Blog

„საერთაშორისო გამჭვირვალობა – საქართველო“ ქართულო ოცნების ინიცირებულ რეპრესიულ კანონებს გამოეხმაურა.  ორგანიზაციის ინფორმაციით, ბოლო 10 დღეში დამოუკიდებელი მედიის 11 წარმომადგენელი ადმინისტრაციული წესით დააკავეს. ბოლო ერთი წლის განმავლობაში კი 25-მდე ასეთი შემთხვევა დაფიქსირდა.

„საერთაშორისო გამჭვირვალობა-საქართველო“ მკაცრად გმობს დამოუკიდებელი მედიის წარმომადგენლების მასობრივ დევნასა და დაკავებებს და აღნიშნულს მედიის მიმართ „ქართული ოცნების“ რეპრესიული პოლიტიკის გაგრძელებად, ასევე თავისუფალი სიტყვის ჩახშობისკენ გადადგმულ კიდევ ერთ ნაბიჯად მიიჩნევს.”

ორგანიზაცია მკაცრად გმობს დამოუკიდებელი, კრიტიკული მედიის დევნას და რეპრესიულ კანონებს.

აღნიშნულ განცხადებაში ასევე ნახსენებია ბოლო 10 დღეში დაკავებული ჟურნალისტები:

• ტელეკომპანია „ფორმულას“ წამყვანი და ჟურნალისტი ვახო სანაია. მოსამართლემ მას 6-დღიანი ადმინისტრაციული პატიმრობა შეუფარდა. მან საპატიმრო უკვე დატოვა.
• ტელეკომპანია „ფორმულას“ წამყვანი და ჟურნალისტი, ქეთა ციცქიშვილი. 5-დღიანიადმინისტრაციული პატიმრობის შემდეგ, მან საპატიმრო უკვე დატოვა.
• ტელეკომპანია „ფორმულას“ სოციალური მედიის მენეჯერი, ცირა ჟვანია. მას 10-დღიანი ადმინისტრაციული პატიმრობა აქვს შეფარდებული.
• ჟურნალისტი ირაკლი წულაია. მოსამართლემ მას 8-დღიანი ადმინისტრაციული პატიმრობა მიუსაჯა.
• „საზოგადოებრივი მაუწყებლის“ სამეურვეო საბჭოს წევრი და ჟურნალისტი – ლიკა ბასილაია-შავგულიძე. მას 5-დღიანი ადმინისტრაციული პატიმრობა აქვს შეფარდებული.
• აზერბაიჯანელი გამომძიებელი ჟურნალისტი, აფგან სადიგოვი. მას 14-დღიანი ადმინისტრაციული პატიმრობა შეუფარდეს.
• „საზოგადოებრივი მაუწყებლიდან“ გათავისუფლებული ჟურნალისტი და წამყვანი, ვასილ ივანოვ-ჩიქოვანი. მას 7-დღიანი ადმინისტრაციული პატიმრობა აქვს შეფარდებული.
• ჟურნალისტი მაიკო ბოკერია. იგი 5 000-ლარიანი ჯარიმის საფუძველზე გაათავისუფლეს. მაიკო ბოკერია მეუღლესთან, ვასილ ივანოვ-ჩიქოვანთან ერთად დააკავეს.
• ტელეკომპანია „ფორმულას“ დამფუძნებელი და რეჟისორი, გიორგი ლიფონავა. მას 3-დღიანი ადმინისტრაციული პატიმრობა შეუფარდეს. მან იზოლატორი უკვე დატოვა.
• მწერალი, რედაქტორი და ტელეკომპანია „ფორმულას“ წამყვანი, ზვიად კვარაცხელია. მას 3-დღიანი ადმინისტრაციული პატიმრობა შეუფერდეს. კვარაცხელიამ იზოლატორი უკვე დატოვა.
• ტელეკომპანია „ფორმულას“ გადაცემა „დროების“ ოპერატორი, ნიკა პატარაია. მას 4-დღიანი ადმინისტრაციული პატიმრობა შეუფარდეს.

ასევე, 24 ოქტომბერს, შინაგან საქეთა სამინისტროს წარმომადგენლებმა, დაახლოებით 1 საათის განმავლობაში თავისუფლება უკანონოდ აღუკვეთეს ონლაინგამოცება „პუბლიკას“ ჟურნალისტს, ბასტი მგალობლიშვილს. გათავისუფლებისას, მას უთხრეს, რომ იგი სხვა პირში აერიათ.

