Blog

როცა ვამბობ, რომ ბოლომდე პასუხს ვაგებ, ვიქნები აქ, სანამ არ დავრწმუნდები, რომ ღონისძიებაში ჩართული თითოეული პოლიციელი არ იქნება უსამართლობის ზემოქმედების მსხვერპლი – გიორგი გახარია ამბობს, რომ 20 ივნისის ღამეზე პასუხისმგებლობას თავად იღებს, თუმცა ის არ გადადგება.

მისი თქმით, ის დაელოდება გამოძიებას, რათა დარწმუნდეს, რომ დარბევაში მონაწილე პოლიციელებს უსამართლოდ არ მოექცევიან. მინისტრი ამბობს, რომ თუკი გამოძიების პროცესში გამოიკვეთება სისტემური დარღვევები ის ამაზეც პასუხისმგებლები იქნება და ამ პასუხისმგებლობას არ გაექცევა.

გიორგი გახარიას თქმით, აუცილებელია ამ პროცესში პოლიტიკური და სამართლებრივი ნაწილი გაიმიჯნოს. პოლიტიკური ნაწილია, როდესაც ვიღაც ცდილობს პოლიციის დელეგიტიმაციის მოხდენას, რაც სახელმწიფო ინსტიტუტების რღვევას ნიშნავს. გახარია ამბობს, რომ ამას ის არ დაუშვებს.

“არავინ ჩემს გარდა ამ ღონისძიებას პირველ რიგში პასუხს არ აგებს, თუმცა რა თქმა უნდა, პოლიტიკური პასუხისმგებლობის ნაწილიც გასათვალისწინებელია. მე შემიძლია ქრონოლოგიურად მოგიყვეთ რა მოხდა, რომელ წუთს, რა სახით, ამის შემდეგ შეგვიძლია პირველი დონის შეფასებები გავაკეთოთ, თუმცა ეს შეფასებებიც არ იქნება სრულყოფილი სანამ არ დაველოდებით, სამართლებრივი პროცედურების დასრულებას.

“ჩემი პოლიტიკური პასუხისმგებლობაა ის, რომ ამ უწყებამ, ღირსეულად გაუძლოს ამ გამოცდას, რომელიც ჩვენ მოგვიწია შეგვესრულებინა ამ ღამეს და ის შედეგები, რაც მივიღეთ იმ პრობლემებით, რაც მივიღეთ ამ პრობლემებს თვალი უნდა გავუსწოროთ და შესაბამისად ვუპასუხოთ-ესეც ჩემი პასუხისმგებლობაა.

როცა ვამბობ,რომ თავიდან ბოლომდე პასუხს ვაგებ მე, მე ვიქნები აქ, სანამ უსაფრთხოდ, ლეგიტიმური პროცედურების დასრულებამდე, არ დავინახავ, რომ თითოეული პოლიციელი, რომელიც ამ ღონისძიებაში იყო ჩართული არ იქნება უსამართლო ზემოქმედების მსხვერპლი. არის ორი განზომილება, პოლიტიკური და სამართლებრივი, სამართლებრივ ნაწილშიც ის რაც ამ ღონისძიებაზე მოხდა, თუ იქ აღმოჩნდება, რომ იყო სისტემური დარღვევები, რა თქმა უნდა, ეს ჩემი პასუხისმგებლობაა და მე ამაზე პასუხს ვაგებ.

თუმცა, არის პოლიტიკური კომპონენტიც, როდესაც ვიღაც ცდილობს მოახდინოს პოლიციის დელეგიტიმაცია, რაც ნიშნავს სამართლებრივი სახელმწიფო ინსტიტუტების რღვევას, რა თქმა უნდა, მე ამას არ დავუშვებ,”-განაცხადა გიორგი გახარიამ.

“რატომ გვესროლეთ ტყვიები, რომლებიც ადამიანის სიკვდილს იწვევს?”- ეს შეკითხვა „რუსთავი 2-ის“ ჟურნალისტმა, თამარ ბაღაშვილმა გიორგი გახარიას დაუსვა.

