Blog

“მან თავად გასცა პასუხი კითხვას, რატომ წავედით პარტიიდან” -საპარლამენტო უმრავლესობის ყოფილი წევრი ეკა ბესელია  ბიძინა ივანიშვილის გუშინდელ ინტერვიუს აფასებს.

ბესელიას თქმით,  ბიძინა ივანიშვილი გულწრფელი არ ყოფილა როდესაც გუნდიდან ყოფილი თანამებრძოლების წასვლაზე საუბრობდა.

“ასეთ უხერხულ მდგომარეობაში მყოფი ბიძინა ივანიშვილი ინტერვიუს დროს განსაკუთრებით იმ ნაწილში, რომელიც ეხებოდა ჩვენი წასვლის მიზეზებს არ მახსოვს. ყოველ შემთხვევაში დიდი ხანია არ მახსოვს ასეთი. ეს იმით იყო განპირობებული, რომ არ იყო გულწრფელი როდესაც ამაზე საუბრობდა.

არ შეიძლება არ ახსოვდეს ის პროტესტი, რომელიც ჯერ კიდევ მის პოლიტიკაში მოსვლამდე გვქონდა ჩვენ, თუ ადევნებდა თვალს, სააკაშვილის რეჟიმის წინააღმდეგ ბრძოლას. იმ მოსამართლეების ქმედების გამო, რომლებიც სწორედაც რომ ძალადობის მსახურნი იყვნენ და არა მსხვერპლნი როგორც თავად უწოდებს მათ. ყოველ შემთხვევაში ჩემი ბრძოლა არ დაწყებულა არც შარშან, არც შარშანწინ და არც გუშინ, 20 წელია მე სასამართლოს დამოუკიდებლობისთვის ვიბრძვი. ჩემი პოლიტიკური და სხვების პოლიტიკური მეხსიერება გაცილებით დიდია, ვიდრე მისი აღმოჩნდა გუშინ სამწუხაროდ.

თავად გასცა პასუხი იმ კითხვებს რატომ წავედით ამ პარტიიდან და რატომ დავტოვე, პარტია რომელიც მასთან ერთად დავაფუძნე თავად უპასუხა ამ კითხვას. სწორედ იმ მთავარი განსხვავების გამო, რომელის დემონსტრირებაც მოახდინა მან ამ ინტერვიუთი. მან თქვა რომ ის იცავს და მიაჩნია, რომ მსხვერპლი არიან ის მოსამართლეები, რომელთა მიმართაც არსებობს საზოგადოების მაღალი უნდობლობა. ზარდიაშვილები თურმე მსხვერპლი არიან იმიტომ რომ მათ მოინანიეს და თქვეს, რომ ადეიშვილ-მერაბიშვილი თურმე არ არიან უსამართლოდ გასამართლებული და ეს საკმარისი აღმოჩნდა, რომ ის დამდგარიყო ამ ადამიანების დამცველად”-განაცხადა ეკა ბესელიამ.

შეგახსენებთ, რომ ბიძინა ივანიშვილმა გუშინ საღამოს ტელეკომპანია “იმედთან” ინტერვიუში ყოფილ თანამებრძოლებზეც ისაუბრა და  განაცხადა, რომ  ფასეულობები პარტიიდან წასულ დეპუტატებს აერიათ და არა ქართულ ოცნებას. 

“რატომ წავიდნენ გუნდიდან, ვერ დაამტკიცეს. გუნდში მათ მე მივეცი საუბრის საშუალება, სამს ჰქონდა პოზიცია, რომელსაც ვერ ასაბუთებდნენ, დანარჩენები დაწყნარდნენ, რადგან ნახეს, რომ მათი ზედმეტი აქტიურობა არაფერზე იყო დაფუძნებული. მათი მიზეზი საბაბადაც ვერ გამოდგებოდა, რადგან მოსამართლეებთან დაკავშირებით ყველა პოზიცია შეჯერებული იყო. ისინი დაიყვნენ, მოახერხეს და აურიეს ფასეულობები. ვნახოთ როგორი სასამართლოა ის, რასაც განიცდიან და რატომღაც მეექვსე წელიწადს”, — განაცხადა ივანიშვილმა გუშინდელ ინტერვიუში.