”გ. ჩიკვაიძე შერჩევითად იღებს გარკვეული სახეობის პროდუქტებს და სისტემატურად აგრძელებს პროვოკაციულ ქმედებებს” – ამის შესახებ პენიტენციური სამსახურის მიერ გავრცელებულ განცხადებაშია ნათქვამი.

”სპეციალური პენიტენციური სამსახური ეხმიანება მსჯავრდებულ გ. ჩიკვაიძის დედის, ეკატერინე წერეთლის მიერ გავრცელებულ მორიგ პროვოკაციულ განცხადებას, თითქოს მსჯავრდებულმა გ. ჩიკვაიძემ და მისმა თანამესაკნეებმა შიმშილობა დაიწყეს საკვების არმიწოდების გამო.

საზოგადოების სწორი ინფორმირების მიზნით განვმარტავთ, რომ მსჯავრდებულ გ. ჩიკვაიძეს და მის თანამესაკნეებს, 2025 წლის 25 და 26 ოქტომბერს, საუზმის სახით შესთავაზეს „ბრალდებულთა და მსჯავრდებულთა კვებისა და სანიტარიულ-ჰიგიენური ნორმების განსაზღვრის შესახებ“ საქართველოს იუსტიციის მინისტრისა და საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის ერთობლივი ბრძანების შესაბამისად დადგენილი ულუფა, რაზეც უარი განაცხადეს და საკანში დაიტოვეს მხოლოდ პური, შემდგომ სადილისა და ვახშმის მიღებაზეც განაცხადეს უარი იმ მიზეზით, რომ არ სურდათ. ასევე 2025 წლის 26 ოქტომბერს, 13:22 საათზე მსჯავრდებულებს შეეთავაზათ სადილი, რა დროსაც მსჯავრდებულმა გ. ჩიკვაიძემ სიტყვიერი შეურაცხყოფა მიაყენა პენიტენციურ დაწესებულებაში სამეურნეო სამუშაოებში ჩარიცხულ საკვების დარიგებაზე უფლებამოსილ მსჯავრდებულს, რომელიც გადაადგილდებოდა დაწესებულების მორიგე თანამშრომელთან ერთად. მსჯავრდებული გ. ჩიკვაიძე, ასევე, არ დაემორჩილა მორიგე თანამშრომლის კანონიერ მოთხოვნას აღნიშნული მართლსაწინააღმდეგო ქმედების შეწყვეტის შესახებ და იგი კვლავ აგრძელებდა სიტყვიერი შეურაცხყოფის მიყენებას სამეურნეო სამუშაოებში ჩარიცხული მსჯავრდებულის მიმართ.

აღსანიშნავია, რომ სპეციალური პენიტენციური სამსახური მუდმივ რეჟიმში უზრუნველყოფს მსჯავრდებულთა სრულფასოვან კვებას, თუმცა მსჯავრდებული გ. ჩიკვაიძე შერჩევითად იღებს გარკვეული სახეობის პროდუქტებს და სისტემატურად აგრძელებს პროვოკაციულ ქმედებებს, რომელთა მიზანია პენიტენციური სამსახურის დისკრედიტაცია – თითქოს სამსახური ვერ უზრუნველყოფს მსჯავრდებულს შესაბამისი კვებით, რაც ცალსახად არ შეესაბამება სიმართლეს და წარმოადგენს ცილისწამებას.

ასევე, განვმარტავთ, რომ პენიტენციური სამსახური, საქართველოს კანონმდებლობის შესაბამისად, რეაგირებს ნებისმიერ ფაქტზე, რომელიც დაკავშირებულია მსჯავრდებულის მიერ განხორციელებულ კანონსაწინააღმდეგო ქმედებასთან.

სპეციალური პენიტენციური სამსახური მოუწოდებს ყველას, მათ შორის მსჯავრდებულებსა და მათთან დაახლოებულ პირებს, თავი შეიკავონ დაუზუსტებელი და ცრუ ინფორმაციის გავრცელებისგან, რომელიც სამსახურის დისკრედიტაციასა და საზოგადოების შეცდომაში შეყვანას ისახავს მიზნად”. – ნათქვამია პენიტენციურის მიერ გავრცელებულ განცხადებაში.