“შეგიძლიათ აგვიხსნათ, რატომ გვესროლეთ ტყვიები, რომლებიც ადამიანის სიკვდილს იწვევს? რატომ ხართ თქვენ ჯერ კიდევ თანამდებობაზე 20 ივნისის სისხლიანი ღამის შემდეგ? თქვენ ხომ იცით, რომ საქართველოში ამას არ პატიობენ?”- ასე მიმართა 20 ივნისს დაჭრილმა ჟურნალისტმა მინისტრ გახარიას.

ბაღაშვილმა  ასევე წაიკითხა იმ ტყვიების შესახებ ინფორმაცია, რომლითაც დასტურდება, რომ   ამ ტყვიის სროლამ შეიძლება სერიოზული ან ფატალურ შედეგი გამოიწვიოს.

„ბატონო მინისტრო, მე 20 ივნისს აქციაზე ვიყავი როგორც ჟურნალისტი, მე ხელში არ მქონია არანაირი იარაღი, ერთადერთი მეკავა მიკროფონი, მე ჩემს მოვალეობას ვასრულებდი“ – მიმართა ბაღაშვილმა მინისტრს.

“ყველაფერი, რაც ამ ღონისძიების დროს მოხდა, რა თქმა უნდა, არის ჩემი პასუხისმგებლობა, მისი დაწყებიდან დასრულებამდე”-აცხადებს შს მინისტრი 20 ივნისის ღამის დარბევაზე საუბრისას.

გიორგი გახარია ამბობს, რომ ის მიჯნავს პოლიტიკურ და სამართლებრივ პასუხისმგებლობას და მიუღებლად მიაჩნია, როდესაც საზოგადოების ნაწილი პოლიციას სახალხო სასამართლოს უწყობს.

გიორგი გახარია ამბობს, რომ ძალის გამოყენებამდე რაც მოხდა ამაზე მსჯელობაც საჭიროა. მისი თქმით, პოლიცია იძულებული გახდა გამოეყენებინა ძალა. მინისტრი ამბობს, რომ ძალის გამოყენება ლეგიტიმური იყო, როცა ხდებოდა შტურმის მიტანა სახელმწიფო ინსტიტუტზე.

“ამ პასუხისმგებლობას არ გავურბივარ. ასევე ჩემი პასუხისმგებლობაა, რომ ის ყველაფერი, რაც დღეს საზოგადოებაში ხდება და როდესაც სახალხო სასამართლოს ვუწყობთ ცალკეულ ადამიანებს, პოლიციელებს მათ შორის, მაშინ როდესაც სამართლებრივი პროცედურებია  დაწყებულა ესეც ჩემი პასუხისმგებლობაა, ის ადამიანები, რომლებიც იცავდნენ სახელმწიფო ინსტიტუტს, ადამიანები, რომლებიც იცავდნენ სამოქალაქო სიმშვიდეს და იძულებული გახდნენ გამოეყენებინათ ლეგიტიმური ძალა ეს ადამიანები უნდა იყვნენ შეფასებული შესაბამისად საზოგადოების მხრიდანაც.

„ღონისძიებაზე პასუხისმგებელი ვარ რა თქმა უნდა მე, მე ამ პასუხისმგებლობას ვიღებ სრულად , ვთვლი,რომ პოლიციამ გამოიყენე ლეგიტიმური უფლება გამოეყენებინა ძალა პროპორციულობის ნაწილში არსებობს გარკვეული კითხვის ნიშნები გარკვეულ ეპიზოდებთან, რომელიც არის გამოსაძიებელი, ვყოფ სამართლებრივ და პოლიტიკურ ნაწილს. სანამ არ იქნება დასმული წერტილი და არ გაეცემა პასუხი ამ პროპორციულობის ნაწილს ვარ აქვს და დავიცავ თითოეულ პოლიციელს, რომელსაც ზოგიერთი ჩვენი მოქალაქე ბულინგის სახით ცდილობს მოუწყოს სასამართლო.

დაუშვებელია შტურმის მიტანა სახელმწიფო ინსტიტუტებზე,ასევე დაუშვებელია იმ ადამიანების ბულინგი და თავდასხმა, რომელიც ცდილობს ეს ინსტიტუტები და კონსტიტუცია დაიცვან,”-განაცხადა გახარიამ.

