზე საგარეო საქმეთა მინისტრმა დავით ზალკალიანმა წარადგინა ევროკავშირთან ასოცირების დღის წესრიგის განხორციელების 2018 წლის ეროვნული სამოქმედო გეგმისა და თავისუფალი სავაჭრო სივრცის შეთანხმების შესრულების წლიური ანგარიში. სხდომაზე დამტკიცდა ასოცირების შეთანხმებისა და ასოცირების დღის წესრიგის განხორციელების 2019 წლის ეროვნული სამოქმედო გეგმა.

March 1, 2019
სპეცოპერაცია ფონიჭალაში

ფონიჭალაში რამდენიმე საათის განმავლობაში გრძელდებოდა სპეცოპერაცია, რომლის მიზანი სავარაუდოდ ნარკოტიკების რეალიზების ბრალდებით რამდენიმე პირის დაკავება იყო. ადგილზე სამართალდამცავები არიან მობილიზებული. შსს ჯერჯერობით კომენტარს არ აკეთებს, თუმცა ადასტურებს, რომ საგამოძიებო მოქმედებები ადგილზე ამ დრომდე გრძელდება.

March 1, 2019
მერილ სტრიპი ბებია გახდა

ცნობილი მსახიობი, ოთხი შვილის დედა, მერილ სტრიპი 69 წლის ასაკში პირველად გახდა ბებია. მსახიობის უფროს ქალიშვილს, 35 წლის მემი გამერს ვაჟი შეეძინა.

ბავშვი 28 თებერთვალს დაიბადა. სასიხარული ამბავი მედიას მემის წარმომადგენელმა ამცნო. ბავშვის სახელი ჯერ უცნობია.

მემი გამერი ფეხმძიმობას არ მალავდა. გასული წლის დეკემბერში ის საზოგადოებაში მომრგვალებული მუცლით გამოჩნდა და დაადასტურა, რომ დედობისთვის ემზადებოდა. ბავშვის მამა მემის საქმრო, სცენარისტი და პროდიუსერი მეჰარ სეთჰია. ისინი გასული წლის აგვისტოში დაინიშნნენ, თუმცა ქორწილი იმ მოტივით გადადეს, რომ ბავშვის დაბადებისთვის უნდა მომზადებულიყვნენ. წარსულში გამერი ორი წლის მანძილზე მსახიობ ბენჟამინ უოკერის ცოლი იყო.

მემი გამერი დედის მსგავსად მსახიობია, თუმცა არა ისეთი პოპულარული. ის ძირითადად სერიალებში მონაწილეობს, მათ შორის არის “ნამდვილი დეტექტივი 3“, “კარგი ცოლი“ .

მერილ სტრიპს როგორც გითხარით ოთხი შვილი ყავს. მემი გამერი, 39 წლის მუსიკოსი ჰენრი ვულფ გამერი, 32 წლის მსახიობი გრეის გამერი და 27 წლის ლუიზა გამერი. მერილ სტრიპი უკვე 40 წელი სკულპტორ დონ გამერის ცოლია. მერილი მისი ცხოვრების სიყვარულს რთულ მომენტში შეხვდა: 1978 წელს მისი საქმრო, მსახიობი ჯონ კაზალე სიმსივნით გარდაიცვალა. დონი მერილს მძიმე მდგომარეობიდან გამოსვლაში დაეხმარა. ისინი მალევე დაქორწინდნენ.

March 1, 2019
რატომ არ გვშველის დიეტა? 5 მიზეზი

სწორად იკვებებით, სპორტდარბაზში დადიხართ, მაგრამ კილოგრამები არ გაკლდებათ? ხშირად ხდება ასე. აი, რამდენიმე მიზეზი, რატომაც დიდი ძალისხმევის მიუხედავად წონაში დაკლება გიჭირთ.

1. თქვენ კვების არასწორი გეგმა შეარჩიეთ

ყველა ადამიანი განსხვავებულია, ისევე როგორც მათი მოთხოვნილებები. შესაძლოა ერთი დიეტა სხვისთვის ეფექტური იყოს, თქვენთვის არა. ეს ბევრ რამეზეა დამოკიდებული, დაწყებული სისხლის ჯგუფიდან, დამთავრებული თქვენი ჰორმონალური ფონით და ინდივიდუალური მეტაბოლიზმით. მიდით კარგ დიეტოლოგთან ან რამდენიმე ვარიანტი მოსინჯეთ. ამის შემდეგ მიხვდებით, რა ტიპის კვებაა თქვენთვის უფრო ეფექტური.

2. მეტისმეტად დიდი პორციები

მნიშვნელოვანია არა მხოლოდ სწორი კვება, არამედ მოზომილი კვებაც. შესაძლოა გაუცხიმოვნებული იოგურთი ნაკლებკალორიულია, მაგრამ ეს არ ნიშნავს რომ ლიტრობით დალიოთ. ჩაიწერეთ ყველაფერი, რასაც ჭამთ და მალე აღმოაჩენთ, სად იმალება ზედმეტი კალორიები, რომლებიც ხელს გიშლით წონის დაკლებაში.