”მილევად რეჟიმში მყოფ აქციას ვუყურებ […] ადამიანები, რომლებიც გამკაცრებული კანონის მიუხედავად რუსთაველზე მაინც გამოდიან, ისინი არიან, ვინც წლების განმავლობაში ამ დესტრუქციული მოქმედებებისა და ექსტრემიზმისთვის დაფინანსებას იღებდნენ. ამიტომ, როგორც ჩანს, მათ ახლაც რაღაც გარკვეული დაფინანსება აქვთ დაგროვებული და მისაღები, შესაბამისად, ამ ვითომ მათ თავგანწირვას შეიძლება ვუწოდოთ დაფინანსებისა და ხელფასისთვის გაღებული თავგანწირვა”.

განაცხადა ამის შესახებ, ივანიშვილის დეპუტატმა, ნინო წილოსანმა რუსთაველის გამზირზე მიმდინარე უწყვეტ აქციებზე საუბრისას.

1 წელი მაგთის 5G ქსელთან ერთად – ახალი შესაძლებლობები, ციფრული გამოცდილება და საერთაშორისო აღიარება

საერთაშორისო სტანდარტების შესაბამისად აგებული მაგთის 5G ქსელი, მობილური
ინტერნეტის სრულიად ახალ შესაძლებლობებს ქმნის.

დღევანდელი ციფრული სამყაროს ეპოქაში ვერც ერთი პირადი თუ პროფესიული
წამოწყება ინტერნეტკავშირის გარეშე ვერ განხორციელდება. ინტერნეტი დიდი ხანია
აღარ არის მხოლოდ კომუნიკაციის საშუალება – ის ინოვაციის, განათლებისა და
ყოველდღიური ცხოვრების განუყოფელი ნაწილია.

სწორედ ამიტომ, თანამედროვე ადამიანისთვის უმნიშვნელოვანესი გახდა მონაცემთა
მყისიერი მიმოცვლა, ონლაინ სერვისებზე წვდომა და გლობალურ სამყაროსთან მჭიდრო
კავშირი, რის უზრუნველსაყოფადაც აუცილებელია სწრაფი, სტაბილური და საიმედო
ინტერნეტი. კავშირის ხარისხი და სერვისის საიმედოობა კი მუდმივად საჭიროებს
ტექნოლოგიურ ინოვაციებს, რაც მაგთიკომის უცვლელ პრიორიტეტად რჩება.
25 ოქტომბერს ერთი წელი შესრულდა მას შემდეგ, რაც მაგთიმ საქართველოში 5G ქსელი
აამოქმედა. მაგთიკომი განაგრძობს ქსელის გაფართოებას და ტრადიციულად, ყველაზე
ვრცელი დაფარვით გამოირჩევა. მაგთის უახლესი თაობის 5G ქსელი ხელმისაწვდომია
თითქმის მთელს საქართველოში.

ტექნოლოგიურმა წინსვლამ არა მხოლოდ ადგილობრივ ბაზარზე შექმნა ახალი
შესაძლებლობები, არამედ საქართველოს საერთაშორისო აღიარებაც მოუტანა – 2025 წლის
პირველი ორი კვარტლის მონაცემებით, მაგთის მობილური ქსელი ინტერნეტის სიჩქარით
მსოფლიოში მე-6 ადგილზე დასახელდა.

https://www.speedtest.net/awards/reports/2025/2025_World_Mobile_Q1Q2.pdf
მაგთის 5G ქსელის აბონენტებს საშუალება აქვთ სრულფასოვნად გამოცადონ ამ
ტექნოლოგიის უპირატესობები, მათ შორის:

გაზრდილი სიჩქარე – უზრუნველყოფს მაქსიმალურ სიჩქარეს, დაბალ დაყოვნებას და
ქსელურ სტაბილურობას. მაგთის 5G ქსელის პიკური სიჩქარე (2000 მბ/წმ-მდე)
იდეალურია დიდი ფაილების ატვირთვა-ჩამოტვირთვისთვის, ვიდეო სტრიმინგისა და
ინტენსიური ონლაინ აქტივობებისთვის.

უზარმაზარი ტევადობა – 5G ტექნოლოგიას აქვს შესაძლებლობა, ერთდროულად
მოემსახუროს 1 მილიონამდე მოწყობილობას 1 კმ²-ზე – ეს 100-ჯერ მეტია, ვიდრე 4G-ს
შეეძლო. შედეგად, ხალხმრავალ ადგილებშიც კი – კონცერტზე, ფესტივალსა თუ ქალაქის
ცენტრალურ მოედნებზე, მაგთის მომხმარებლებს შესაძლებლობა აქვთ მუდამ იყვნენ
ონლაინ.