(more…)

„ის, რაც თავიდან ბრძანეთ, პასუხისმგებლობა ერთმნიშვნელოვნად ეკისრება ჩვენ შესაბამის უწყებებსაც, მათ შორის უსაფრთხოების საბჭოსაც, მაგრამ ეს არ იყო გაანალიზებული და არ ყოფილა განხილული, ამ ჭრილში სამწუხაროდ, ეს ღონისძიება რომელიც ჩატარდა პარლამენტში, დანახული არ ყოფილა. ამას გეუბნებით გულწრფელად, რაც შესაძლებელია იყოს შეცდომა, ან არასაკმარისი ანალიზი, მაგრამ ფაქტია,“ – ასე უპასუხა გიორგი გახარიამ ჟურნალისტის კითხვაზე, გაანალიზდა თუ არა 20 ივნისს პარლამენტში შენობაში, რუსი დეპუტატის მისვლა და შემდგომი მოვლენები, გათვლილი იყო თუ არა უსაფრთხოების კონტექსტში რისკები.

მინისტრი მიიჩნევს, რომ რაც მოხდა პარლამენტის შენობაში და შემდგომ განვითარებული მოვლენები უნდა გახდეს სპეციალური სამსახურების გამოძიების საგანი.

„უსაფრთხოების კომპონენტი იმაში, რაც მოხდა პარლამენტის შენობაში, პარლამენტს თავმჯდომარის ადგილიდან, შემდგომ ყველაფერი, რაც ამას მოჰყვა, ვხედავთ, რომ ეს შესაძლებელია, სპეციალური სამსახურების გამოძიების საგანი გახდეს, უნდა გახდეს. განსაკუთრებით, ამაში შემდგომ, რა განვითარებაც ამ ქმედებას მოჰყვა. თუმცა მინდა აღვნიშნო, რომ ეს ორი სხვადასხვა კომპონენტია, არსებობს კომპონენტი, რამაც გამოიწვია თავისუფალი მოქალაქის სამართლიანი პროტესტი. ძალიან დიდი რაოდენობა პოლიციელები, რომლებიც იქ იდგნენ, ვიცი, რომ გულწრფელად თანაუგრძნობდნენ პროტესტანტებს, ბევრი მათგანი მსახურობს საოკუპაციო ხაზზე, მათ ძალიან კარგად ესმით უსაფრთხოების და ოკუპაციის კომპონენტი, რამდენად მნიშვნელოვანია და ემოციურადაც ძალზედ მნიშვნელოვანია მათთვის. არანაირი პრობლემა არ არსებობდა იმაში, რომ ისინი თანაუგრძნობდნენ ამ პროტესტს.

“ეს არის ერთი ნაწილი, რა იყო გათვლილი და რა მიზანს ემსახურებოდა ღონისძიების მესვეურების ქმედების უკან, იყო თუა რა რაიმე გათვლები, რომელიც ქვეყნის უსაფრთხოების რისკებს შეუქმნიდა. სხვა საკითხია, ყველაფერი ის, რამაც მიიღო შემდგ პროტესტმა. ორივე კომპონენტი განსახილველია. უსაფრთხოების განზომილებას თვალსაზრისით, მე ვთლი, რომ ეს არის სხვადასხვა კომპონენტი და ვერანაირად მე იმ პროტესტის, რომელიც ჩვენმა მოქალაქეებმა პარლამენტის წინ გამოხატეს ვერ დავუკავშირებ უსაფრთხოების იმ შესაძლო რისკებს, რომელიც შესაძლებელია ყოფილიყო რუსი დეპუტატის ქმედებების უკან. რა ფორმებიც მიიღო ამ პროტესტმა ესეც ქვეყნის უსაფრთხოების კომპონენტს სერიოზულად ეხება, სხვა ფორმატში, მაგრამ ასევე განსახილველია,” – განაცხადა გიორგი გახარიამ.

ხმაური შეკვეთილში, ბიძინა ივანიშვილის სახლთან, სადაც უკვე მესამე დღეა მინისტრ გახარიას გადადგომის მოთხოვნით აქციები მიმდინარეობს. სიტყვიერი დაპირისპირება ბანერის გაკვრას მოჰყვა.