3. ნაკლები აქტივობა

სპორტი კარგია. მაგრამ თუ კვირაში რამდენჯერმე სპორტდარბაზში ვარჯიშობთ, დანარჩენ დროს კი მანქანაში, ოფისში, დივანზე გაუნძრევლად ატარებთ შედეგი არ გექნებათ. ხშირად იარეთ ფეხით, ირბინეთ, ადით კიბეზე.

4. ძილის ნაკლებობა

ძილი ყველაფერთან ერთად მეტაბოლიზმზეც მოქმედებს. ამიტომ დღეღამეში მინიმუმ 7 საათი უნდა გეძინოთ. წონის დაკლების პროცესში ძილის დარეგულირება მნიშვნელოვანია.

5. პლატოს მიაღწიეთ

ეს ნორმალურია. ხშირად ხდება, რომ წონა ერთ ადგილზე ჩერდება და შესაძლოა ერთი თვე ვერაფერი დაიკლოთ. თუმცა ამის ნუ შეგეშინდებათ. თუ ყველაფერს დანარჩენს სწორად აკეთებთ, პროცესი აუცილებლად დაიძვრება ადგილიდან და წონის კლებაც გაგრძელდება.

March 1, 2019
როგორ დაემშვიდობა ბესელია ივანიშვილს?

მმართველი გუნდიდან წასული ეკა ბესელია პარტიის ლიდერთან ბოლო შეხვედრას იხსენებს. პოლიტიკოსი ამბობს, რომ ბიძინა ივანიშვილთან შეხვედრები იყო როგორც მეგობრული, ასევე რთული, ბოლო შეხვედრას კი ცივილურს დაარქმევდა.

“დამშვიდობება იყო კულტურული. მანამდე კი რთული პროცესი გავიარეთ. ჩვენი გზები სწორედ იმიტომ გაიყო, რომ მოსამართლეების საკითხზე ჩვენი ხედვები არ დაემთხვა”,თქვა ეკა ბესელიამ “ტვპირველთან”.

ცოტა ადრე უნდა წავსულიყავი – გედევან ფოფხაძე

საპარლამენტო უმრავლესობიდან ჟორჟოლიანიც მიდის

ბექა ნაცვლიშვილმა საპარლამენტო უმრავლესობა დატოვა

ეკა ბესელიამ “ქართული ოცნება” დატოვა

ბიძინა ივანიშვილი დღეს მმართველი გუნდის წევრებს შეხვდება

March 1, 2019
საპატრიარქო მზად არის დეკანოზ მამალაძის შეწყალების მოთხოვნით პრეზიდენტს მიმართოს – მეუფე ანტონი

მეუფე ანტონი, რომელიც დღეს მსჯავრდებულ დეკანიოზ გიორგი მამალძესთან გლდანის სასჯელაღსრულების დაწესებულებაში იყოფებოდა, აცხადებს, რომ საპატრიარქო მზად არის, მამა გიორგის შეწყალების მოთხოვნით ნაბიჯი გადადგას. ბაღდათის მიტროპოლირტი ირწმუნება, რომ საპატრიარქო მზად არის, პრეზიდენტს მიმართოს მსჯავრებული დეკანოზის შეწყალების მოთხოვნით. „საკითხი აუცილებლად უნდა განვიხილოთ შიგნით, ეს არის შიდა საკითხი და ერთხელ და სამუდამოდ დასრულდეს თემის ირგვლივ მითქმა-მოთქმა და სპეკულაციები“ – აცხადებს მეუფე ანტონი და დარწმუნებულია, რომ პრეზიდენტი სალომე ზურაბიშვილი დეკანოზს შეიწყალებს.

„მსჯავრდებული თავად იტყვის ყველაფერს, არ მინდა მოვლენებს დავასწრო. მიმაჩნია, რომ ის უდანაშაულოა“- განაცხადა მეუფე ანტონმა გლდანის სასჯელარსრულების დაწესებულებიდა გამოსვლის შემდეგ. მეუფე ანტონმა დღეს დეკანოზთან შეხვედრისას იმ სკანდალურ წერილზეც ისაუბრა, რომელიც გიორგი მამალაძემ 2017 წელს მატროსოვის ციხიდან 4 ეპისკოპოსს გამოუგზავნა. ვანისა და ბაღდათის მიტროპოლიტი რამდენიმე დღის წინ წერილის მძიმე მორალურ-ზნეობრივ შინაარსზე საუბრობდა, დღეს კი ამბობს, რომ აჟოტაჟის საფუძველი არ არსებობს და ამ წერილს ეკლესიის შიგნით განიხილავენ.

March 1, 2019