ყველაზე ფართო დაფარვის არეალი – მაგთიკომი მუდმივად ლიდერობს
სატელეკომუნიკაციო ბაზარზე მობილური ქსელის დაფარვის მხრივ. ეს ტენდენცია 5G
ტექნოლოგიის შემთხვევაშიც გაგრძელდა და დღეს, მაგთის 5G ქსელი ხელმისაწვდომია
თითქმის მთელს საქართველოში.

ქსელის განვითარება დინამიკური პროცესია. ახალი ურბანული ზონებისა და
ინფრასტრუქტურის განვითარებას კვალდაკვალ მიჰყვება მაგთის 5G ქსელის
გაფართოების უწყვეტი პროცესი.

3 მილიონზე მეტი აბონენტისთვის მაგთიკომი ხარისხთან და საიმედოობასთან
ასოცირდება.

”ქართული ოცნების” პროკრატურამ ტექნიკური უნივერსიტეტის განცხადების საფუძველზე სამსახურებრივი მდგომარეობის გამოყენებით, საქართველოს ტექნიკური უნივერსიტეტის კუთვნილი, დიდი ოდენობით ქონების მართლსაწინააღმდეგო მითვისების და გაფლანგვის ფაქტზე საქართველოს უნივერსიტეტის წინააღმდეგ გამოძიება დაიწყო.

“პროკურატურას ტექნიკური უნივერსიტეტის რექტორმა, მიმდინარე წლის 17 ოქტომბერს განცხადებით მიმართა, სადაც საქართველოს ტექნიკური უნივერსიტეტის სარგებლობასა და მფლობელობაში არსებული, თბილისში კოსტავას ქუჩა N77-ში მდებარე უძრავი ქონების (მიწის ნაკვეთების, მასზე დამაგრებული შენობა-ნაგებობებისა და სპორტული მოედნების) შპს “საქართველოს უნივერსიტეტზე” უკანონო პრივატიზების ფაქტებზე მიუთითებდა.საქართველოს გენერალური პროკურატურის კორუფციული დანაშაულის წინააღმდეგ ბრძოლის დეპარტამენტში გამოძიება საქართველოს სისხლის სამართლის კოდექსის 182-ე მუხლის მე-2 ნაწილის “დ” ქვეპუნქტით და მე-3 ნაწილის “ბ” ქვეპუნქტით 24 ოქტომბერს დაიწყო”. – ნათქვამია განცხადებაში.

საფრანგეთის ხელისუფლებამ დააკავა ორი ეჭვმიტანილი, რომლებიც გასულ კვირას ლუვრის გამბედავ ძარცვაში მონაწილეობდნენ. თავდაპირველად ინფორმაცია ადგილობრივ მედიაში გავრცელდა, შემდეგ კი პარიზის პროკურატურამაც დაადასტურა, თუმცა დაკავებულთა რაოდენობა ოფიციალურად არ დაუსახელებიათ.

გავრცელებული ცნობით, ერთ-ერთი ეჭვმიტანილი შაბათ საღამოს, დაახლოებით 22:00 საათზე, პარიზის შარლ დე გოლის აეროპორტში დააკავეს — ის თვითმფრინავში ჩაჯდომას და ქვეყნის დატოვებას აპირებდა. მეორე ეჭვმიტანილი მალევე დააკავეს პარიზის გარეუბანში.

გაზეთ Le Parisien-ის ინფორმაციით, ორივე მამაკაცი პარიზის მახლობლად მდებარე დეპარტამენტიდან — სენ-სენ-დენიდან არიან და ადრე უკვე მოხვედრილან პოლიციის ყურადღების ცენტრში.

მათი პირადობის შესახებ დამატებითი ინფორმაცია ამ დროისთვის არ გავრცელებულა. სააგენტო AFP–ის წყაროზე დაყრდნობით, ერთ-ერთ დაკავებულს აეროპორტში ალჟირისკენ გამგზავრება ჰქონდა დაგეგმილი.

ლუვრის ძარცვა გასულ კვირას, დღისით მოხდა — მსოფლიოში ყველაზე მონახულებადი მუზეუმიდან 88 მილიონი ევროს (100 მილიონ დოლარზე მეტი) ღირებულების ისტორიული ფასეულობები მოიპარეს. საფრანგეთის იუსტიციის მინისტრმა აღიარა, რომ უსაფრთხოების პროტოკოლებმა „ვერ იმუშავა“, რამაც ქვეყანას სერიოზული ზიანი მიაყენა. პარიზის პროკურორმა ლორა ბეკუამ ინფორმაცია დაადასტურა, თუმცა თქვა, რომ გამოძიების შესახებ დეტალების დროზე ადრე  გახმაურებამ შესაძლოა გამოძიებას ავნოს.