აქციის მონაწილეს ივანიშვილის სახლის შესასვლელთან ბანერის განთავსების უფლება სამართალდამცავებმა არ მისცეს, რასაც ხმაური მოჰყვა.

შეგახსენებთ, რომ შეკვეთილში აქციების პარალელურად შიმშილობის აქციაც მიმდინარეობს. მოშიმშილეებსა და აქციის მონაწილეებს იდენტური მოთხოვნები აქვთ. გადადგეს გახარია და დაისაჯოს ყველა ვინც 20 ივნისის ღამეს უფლებამოსილებას გადაამეტა.

ჟურნალისტების ნაწილი გიორგი გახარიასთან შეხვედრაზე არ დაუშვეს. შეხვედრას ვერ ესწრება პრესა.გე-ს რედაქტორი გიორგი კაპანაძე.

ამ წუთებში შს მინისტრი ჟურნალისტებს ხვდება. გიორგი გახარია შეხვედრაზე 20 ივნისის ღამეს, რუსთაველის გამზირზე განვითარებულ მოვლენებზე საუბრობს. მინისტრის განცხადების შემდეგ შეხვედრა, კითხვა პასუხის რეჟიმში გაგრძელდება.

მამუკა ბახტაძემ განაცხადა, რომ 20 ივნისის მოვლენებზე პასუხისმგებლობა მიხეილ სააკაშვილს და ნაციონალურ მოძრაობას ეკისრება.

“ ნაციონალური მოძრაობა ცდილობდა ფეხი დაგვცდომოდა, სამწუხაროდ ჩვენ ფეხი დაგვიცდა, მართლაც, ჩვენ რაც ვიხილეთ 20 ივნისს, მართლაც ყველა ქართველისთვის, იყო უმძიმესი სანახავი, ძალიან მძიმე. ამან გამოიწვია გულწრფელი პროტესტი ჩვენს მოქალაქეებში და თითოეული ჩვენგანი არის ამ პროტესტის სოლიდარული“, – განაცხადაპრემიერ-მინისტრმა მამუკა  ბახტაძემ.

პრემიერი გახარია  გადადგომის საკითხს არ განიხილავს- ამის შესახებ მან ჟურნალისტის შეკითხვის საპასუხოდ განაცხადა.

ბახტაძის განცხადებით, გიორგი გახარიამ ქვეყანას ძალიან მძიმე სცენარი აარიდა. პრემიერი ამბობს, რომ მომხდარზე ის ძალაა პასუხისმგებელი, ვინც მისი შეფასებით დესტრუქცია მოაწყო.

„რაც შეეხება მოთხოვნა, რომ გადადგეს შს მინისტრი, პოლიტიკური პასუხისმგებლობა ამ პროვოკაციაზე უნდა აიღოს იმ დესტრუქციულმა ძალამ, რომელმაც გამოიყენა ჩვენი მოქალაქეების გულწრფელი პროტესტი თავსი იარაღად. ამავე დროს ჩვენ ვუზრუნველყოფთ ტრანსფარენტულ და გამჭირვალე გამოძიებას როდესაც საუბარია ძალის გადამეტების ცალკეულ შემთხვევებზე და ამაზეც არავითარი კითხვის ნიშანი არ უნდა არსებობდეს ქართულ საზოგადოებაში. და ჩვენ ქართულ საზოგადოებასთან ერთად დავინახავთ და გვექნება ანალიზი რასთან გვაქვს საქმე. თუ ცალკეული შემთხვევების ერთობლიობა, ის ანალიზი რომელიც დაიდება გამოძიების მიერ იქნება შესაბამისი პირველ რიგში ქართული საზოგადოება იქნება ის ვინც ამ ყველაფერს განსაზღვრავს და შეაფასებს. ჩვენ ჩვენს გუნდში არავის არ გვყავს არავინ რომელიც თავის სკამს გამოეკიდება. ფაქტი არის ერთი, რომ მოხდა ძალიან მძიმე სცენარის ჩვენი საზოგადოებისთვის არიდება და ამის პარალელურად დაშავდნენ ჩვენი მოქალაქეები. ამას სჭირდება შესაბამისი შეფასებები როგორც პოლიტიკური თვალსაზრისით ასევე სამართლებრივი და ჩვენ ამას აუცილებლად უზრუნველყოფს,“-განაცხადა მამუკა ბახტაძემ. 