მიატოვა საყვარელმა პოეტმა მაღრაძემ და დარჩენილია დამწყები პოეტი თალაკვაძის ამარა – განაცხადა რომან გოცირიძემ ბიძინა ივანიშვილის გუშინდელ ინტერვიუზე.
“ნაციონალური მოძრაობის” წევრის შეფასებით, ბიძინა ივანიშვილი პოლიტიკური ოპონენტების დევნითაა დაკავებული, რადგან თანამებრძოლები შემოეცალა.

გოცირიძემ ბიძინა ივანიშვილის მიერ ანაკლიის პორტზე გაკეთებული განცხადებაც უარყოფითად შეაფასა და აღნიშნა,რომ მსგავსი საუბრები  ინვესტორისთვის ძალიან უარყოფითი გზავნილია.

“ეს იყო შეშინებული კაცის დარდები, რომელიც ხვდება, რომ კარგავს ძალაულფებას, რომ დარჩა მარტო, გაწირა ყველამ, ვისაც კი ელემენტარულად ჭკუა მოეკითხება. ოთხჯერ ახსენა „კაპიტანი გიგაური,“ ორჯერ მეტად შალვა შავგულიძე, უთვალავჯერ „ნაციონალური მოძრაობა“ და არცერთხელ უხსენებია რუსეთი. არის გახლართული თავის პარტიულ ინტრიგებში, მიატოვა საყვარელმა პოეტმა მაღრაძემაც კი და დარჩა დამწყები პოეტი თალაკვაძის ამარა. ადამიანი, რომელსაც წამოცდენებით მეტის თქმა შეუძლია, ვიდრე ხმამაღალი საუბრით. წამოცდა, რომ ანაკლიის პროექტი არის წამგებიანი და მისი რენტაბელურობა შეიძლება მიღწეული იყოს 30-40 წლის შემდეგ, ამას რომ ინვესტორი მოისმენს, როგორ უნდა გაბედოს ანაკლიის პროექტში მონაწილეობა,“-განაცხადა რომან გოცირიძე. 

შეგახსენებთ, რომ გუშინ ტელეკომპანია “იმედის” ეთერში ბიძინა ივანიშვილმა ყოფილი თანამებრძოლები გააკრიტიკა და ასევე ანაკლიის პორტის წამგებიანობაზე ისაუბრა. ივანიშვილმა განაცხადა, რომ ანაკლიის პორტიდან ბიზნესმენი სარგებელს დიდი ხნის განმავლობაში ვერ მიიღებს, ამიტომ ის მომგებიანი არ არის.

ევროსაბჭოს საპარლამენტო ასამბლეაზე სიტყვით გამოსვლამდე საქართველოს პრემიერ-მინისტრმა მამუკა ბახტაძემ სტრასბურგში პირველი შეხვედრა გამართა.

ბახტაძე ევროსაბჭოს საპარლამენტო ასამბლეის პრეზიდენტს შეხვდა, რომელიც თვის ბოლოს საქართველოს ეწვევა.

შეხვედრის დასრულების შემდეგ მამუკა ბახტაძემ  მოკლე კომენტარი გააკეთა.

“შეხვედრაზე განვიხილეთ ორმხრივი ურთიერთობების საკითხი, აღვნიშნეთ მნიშვნელოვანი პროგრესი, რომელსაც საქართველომ მიაღწია დემოკრატიის კონსოლიდაციის, რეფორმების პროცესისა და მიღწევების განმტკიცების კუთხით. განვიხილეთ ევროსაბჭოს გამოწვევები და შევეხეთ მინისტრთა კომიტეტის საქართველოს მომავალი თავმჯდომარეობის საკითხს. მივაწოდე პრეზიდენტს ინფორმაცია, ადამიანის უფლებების დარღვევის სერიოზულ ფაქტებზე ოკუპირებულ რეგიონებში. ხაზი გავუსვი, რომ საქართველო მზად არის მჭიდროდ ითანამშრომლოს საპარლამენტო ასამბლეასთან და მადლიერი ვარ ევროსაბჭოს ჩართულობით რეფორმების პროცესში. მიგვაჩნია, რომ რეკომენდაციები მნიშვნელოვანია ჩვენი ეროვნული პრაქტიკის და კანონმდებლობის ჰარმონიზაციისთვის ევროპულ სტანდარტებთან,”-განაცხადა მამუკა ბახტაძემ.

