Blog

ქართველი მეცო-სოპრანო, ანიტა რაჭველიშვილი დღეს, თბილისში დაგეგმილ საპროტესტო მსვლელობას შეუერთდება. მხარდამჭერი ვიდეომიმართვა მან საკუთარ ფეისბუქის გვერდზე გაავრცელა. ის ამბობს, რომ პროტესტის გამოხატვას სიმღერით გეგმავს:

“დღეიდან მე თქვენ გვერდით ვარ, სულიერად აქამდეც სულ თქვენთან ერთად ვიყავი იმიტომ, რომ ძალიან მიჭირდა შორს ყოფნა საქართველოსთვის ასეთ მძიმე ჟამს… რუსეთი ოკუპანტია, რუსეთის კომუნისტი დიპლომატის ადგილი საქართველოს პარლამენტში არ არის, გახარია არის ჯალათი, რომელმაც დაასახიჩრა ახალგაზრდები და ერთი ადამიანის სიცოცხლე ჩააგდო საფრთხეში. მე კატეგორიულად ვეწინააღმდეგები პროპაგანდისტულ მოსაზრებას რომ აქციაზე დგანან ნაციონალური მოძრაობის დემაგოგები. მე ვიტყვი, რომ აბსოლუტურად არაფერ შუაში არ არიან… უნდა ვიდგეთ იქ, უნდა შევეწინააღმდეგოთ და გავაპროტესტოთ ის, რაც მოხდა, როდესაც გავრილოვი ჩამოვიდა და რაც შემდგომ მოყვა გავრილოვის ჩამოსვლას. ჩვენმა მთავრობამ უსინდისოდ დაიცვა რუსი დეპუტატი, ძალადობით, საშინელი ფაქტები მოხდა, ამის დავიწყებას ვერ შევძლებ. მე ვიქნები დღეს საღამოს. შევეცდები, რომ ჩემი პროტესტი გამოვხატო სიმღერით და საქართველოს მხარდაჭერით. ეს არის სამართლიანი აქცია, რომელიც ტარდება იმ ახალგაზრდების ორგანიზებით, რომელიც ჩვენი მომავალია. ვინც იქნებიან უკეთესი მომავლის იმედი”.- განაცხადა ანიტა რაჭველიშვილმა 

Universal Music Publishing Group-ი  საქართველოს “საავტორო უფლებათა ასოციაციაში” გაწევრიანდა. ოფიციალურ ხელშეკრულებას დღეს მოეწერა ხელი, ხოლო პირ­და­პი­რი წარ­მო­მად­გე­ნე­ლი ქარ­თუ­ლი კომ­პა­ნია GMI Rights Managment-ი (GMI)  იქნება.

“ეს არის პირველი და ძალიან მნიშვნელოვანი პრეცედენტი საქართველოში, როდესაც ერთ-ერთმა უმსხვილესმა მუსიკალურმა გამომცემლობამ რუსეთის გვერდის ავლით, პირდაპირი წარმომადგენლობა გახსნა საქართველოში”, – განაცხადა “საქართველოს საავტორო უფლებათა ასოციაციის” თავმჯდომარის გოგა კობალაძემ.

“საქართველო ამ სფეროში რუსეთის გავლენისგან თანდათან თავისუფლება. ეს ორი ფაქტორის გამოა მნიშვნელოვანი: პოლიტიკური ფაქტორის, რადგან რუსეთის ზეგავლენის ქვეშ არ ვიქნებით და მეორე – ეკონომიკური თვალსზრისით ეს ძალიან მნიშვნელოვანია, რადგან მოსარგებლეები აქამდე რუსულ კომპანიებს, როგორც შუამავლებს უხდიდნენ ჰონორარს და ახლა კი პირდაპირ სათავო ოფისს გადაუხდიან, რაც ბუნებრივია ფასზეც იმოქმედებს”, – განაცხადა გოგა კობალაძემ. 

“საქართველოს საავტორო უფლებათა ასოციაციის” ინფორმაციით, დღემდე, საქართველო დიდი მუსიკალური გამომცემლობების და Record Label -ების (Warner, Sony და სხვა) მიერ იფარებოდა და იფარება არა პირდაპირ, არამედ რუსეთის რეგიონული ოფისების მეშვეობით, რაც დიდ უხერხულობას ქმნის მოსარგელეთა მიერ ჰონორარის გადახდის კუთხით, რადგან მათ გადახდა რუსული კომპანიების სასარგებლოდ უწევთ და ფასებიც უფრო მაღალია. 

Universal-იმართავს ისეთი მუსიკოსების საავტორო უფლებებს, როგორებიც არიან: Coldplay, U2, ABBA, Adele, Bee Gees, Eminem,  Jimi Hendrix, Elton John, Linkin Park, Maroon 5, Britney Spears, Justin Timberlake და  ა.შ.

სოციალურ ქსელში გავრცელდა ვიდეო სადაც საქართველოს ყოფილი პრეზიდენტი გიორგი მარგველაშვილი თავისუფალ დროს საქართველოს საზოგადოებრივი საქმეთა ინსტიტუტის სტუდენტებსა და ლექტორებთან ერთად ორბეთში ატარებს.  გიორგი მარგველაშვილი GIPA-ს რექტორია, რომელიც წამყვანი უმაღლესი განათლების ცენტრია სახელმწიფო მართვის, სამართლის, საერთაშორისო ურთიერთობებისა და ჟურნალისტიკის მიმართულებით.

მწერლები კულტურისა და განათლების სამინისტროს წინააღმდეგ – მწერალთა სახლში შეკრებილმა ავტორებმა კიდევ ერთხელ გააპროტესტეს სამინისტროში მიღებული გადაწყვეტილება, რომლის თანახმადაც, მწერალთა სახლი და წიგნის ცენტრი გაუქმდა.