პასუხისმგებლობა მსჯავრდებულ  სააკაშვილს ეკისრება-ეს განცხადება  პრემიერ მინისტრმა  მამუკა ბახტაძემ ბრიფინგზე გააკეთა.მისი თქმით, 20 ივნისის მოვლენებზე პასუხისმგებლობა დესტრუქციულმა ოპოზიციურმა ძალამ უნდა აიღოს. 

“ჩვენ ვიხილეთ გულწრფელი პროტესტი თითოეული ადამიანის თითოეული ახალგაზრდის მაგრამ ამავე დროს ჩვენ ვიხილეთ რომ დესტრუქციული ძალა ჩაერთო და ეს ძალა ცდილობდა   თავისი პროვოკაციული მიზნებისთვის გამოეყენებინა ეს გულწრფელი პროტესტი, რამდენიმე საათის განმავლობაში მიმდინარეობდა ძალადობა ჩვენს პოლიციელებზე.. საქართველოს მშვიდობას დაემუქრა საფრთხე,საქართველოს კონსტიტუციაზე იყო შეტევა, ეს ყველაფერი დასრულდებოდა ქაოსით ჩვენი ქვეყნისთვის, საპოლიციო ძალების ვალდებულებაა დაიცვას ჩვენი მოსახლეობის  მშვიდობა. რამდენიმე საათის განმავლობაში მიმდინარეობდა ფიზიკური თავდასხმა და სიტყვიერი შეურაცხყოფა პოლიციელებზე. დადგა ის კრიტიკული დრო, როცა პასიური კორდონი ფიზიკურად ვეღარ აკავებდა ამ აგრესიას, შესაბამისად, პოლიციას დარჩა ერთადერთი ლეგიტიმური გზა გამოეყენებინა ლეგიტიმური ძალა. ჩვენ ძალიან მძიმე სურათი ვიხილეთ და ეს იყო უმძიმესი წუთები. დაზარალდნენ მოქალაქეები, პოლიციელები. ის, რაც მოხდა ეს არ იყო შინაგან საქმეთა სამინისტროს ან მისი ხელმძღვანელის არჩევანი. ეს არის მათი მოვალეობა, რომ დაიცვან კონსტიტუცია, წესრიგი ქვეყანაში. შედეგი მძიმეა იმ თვალსაზრისით, რომ ჩვენი მოქალაქეები დაზარალდნენ და  ადამიანის ჯანმრთელობაზე მაღლა არაფერი დგას, პასუხისმგებლობა ამ შედეგებზე ეკისრება მსჯავრდებულ სააკაშვილს და მის აგრესიულ გუნდს, რომელმაც შეეცადენ და გამოიყენეს ჩვენი მოქალაქეების გულწრფელი პროტესტი და იერიში მიიტანეს ჩვენ კონსტიტუციაზე, ეს არის მიუღებელი“,- განაცხადა ბახტაძემ.

შეგახსენებთ, დღეს პრემიერ-მინისტრი მამუკა ბახტაძე მთავრობის საქმიანობის ყოველწლიური ანგარიშით პარლამენტში  პლენარულ სხდომაზე უნდა მისულიყო, თუმცა მან გადაიფიქრა.

სავარაუდოდ, ეს გადაწყვეტილება ქვეყანაში მიმდინარე პროცესებს უკავშირდება.

პარლამენტის რეგლამენტის მიხედვით, პარლამენტში პრემიერის ყოველწლიურის მოხსენებით გამოსვლა სავალდებულოა და საგაზაფხულო სესიის ბოლო თვეს უნდა მოხდეს.

პარალმენტის საგაზაფხულო სესია ხვალ იხურება. ბიუროს გადაწყვეტილებით, პრემიერ-მინისტრის ყოველწლიური ანგარიშის მოსმენა 27 ივნისის სესიაზე იყო დანიშნული.