შინაგან საქმეთა სამინისტროს ქვემო ქართლის პოლიციის დეპარტამენტის დეტექტივების სამმართველოს თანამშრომლებმა, ჩატარებული ოპერატიულ-საგამოძიებო მოქმედებების შედეგად, 1989 წელს დაბადებული ა.ს. განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით დააკავეს.

დანაშაული 8-დან 20 წლამდე ან უვადო თავისუფლების აღკვეთას ითვალისწინებს.

სამართალდამცველებმა, დაკავებულის პირადი და საცხოვრებელი ბინის ჩხრეკისას, 30 გრამამდე ნარკოტიკული საშუალება „ჰეროინი“ ნივთმტკიცებად ამოიღეს.

გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე, საქართველოს სსკ-ს 260-ე მუხლის მე-6 ნაწილის „ა“ ქვეპუნქტით მიმდინარეობს.

დღეს დილიდან რუსთავიდან თბილისში მოძრავი მიკროავტობუსების მძღოლების ნაწილი  გაფიცულია. მძღოლების გაფიცვის გამო, აღნიშნულ მარშრუტზე მგზავრთა გადაყვანა შეფერხებით მიმდინარეობს.

გაფიცულების თქმით, მათ კომპანია “ინტერტრანსმა” ყოველდღიური შესატანი თანხა 15 ლარით გაუზარდა, მძღოლები კი  გადასახადი თანხის შემცირებას ითხოვენ.

მიკროავტობუსების მძღოლები ოფიციალური კომენტარის გაკეთებისგან თავს იკავებენ, რადგან მათი თქმით,  შესაძლოა ამის გამო, დამსაქმებელთან პრობლემები შეექმნებათ.

კომპანია ,,ინტერტრანსში“ კი მძღოლების გაჩერების სხვა მიზეზს ასახელებენ.

“ამდენი ხნის განმავლობაში, რამდენიმე ჩამონგრეული მეტროსადგური ვერ გავაკეთეთ გარკვეული პრობლემების გამო, ხან პროექტი არ ვარგა, ხან ისეთ პროექტს მოგვაწვდიან, რომ მისი გაკეთება სირცხვილია უბრალოდ. ერთი წელი გავიდა და „ვარკეთილის“ ჭერი ვერ გაგვიკეთებია, სირცხვილია, იმოქმედეთ სწრაფად”,- ამის შესახებ დედაქალაქის მერმა კახა კალაძემ თბილისი მთავრობის სხდომაზე საკუთარ მოადგილეს მიმართა,რომ  ეს პრობლემა მალე მოგვარდეს.

კახა კალაძემ, საზოგადოებრივი ტრანსპორტის განვითარების გეგმებზე  ისაუბრა და განაცხადა, რომ დღეს ტენდერი  მეტროს ვაგონების რეაბილიტაციაზე ცხადდება.