„ჩემთვის ეს არის მიმართული აშკარად ძალიან წარმატებული ორგანიზაციის დამოუკიდებელი, თავისუფალი ორგანიზაციის დასუსტებისკენ. ამას პოლიტიკური სარჩული აქვს, თუ სხვა სარჩული აქვს, არ ვიცი. ზუსტად ამ კითხვებს ვსამ მეც თქვენთან ერთად და ძალიან მინდა, რომ რამენაირად ეს ყველაფერი გაირკვეს“, – განაცხადა მწერალთა სახლის ყოფილმა დირექტორმა, ნატა ლომოურმა.

მწერლები განათლების სამინისტროს გადაწყვეტილებას მათ პროტესტს უკავშირებენ, როდესაც მათ ფრანქფურტის წიგნის ბაზრობაზე ზვიად რატიანზე პოლიციელების მხრიდან ძალადობა გააპროტესტეს.

„წიგნის ცენტრიც და მწერალთა სახლიც არაკონტროლირებადი აღმოჩნდა, მათ ვერ აპატიეს მწერლებს პროტესტი იმისათვის, რომ ზვიად რატიანი დაასახიჩრა პოლიციამ. ამაზე პასუხი არავის არ უთხოვია და ჩვენ გამოვხატეთ პროტესტი ფრანკფურტში მთელი მსოფლიოს გასაგონად და ჭეშმარიტი სახის საჩვენებლად. ეს ერ აპატიეს, ვერ აპატიეს, რომ ვერ გაიტანეს თავისი, რომ სალომე ზურაბიშვილი და მანანა ბერიკაშვილი არ გამხდარიყვნენ გამგებლები ფრანქფურტის წიგნის ბაზრობაზე საქართველოს წარდგინების,“ – განაცხადა ფილოსოფოსმა, გიორგი მაისურაძემ.

საქართველოს იუსტიციის უმაღლესი საბჭოს არამოსამართლე წევრის, ანა დოლიძის შეფასებით, განათლების სამინისტრომ არადემოკრატიული გადაწყვეტილება მიიღო.

„მგონი განათლების სამინისტროს დაავიწყდა, რომ მწერალთა სახლი არის მწერლების. დემოკრატიულ საზოგადოებაში ამ ხალხთან კონსულტაციის გარეშე არავითარი სერიოზული გადაწყვეტილების მიღება არ შეიძლებოდა. თვითონ ფორმა, როგორ მიაუქმეს ეს ორი დაწესებულება, მეტყველებს იმაზე, რამდენად არადემოკრატიულად არის გადაწყვეტილებები მიღებული განათლების სამინისტროში“, – განაცხადა ანა დოლიძემ.

ვლადიმერ პუტინმა ოსაკაში დონალდ ტრამპთან გამართულ შეხვედრას საქმიანი და პრაგმატული უწოდა. შეფასება რუსეთის პრეზიდენტმა დიდი ოცეულის შემაჯამებელ პრესკონფერენციაზე გააკეთა. რუსეთის პრეზიდენტმა საკმაოდ დიდი დრო დაუთმო ელტონ ჯონის კრიტიკას. მუსიკოსმა ლგბტ თემის მიმართ დამოკიდებულების გამო ვლადიმერ პუტინი ფარისევლობაში დაადანაშაულა, რაზეც რუსეთის პრეზიდენტმა უპასუხა, რომ ელტონ ჯონი გენიალური მუსიკოსია, თუმცა შეხედულებებთან დაკავშირებით ცდება.

პუტინმა რუსეთში ჰომოსექსუალიზმის პროპაგანდის წინააღმდეგ მოქმედი კანონიც გაიხსენა და დასავლელ ლიბერალებს მოუწოდა, ბავშვებს თავი დაანებონ.

ფოტო: ნიკოლოზ ურუშაძე 

20-21 ივნისის სისხლიან ღამეს დაშავებული ერთი პირის ჯანმრთელობის მდგომარეობა მძიმეა. ის მართვით სუნთქვის აპარატზეა შეერთებული. ის მკურნალობას ალადაშვილის კლინიკიდან გადაყვანის შემდეგ რეგიონალურ ჰოსპიტალში განაგრძობს.

მის გარდა, რეგიონალურ ჰოსპიტალში ნეიროქირურგიული ოპერაცია კიდევ ერთ პაციენტს ჩაუტარდა, რომლის მდგომარეობაც გაუმჯობესებულია.

საგანგებო სიტუაციების კოორდინაციისა და გადაუდებელი დახმარების ცენტრის ხელმძღვანელი, ავთანდილ თალაკვაძე აცხადებს, რომ ამ დროისთვის 20-21 ივნისის ღამეს დაშავებული 6 პაციენტი მკურნალობას ორ კლინიკაში განაგრძობს. მათი უმრავლესობის ჯანმრთელობის მდგომარეობა დამაკმაყოფილებელია.

სამი პაციენტი მკურნალობას “ნიუ ჰოსპიტალში” გადის, დანარჩენი კი – რეგიონალურ ჰოსპიტალში.

ავთანდილ თალაკვაძემ ასევე განაცხადა, რომ ხდება პაციენტების სამკურნალოდ საზღვარგარეთ გაშვება. მისი თქმით, ორი სამართალდამცველი მკურნალობას თურქეთში გადის, რომელთაგან ერთ-ერთს ორშაბათს ნეიროქირურგიული ოპერაცია ჩაუტარდება.

თალაკვაძის განცხადებითვე, კიდევ იგეგმება ორი პაციენტის გაშვება საზღვარგარეთ – გერმანიასა და ისრაელში.