„ლუვრის ძარცვიდან ერთ კვირაში ვადასტურებ, რომ შაბათს, 2025 წლის 25 ოქტომბრის საღამოს, განხორციელდა დაკავებები. ერთ-ერთი დაკავებული ემზადებოდა ქვეყნის დასატოვებლად“, — ნათქვამია ბეკუას განცხადებაში მედიის კითხვის პასუხად. განცხადებაში დაკავებულთა ზუსტი რაოდენობა კვლავ არ არის მითითებული.

„ძალიან ვნანობ, რომ ეს ინფორმაცია გამოძიების ინტერესების გათვალისწინების გარეშე გახდა საჯარო. ასეთი გაჟონვები მხოლოდ ავნებს იმ ასეულობით გამომძიებლის ძალისხმევას, რომლებიც მოპარულ სამკაულებსა და დანაშაულის ყველა მონაწილეს ეძებენ. დამატებითი დეტალების გახმაურება ჯერ ძალიან ადრეა. დამატებით ინფორმაციას მოგაწვდით ეჭვმიტანილების დაკითხვის დასრულების შემდეგ (რომელიც შეიძლება 96 საათამდე გაგრძელდეს)“, — დასძინა პროკურორმა.

ლუვრის ძარცვისას ოთხმა ნიღბიანმა დამნაშავემ კარიერის კიბე გამოიყენა, გაემართნენ მუზეუმის ფანჯრისკენ, მოჭრეს მინაც და  ჩარჩოც, შემდეგ კი შენობაში შეაღწიეს.

მათ გახსნეს მეტალის სეიფები ძვირფასეულობით,  შემდეგ კი სკუტერებით მიიმალნენ. მთელი ოპერაცია რვა წუთზე ნაკლებ დროში მოხდა.

ძარცვაში მონაწილეობდა ოთხი ნიღბიანი პირი, საიდანაც ორმა შიგნით შეაღწია. გამომძიებლები დარწმუნებულნი არიან, რომ ეს პროფესიონალი კრიმინალები იყვნენ, რადგან ზუსტად იცოდნენ, რა ნივთების მოსაპარად მიდიოდნენ და მოქმედებდნენ კარგად დაგეგმილი გეგმით.

ოთხშაბათს პროკურორმა ბეკუამ RTL–თან განაცხადა, რომ მოპარული სამკაულების ღირებულება 88 მილიონ ევროს შეადგენს (დაახლოებით 102 მილიონ დოლარს).

„ეს ფინანსური დანაკლისია, მაგრამ ბევრად უფრო მძიმეა ის ზიანი, რომელსაც ასეთი ქურდობა ისტორიულ მემკვიდრეობას აყენებს“, — აღნიშნა ბეკუამ.

მოპარულ ნივთებს შორის იყო ბრილიანტებით დამშვენებული სამკაულები, რომლებიც ორმა ნაპოლეონმა თავის ცოლებს აჩუქეს.

ექსპერტების აზრით, დიდი ალბათობით, მძარცველებმა სამკაულები უკვე ნაწილებად დაშალეს — ამოიღეს ბრილიანტები და გადაადნეს ძვირფასი ლითონები, რათა ბევრად უფრო დაბალ ფასად გაეყიდათ, როგორც უბრალო მასალა და  არა როგორც უნიკალური ისტორიული არტეფაქტები. ცნობილია, რომ გატაცებულია რვა ნივთი — დიადემები, ყელსაბამები, საყურეები და ბროსები — ყველა მათგანი XIX საუკუნეს მიეკუთვნება და ოდესღაც საფრანგეთის სამეფო და იმპერატორების ოჯახის საკუთრება იყო.

კიდევ ორი ნივთი — მათ შორის იმპერატრიცა ეუჟენის გვირგვინი — გატაცების ადგილთან ახლოს იპოვეს. როგორც ჩანს, მძარცველებს გაქცევის დროს დაუვარდათ.

მალევე საჯაროდ გახდა ცნობილი, რომ ძარცვის შემდეგ ლუვრში თავისუფლად გამოფენილი ნაწილის სამკაულები გადატანილ იქნა საფრანგეთის ბანკის მიწისქვეშა საცავებში.