“დღეს ჩვენ ვაცხადებთ ტენდერს მეტროს ვაგონების რეაბილიტაციაზე. 4 ახალი შემადგენლობა გვეყოლება. 20 მილიონია ამისთვის გამოყოფილი. ჩვენი მთავარი მიმართულებაა, რომ განსაკუთრებით პიკის საათებში მოცდის დრო 3 წუთზე ნაკლები გავხადოთ. ბოლო დღეების განმავლობაში აქტიურად ზიარდება ფოტოები მეტროში არსებულ სიტუაციაზე, ხშირია მეტროს ვაგონების მწყობრიდან გამოსვლის შესახებ ინფორმაციები. ეს, რა თქმა უნდა, სერიოზული პრობლემაა, რომელიც დღეს და გუშინ არ დაწყებულა. წლების განმავლობაში სათანადო თანხები არ იყო მიმართული იმისკენ, რომ ეს პრობლემა მოგვარებულიყო. შემთხვევითი არ არის, რომ 2018-2019 წელს 100 მილიონი დაიხარჯება მეტროზე. 70 მილიონი დედაქალაქის ბიუჯეტიდან არის გამოყოფილი, 15 მილიონი დოლარი აზიის განვითარების ბანკის მიერ არის მოცემული. ყველაფერი უნდა გავაკეთოთ, რომ მეტროში არსებული ვითარება მოვაწესრიგოთ და მე პირობას გაძლევთ, რომ ჩვენ ვიქნებით თითით საჩვენებელი დედაქალაქის მთავრობა, რომელიც საზოგადოებრივ ტრანსპორტს ისე მოაგვარებს და ისე მოაწესრიგებს, რომ ბევრ ევროპულ ქვეყანაში არ იქნება ასეთი“,- განაცხადა კახა კალაძემ.

დედაქალაქის მერმა სტატისტიკა წარადგინა,  რამდენად ხშირად გამოდიოდა წლების განმავლობაში მეტროს ვაგონები მწყობრიდან.

„რაც შეეხება სტატისტიკას მწყობრიდან გამოსვლის შემთხვევებზე, მინდა მოსახლეობას მივაწოდო ინფორმაცია როგორ იყო წლების განმავლობაში და როგორი მდგომარეობა გვაქვს დღეს. 2017 წელს დაფიქსირდა 326 დაზიანება, მათ შორის, მგზავრების ევაკუაციის 95 შემთხვევა. 2018 წელს 305 დაზიანება იყო, მგზავრების ევაკუაციის 92 შემთხვევა, 2019 წელს გვაქვს 100 შემთხვევა, მათ შორის, მგზავრების ევაკუაციის 26 შემთხვევა. მგზავრების რაოდენობა არის ძალიან გაზრდილი მეტროში. მაგალითად, 2016 წელს დღეში საშუალოდ მგზავრთა რაოდენობა იყო 273 ათასი და 2019 წელს ეს მაჩვენებელი არის გაზრდილი 100 ათასით. ჩვენ გვაქვს ძალიან სერიოზული გამოწვევა, რომ როგორც მეტრო, ასევე ავტობუსები იყოს ყველანაირად მოწესრიგებული. ამდენი ხნის განმავლობაში, რამდენიმე ჩამონგრეული მეტროსადგური ვერ გავაკეთეთ გარკვეული პრობლემების გამო, ხან პროექტი არ ვარგა, ხან ისეთ პროექტს მოგვაწვდიან, რომ მისი გაკეთება უბრალოდ სირცხვილია, ხან არის ტენდერის ჩავარდნა. ამიტომ, ჩემი თხოვნაა – გაკეთდეს პირდაპირი შესყიდვები. ერთი წელი გავიდა და „ვარკეთილის“ ჭერი ვერ გაგვიკეთებია, სირცხვილია, იმოქმედეთ სწრაფად“,- განაცხადა კალაძემ.

“ცენტრ პოინტის” დამფუძნებელს მაია რჩეულიშვილს 7 წლით თავისუფლების აღკვეთა მიესაჯა – განაჩენი სასამართლომ ცოტა ხნის წინ გამოაცხადა.საქმე “ცენტრ პოინტის”„მიონის” ეპიზოდს ეხება.

ბრალდების მხარის განმარტებით, ერთ-ერთი ბრალდებული ქეთევან ჟორდანია, რომელიც სწორედ იმ ობიექტის ხელმძღვანელი პირი იყო, საიდანაც მოხდა თანხების მითვისება, მომხდარში “ცენტრ პოინტის” დამფუძნებელს ადანაშაულებს და მის წინააღმდეგ მამხილებელი ჩვენება მისცა.

მაია რჩეულიშვილს და ქეთევან ჟორდანიას თაღლითობით დიდი ოდენობით თანხის მითვისება ედებათ ბრალად.

მთაწმინდის მაჟორიტარი დეპუტატობის კანდიდატი, გიორგი ანდრიაძე გირჩის რელიგიური ორგანიზაციის, ბიბლიური თავისუფლების გაუქმების მოთხოვნით სასამართლოს მიმართავს. ამის შესახებ ანდრიაძემ დღეს  პრესკონფერენციაზე განაცხადა.

ანდრიაძემ განაცხადა, რომ ბიბლიური თავისუფლება უკანონოდ შეიქმნა. 

რაც შეეხება მის მიერ შექმნილ რელიგიურ ორგანიზაციას, ის ამბობს, რომ ის ადრეც არსებობდა და ამის დამადასტურებელი დოკუმენტებიც მოიპოვება.

“როდესაც გირჩის რელიგიური ორგანიზაცია გაუქმდება, ჩვენც შევწყვეტთ ჯარში გაწვევის თავის ასარიდებლად რეგისტრაციას. კატაკომბური ორგანიზაცია იარსებებს და მას სხვა მიზნებიც აქვს”, — განაცხადა ანდრიაძემ.

პირველ აპრილს გიორგი ანდრიაძემ განაცხადა, რომ გირჩის ალტერნატივად მართლმადიდებლური კატაკომბური  ორგანიზაცია შეიქმნა, რომელიც ახალგაზრდებს ჯარისგან გაათავისუფლებს. მისი განმარტებით, ეს ორგანიზაცია თურქეთში არსებულ, ისტორიულად ჩამოყალიბებულ კატაკომბურ ეკლესიას წარმოადგენს, რომელიც თავისი მრწამსით მართლმადიდებლური ორგანიზაციაა.

თბილისის სატრანსპორტო კომპანიის ინფორმაციით, დღეიდან, მძღოლებს საშუალება ექნებათ, თბილისის პარკინგის SMS შეტყობინების სერვისით ისარგებლონ.

სერვისის გასააქტიურებლად აუცილებელია მომხმარებელმა გაიაროს რეგისტრაცია თბილისის პარკინგის ოფიციალურ ვებგვერდზე (www.parking.tbilisi.gov.ge).

მომხმარებელს SMS-ით შესაძლებლობა აქვს მიიღოს შემდეგი სახის ინფორმაცია:

შეძენილი პარკირების საშვის მოქმედების ვადა,
შეძენილი პარკირების საშვის ვადის ამოწურვის შეტყობინება 10 დღით ადრე,
ავტოსატრანსპორტო საშუალების დაჯარიმების შესახებ (საჯარიმო ქვითრის მითითებით),
საურავის დარიცხვის შესახებ (საჯარიმო ქვითრის მითითებით),
სპეციალურ საჯარიმო სადგომზე ავტოსატრანსპორტო საშუალების გადაყვანის შესახებ.

“მომსახურების გასააქტიურებლად, მომხმარებელს შეჰყავს ავტოსატრანსპორტო საშუალების სახელმწიფო ნომერი და ორგანიზაციის საიდენტიფიკაციო კოდი/ან პირადი ნომერი (ვის სახელზეც არის ავტოსატრანსპორტო საშუალება რეგისტრირებული) გრაფაში „sms შეტყობინების გამოწერა“. მონაცემების შეყვანის შემდეგ, დაფიქსირებულ მობილურ ნომერზე იგზავნება სპეციალური ტრანზაქციის კოდი, რომელიც მომხმარებელმა შესაბამის გრაფაშიუნდა შეიყვანოს და შემდეგ მიიღებს დასტურს მომსახურების გააქტიურების შესახებ”, – აღნიშნულია  განცხადებაში.

დამატებითი ინფორმაციის მიღება შესაძლებელია თბილისის სატრანპორტო კომპანიის ცხელ ხაზზე: (+995 32) 293-44-44.